Mataayo 15
15
UYeesu ikigakhaana amamanyiso aga ngʼoma sa vambuya
(Maluko 7:1-13)
1Lino, aVafalisaayo na vamanyisaaji vamonga va ndaji sa Musa, vayinsile kihuma ku Yelusalemu. Vaaluta kwa Yeesu vamuposa vaaja, 2“Kwashi avamanyisiwa vaakho vasiyinatila ingʼoma sina avambuyeesu vatuleshelaga? Kwa kiiva viilya ishakiilya vasiyinatila ingʼoma iya kiyiyooga amawokho gaanave!”#15:2 Ingʼoma iya kiyiyooga amawokho gaanave: AVafalisaayo vijovaga, nda umuunu apyase ishakiilya asiyiyoojile amawokho na kifuunya tangusiina, ishakiilya isho shiiva shashafukha, ndeeno shikimugaha yuna iilya ave mushaafu. AVafalisaayo vaswigaga, kiiva uYeesu asikhatunile kishafukha kwa vamanyisiwa vaakwe. 3UYeesu wávayankha wáaja, “Kwashi omwe mukisinanga indaji sa Nguluvi, kwa nsila ya kisiyinatila ingʼoma seenyu? 4UNguluvi wájovile, ‘Uvatiilaje uwiiho nu maayi waakho.’#15:4 Yimba mu litaafili lya Kihuma 20:12; Luuju lwa Ndaji 5:16. Khanji wájovile, ‘Yoyoona yuna ikimuliga uwiihe awu umaayi waakwe, uyo wa kibudwa.’#15:4 Yimba mu litaafili lya Kihuma 21:17; Njowo sa Valaawi 20:9. 5Leelo omwe mwijova kiija, umuunu akwiliile kimujovela uwiihe awu umaayi waakwe kiija, ‘Ifiinu fina naava niija nikutanje owe, naahumya kwa Nguluvi.’ 6Baheene mwijova kiija umuunu asisakulwa kimutiila uwiihe awu umaayi waakwe. Ukho kukwene kilitofola iLiswi lya Nguluvi, kwa nsila ya kiyinatila ingʼoma seenyu. 7Muli vamyansi omwe! UIsaaya wálogwele ga shiyooli pina wákuwiilwe amalago kwa kiiva yeenyu kiija,
8‘UNguluvi iija,
“Avaanu ava vikinitiila kwa kilogola kwene hela,
leelo inumbula saanave sisikinihiiva one.
9Woope vikinifuunya hela one,
khanji vimanyisa amamanyiso ga ndaji sa vaanu na kiija ndaji sangu.”#15:8-9 Yimba mu litaafili lya Isaaya 29:13.’”
Ifiinu fina fikimushafula umuunu
(Maluko 7:14-23)
10UYeesu wáshishemeelile khanji ishipuga sha vaanu wáshijovela wáaja, “Munipulisaaje, khanji mugamanyaje gina niijova! 11Ishiinu shina shikimuyinjila umuunu mu mulomo, shisikwiliile kimushafula. Leelo shina shiihuma mu mulomo gwakwe, shisheene shikimushafula umuunu.”
12Baheene avamanyisiwa vaakwe vaaluta kwa Yeesu, vamuposa vaajova, “Wuli, umeenye kiija aVafalisaayo vakhalalaga mandu, vaganaga kipulikha amaswi gina walogolaga?” 13UYeesu wávayankha wáaja, “UDaada wangu yuna ali kushaanya akhakuula ifimelo fyofyona fina asikhafivyalile. 14Valeshi, kiiva awo valongosaaji vapofu va vapofu! Umupofu nda ikimulongosa umupofu muyine, woona vavili vasidubujile mu lilindi!” 15Leelo uPetulo wámujovela wáaja, “Tiganulila ishihwano sha shiinu shina shikimushafula umuunu.” 16UYeesu wávayankha wáaja, “Wuli, na yuumwe mushaanali musiimanya? 17Wuli, musimeenye kiija shoshoona shina shiyinjila mu mulomo, shiiluta mu wutumbu wa muunu, baheene kuwudugo ikishihumya kunja? 18Leelo ishiinu shina shiihuma mu mulomo gwa muunu, shiihuma mu numbula yaakwe, isho shisheene shina shikimushafula umuunu. 19Kiiva mu numbula ya muunu, mumwene muna giihuma amahiiva amavi, uwubudaaji, uwaafu uwa kijenda na vadala va kunja, uwushemi, uwuhiiji, uwubedelo wa wudehi na maligo. 20Goona ago, gageene gina gikimushafula umuunu. Leelo umuunu asikwiliile kiiva mushaafu kwa kilekha kiyiyooga amawokho.”
