Mataayo 10
10
UYeesu ikivafilikha avanandeje vaakwe ishumi na vavili
(Maluko 3:13-19; 6:7-13; Luuka 6:12-16; 9:1-6)
1UYeesu wávashemeela avanandeje vaakwe ishumi na vavili, wávapeela uwutawulilwa uwa kigadaga amalungu na kiponia amatamu goona. 2Lino amataawa ga vanandeje#10:2 Vanandeje: Yimba iliswi Mwanandeje mu Maswi aMahensa. awo ishumi na vavili gageene aga. Uwa wutasi yu Simoni (yuna itambulwa Petulo), uAndeleya umunangʼana waakwe uSimoni, uYaakobo umwana wa Sebedayo, uYohana umunangʼana waakwe uYaakobo, 3uFilipo, uBatolomaayo, uTomasi, uMataayo umutofya khoodi, uYaakobo umushina Alufaayo, uTadaayo, 4uSimoni uMulwila Nyi,#10:4 UMulwila Nyi: Kwa Shiyunaani yiyandiikhwe Mukananaayo. Uluganulo lwakwe, uMulwila Nyi. uYuuda uIsikaliyoote, yuna kuwudugo wámudolelaga uYeesu.
5UYeesu wávafilikhaga awo ishumi na vavili, wávasimila wáaja, “Musikhalutaji kwa vaanu vina vasili Vayahuudi, khanji musikhajelaji kiyinjila mu majumbi goona aga Samaliya. 6Leelo lutaji kwa Vayahuudi, kiiva vayajile ngaja nkholo sina siyajile. 7Khanji, pina mwijenda, khomaji kiija, ‘UWutwa wa Nguluvi wuli nkholeela.’ 8Vaponiaji avatamu, vafyusaaji vina vafwile, vavalasaaji avanya nyawulova na kigadaga amalungu. UNguluvi avapeelile bule uwutawulilwa uwu, na yuumwe humyaji bule. 9Musikhasumulaji ihela yoyoona mu mafukho geenyu. 10Musikhasumulaji imbukuli, amenda aganji aga kipyanisa, indaatu, awu inkwegu isa kijendela. Kiiva umusenga nsengo isakulwa kipeelwa na vaanu vina ikivasenjela, ifiinu fina isakula. 11Ilijumbi lyolyona lina mukhayinjila awu mu lujinji, musakulaji umo umuunu yuna akwiliile kivasaajisa omwe. Baheene mukhalaje kunyaakwe, mbakha uluhaavi luna mukhawuukha ukho. 12Pina muhuluta mu nanda, muvahunjilaje avakhaaya kiija vave nu wulindamafu. 13Ndeeno, nda vakwali avaanu vina vifwaya, muvafunyilaje baheene uNguluvi avayimiilile. Leelo nda vakwasiina vina viilava, uNguluvi asivayimiilila avaanu awo. 14Khanji pala pina vasikivasaajisa wala kivapuliisa, wuukhaji na kikungʼuuna amankundi gina gali mu nsayo sa magulu geenyu.#10:14 Kikungʼuuna amankundi gina gali mu nsayo sa magulu geenyu: Uluganulo lwakwe, aVayahuudi vinshi pina viiwuya kunyaanave, vakhandi vikungʼuuna amankundi ga nyi sina sisili sa Vayahuudi mu nsayo sa magulu gaanave, kwa kiiva vakhandi viijova kiija, inyi isinji mwikho. Avanandeje va Yeesu vagahaga ndeeno, kivawonensa aVayahuudi vina vasikhaanaga imola sa Nguluvi kiija, uNguluvi ikivaaga vaafu. Nda vasilambiisila, umwene akhavahiga. 15Shiyooli nikivajovela kiija, mu lisiku ilya kihigwa inyi, yikhava lupeefu kwa vaanu va lijumbi lya Sodoma ni Gomola kipona kihigwa, kulikho ilijumbi ilyo!#10:15 Sodoma ni Gomola: Avaanu va majumbi aga, vakhandi vana wunansi mandu. Yimba mu litaafili lya Shiyanso 19:24-29.
Amalava amakhome gina gakhayinsa
(Maluko 13:9-13; Luuka 21:12-17)
16“Puliisi, nikivafilikha ngaja nkholo sina sijenda paakhati naakhati ya mbwawa. Ndeeno muveesaje vanya luhala ngaja njokha, khanji muveesaje vahuugu ngaja nkunda. 17Omwe yivavalaji, kwa kiiva vakhavatwala pa livansa lya vakhome, khanji vakhavatova mu nanda saanave isa kifuunyila. 18Vakhavatwala omwe pa vakhome va nyi na pa vatwa kwa kiiva yangu. Baheene muve mukivabedela avaanu vina vasili Vayahuudi. 19Leelo, pina vakhavatwala pa livansa, musikhatungumalaji kiija mukhalogola shishi, awu mukhayankha wuli, kiiva uluhaavi ulo uNguluvi akhavapeela aga kilogola. 20Kiiva, musili yuumwe muna mulogola, leelo uNumbula wa Nguluvi uWiheesu, yumwene yuna akhava ilogola kishilila omwe.
