Mataayo 12
12
UYeesu yumwene Mutwa wa lijuva lya Sabaato
(Maluko 2:23-28; Luuka 6:1-5)
1Ilijuva limonga ilya Sabaato,#12:1 Sabaato: Yimba iliswi ili mu Maswi aMahensa. uYeesu na vamanyisiwa vaakwe vakhandi viishila mu magunda ga ngano. Avamanyisiwa vaakwe vakhandi vana njala, baheene vadeenya na kipulula amahoojo ga ngano na kiilya. 2Leelo aVafalisaayo pina vagaagaga ago, vamujovelaga uYeesu vaaja, “Loleela, avamanyisiwa vaakho vikigasenga gina gakhaniilwe pa lijuva lya Sabaato!”#12:2 Gina gakhaniilwe pa lijuva lya Sabaato: Indaji sa Vayahuudi sikhandi sisikimutawula hata padoodo, umuunu kideenya amahoojo aga ngano, mu mugunda gwa muunu uyunji (Luuju lwa Ndaji 23:25). AVafalisaayo vakhandi vilalamikha, kwa kiiva, kideenya amahoojo aga ngano, vijovaga kiija vasenga insengo.
3UYeesu wávayankha wáaja, “Wuli, musinayimbe mu Mayandikhwa aManofu umutwa uDawudi na vayine shina vagahile, pina vakhandi ni njala?#12:3 Yimba mu litaafili lya 1 Samweli 21:1-6. 4UDawudi wáhulwite mu liheema lya Nguluvi, wátoola wáalya na vayine amakhaate gina gakhandi gavishiilwe pa Nguluvi. Indaji sa Musa sikhandi sikivakhaana kiilya amakhaate ago, ila avatambule veene duguli. 5Awu musinayimbe mu ndaji sa Musa kiija avatambule va mu nanda imbaagule iya kifuunyila, vikisinanga indaji isa Sabaato? Hata ndeeno uNguluvi asikivavasa kiija viigaha fivi. 6Lino nikivajovela omwe kiija, apa akwali yuna mukhome kishila inanda imbaagule iya kifuunyila. 7Nda mwali muve mumeenye uluganulo lwa maswi mu Mayandikhwa aManofu gina giijova, ‘Nisakula ulusungu kulikho isadaakha,’#12:7 Yimba mu litaafili lya Hoseya 6:6. ndi mwava musikivapiikha avaanu vina vasinanjile ulujowo loloona. 8Kiiva, one Lusawo lwa Muunu, yuune Mutwa wa lijuva lya Sabaato.”
UYeesu iiponia umuunu mu lijuva lya Sabaato
(Maluko 3:1-6; Luuka 6:6-11)
9Baheene uYeesu wáwuukha pala, wáaluta wáyinjila mu nanda yaanave iya kifuunyila. 10Mu nanda mula, wáali akwali umuunu yumonga yuna akhandi ana liwokho lina likholoweeshe. Vaali vakwali khanji aVafalisaayo vina visakulaga kimujela uYeesu, kiija vamusitaashe. Vamuposaaga vaajova, “Wuli, indaji isa Musa sitawula kiponia umuunu mu lijuva lya Sabaato?”
11UYeesu wávayankha wáaja, “Yu naani munyeenyu yuna inkholo yaakwe nda yidubujile mu lilindi pa lijuva lya Sabaato, yuna asingayihumya? 12Umuunu iitunwa mandu kishila inkholo! Ndeeno yiyiitikhwa kigaha inofu mu lijuva lya Sabaato.”
13Baheene uYeesu wámujovela umuunu yula wáaja, “Golosa iliwokho lyakho.” Woope wágolosa, baaho lyapona lyava ngaja iliyine. 14Baaho aVafalisaayo ava, vaganile kilwaga ulo, vahumile kunja, vapulinkhane shina vakhasa kimubuda uYeesu.
UMubaagule wa Nguluvi
15UYeesu wáganaga kimanya kiija aVafalisaayo vipulinkhana kimubuda, wáwuukhaga pala. Baheene avaanu vinshi vamufwataga, woope wávaponiaga avaanu woona vina vakhandi vatamu. 16Leelo wávapavilaga kiija vasikhayalalisaaga kiija umwene yu naani. 17UYeesu wájovile ndeeno, kiija gakwilane gina umukuwamalago uIsaaya wáyandikhaga mu Mayandikhwa aManofu kiija,
18“Loleela, uyu yumwene muvanda wangu yuna nimubagwile,
Mugani wangu yuna ikinishendeefya.
