Mataayo 18
18
Yu naani yuna mukhome mu Wutwa wa Nguluvi
(Maluko 9:33-37; Luuka 9:46-48)
1Paanyuma padoodo avamanyisiwa va Yeesu vamuyinsila uYeesu, vamuposa vaajova, “Yu naani yuna mukhome kishila avanji woona mu Wutwa wa Nguluvi?” 2UYeesu wámushemeela umwana umunangʼana, wámuyiimya paakhati yaanave, 3wávajovela wáaja, “Shiyooli nikivajovela, nda musiseetukha na kiiva ngaja avaana avanangʼana, musikwiliile kiyinjila mu Wutwa wa Nguluvi. 4Ndeeno umuunu yoyoona yuna ikiyiyiisa ngaja umwana umunangʼana uyu, uyo yumwene akhava mukhome mu Wutwa wa Nguluvi. 5Khanji, umuunu yoyoona yuna ikimusaajisa umwana umunangʼana ngaja uyu kwa litaawa lyangu, iiva ikinisaajisa one. 6Avaanu avanangʼana vina vikinihuviilila one, umuunu nda amupinse umunyaayumo waanave agahe uwunansi, yiiva shiba umuunu uyo apinyilisiwe mu nsingo ilyala ilikhome ilya kihawulila na kitaagwa mu shoogo ishitali isha bahali.
Amapavilo ulwa majelo
(Maluko 9:42-48; Luuka 17:1-2)
7“Aka omwe vaanu va mu nyi iyi, muna mupinsa avaanu vagahe uwunansi. Ago shiyooli gakhayinsa, leelo aka kwa muunu uyo yuna ikigapinsa ago! 8Iliwokho lyakho awu iligulu lyakho nda likikupinsa kigaha uwunansi, lidumula ulitaaje kutali. Shiba kihuluta mu wuumi wa shiluta ni liwokho limo awu ni ligulu limo, kulikho kihuluta na mawokho gavili awu magulu gavili, na kitaagwa mu malafyo ga mooto gwa shiluta. 9Khanji, iliiho lyakho nda likikupinsa kigaha uwunansi, lijodola ulitaaje kutali! Shiba kiyinjila ku wuumi wa shiluta ni liiho limo, kulikho kiiva na meeho goona gavili, na kitaagwa mu malafyo ga mooto gwa shiluta.
Ishihwano sha nkholo yina yiyajile
(Luuka 15:3-7)
10“Yivavalaji, musikhamusalaji umunyaayumo mu vanangʼana ava! Kwa kiiva nikivajovela kiija, hata woope vana vamalayikha vaanave kushaanya. Uluhaavi loona vali pa Daada wangu yuna ali kushaanya vikimuloleela. [11Kwa kiiva uLusawo lwa Muunu wáyinsile mu nyi kivakulusa vina vayajile.]#18:11 Amaswi aga, gakusiina mu mayandikhwa agamonga amakuulu. Yimba mu litaafili lya Luuka 19:10. 12Mwiwona wuli? Umuunu nda ana nkholo ligana limo, leelo yimo yiyaje, wuli, asisilekha inkholo mashumi gonja ni gonja ku shidunda na kiluta kiyitavikha yimo yila yina yiyajile, mbakha ayaaje? 13Shiyooli nikivajovela, nda ayaaje, ishendeeva mandu kwa kiiva ya nkholo yimo yila, kishila inkholo sila mashumi gonja ni gonja sina sisiyajile. 14Shiisho ndeeno, uWiheenyu uwa kushaanya asigeene kiija yumonga mu vanangʼana ava, ayaje.
Ulugoto lwa kimuyoonya yuna ananjile
15“Nda umuhuvililaaji muyaago akunanjiile, lutaga umupose pina muli vavili hela. Nda akupulishe, lino, usiive wamupata khanji umuhuvililaaji muyaago. 16Leelo nda asakupulikha, lutaga umutoole umuunu uyunji yumo awu vaanu vavili, kiija mufwataje aMayandikhwa aManofu gina giijova kiija, ‘Vaveesaje vakwali avalunjikhaaji vavili awu vatatu ava kilunjikha shila shiinu.’#18:16 Yimba mu litaafili lya Luuju lwa Ndaji 19:15. 17Nda asikivapulikha awo woope, lutaga uvajovele avayimililaaji va shipuga sha vahuvililaaji. Nda asikivapulikha awo, baheene muvasaaga ngaja shina ukimuvasa yuna asikimuhuviilila uNguluvi awu mutofya khoodi.
