लूका 12
12
पचघुचिया बदीरे सेताव
1हनमेला हजार हजार होड़कू ईसू एचेरेकू जुमावनेना अरू मुरुककू चोड होड़ेंगा। ईसू मड़ंग, चेलाकूतेन एचेरेय कता बुँहड़ीतेरा, “फरीसी होड़कू मेड अंजउड़ीकू एचेयता अरू हान सेबेल सोड़ा इया सेड़याव जुवाःता। हनालगा हँकू अते अपे सवासितीपे दोहोन। 2डबावतो इदा, हना जमा उघाड़ जुवाःता अरू ओकोत इदा, हान जमाकू सुदीगोडता। 3अपे अंदरारेपे कताकेरा हना बड़रा मरसलरेकू अयुमेता। अरू अपे ओड़ाः छिनारे जहड़नेनखनपे कताकेरा हना बड़रा सड़ुम चोटतेकू परसारगेता।
इये एचेरे बोर लगा इदा
(मती 10:26-31)
4ने ईंग सउंगताकू, अयुमेपे, अपेराः देह एकलाकू ञेड गोएग अवेयता हँकुःआ होड़कू अलोपे बोरोवाकुःआ। 5अपेके इये सुदा बोर लगा इदा, हनायिंग उदुःवापेता। अपे भगवानपे बोरोवा, हनाँय एचेरे अपेराः देह अरू जीव बनर नरगरे सोलोंगे लगा हातपात इदा। 6बारटोंग रिचकी ढिबुवाते पाँचटोंग गोरेलाकू किजानता। हनामिन अते मीटोंगीग गोरेला हों भगवान मेरेय लिड़िंगेयता। 7मुरुक बगरा गोरेलाकू अते हों अपे भगवान लगा मइद इदानपेःआ। अपेराः मेमेडटोंग ऊब हों भगवान गँड़ाव दोहोकेरा। हनालगा अपे अलोपे बोर।”
मान मरजइत सहे आड-बेकार
8हनते ईसू कताया, “ईंग बड़रापे अयूम। तोनोंगीग होड़ एटाःकू मड़ंगरे ईंगे मान मरजइतता दो मनुवारीग बेटात हों भगवानरिकुःआ सेरमो देसरिकुःआ बराहीलकू मड़ंगरे हाँये मान मरजइतता। 9मनदो तोनोंगीग, होड़कू मड़ंगरे ईंगे आड-बेकारवा दो, ईंग हों भगवानरिकुःआ सेरमो देसरिकुःआ बराहीलकू मड़ंगरे हाँयिंग आड-बेकारवायता।
10मनुवारीग बेटात बदीरे ओपता बड़राय बड़रा, हाँयग होड़राः कसूर, भगवान आँयगराः ओंगोल अतेय बराव एंडागोडता। मनदो सुद बिरुवाय ओपताता हाँय होड़राः कसूर, भगवान ओरोय बराव एंडातेरा।
11एटाः होड़कू अपे साब गोःकेडपेखन अरजी ओड़ाःरे अरू अदालइत ओड़ाःरे अरू नेताकू मड़ंगरेकू एचे चड़ाँपे दो, हनमेला अलोपे ओंगोल दोहोगे, माररे अबू चेले माःआनबू कतायता, माःआन। 12दो हननमेला सुद बिरुवा अपे उदुःवापेता चेले माःआन ककता इदा, हना।”
बुयांग गिरहतराः कहड़ी
13हनते हंड़ाकू दोहोना हँकू अते मी होड़ ईसू एचेरेय कताया, “ने गुरुजी, ईंग वगायिंगमे कतावा ईंग अपांगराः इताडे हटिंगवालिंग।”
14दो ईसू कताया, “ने गोय, ईंग अपेरीग फड़ियावदार अरू हटिंगदार इये तुलाकिरिंगा?” 15अरू ईसू हँकुःआ होड़कू एचेरेय कताया, “सवासितीपे दोहोन। जमा इयाःआ ललची अते अपेराः जीवपे बनसाव। तोनोंगीग जमा जइतकूने किजा जुमावगोड हों हाँयराः जीव नपाय ओरो दोहोनेना।”
16नानाः कता अते ईसू हँकू एचेरे मीटोंग अउल-तउल कहड़ीय कतातेरा, “मी होड़राः कियारीराः हुड़ू मुरुक जांगनेना। 17हाँय अनँयग जीवरेय ओंगोलतेरा, नाःआमिन हुड़ू दोहोय लगा ततेर कोवानेःआ। दो ईंग करेयिंग दोहोय?
