मत्ती 12
12
आराम का दन का बारा में परसण
(मरकुस 2:23–28; लूका 6:1–5)
1 #
वे.वि 23:25
वीं टेम ईसू आराम का दन खेता में वेन जारिया हो अन वाँका चेला ने भूक लागी तो वीं गव की ऊम्याँ तोड़-तोड़न खाबा लागा। 2फरीसी ओ देकन वाँकाऊँ क्यो, “देक, थाँरा चेला वो काम करे हे, ज्यो आपणाँ मूसा का नेमा का हस्याबूऊँ आराम का दन करणो हव कोयने हे।”
3ईसू वाँकाऊँ क्यो, “कई थें ओ ने भण्यो के, जद्याँ दाऊद अन वाँका हण्डाळी ने भूक लागी तो वणा कई किदो? 4वो अन वींका हण्डाळ्याँ परमेसर का मन्दर में ग्या अन चड़ाई तकी रोट्याँ खादी, ज्याँने याजक ने छोड़न कुई दूजाँ ने खाता हा? 5कई थें नेमा में ने भण्यो के, आराम का दन याजकईस मन्दर में काम करन आराम का दन का नेम ने तोड़े हे? पण वाँने कुई भी कई ने केवे हे। 6पण मूँ थाँकाऊँ कूँ हूँ के, अटे ज्यो हे, वो मन्दरऊँ भी मोटो हे। 7#मत्ती 9:13; होसे 6:6यद्याँ थें आँको मतलब हमजता तो थाँ जाणता के, ‘मूँ दयाऊँ राजी वूँ हूँ, बलीदानऊँ ने,’ तो थाँ बना दोस का मनकाँ पे दोस ने लगाता। 8काँके मनक को पूत तो आराम का दन को भी परबू हे।”
लुला हात का मनक ने हव करणो
(मरकुस 3:1–6; लूका 6:6–11)
9ईसू वटेऊँ चालन यहूदियाँ का परातना घर में आया। 10वटे एक मनक हो, जिंको हात लुलो हो। मनकाँ ईसू पे दोस लगाबा का वाते वाँकाऊँ पूँछ्यो, “कई आराम का दन कणी मांदाने हव करणो नेमा का हिसाबऊँ सई हे के ने?”
11 #
लूका 14:5
तो ईसू वाँकाऊँ क्यो, “थाँकामें अस्यो कूण हे जिंको एक गारो वे, अन आराम का दन खाड़ा में पड़ जावे, तो वो वींने बारणे ने काड़ी कई? 12पछे मनक तो एक गाराऊँ घणो अनमोल हे। ईं वाते आराम का दन भलो करणो हव हे।” 13तद्याँ ईसू वीं लुला मनकऊँ क्यो, “आपणो हात लाम्बो कर।”
वणी हात लाम्बो किदो अन वींको हात दूजाँ हात का जस्यान पेल्या हो वस्यान हव वेग्यो। 14पछे फरीसी वटूँ पराग्या अन ईसू ने मारबा को गेलो होदबा लागा।
परमेसर को थरप्यो तको दास
15ईसू वणा लोगाँ की बात ने जाणन वटाऊँ पराग्या अन नरई लोग-बाग वाँका पाच्छे चालबा लागा, अन वाँकाणी वाँ हाराई ने वाँकी मांदकीऊँ हव किदा। 16पण वाँकाणी वाँने हेंचेत किदा के, ईं बात को परच्यार मती करो। 17यो ईं वाते व्यो के, परमेसर का आड़ीऊँ बोलबावाळा यसाया का मुण्डाऊँ परमपिता परगट किदो, वो पूरो वे,
18 #
यसा 42:1–4
“देको, यो मारो दास हे,
जिंने में थरप्यो हे,
मारो लाड़लो हे,
जणीऊँ मूँ घणो राजी हूँ।
मूँ मारी आत्मा वींमें राकूँ
अन वो हाराई मनकाँ को न्याव करी।
19वो ने कदी कणीऊँ लड़ई करी, अन नेई हाका-भार करी,
अन नेई बजार में कुई वींकी अवाज हूणी।
20जद्याँ तईं वो मनकाँ को ईमानदारी का हाते न्याव ने करी वो किंकोई नास ने करी,
वीं पलई वाड़ा का पतला टिण्डका का जस्यान वाँको वो कन दिवा का धूवा का जस्यान कमजोर वो।
21पछे हाराई मनक आपणी आस वींका नाम पे राकी।”
ईसू अन बालजेबूल
(मरकुस 3:20–30; लूका 11:14–23)
22तद्याँ लोग-बाग हुगली आत्मा धस्यी तका एक मनक ने ईसू का नके लाया ज्यो वणी आत्मा की वजेऊँ आंदो अन गूँगा हो। अन ईसू वींने हव किदो, अन वो बोलबा अन देकबा लागो। 23ईंपे हारई मनक ओ देकन अचम्बा में पड़ग्या अन क्यो, “ओ कई दाऊद की ओलाद मसी हे?”
