Jan 13
13
Jézi ka lavé pyé so disip
1A té roun jou anvan lafèt Pak jwif, Jézi té savé so lèr té rivé pou li té lésé latè-a é alé jwenn so Papa. I té montré moun latè ki té krè an li kouman li té kontan yé, é li té kontan yé dépasé kontan.
2Jézi ké so disip té ka manjé. Djab-a té déja mété annan tchò Jida pitit Simon Iskaryòt lidé trayi Jézi.
3Jézi té savé a Bondjé ki té voyé l, li té ka viré koté Bondjé, é Papa-a té mété tout bagaj an so lanmen.
4I lévé di tab-a, i tiré so lenj é li maré so ren ké roun twèl létof.
5Epi, li vidé dilo annan roun basin é i koumansé lavé pyé so disip; i té ka swiyé yé ké twèl-a i té maré annan so ren.
6I rivé douvan Simon Pyèr, ki di li: “To, Mèt, to lé lavé mo pyé?”
7Jézi réponn li: “Sa mo ka fè-a, to pa pouvé konprann li anprézan, to ké konprann li plita.
8Pyèr di li: “Non, mo péké janmen lésé to lavé mo pyé.” Jézi réponn: “Si mo pa lavé to pyé, to péké gen anyen ka wè ké mo ankò.”
9Simon Pyèr di: “Mèt, si a sa, a pa mo pyé rounso pou lavé, mé lavé mo lanmen ké mo tèt osi!”
10Jézi di li: “Sala ki lavé so kò déja prop, i bizwen lavé so pyé rounso. Zòt déja prop, mé a pa zòt tout ki prop.”
11Jézi té déja savé ki moun té ké trayi l, a pou sa li di: “A pa zòt tout ki prop.”
12Lò Jézi fini lavé yé, i viré mété so lenj, é li asi bòd” tab-a, é i di yé: “Ès zòt konprann sa mo fini fè pou zòt-a?
13Zòt ka aplé mo Mèt ké Bondjé, é zòt ganyen rèzon, piski a sa mo sa vrè.
14Mé si mo menm ki sa zòt Mèt ké Bondjé, mo djokoti lavé zòt pyé, zòt osi, zòt divèt lavé zòt pyé roun a lòt.
15Mo bay zòt roun ègzanp pou zòt pouvé fè kou mo fè pou zòt.
16Sa mo ka di zòt-a a lavérité, pyès sèrvitèr pa pli gran pasé so mèt, ni pyès mésajé pa pli gran pasé sala ki voyé l-a.
17Anprézan zòt konèt lavérité, é a pa dé kontan zòt ké kontan si zòt fè sa.
18Mo pa ka palé pou zòt tout, mo konèt sa mo chwézi. Mé, sa Liv Bondjé di ganyen pou fèt vrè, i ékri: “Sala ki té ka manjé dipen-an ké mo, a li menm ki lévé lanmen kont mo.”
19Anprézan, Mo ka di zòt sa anvan sa fèt, pou zòt krè mo sa moun mo yé-a, lò sa ké rivé.
20Sa mo ka di zòt-a a lavérité, sala ki risouvwè moun mo voyé-a ka risouvwè mo, é sala ka risouvwè mo ka risouvwè moun ki voyé-a.”
Jézi di ki moun ki ké trayi li
21Aprè Jézi fini di sa, so lèspri té troublé, é i di kou dilo klè ansou roch: “Sa mo ka di zòt-a a la vérité, roun annan zòt ké trayi mo.”
22So disip-ya té débousolé, yé jité roun kout wèy roun ansou lòt, yé té ka doumandé yé kò di ki moun li té ka palé-a.
23Roun annan yé, disip Jézi té kontan-an, té asi tou proch Jézi.
24Simon-Pyèr fè li sign pou li doumandé Jézi di ki moun li té ka palé.
25E Sa disip-a panché so tèt bòdi Jézi, li di: “Mèt, di ki moun ou ka palé-a?”
26Jézi réponn: “Mo ké tranpé sa moso dipen-an annan pla-a. Sala mo ké bay li-a, a li ké trayi mo.” Ansou sa, Jézi pran moso dipen-an, li tranpé l, é li lonjé l pou Jida, pitit Simon Iskaryòt.
27Dipi Jida té pran moso dipen-an, Djab-a antré annan li. Jézi di li: “Sa to ganyen pou fè-a, fè li vitman!”
28Pyès annan so disip ki té bòdi tab-a pa té konprann poukisa Jézi té di li sa.
29Kou a té Jida té ka tchenbé sak soumaké-a, dézoutrwa té ka pansé, ki Jézi té ka di li achté sa yé té bizwen pou lafèt-a, ou byen bay moun pov lacharité.
30Jida li menm, pran moso dipen-an, é li kouri soti dèrò. Lannwit té déja tonbé.
Rounnòt koumannman
31Lò Jida pati, Jézi di ròt disip-ya: “Anprézan, moun ka wè laglwar Pitit Wonm-an, é laglwar Bondjé-a an Li.
32Kou Pitit Wonm-an fè moun wè laglwar Bondjé-a an li, Bondjé Li menm ké fè moun wè laglwar Pitit Wonm-an, é li ké fè l tanto.
33Mo timoun-yan, mo pa ké rété lontan ké zòt ankò. Zòt ké chaché mo, mé mo ka di zòt kou mo déja di jwif-ya: “Zòt pa pouvé alé koté mo ka alé-a.
34Anprézan mo ka bay zòt roun nouvo koumannman: A pou zòt kontan zòt roun a lòt. Enren, kou mo kontan zòt, kontan zòt roun a lòt.
35Si zòt kontan zòt roun a lòt, tout moun ké savé zòt sa mo disip.”
Jézi di Pyèr ké fè konsi li pa konèt li
36Simon Pyèr doumandé l: “Mèt, koté to ka alé?” Jézi réponn li: “Koté mo ka alé-a, to pa pouvé swiv mo anprézan, mé plita to ké pouvé.”
37Pyèr di li: “Mèt, poukisa mo pa pouvé swiv to anprézan? Mo menm, mo jis paré mouri pou to!
38Jézi di li: “Pyèr, to krè to paré mouri pou mo? Enren, sa mo ka di to-a a lavérité, anvan kòk chanté douvan jou, to ké déja di trwa fwè to pa konèt mo.”
Valgt i Øjeblikket:
Jan 13: GCR07
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Guyana French Creole Gospel of John © Suriname Bible Society, 2007.
