Thangambere 24
24
Jugamu Dhaku ni Isak
1Man Ibrahim uti, oro pare de doko dit: man Yehova mio mugisa ni Ibrahim i gin ceke. 2Man Ibrahim uwacu ni jatic pare, ma jadit m’i ot pare, m’ubimo wi gin ceke m’ebedo ko kumae, Akwei keth cingi the bamba: 3man abiketho ikwong’ ku Yehova, Mungu m’i polo man Mungu m’i ng’om, nia ibigamu dhaku ngo m’i kind nyig Jukanani, m’abedo i Idndgi, ni woda: 4ento ibicidho ba ng’om ma thuwa, man ba wat para, man ibigamu dhaku ni woda ma Isak. 5Man jatic uwacu ire kumae, Kuno nyo dhaku biyio ngo ya elub toka i ng’om maeni: e abidong’ dwoko wodi i ng’om m’iai i ie? 6E Ibrahim uwacu ire kumae, Bed ku weng’i nia kud idwok woda kuca kendo. 7Yehova, Mungu m’i polo, m’egama kud i ot pa vwa, man kud i ng’om ma junyola i ie, man m’uweco i bang’a, m’ukwong’o ira de, m’uwacu kumae, Abimio ng’om maeni ni kodhini; ebioro malaika pare i weng’i, man ibigamu dhaku ni woda ku kuca. 8Man tek dhaku yio ngo elub toki, e ibilund gonjri ni kwong’ para maeni: ento kud idwok woda kuca kendo. 9E jaticne ketho cinge the bamb Ibrahim ma rwodhe, man ekwong’o ire pi gin maeni.
10E jaticne gamu ngamia apar, ma ngamia pa rwodhe, man eai, m’ebedo ku gin ma ber pa rwoth pare ceke i cinge: e eai malu, man ecidho ba Mesopotamia, bang’ adhura pa Nahor. 11Man eketho ngamia girum piny ng’ei adhura ng’et kulo m’atong’a mi pi i kinde mir uthieno, i kinde ma mon cidho nitwomo ie pi. 12Man ewacu kumae, E Yehova, Mungu pa rwoth para Ibrahim, akwei, ora awoth pio i ceng’ maeni, man inyuth bero ni rwoth para Ibrahim. 13Nen, abecungo ng’et kulo mi pi; man nyig dhanu mir adhura gibibino twomo pi: 14man wek etimbre, nia nyaku m’abiwacu ire kumae, Lur agulu peri piny, akwei, kara amadhi: man ebiwacu kumae, Madhi, man abimio ni ngamia peri bende gimadhi; wek ng’atuca bed ng’atu m’igoyo wie ni jatic peri ma Isak; man ku maeni abing’eyo nia inyutho bero ni rwoth para. 15Man etimbre, ma fodi edaru weco ngo, nia, nen Rebeka wok, ma junyole ni Bethuel, ma wod Milka, ma dhaku pa Nahor m’umin Ibrahim, kud agulu pare wi goke. 16Man nyakune wang’e leng’ dit mir anena, en e nyaku ma sumba, kadi co de foduvuto kude ngo: e eloro piny ba kulo, man epong’o agulu pare, e eidho malu. 17E jaticne ringo kara eromb kude, man ewacu kumae, Akwei, mi ira pi moko ku i agulu peri amadhi. 18Man ewacu kumae, Madhi, rwoth para: man etimo pio, man eting’o agulu i cinge, emio ire de emadhi. 19Man kan edaru mio ire emadhu, ewacu kumae, Abitwomo ni ngamia peri bende, maram gibimadhu ko. 20Man etimo pio, e ekonjo pi ku i agulu pare i ungoli, man eringo kendo ba kulo m’atong’a kara etwom, man etwomo ni ngamia pare ceke. 21E ng’atuno nene tel, m’ebedo ling’, kara eng’ei tek Yehova ketho woth pare bedo miero kadi ungo. 22Man etimbre, kinde ma ngamia daru madhu, nia ng’atuno ting’o lagith mi mola ma kwar ma pekne ng’et cekel, ku gwang’ ario mi cinge ma pekne mola ma kwar cekel apar, 23man ewacu kumae, In i nya ng’a? yer ira, akwei. Kabedo nuti i ot pa wuru ma wagonj i ie? 24Man ewacu ire kumae, An a nya Bethuel ma wod Milka, m’enyolo ni Nahor. 25Man ke ewacu ire kumae, Lum nuti i bang’wa ku cemo de m’uromo, man kabedo de mi vuto. 26Man ng’atuno kulo wie e erwo ni Yehova. 27Man ewacu kumae, Mugisa ni Yehova, Mungu pa rwoth para ma Ibrahim, m’eweko kisa pare ngo ku lemandha pare yo ba rwoth para: an, Yehova tela i yo ba ot pa utumin rwoth para.