Uwutawulilwa uwa vamanyisiwa uwa kidinda na kidindula
18“Shiyooli nikivajovela, goona gina mugadindile mu nyi iyi, uNguluvi asigadinde hata kushaanya. Khanji, goona gina mugandindwile mu nyi iyi, uNguluvi woope asigadindule hata kushaanya. 19Nikivajovela khanji kiija, nda avaanu vavili mu shipuga sha vahuvililaaji vapulinkhane mu nyi iyi kwa gina vilomba umutango, uDaada wangu uwa kushaanya asivagahile ago. 20Kiiva nda vakwali avaanu vavili awu vatatu vina vakungaanile kwa litaawa lyangu, na yuune niiva baaho.”
Ishihwano sha muunu yuna asisaajila
21Baheene uPetulo wáaluta kwa Yeesu, wámuposa wáaja, “Wee Mutwa, nda umuhuvililaaji muyangu aninanjiile, nisakulwa kimusaajila mala khalinga? Wuli, mala fungati?” 22UYeesu wámuyankha wáaja, “Nisikikujovela kiija mala fungati hela, leelo umusajilaje umuyaago luhaavi loona mu wiikhasi waakho bila kivasa.#18:22 Luhaavi loona mu wiikhasi waakho bila kivasa: Kwa Shiyunaani yiyandiikhwe, 7 x 70.
23“Lino, uWutwa wa Nguluvi wuhwaneene ni shihwano ishi. Akhandi akwali umutwa yumonga yuna wávashemeelaga avasenga nsengo vaakwe kiija, avahombe amakhole gaanave. 24Umutwa pina wáyansaaga kivasa, wátwalilwagwa umuunu yumonga yuna akhandi idaayiwa ilifungu likhome mandu ilya hela.#18:24 Ilifungu likhome mandu ilya hela: Kwa Shiyunaani yiyandiikhwe, talanta sisaanu. Talanta yimo yikhandi yilingeene na mahombo ga muunu yumo, kwa maakha ishumi na mutanda. 25Umusenga nsengo uyo wápotiilwe kihomba ihela sina akhandi idaayiwa. Baheene umutwa wálamula kiija agusiwe umwene, umudala waakwe, avanaakwe ni fiinu fyona fina akhandi nafyo, baheene amuhombe.
26“Baheene umusenga nsengo yula wáfugama pa mutwa, wámulomba wáaja, ‘Nilomba uniheepe padoodo, nisikuhombe ifiinu fyakho fyona.’ 27Umutwa yula wámusungupila umusenga nsengo waakwe, wámusaajila kihomba umukhole gwakwe, wámutawula kiija alutaje.
28“Umusenga nsengo yula wáganile kihuma, wámwajile umusenga nsengo muyine yuna wámukhopesaaga ilifungu lidoodo kwa kifwatana na shina umutwa akhandi ikimudaayi umwene. Baaho wámutakha ku nsingo, wámujovela wáaja, ‘Nihomba shina nakukhopesaaga.’ 29Umusenga nsengo muyine wáfugama pamwandi yaakwe wámulomba wáaja, ‘Uniheepe padoodo, nisikuhombe ifiinu fyakho.’ 30Leelo umwene wákhaana, wámutwala kimudindila umuyine mu shifungo, mbakha uluhaavi luna akhahomba umukhole goona.
31“Avasenga nsengo vayine vaganile kigaaga ago, valemala mandu mu numbula saanave. Baheene vaaluta kwa mutwa waanave na kimujovela goona gina gasenjekhaga. 32Baheene umutwa wámushemeela umusenga nsengo yula, wámuposa wáaja, ‘Owe uli muunu muvi mandu! Wanilombaga kiija nikusaajile shina nikhandi nikikudaayi, one nakusajilaga umukhole gwakho goona! 33Wuli, owe usisakulwa kimusungupila umuyaago uyu, ngaja one shina nakusungupilaga owe?’
34“Baheene umutwa yula wákhalalaga mandu, wávalajisa avasulukhali vaakwe kiija vamukhate na kimudindila mu shifungo, mbakha uluhaavi luna akhahomba umukhole goona.”
35Kuwudugo, uYeesu wávajovela wáaja, “UDaada wangu yuna ali kushaanya asivagahile na yuumwe shiisho ndeeno, nda musikwiliile kimusaajila umuyeenyu kwa numbula yeenyu yoona.”
Valgt i Øjeblikket:
Mataayo 18: Shisangu
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2020, Wycliffe Bible Translators, Inc. All rights reserved.