Nisimupeele uNumbula wangu,
kiija akhome imola sa wukulukho wangu ku vaanu va nyi soona.
19Asikhaanania na vaanu khanji asilyovana nawo,
kusiina umuunu yuna asipuliisishe ishawuti yaakwe mu nsila inkhome.
20Asiludeenya ulutete luna lubajunkheene,
asiwusiimya uwutambi wuna wisinkha ilyosi,
kuwudugo, akhawupinsa uwukulukho wa Nguluvi kimena.
21Khanji, avaanu va nyi soona vakhahuviilila mu litaawa lyakwe.”#12:18-21 Yimba mu litaafili lya Isaaya 42:1-4.
UYeesu nu Belisebuli
(Maluko 3:20-30; Luuka 11:14-23)
22Ilijuva limonga, avaanu vamuleeta kwa Yeesu umuunu yuna akhandi ana lilungu. Ililungu lila lyamugahaga kiiva mupofu, khanji mbwibwi. UYeesu wámuponia umuunu yula, woope wáyansa kilogola na kiloleela khanji. 23Ishipuga sha vaanu shaswigaga na kiposania viija, “Wuli, uyu angava yu Lusawo lwa mutwa uDawudi?”#12:23 Lusawo lwa mutwa uDawudi: Uluganulo lwakwe, uMukulusaaji. Yimba iliswi Dawudi mu Maswi aMahensa. 24Leelo aVafalisaayo vaganile kipulikha ago, vaajova, “UYeesu ikigadaga amalungu kwa ngufu sa Belisebuli#12:24 Belisebuli: Litaawa ilinji ilya Shetaani yuna mukhome wa malungu goona. umukhome wa malungu.”
25UYeesu wágamanya amahiiva gaanave. Baheene wávajovela wáaja, “Avaanu va wutwa wumo nda vatovane, uwutwa uwo wunanjikha. Hata mu litembe shiisho ndeeno, nda vanangane, ilitembe linanjikha. 26Woope uShetaani nda ikimudaga uShetaani, apo uwutemi waakwe wiiva wubagunkheene. Ndeeno uwutwa waakwe wukwiliile kisingamala wuli? 27Lino! One nda nikigadaga amalungu ago kwa ngufu sa Belisebuli, avamanyisiwa veenyu vikigadaga kwa ngufu sa naani? Mu ilyo, avamanyisiwa veenyu vakhavahiga omwe. 28Leelo one, nda nikigadaga amalungu kwa ngufu sa Numbula wa Nguluvi, lino uWutwa wa Nguluvi shi waafikha kunyeenyu. 29Kusiina umuunu yuna akwiliile kiyinjila mu nanda ya muunu umunya ngufu kiija, amuposhe ifiinu fyakwe nda asimupinyile tangusiina. Leelo pina wámupinya tangusiina umuunu umunya ngufu, baheene akwiliile kimupokha ifiinu fyakwe.”
30“Umuunu yoyoona yuna asili lubali lwangu, uyo mulugu wangu. Khanji yuna asikungaania lumo noone, asiive ipalankhania. 31Lino, kwa kiiva ya ilyo nikivajovela kiija, uNguluvi akhavasaajila avaanu uwunansi waanave woona, hata nda vamutofole. Leelo, asikhavasaajila avaanu vina vikimutofola uNumbula uMunofu. 32Khanji uNguluvi akhamusaajila umuunu yoyoona yuna ikimutofola uLusawo lwa Muunu. Leelo asikhamusaajila umuunu yuna ikimutofola uNumbula uMunofu mu luhaavi ulu awu luna luyinsa.
Ilipishi limanyikha kwa makhomo gaakwe
(Luuka 6:43-45)
33“Nda uligote wunofu ilipishi, lisiikhome amakhomo amanofu, leelo nda usikiligota wunofu ilipishi ilyo, lisiikhome amakhomo amavi. Ukwiliile kilimanya ilipishi kwa kigamanya amakhomo gaakwe. 34Omwe woona muhwaneene ni njokha! Mukwiliile wuli kilogola amaswi amanofu kuno muli vanansi? Kwa kiiva amaswi gina umuunu iijova, giihuma mu gala gina gamemile mu numbula yaakwe. 35Umuunu umunofu ilogola amaswi amanofu kihuma mu manofu gina gamemile mu numbula yaakwe. Leelo umuunu umunansi ilogola amaswi amavi kihuma mu wunansi wuna wumemile mu numbula yaakwe. 36Leelo nikivajovela omwe kiija, mu lisiku ilya kihigwa inyi, avaanu vakhataviilila shila liswi lina lisifwaya lina valogolaga. 37UNguluvi akhakuvasa kiiva mugolofu kwa maswi gaakho amanofu, awu akhakuhiga kiiva munansi kwa maswi gaakho amavi.”