28Man nyakune ringo, eyero de ni ot pa min calku lembe maeni. 29Man Rebeka, umin nuti ma nyinge Laban: man Labanne ringo woko ba ng’atuno, ba kulo. 30Man etimbre kinde m’eneno lagith, ku gwang’ i cing’ nyamin, man kan ewinjo lembe pa Rebeka ma nyamin, m’ewacu kumae, Ng’atuno yero kumeni ira; nia ebino ba ng’atuno; man, nen, ecungo i ng’et ngamia dhu kulo. 31Man ewacu kumae, Mondi, in m’inwang’u mugisa ba Yehova; icungo woko nedi? kum ayiko ot, ku kabedo mi ngamia. 32E ng’atuno bino i ot, man egonyo jamni ku wi ngamia; man emio lum ku cemo de ni ngamia, ku pi mi lwoko tiende ku tiend ju ma gini kude. 33Man juketho cemo i wang’e kara ecam: ento ewacu kumae, Abicamu ngo, ma fodi k’ayero pi woth para ngo. Man ewacu kumae, Yer asu. 34E ewacu kumae, An a jatic pa Ibrahim. 35Man Yehova mio mugisa dit ni rwoth para; man edoko dwong’: man emio ire udul rombe kud udul lim, ku mola ma tar man mola ma kwar, ku jutic ma co man bong’, ku ngamia man kana. 36E Sara ma ci rwoth para nyolo nyathin ma nico ni rwoth para kinde m’eti: man emio ire gin ceke m’ebedo ko. 37E rwoth para ketho akwong’o, ewacu kumae, Ibigamu dhaku mi nyig Jukanani ngo ni woda, m’abedo i ng’om migi: 38ento ibicidho ba ot pa vwa, man ba wat para, e ibigamu dhaku ni woda. 39E awacu ni rwoth para kumae, Kuno nyo nyaku bilubo toka ngo. 40Man ewacu ira kumae, Yehova, m’awotho i wang’e, ebioro malaika pare karacelo kudi, man ebiketho yo peri bedo miero; e ibigamu dhaku ni woda ba wat para, man mi ot pa vwa: 41ibilund gonjri ni kwong’ para, kinde m’iwok ba wat para; man tek gimie iri ngo, ibigonjri ni kwong’ para. 42Man abino ceng’ maeni ba kulo, man awacu kumae, E Yehova, Mungu pa rwoth para Ibrahim, tek kawono iketho yo para m’acidho i ie bed miero: 43nen, acungo dhu kulo mi pi; man wek etimbre, nia nyaku m’uwok nitwomo, m’abiwacu ire kumae, Akwei, mi ira nyathi pi moko ku i agulu peri amadhi; 44man ebiwacu ira kumae, Dong’ imadhi, man abitwomo ni ngamia peri bende: wek ng’atuno bed nyaku ma Yehova goyo wie ni wod rwoth para. 45Man ma fokadaru weco ngo ku yo i adundena, nen, Rebeka wok kud agulu pare wi goke; e eloro piny ba kulo, man etwomo: e awacu ire kumae, Akwei, wek amadhi. 46Man etimo pio, man eting’o agulu pare ku wi goke, ewacu de kumae, Madhi, man abimio ni ngamia peri bende gimadhi: kum kumeno amadhu, man eketho ngamia bende gimadhu. 47Man apenje, awacu de kumae, In i nya ng’a? man ewacu kumae, Nya Bethuel, ma wod Nahor, ma Milka nyolo ire: Man aketho gwilo i ume, ku gwang’ de i cinge. 48Man akulo wia, e arwo ni Yehova, man amio mugisa ni Yehova, ma Mungu pa rwoth para Ibrahim, m’utelo wia i yo ma ber kara agam nyar umin rwoth para ni wode. 49Man kawono tek wubitimo ku bero man andha kum rwoth para, yer ira: man tek ungo, yer ira; kara alokra yo ku cing’ ma yor acwic, kadi yor acam.
