เกาตีนา 18
18
เอาซาง โตะ และ อับราฮัม
1มี มี งิ นัน แร็ง อาก แลว เยโฮวา ก็ แอง ระ อับราฮัม เม็จ นัง ออ วัล ญาม นัน อับราฮัม พัก อุ ตัก ลำ กุด จ็อง คอง เอาจ็อง มำเร นำ ก็ ต็อม คุด อุ ตัก ปะตู เต็น 2นำ ก็ ง็อห มัด ดอม ปัก เม็จ อัหคล็อง แพะ ล็อง ญ็อง อุ ลัห มัด ออ นำ ก็ เล็ง จัก กราบ ไว อัห จำ ซิก 3นำ ก็ ไล อัห ฮุนเน “กัน แป ใจ ดัว ซิห เอิญ ก็ อำ แป งเคาะ เริล เตาะ แวด แอว เอิญ วาล กา เอิญ ก็ เป็น ลูกนอง แป 4เอิญ ไล อัห ซับ ออก พุจ เจ็ง อน แป วาล คุด มโบละ ตัก งูด เกาลำ เน วาล ดาย 5แป โตะ ตัก เน แลว เอิญ ตอนฮับ แป ก็ กุญ ครอ ระ แป มโบละ ป็อง จะ อิมๆ วาล ซัง แป กอย เริล นอ” อับราฮัม อัง “เออะ ดิห” อัห อัง
6อับราฮัม ก็ เล็ง กุด พาเต็น นำ ไล ซารา เอิด แปง ซาลี เลาะๆ แพะ ทัง #ค 6 แพะ ทัง ทัง อัห แย็ด ปะมาน 7 คะนาน แอง คนมปัง เวิดๆ 7อับราฮัม ก็ เล็ง จัก เอิด ควัน งัว ซีเติน มี นัง เลาะลัห นัง นำ ก็ อน ตัก ลูกนอง มเบิล แอง ซะ ป็อง เวิดๆ 8นำ ก็ เอิด เนย เอิด นม เคิบ เซ็จ งัว ตัก อัห แอง แลว นัน พระ อน ตัก แพะ ล็อง นัน ป็อง อัห ก็ ป็อง จะ อุ นำ ก็ ญ็อง เพา อัห อุ ตัก งูด เกาลำ ติๆ นดิ อัห นัน 9อัห ก็ ซ็วน นำ ฮุนเน “ซารา อุ พานเดย เออะ” อัห อัง “นำ อุ ตัก พาเต็น นัน” อับราฮัม อัง
10มี มี ล็อง นัน #ค 10 มี แพะ ล็อง โตะ แอว และ อับราฮัม นัน มี ล็อง เป็น เอาซาง เปียะ ล็อง เป็น เทวาดา ไล อับราฮัม ฮุนเน “วาง แทะ ซัวะ เน เอิญ ก็ ลบ วัล โตะ แอว และ แป วัล ซีเละ ดาย ญาม นัน ซารา เกิด ควัน อัหคล็อง มี ล็อง พอดี” นำ อัง ซารา ก็ ปัง แญง อัห อุ ตัก ปะตู เต็น แทะ ลอล อัห นัน 11อับราฮัม เคิบ ซารา ก็ มแบร็ห แลว นอ ซารา ก็ ปน แอ็ม กำนด มี ควัน แลว 12ซารา เม็จ อัห จ็อก ฮุนนะ นำ ก็ ดึก เซด อุ ใน ใจ ออ นำ จ็อก ใน ใจ คือเน “เอิญ ก็ มแบร็ห แลว คล็อง เอิญ ก็ มแบร็ห แลว เอิญ จบ มี ควัน กุญ จังนัก บ็อห” ซารา อัง