Avaanu visakula uYeesu avawonense ishimanyilo
(Maluko 8:11-12; Luuka 11:29-32)
38Baheene aVafalisaayo avanji na vamanyisaaji va ndaji sa Musa vamujovelaga uYeesu vaajova, “Wee Mumanyisaaji, tisakula utuwonense ishimanyilo, kiwonensa kiija ufiliikhwe nu Nguluvi.” 39UYeesu wávayankha wáaja, “Ishisafi sha vaanu avanansi, shisakula ishimanyilo! Nisikhavawonensa shimanyilo shoshoona shila, leelo shimanyilo shimo hela shina musishaaje, ngaja shila isha mukuwamalago uYoona. 40Kwa kiiva, ngaja uYoona shina wákheele mu wutumbu wa nswi inkhome nsiku sitatu ishiminsi ni shilo, shiisho ndeeno na yuune Lusawo lwa Muunu, nisiikhale mu lijooja nsiku sitatu ishilo ni shiminsi.#12:40 Yimba mu litaafili lya Yoona 1:17. 41Khanji mu lisiku ilya kihigwa inyi, avaanu ava ku Ninaawi, woope vakhayiima kivataviilila omwe vaanu va shisafi ishi, kiija muli vanansi. Kwa kiiva uYoona pina akhandi iikhoma iLiswi lya Nguluvi kunyaanave, valambisilaga uwunansi waanave. Lino, apa akwali umukhome kishila uYoona, leelo omwe mukhaana kilambiisila! 42Mu lisiku ilya kihigwa inyi, umutwa umushimaayi uwa ku Seba uwa mbamba sa kunyagamo akhayiima kivahiga omwe, omwe vaanu va shisafi ishi kiija muli vanansi. Umwene wáshuulile kihuma ku nyi ya kutali, wáyinsa kipulikha amaswi ga wumanyi wa Selemaani.#12:42 Selemaani: Uyo akhandi mutwa wa nyi ya Isilaheli yuna imanyikhaga kiiva nu wumanyi wukhome. Yimba mu litaafili lya 1 Vatwa 10:1-10. Lino, apa akwali umukhome kishila uSelemaani, leelo omwe mukhaana kimupuliisa.”
Amamanyiso ulwa malungu
(Luuka 11:24-26)
43UYeesu wáyitenekha kijova, “Ililungu pina limuhumile umuunu, liiluta ku luvanda kisakula uluvala lwa kituuya. 44Nda lisipaajile, apo baheene lisiijove, ‘Nisiitine kukula ku nanda yangu kuna nahumaga.’ Nda litine, lipaaje pali mwasi, pafyajiilwe, khanji panosiiwe wunofu. 45Apo baheene liiluta kigatoola amalungu aganji fungati amavi mandu kishila ilyene. Baheene gihuluta mwa muunu uyo, giikhala. Apo umuunu uyo iiva mutamu mandu, kishila ulwamwandi. Shilukhava shiisho kwa vaanu ava luhaavi ulu.”
Unyina na valukholo lwakwe va Yeesu
(Maluko 3:31-35; Luuka 8:19-21)
46UYeesu pina akhandi ayiteneeshe kilogola ni shipuga sha vaanu, unyina na valukholo lwakwe vayinsa pa nanda yina wáali akwali uYeesu, vayiima panja, visakulaga kilogola nawo. 47Baheene umuunu yumonga wámujovela wáaja, “Umaayi waakho na valukholo lwakho vali panja, visakula kilogola noowe.” 48Leelo uYeesu wámuyankha wáaja, “Umaayi wangu yu naani na valukholo lwangu vava naani?” 49Wágolosa iliwokho kwa vamanyisiwa vaakwe wáaja, “Loleela, ava vaveene vamaayi vangu na valukholo lwangu! 50Kiiva umuunu yoyoona yuna isenga gina idobokha uDaada wangu yuna ali kushaanya, uyo yumwene lukholo lwangu, wulumbu wangu khanji yu maayi wangu.”
Valgt i Øjeblikket:
Mataayo 12: Shisangu
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2020, Wycliffe Bible Translators, Inc. All rights reserved.