50Laban giku Bethuel gilund giloko lembe man giwacu kumae, Ginduni ai ba Yehova: wacopo weco iri rac kadi ber de ngo. 51Nen, Rebeka ni i weng’i, game, man icidhi, e wek ebed dhaku pa wod rwoth peri, calu Yehova yero. 52Man etimbre, nia, kinde ma jatic pa Ibrahim uwinjo lembe migi, nia erum piny i ng’om ni Yehova. 53Man jaticne wodho ruko mi mola ma tar, man ruko mi mola ma kwar, ku kendi, man emiogi ni Rebeka: emio gin ma pire tek ni umin bende man ni min. 54E gicamu gimadhu de, en ku dhanu ma gini karacelo kugi, e gibedo ku diewor soro; man giai kugweno, e ewacu kumae, Ora ba rwoth para. 55Man umin mire ku min de giwacu kumae, Wek nyakune bed i bang’wa ceng’ moko, calu ceng’ apar; e yo ng’ei maeno ebicidho. 56Man ewacu igi kumae, Kud wucera, kum Yehova ketho yo para bedo miero; ora kara acidh ba rwoth para. 57Man giwacu kumae, Wabilwong’o nyakune, man wabipenje i dhoge. 58E gilwong’o Rebeka, man giwacu ire kumae, Ibicidho ku ng’atu maeni? Man ewacu kumae, Abicidho. 59Man gioro Rebeka ma nyameggi, ku jakur pare, man jatic pa Ibrahim, ku dhanu pare. 60E gimio mugisa ni Rebeka, man giwacu ire kumae, Nyamegwa, bed meg rubanga mi rubanga apar, man wek kodhini mwony dhugang’ mi ju m’udagugi.
61Man Rebeka ai malu, ku jumanyir pare, man giwotho ku wi ngamia, e gulibo ng’atuno: man jatic ugamu Rebeka, e ecidho i yo pare. 62Man Isak ubino uai i yo mi Ber-lahai-roi; kum ebedo i ng’om ma yor ariwa ma piny. 63E Isak ucidho woko kara ie pid lembe i podho uthieno: man eting’o wang’e malu, man eneno, man, nen, ngamia bebino. 64E Rebeka ting’o wang’e malu, man kan eneno Isak, eloro ku wi ngamia. 65Man ewacu ni jatic kumae, Ng’atu maeca m’ubewotho i podho kara eromb kudwa en e ng’a? E jaticne wacu kumae, En e rwoth para: e eting’o bongu mi wang’, eumo ko wang’e. 66E jatic uyero ni Isak gin ceke m’etimo. 67Man Isak ukele i hema pa Sara ma min mire, man egamu Rebeka, e edoko dhaku pare; man emare: e Isak ujukre yo ng’ei tho pa min.
Valgt i Øjeblikket:
Thangambere 24: AB1970
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
The Holy Bible In Alur (Lur), Revised Orthography © United Bible Societies, 1970.