मूक चेलाकू 8
8
1साहूल#8:1 तयोमरे होड़कू पउलूस माःआनकू कतावाया हाँय ननाँय साहूल हवे। हंडाय दोहोना अरू इसतपनूसराः गुजुःरे राययाने।
साहूल कलसियारिकुःआ होड़कूय संतावतेरा
हनमेला एरुसलेम सहरराः कलसियारिकुःआ होड़कू लगा संताव बुँहड़ीयान। अरू ईसूरिकुःआ मूक चेलाकू अड़ाःतेडखन जमा बिसवासी होड़कू एहूदिया छतर अरू समरिया छतररेकू ञीर सितिर-बितिरयान। 2भगवानकू मनवेयता हँकुःआ होड़कू इसतपनूसकू तीलतेरा अरू हाँय लगा मुरुककू फिकीरावयान। 3अरू साहूल दो कलसियारिकुःआ होड़कू लाय एंडाकू लगाय बुँहड़ीतेरा अरू ओड़ाः ओड़ाः बोल घड़ीन हाँय बिसवासी होड़कू, मरदकू अरू अइमीकू, एचे उडुंगकेडकूखन जेहेलरेय एचे सींगकुःआ।
समरिया छतररे पिलिपराः परसार
4ञीर सितिर-बितिरनेना हँकुःआ बिसवासी होड़कू सेनेडा हना जमा देसरिकुःआ होड़कू एचेरे ईसूराः नपाय सरवनकू परसार उदुःतेरा। 5दो पिलिप#मूक चेला 5:6 समरिया छतरराः मीटोंग मरंग सहररेय सेनेडा अरू ईसू मसी बदीरेय परसार उदुःतेरा। 6हंडाकुःआ होड़कू पिलिपराः कताकू अयूमतेरा अरू हाँय एचेतेरा बयाव जुवाः इयाःआ बुताकूनकू ञेलतेरा दो हाँयराः बड़रा तिंगीड घड़ीनकू अयुमेःआ। 7भूतकू होड़कू अते मुरुक खिररी घड़ीनकू उडुंगनेना अरू लकवा ञेडतो होड़कू अरू ठुठा होड़कू होंकू नपाययान। 8हनालगा हना सहररिकुःआ होड़कू मुरुककू बहालयान।
सिमोन ञावीग जादो होड़
9दो हना सहररे मी होड़ होड़ दोहोना। हाँयराः ञाव दोहोना सिमोन। हाँय तोनोंग बेला वरी समरिया छतररिकुःआ होड़कू एचेरे बरा रूपी एचेतेडखने एचे बयावतेडकुःआ अरू हाँय अनँयग बदीरे होड़कू एचेरेय बड़वारा। 10लचार होड़कू अरू मरंग मरंग होड़कू हों हाँयराः कताकू मनाःआ अरूकू कताया, “सतायरे नाँयग होड़ मुरुक मरंग जंगर, होड़कू कतावाता भगवानराः हना जंगर हवे।” 11हाँय मुरुक बेला आँयगराः देवइर बुता एचेवाडखन होड़कूय एचे बयावा। हनालगा हाँय मुरुककू मनेवाया। 12मनदो पिलिप भगवानराः राइजराः नपाय सरवन अरू ईसू मसीराः ञाव बदीरेय परसारतेरा दो हँकुःआ जमा होड़कू, मरदकू अरू अइमीकू, हाँयराः कता बिसवासकेडखन बतिसमाकू गोःतेरा। 13सिनिमोन हों बिसवासतेडखन बतिसमाय गोःतेरा। हनते हाँय पिलिपे ओतोंग सेनेडा अरू ञेनेल ञेलरे होड़कू नपाय जुवाःआ अरू बयाव जुवाः इयाःआ बुताकून ञेलतेडखने बयावयान।
14एरुसलेमरेकू दोहोना ईसूरिकुःआ मूक चेलाकू अयूमतेरा, समरियारिकुःआ होड़कू भगवानराः सरवनकू मनेवातेरा, माःआन। दो हँकू पतरस अरू एहुना हंडाकू वारतेरा। 15हँकुःआ होड़कू एचेरे हनमेला वरी भगवानराः सुद बिरुवा मेर वेगगान अरू हँकू, परबू ईसू मसीराः ञावते एकला बतिसमाकू गोःतेरा। 16हनालगा हँकिन हंडाकिन सोदोरनेना दो हंडाकुःआ होड़कू भगवानराः सुद बिरुवा पवाः लगाकिन अरजीतेरा। 17हनते पतरस अरू एहुना हँकुःआ होड़कू सुद बिरुवाकू पवाः लगा तिःईकिन खेपातेरा।
18मूक चेलाकिन तिःईकिन खेपातेड दो हँकुःआ होड़कू लगा भगवान आँयग सुद बिरुवाय एमेतेरा। दो सिमोन नाःआ जमाकूने ञेलतेरा अरू हँकिन एचेरे ढिबुवा एमेतेडखने कताया, 19“नाःआ इयाःआ दहिन ईंग हों ओवायिंगबा, जेमहा तोनोंगीग होड़ एचेरे ईंग तिःईयिंग खेपा दो हाँय सुद बिरुवाय पवाव जुवाः।”
20दो पतरस कता कुदातेरा, “आम भगवानराः दहिन ढिबुवाते किजा लगाम ओंगलेतना जा? आम अनमराः ढिबुवा सुदाम लाय जुवाःता। 21आमराः इंदरी भगवान मड़ंगरे नपाय कोवानेःआ। हनालगा आमके अलिंग एचेयतना हना सेवारे कहिसाः इताड सहे हातपात कोवानेःआ। 22नाःआ इया बेलूराः ओंगोलकून अते जीवमे कुदा अगू अरू परबू एचेरेम अरजी। होनायाःकून करे आमराः कसूर ओंगोलकून हाँय बराव एंडागोडता। 23ईंग सुदीयतना आम इराते पेरेगतो इदानमेःआ अरू कनासूर कसूरते आम जीव पेरेगतो इदा।”