13เยโฮวา ก็ ซ็วน อับราฮัม ฮุนเน “เป็น ตัก ซีวะ ซารา โซะ เซด ซีวะ นำ กึด เค็ย นัง ออ มแบร็ห แลว มี ควัน ไอ มี กุญ 14มี ซีวะ ตี เอาซาง แอง ไอ มี กุญ บ็อห ดอม เนอะ เล็ห ซัวะ เน วาง แทะ เอิญ ก็ โตะ วัล ซารา ก็ เกิด ควัน อัหคล็อง พอดี” เอาซาง อัง 15ซารา เม็จจึด เค็ย เอาซาง เม็จจึด กำกึด ออ นำ ก็ นเจิก นำ ก็ มแบล “เอิญ ไอ มี กุญ เซด” นำ อัง เอาซาง ก็ ซวัล นำ ฮุนเน “มัห เซด นังเลาะ ดาย” เอาซาง อัง
อับราฮัม ซ็วน เลือง เมือง โซโดม
16เจ็นนัน ปึง อัหคล็อง แพะ ล็อง นัน ก็ เริล ออ อัห และ เริล เมือง โซโดม อับราฮัม ก็ ซับ ซง อัห มี คัล รวง 17เยโฮวา ก็ จ็อก ฮุนเน “เอ เอิญ งเกริม เลือง ตี เอิญ บัก และ แอง เน ไอ มี ระ อับราฮัม เม็จ ก็ ไอ มี เลาะ ก้า 18บัดนะ ควัน งา อับราฮัม ก็ ดก เล็ห เป็น กรอก จ็อง ดุห อัห ก็ เป็น กรอก ซำคัน ดุห บัดนะ นโดน ครำ มด จู กรอก ตัก โลก แพนซิก เน ก็ กุญ เลาะ ญอน กรอก นำ 19เอิญ ก็ เลือก เอิด นำ แลว ระ นำ ไล ควัน ออ เจือ ปัง แญง เอิญ เลาะๆ บัดนะ ระ ควัน นจะ ควัน ลาน นำ รักซา แญง เอิญ ระ อน เลาะๆ ระ อัห เป็น ครำ เลาะ ครำ ซือ ไอ มี ตี ติ ตี คอล เอิญ ซันญา เคิบ นำ แลว เอิญ ก็ ต็อง รักซา แญง ซันญา คอง ออ เอิญ ไล เลือง ตี เอิญ บัก และ แอง เน ระ นำ เม็จ ก็ เลาะ ฮัห” เอาซาง อัง
20เยโฮวา ก็ ลด ไล อับราฮัม ฮุนเน “ดก ครำ อัห พอง เมือง โซโดม เคิบ เมือง โกโมรา ดาย อัห เค็ย ครำ เปียะ เมือง นัน แร็ง ดุ อัห แอง ซะ ไอ มี เลาะ ดก เกิน อัห แอง ลุห ซาปะ ซาเปด 21เอิญ เริล ดอม อ็อญ อัห วาล อ็อญ เจือ อัห กิว แอง ซะ ไอ มี เลาะ มอก อัหซอ พอง นัน ซีเละ อัน กัน อัห ไอ มี กิว แอง ซะ ราย ซีเละ เอิญ ก็ เม็จ มด” เยโฮวา อัง
22ทาเน ปาม เปียะ ล็อง นัน ก็ จูล เริล ตัก เมือง โซโดม นเซ็บ แต เยโฮวา ควะ ญ็อง อุ เคิบ อับราฮัม นัน 23อับราฮัม ก็ ติ โตะ ซ็วน นำ ฮุนเน “เอาซาง เฮย มัห ไอ มี จบ มเบิล ครำ เลาะ เลิม เคิบ ครำ ไอ มี เลาะ นัน ก้า 24จับ มี ครำ เลาะ ฮาซิบ ล็อง อุ ตัก เมือง โซโดม นัน มัห ก็ ไอ มี จบ มเบิล แอ็ม ครำ เลาะ นัน เลิม เคิบ อัห มด ก้า มัห ญ็อก แอ็ม โทด อัห ก็ กุญ กา 25ครอ เคิบ มัห เตาะ อำ มัห แอง เตาะ ดาย เอิญ กึด เค็ย มัห ไอ มี จบ มเบิล แอ็ม ครำ เลาะ เลิม เคิบ ครำ ไอ มี เลาะ นัน ก้า มัห เป็น ล็อง ตี ตัดซิน โลก เน แลว มัห ก็ ต็อง แอง แคระ อุ แลว นอ” อับราฮัม อัง