24 #
मत्ती 9:34; 10:25 पण फरीसियाँ ओ हुणन तरत क्यो, “ओ तो हुगली आत्मा का सरदार बालजेबूल की मदतऊँ हुगली आत्मा काड़े हे।”
25ईसू वाँका मन ने जाणन वाँकाऊँ क्यो, “कणी भी राज में यद्याँ फुट पड़ जावे, तो वो नास वे जावे हे अन कुई नगर कन घर-परवार में फुट वेवे हे, वो अटल ने रेई। 26अन यद्याँ सेतानईस सेतान ने काड़े, तो वो खुद कोईस विरोदी वेग्यो हे। पछे वींको राज कस्यान टक्यो तको रेई? 27यद्याँ मूँ बालजेबूल की मदतऊँ हुगली आत्मा नवाड़ू हूँ, तो थाँका चेला किंकी मदतऊँ नवाड़ो हो? ईं वाते वींइस थाँने ईं बातऊँ गलत साबत करी। 28पण यद्याँ मूँ परमेसर की आत्मा की मदतऊँ हुगली आत्मा नवाड़ू हूँ, तो परमेसर को राज थाँका नके आ पूग्यो हे।
29“यद्याँ कुई तागतवर मनक का घर ने लुटणो छावे हे तो वो पेल्याँ वीं तागतवर मनक ने बांदी। तद्याँ वो वींका घर ने लूट सके हे।
30 #
मर 9:40
“ज्यो मारा हाते ने हे वो मारो विरोदी हे, ज्यो मारो चेला वेबा का वाते मनकाँ ने भेळा ने करे हे, वो वाँने माराऊँ छेटी करबा को मस वेवे हे। 31ईं वाते मूँ थाँकाऊँ कूँ हूँ के, मनक का हाराई पाप अन मुण्डाऊँ किदी तकी बुरई माप किदी जाई, पण पुवितर आत्मा की बुरई कदीई माप ने किदी जई। 32#लूका 12:10ज्यो कुई मनक का पूत का विरोद में कई भलो-बुरो बात केई, वींको ओ गुनो परमेसर माप कर सके हे, पण ज्यो कुई पुवितर आत्मा का विरोद में कई केई, वाँको यो गुना ने तो ईं जुग में अन नेई आबावाळा जुग में माप किदो जाई।
जस्यो रूँकड़ो वस्यो फळ
(लूका 6:43–45)
33 #
मत्ती 7:20; लूका 6:44 “यद्याँ थाँ हव फळ पाणा छारिया हो तो थाँने एक हव रूँकड़ो लगाणो पड़ी अन बुरा रूँकड़ा लगावो तो बुरा फळइस पावो, काँके रूँकड़ो आपणाँ फळऊँ ओळक्यो जावे हे। 34#मत्ती 3:7; 23:33; लूका 3:7; मत्ती 15:18; लूका 6:45हो हाँप का बच्या, थें बुरा वेन कस्यान हव बाताँ कर सको हो? काँके ज्यो मन में हे, वोईस मुण्डा में आवे हे। 35हव मनक मन का हव भण्डारऊँ हव बात काड़े हे अन हूँगलो मनक मन का हूँगला भण्डारऊँ हुगली बाताँ काड़े हे।
36“मूँ थाँकाऊँ कूँ हूँ के, जीं जीं फोगट की बाताँ मनक केवे हे, न्याव का दन वीं हाराई बाताँ को वाँने हस्याब देणो पड़ी। 37काँके थाँ थाँकी किदी तकी बाताँ के मस दोसी अन बना दोस का ठेराया जावो।”
हरग का हेन्याण की मांग
(मरकुस 8:11–12; लूका 11:29–32)
38 #