21“Kwa luhaavi ulo, umuunu akhamudoolela ulukholo lwakwe kwa valugu kiija abudwe. Khanji, uwiihe akhamudoolela umwanaakwe kwa valugu kiija abudwe. Avaana woope vakhavadoolela avasafi vaanave kiija vabudwe. 22Avaanu woona vakhavakhalalila kwa kiiva omwe muli vamanyisiwa vangu. Leelo umuunu yoyoona yuna akhajimba mbakha kuwudugo, uNguluvi akhamukulusa. 23Avaanu pina vakhavagahila fivi mu lijumbi limo pina mwikhoma, sijilaji mu lijumbi ilinji. Shiyooli nikivajovela kiija, musikhamala kijenda mu majumbi goona aga Isilaheli, uLusawo lwa Muunu ave asinaatine. 24Umumanyisiwa asili mukhome kishila umumanyisaaji waakwe. Khanji, umuvanda woope, asili mukhome kimushila umutwa waakwe. 25Umumanyisiwa isakulwa ave ngaja umumanyisaaji waakwe na umuvanda woope isakulwa kiiva ngaja mutwa waakwe. Nda vikimushemeela umukhome wa nanda kiija yu Belisebuli,#10:25 Belisebuli: Litaawa ilinji lya Shetaani yuna mukhome wa malungu goona. wuli, vasikhavashemeela avaanu vina vali mu nanda yaakwe ilitaawa ilivi mandu?
Nguluvi mwene duguli isakulwa kitiilwa
(Luuka 12:2-9)
26“Ndeeno musikhavatiilaji avaanu awo, kwa kiiva shoshoona shina shifihiilwe shikhafumbulwa, khanji imbuusa yoyoona yikhamanyikha na kiwonekha, shiyooli fikhava bahawuvalafu. 27Amaswi gina nikivajova mu nshiisi, mugalogolaje bahawuvalafu. Khanji, goona gina mwipulikha kwa wufiho, muyalalisaaje bahawuvalafu. 28Musikhavatiilaji avaanu vina viibuda umuvili gwene, leelo mutiilaji uNguluvi yuna akwiliile kikubuda shiluta na kikutaaga mu malafyo ga mooto gwa shiluta. 29Wuli, inyanyamba sivili sisigusiwa kwa hela ndoodo mandu? Hata ndeeno kusiina inyanyamba yina yikhagwa pansi, bila kimanya uNguluvi. 30Lino omwe, hata inyele soona isa mu matwe geenyu, uNguluvi asimeenye! 31Lino, musikhatiilaji kwa kiiva omwe mwitunwa mandu kishila inyanyamba. 32Nikivajovela kiija, umuunu yoyoona yuna ikivajovela avaanu kiija ikiniyinatila one, na yuune nikhamujovela uDaada wangu yuna ali kushaanya kiija umuunu uyu ikiniyinatila. 33Leelo, yoyoona yuna ikinikhaana pa vaanu, na yuune nikhamukhaana pa Daada wangu yuna ali kushaanya.
Uwukhamu uwa kimufwata uYeesu
(Luuka 12:51-53; 14:26-27)
34“Musikhahiivaji kiija, nayinsa mu nyi kileeta uwulindamafu. Ndaali! Yisili ndeeno, leelo, nayinsa kileeta ilibaatu. 35Nayinsa kiija umwana nu wiihe, umwali nu maayi waakwe, umuunu nu mukhamwanaakwe vasikhapulinkhanaga. 36Khanji avalugu va muunu, vakhava vaanu va mukhati ya nanda yaakwe.#10:35-36 Yimba mu litaafili lya Mikha 7:6. 37Umuunu yoyoona yuna ikimugana uwiihe awu umaayi waakwe kulikho kinigana one, uyo asikinifwaya. Khanji, yoyoona yuna ikimugana umuswamuve awu umwalive kulikho kinigana one, uyo woope asikinifwaya. 38Umuunu yoyoona yuna asikiniyinatila one na kilava, hata nda yive kiifwa, uyo woope asikinifwaya. 39Kiiva, umuunu yoyoona yuna isakula kiwusaajila uwuumi waakwe, uyo asiwuyase, leelo umuunu yuna ikiwuyasa uwuumi waakwe kwa kiiva ya one, uyo asiwupate uwuumi wa shiluta.
Avaanu vina vakhaposheela ulutono
(Maluko 9:41; Luuka 10:16)
40“Umuunu yoyoona yuna ikivasaajisa omwe, iiva ikinisaajisa one. Khanji, yoyoona yuna ikinisaajisa one, iiva ikimusaajisa yuna wánifilikha one. 41Yoyoona yuna ikimusaajisa umukuwamalago, kiiva umuunu uyo mukuwamalago, uNguluvi akhamupeela ulutono ngaja lwa mukuwamalago. Khanji, yoyoona yuna ikimusaajisa umugolofu, kiiva umuunu uyo mugolofu, uNguluvi akhamupeela ulutono ngaja lwa mugolofu. 42Shiyooli nikivajovela kiija, yoyoona yuna ikimupeela ikhoomasi ya malenga amasisimu umunyaayumo wa vanangʼana ava, kwa kiiva ya mumanyisiwa wangu, uNguluvi akhamupeela ulutono lwakwe.”
Valgt i Øjeblikket:
Mataayo 10: Shisangu
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2020, Wycliffe Bible Translators, Inc. All rights reserved.