Ilihuuvi ilya washimaayi yuna asili Muyahuudi
(Maluko 7:24-30)
21UYeesu wáwuukhaga pala, wáaluta ku mbali isa Tiilo ni Sidoni. 22Baheene uwashimaayi yumonga yuna asili Muyahuudi, wáaluta kwa Yeesu, wályova kwa ngufu wáaja, “Wee Mutwa, Lusawo lwa mutwa uDawudi,#15:22 Lusawo lwa mutwa uDawudi: Uluganulo lwakwe, uMukulusaaji. Yimba iliswi Dawudi mu Maswi aMahensa. nisungupila! Umwali wangu ilafisiwa mandu na malungu.” 23Leelo uYeesu asikhamuyanshile liswi lyolyona. Kuunyuma, avamanyisiwa vaakwe vaaluta kwa Yeesu vamulomba vaajova, “Mujovela uwashimaayi uyu awuushe, kwa kiiva ikitulyovela kunyuma yeesu.” 24UYeesu wávayankha wáaja, “UNguluvi wánifilikhaga kivakulusa aVaisilaheli hela, kwa kiiva, aveene vali ngaja nkholo sina siyajile.”
25Uwashimaayi yula wáaluta wáfugama pa Yeesu, wámulomba wáaja, “Wee Mutwa, nikikulomba unitanjilise!” 26Baheene uYeesu wámuyankha wáaja, “Lusili lunofu kitoola ishakiilya sha vaana na kisitoosesa imbwa.”#15:26 Vaana: Uluganulo lwakwe, Vayahuudi. Imbwa: Uluganulo lwakwe, vina vasili Vayahuudi. 27Uwashimaayi yula wáaja, “Eena Mutwa, leelo nasi mbwa soope siilya amasigase gina giigwa pansi pa meesa iya vatwa vaakwe.” 28UYeesu wámuyankha wáaja, “Wee nyineesu owe, ilihuuvi lyakho likhome mandu! Yive ndeeno ngaja shina wisakula.” Baaho, umuhinja yula wáapona.
UYeesu iiponia avatamu vinshi
29UYeesu wáganile kiwuukha pala, wávaleeme mulubali lwa lilamba ilikhome ilya Galilaya, wátaana kiluta kikhala ku shidunda. 30Avaanu vinshi mandu vaaluta kwa Yeesu kivatwala avalema amagulu, avapofu, avambwibwi na vanji vinshi. Vavaviikha avatamu vala pa magulu gaakwe, umwene wávaponia. 31Avaanu mu shipuga shila, vaswigaga mandu vaganaga kivaaga avambwibwi vilogola, avalema amagulu vijenda na vanya wulema uwunji viipona na vapofu viloleela. Avaanu vayansa kimusufya uNguluvi yuna aVaisilaheli vikimufuunya.
UYeesu ikivaliisa avaanu magana mashumi gana (4,000)
(Maluko 8:1-10)
32Baheene uYeesu wávashemeela avamanyisiwa vaakwe wáajova, “Nikivasungupila avaanu ava, kiiva vakheele noose nsiku sitatu, lino vagaya shakiilya. Nisiganile kivahwesa kiija vawuyaje kunyaanave pina vana njala, vasilaave vasilishe mu nsila.”
33Avamanyisiwa vaakwe vala vamuposa vaajova, “Tisigaaje kwi amakhaate aga kivakwila avaanu woona ava, pa lunyikha panu?” 34UYeesu wávaposa wáaja, “Muna makhaate galinga?” Vamugomosesa vaaja, “Tina makhaate fungati nu tuswi tusheefu, khanji tudoodo.” 35Baheene uYeesu wávalajisa avaanu woona kiija vakhale pansi. 36Wátoola amakhaate gala fungati nu tuswi tula, wámuhonjesa uNguluvi, wámenyulania, wávapeela avamanyisiwa vaakwe, woope avamanyisiwa vavagavila avaanu vala. 37Avaanu woona vala valiisaga vayikuta. Baheene avamanyisiwa vakunganiaga amakhaate amamenyulanie gina gasigalaga, gamemile matunduti fungati. 38Ndeeno, avaanu vina valiisaga ishakiilya shila, vakhandi vagoosi magana mashumi gana (4,000), bila kivavasa avashimaayi na vaana. 39Wáganaga kivahwesa avaanu vala, uYeesu wáyinjila mu shipugo, wáaluta ku mbali isa lijumbi lya Magadani.
Valgt i Øjeblikket:
Mataayo 15: Shisangu
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2020, Wycliffe Bible Translators, Inc. All rights reserved.