26เยโฮวา ก็ ซวัล นำ คือเน “กัน เอิญ เม็จ ครำ เลาะ ฮาซิบ ล็อง ตัก เมือง โซโดม นัน เอิญ ก็ ไอ มี มเบิล ครำ เมือง นัน เตาะ เอิญ ญ็อก แอ็ม โทด อัห ก็ กุญ เอิญ ไอ มี มเบิล อัห ญอน มี ครำ เลาะ ฮาซิบ ล็อง อุ ตัก นัน” นำ อัง
27อับราฮัม ก็ ซ็วน เอาซาง วัล “ครอ เคิบ มัห เตาะ อำ มัห ทือ เอิญ ดาย งกี เฮย เอิญ เอิด ใจ จ็อง ซ็วน มัห วัล เอิญ ก็ เป็น ครำ มาลือ เอิญ ไอ มี ซิด ซ็วน ซีวะ ตัก มัห เตาะ ดาย 28จับ ฮาซิบ ล็อง นัน คาด ฮา ล็อง ลือๆ มี แต ซีซิบ ฮา ล็อง ลือๆ มัห ก็ ไอ มี มเบิล อัห มด ตึง เมือง นัน ก้า” นำ อัง เอาซาง ก็ ซวัล นำ เค็ย “กัน เอิญ เม็จ มี ครำ เลาะ ซีซิบ ฮา ล็อง เอิญ ก็ ไอ งกิ มเบิล อัห เตาะ” เอาซาง อัง
29อับราฮัม ก็ ลบ วัล ซ็วน เอาซาง คือเน “จับ มี ซีซิบ ล็อง ดุห” นำ อัง “กัน มี ครำ เลาะ ซีซิบ ล็อง มาลือ เอิญ ก็ ไอ มี มเบิล อัห เตาะ” เอาซาง อัง 30อับราฮัม ก็ ซ็วน เอาซาง วัล “ครอ เคิบ มัห เตาะ อำ งเคาะ อ็อด อัง เอิญ ดาย เอิญ ครอ ซ็วน มัห วัล กัน มี ซามซิบ ล็อง มัห มเบิล อัห อัน” นำ อัง “ไอ มี มเบิล เตาะ” เอาซาง อัง
31อับราฮัม ก็ ซ็วน เอาซาง วัล “เอาซาง เฮย เอิญ เอิด ใจ จ็อง ฮาน ซ็วน มัห ซีเละ นะ ดาย ดก เอิญ ซ็วน มัห แลว ครอ เคิบ มัห อำ มัห ทือ อำ มัห โป เอิญ ดาย กัน มี ครำ เลาะ มี ซาว เดียว มัห มเบิล อัห อัน” นำ อัง เอาซาง ก็ ซวัล นำ “กัน เอิญ เม็จ มี ครำ เลาะ มี ซาว ล็อง ตัก เมือง นัน เอิญ ก็ ไอ งกิ มเบิล อัห เตาะ” เอาซาง อัง
32นำ ก็ ลบ วัล ซ็วน เอาซาง ฮุนเน วัล “ครอ เคิบ มัห เตาะ งกี เฮย อำ มัห อ็อด อัง เอิญ ดาย เอิญ ครอ ซ็วน มัห มี ลบ เดียว นะ ก็ ปอ จับ มัห เม็จ มี ครำ เลาะ ตัก เมือง นัน มี ซิบ เดียว ดุห มัห อัง จังนัก บ็อห” นำ อัง เอาซาง ก็ ไล นำ ฮุนเน “กัน เอิญ เม็จ มี ครำ เลาะ ตัก เมือง นัน มี ซิบ ล็อง เอิญ ก็ ไอ มี มเบิล แอ็ม อัห เตาะ” เอาซาง อัง
33แลว เยโฮวา จ็อก เคิบ อับราฮัม แลว เยโฮวา ก็ เริล ออ อับราฮัม ก็ วัล เจิง ออ
Valgt i Øjeblikket:
เกาตีนา 18: Prai
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Global Partners