मत्ती 16:1; मर 8:11; लूका 11:16 ईंपे कुई सास्तरी अन फरीसी ईसुऊँ क्यो, “हो गरू, माँ थाँका हाताँ को कई परच्यो देकणा छावाँ हा।”
39 #
मत्ती 16:4; मर 8:12 पण ईसू वाँने क्यो, “ईं दनियाँ का हूँगला अन कुकरमी लोग हरग को हेन्याण मागे हे, पण परमेसर का आड़ीऊँ बोलबावाळा योना का हेन्याण ने छोड़न कुई दूज्यो हेन्याण वाँने ने दिदो जई। 40#योना 1:17योनो तीन दनाँ तईं माछळी का पेट में रियो, वस्यानीस मनक को पूत तीन दन पाताळ में रेई। 41#योना 3:5नीनवे नगर का लोग-बाग न्याव का दन ईं जुग का लोगाँ का हाते उटन थाँने दोसी बणाई, काँके वाँकाणी योना को परच्यार हामळन वणा आपणाँ मन पापऊँ फेर लिदो अन देको, अटे ज्यो हे, वो योनाऊँ भी मोटो हे। 42आतमणी दिसा की राणी न्याव का दनाँ में अणी जुग का मनकाँ का हाते उटन थाँने दोसी बणाई, काँके वाँ राजा सुलेमान को ज्यान हुणबा का वाते धरती का अणी खुणाऊँ वीं खुणा तईं अई अन देको, अटे ज्यो हे वो सुलेमानऊँ भी मोटो हे।
हुगली आत्मा को पाछो आणो
(लूका 11:24–26)
43“जद्याँ हुगली आत्मा मनक मूँ निकळ जावे हे, तो हून्नी जगाँ में रईम्बो का वाते जगाँ होदती रेवे हे अन वींने जगाँ ने मले हे, 44तद्याँ वाँ आपणाँ खुदऊँ केवे हे, ‘मूँ आपणाँ वीं घर में जटाऊँ निकळी ही, पाच्छी परी जाऊँ।’ अन पाच्छी फरन आवे तो वटे हुन्नो, साप-सपई अन हारोई ठाणे पावे हे। 45तद्याँ वाँ जान आपणाँऊँ ओरी हुगली हात आत्माने आपणाँ हाते ले आवे हे, अन वीं वींमें धसने वटे वास करे हे, अन वीं मनक की पाछली दसा पेल्याऊँ भी हुगली वे जावे हे। ईं जुग का हूँगला मनकाँ की दसा भी अस्यानीस वेई।”
ईसू की बई अन भई
(मरकुस 3:31–35; लूका 8:19–21)
46अबाणू तईं ईसू मनकाँ की भीड़ऊँ बाताँ कररियो हो, तद्याँ वाँकी बई अन भई बारणे ऊबा हा अन वाँकाऊँ बाताँ करणा छाता हा। 47ईं वाते कणी ईसुऊँ क्यो, “देक थारी बई अन थारो भई बारणे ऊबा हे, अन थाँराऊँ बाताँ करणा छावे हे।”
48यो हामळन ईसू केबावाला ने क्यो, “मारी बई कूण हे? अन कूण हे मारा भई?” 49अन आपणाँ विस्वास्याँ की आड़ी आपणाँ हात लाम्बो करन क्यो, “देको, मारी बई अन मारो भई ईं हे। 50काँके ज्यो कुई मारा हरग का बाप की मरजी पे चाले, वो मारो भई, मारी बेन अन मारी बई हे।”
Valgt i Øjeblikket:
मत्ती 12: एम टी आर
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
(c) 2010-2017, New Life Computer Institute. All rights reserved