24दो सिमोन कतातेरा, “अबा कताकेरा हना कताकूनरे तोनोंगाः कता ईंग जीवरे अहा होयाः लगा, ईंग बदीरे भगवान एचेरेबा अरजी।”
25पतरस अरू एहुना हना छतररे भगवानराः सरवन कता उदुः लगा चबानेन दो हँकिन एरुसलेम अगीकिन कुदा सेनेडा। सेनेन सेन दूररे हँकिन ईसूराः नपाय सरवन समरिया छतरराः एटाः एटाः गाँवरेकिन परसार उदुःतेरा।
पिलिप मरंग हातपात होड़ सुदा
26मी दिन परबू भगवानरीग बराहील पिलिप एचेरेय कतातेरा, “सपड़ाःमे अरू एरुसलेम अते गासा सहर वरी सेनता हना दूरते दखिन अगीम सेन।” 27दो हाँय सपड़ावनेनखन तोराय, अरू सेनेन दूररे कूस देसरीग रानी कंदकीरीग मरंग हातपात होड़े ञेलतेरा। हाँय चकुराय दोहोना अरू हना राइजराः ढिबुवाकूनरीग जिमेवारी होड़े दोहोना। हाँयग होड़ एरुसलेम सहररे भगवान ओड़ाःरे भगवान जाग घड़ीन सेवा लगाय सेनेडा। 28अरू हाँय अनँयग देस अगी कुदान मेला हाँयराः रंतरे दुड़ुःनेनखन भगवानराः बड़रा कतायीग होड़ एसयाहराः कागदतेय बछाःआ। 29दो सुद बिरुवा पिलिप एचेरेय कताया, “आम हनानाः रंत अगीम सेन अरू मिनी जुदाबा सेन।”
30दो पिलिप हना रंत अगीय बतकाव सेनेडा अरू हाँयग होड़ भगवानराः बड़रा कतायीग होड़ एसयाहराः कागद बछाःतोय अयूमतेरा। अरू पिलिप हाँय एचेरेय होंबोरतेरा, “ने गो, आम बछाःतना हना कागदमे बुझाःतना जा?”
31दो हाँय कताया, “तोनोंगीग ईंग मेरकू कता बुझावगींग, दो ईंग करा इयायिंग बुझाः?” हनते हाँय पिलिप एचेरे रंत सेरमोरे हाँय सुदा दुड़ुः लगाय कतातेरा।
32दो हाँयग मरंग हातपात होड़ भगवानराः कागद अते ननाः पाठे बछाःआ;
हाँय पुजागे लगाकू गोःगेयता हाँयग भेड़ा इयाकू इदीतिरिया।
अरू हाँय ऊबकू ईर उडुंगता हँकुःआ होड़कू मड़ंगरे कलेकाले दोहोनता
हाँयग भेड़ा होन इया हाँय हों कलेकाले दोहोना।
33हाँयकू एचे बेग-हतावातेरा अरू हाँय नपायते मेरकू फड़ियावगडीग।
बेगर फड़ियावतेकू ञेड एंडातिरिया,
हनालगा हाँयरिकुःआ नइड़-बाँस होड़कू इये ञामकूता?#एस 53:7-8
34दो हाँयग होड़ पिलिप एचेरेय होंबोरतेरा, “ईंग मयावाडखन उदुःवायिंगमे, भगवानराः बड़रा कतायीग होड़ इये बदीरेय कतायतना? अनँयग बदीरे जा एटाः होड़ बदीरे?” 35दो पिलिप भगवानराः कागदराः हना पाठते बुँहड़ीतेडखन ईसू बदीरे नपाय सरवने कता उदुःतेरा।
36दो हँकिन सेनेन सेन दूररे हना संडक कुटीरे दाः दोहोना। दो हाँयग मरंग हातपात होड़ कतातेरा, “ञेलमे नंडा दाः इदा। ईंग बतिसमा एमे अते तोनोंग टटी-बेड़ा इदा जा?”
37[दो पिलिप कतातेरा, “आम जमा जीवतेम बिसवासगेतना दो बतिसमायिंग एमेवामता।”
दो हाँय कता कुदातेरा, “हाव, ईंग बिसवासगेतना ईसू मसी भगवानरीग बेटात हवे, माःआन।”] 38दो हाँयग मरंग हातपात होड़ रंत रोंकावगे लगाय हुकुमतेरा। हना तयोमरे बना होड़ उतरावनेनखन दाःरेकिन बोलोयान। अरू पिलिप हाँय बतिसमाय एमेवातेरिया।
39हँकिन दाः अतेकिन उडुंगनेन दो हननमेला भगवानराः सुद बिरुवा पिलिप रेम गोःयाड दो, मरंग हातपात होड़ हाँय मेरेय ञेलगडीग। मनदो हाँय सेना हनानाः दूर अगी मुरुक बहालनेनखन तोराय।
40मनदो भगवानराः सुद बिरुवा असदोद सहररे पिलिपे गोः सोदोरतिरिया अरू हाँय कइसरिया सहर अरीन सुदुरुः वरी जमा सहरकूनरे भगवानराः नपाय सरवन होड़कू एचेरे परसार उदुःवा घड़ीने सेना।
Valgt i Øjeblikket:
मूक चेलाकू 8: kfp
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© (Active) Wycliffe Bible Translators, Inc. All rights reserved.