18अरू हाँय अनँयग जीवरेय कताया, ईंग एचेरे मड़ंग दोहोना हना पला आडकेडखन एटाः नपाय मरंग पलायिंग तुलाता। 19पला तुलाकेडखन ईंग इनिंगतेयिंग कतायता, ईंग मुरुक बरिस लगा हुड़ू अरू जमा जइतकूनिंग बुता अदेरकेरा। नुँहू नपाय ईंग जोम ञूयता अरूयिंग लोड़ोनता अरू बहालतेयिंग दोहोनता।
20मनदो भगवान हाँय एचेरेय कतातेरा, ने बुयांग, तिसिंग रइत आम गोएग जुवाःताम। आम जुमावकेरा हना जमा इयेराः होयाःता?
21अनँयग लगा आन-धाने जुमावता हाँयग होड़ ननाँयग गिरहत होड़ इयाय दोहोनता। अरू ननन इयायीग होड़ भगवानराः मेडरे गिरहत मेरेय दोहोनता।”
भगवान एचेरेपे भरसागे
(मती 6:19-21,25-34)
22हनते ईसू चेलाकू एचेरेय कताया, “हनालगा अपे एचेरे ईंग कतायतना, अपेराः जीव लगा अलोपे ओंगोल कुहकाः, अले चिलाले जोम, माःआन। अरू अपे देह लगा अलोपे ओंगले, अले चिलाले तुसिंग, माःआन। 23जउः जीव अते अरू सोनहे देह अते मरंग कोवानेःआ। 24कवाःकूराः बदीरेपे ओंगले। हँकू मेरकू वेरता अरू ईरकेडखन ओड़ाःरे सहे पलारे हुड़ू मेरकू दोहोयता। मनदो भगवान हँकू जोम लगाय ओवाकूता। दो अपे तितीगकू अते मुरुक मइद कोवापेःआ जा? 25अपे अते इये ओंगोल कुहकाः घड़ीन अनँयगराः उमइर मी घंटा होंय बडे अवेयता? 26नाःआ मिनाः गुनहोनाः बुता हों अपे मेरपे बुता अवेयता दो अरू एटाः एटाःआ कता बदीरे चिला लगापे ओंगलेतना?
27अपे बहाकून बदीरेपे ओंगले, हन करा इया हरानता। हन मेर बुताता अरू सोनहे मेर तुलायता। अपे ईंगपे अयूम, मरंग राजा सुलइमान हों आँयगराः जमा सिंगार अते हना बहाकून इया सोनहे मेरेय तुसिंग अवेगाड। 28अपे ईंगपे अयूम। बीर तोनोंग दिन वरी हड़ियड़ दोहोनता अरू तयोमरे झुरा जुवाःता अरू होड़कू हना बीर ईर जुमावकेडखनकू बाल लो एंडागोडता। हनारे हों भगवान हना बीरकून सुघरे तुसिंगेता। दो ने हुडिंग बिसवास होड़कू, अपे तुसिंगे लगा नपाय सोनहे भगवान चिला लगा मेरेय एमेकेःआ? 29चिलाले जोम अरू चिलाले ञू, माःआन अलोपे ञाम, अरू ओंगोल कुहकाःरे अलोपे दोहोन। 30चउंदीसरिकुःआ होड़कू नाःआ इयाःआ कताकूनकू ञामता अरू अपेरीग अपांग भगवान सुदीयतना अपेके नाःआकूनराः जरूरी इदा, माःआन। 31मनदो भगवानराः राइजराः कताकूनपे ञाम, दो नाःआ जमाकून हों अँननपेराः होया जुवाःता।”
32ईसू अरूय कताया, “ने हुडिंग गउदारिकुःआ होड़कू, अपे अलोपे बोर। अपेरीग सेरमो देसरीग अपांग, आँयगराः राइज अपे एमेवापे लगा मंजूररे इदानिया। 33अपे अँननपेराः आन-धान अकिरिंगवाडखन होड़कूपे हटिंगगोडवा। अरू मेर जुनानता हना बगली अपे लगापे तुलाय। मेर चबानता अरू इनिग होड़ मेरेय इनिग अवेयता अरू दियाँकू मेरकू जोम अवेयता हना इयाःआ आन-धान#रूमी 14:17 सेरमो देसरेपे जुमावगोड। 34अपेराः आन-धान दोहोनता हननंडा अपेराः ओंगोल हों दोहोनता।
ईसूपे टकागोड ञवन
35अपेराः मयांग बड़ियाड़पे कास दोहोका अरू अपेराः ढिबरी सलगावगोड ञवन। 36सेवकिया होड़कू अँकूरीग मालिक बियाह अते अरीने कुदा वेग वरीकू टकागोड ञवनता अरू मालिक सोदोरकियानखन दुवारे टोकोःतान दो हाँय लगाकू गीगगोडता। अपे हों हँननकुःआ होड़कू इयापे बड़ाँः। 37मालिक वेगवाडखन आँयगरिकुःआ सेवकिया होड़कू सपड़ावतोय ञेलकूता दो, हँकुःआ सेवकिया होड़कूराः जीव नपाय दोहोनता। अपे एचेरे सताय कतायिंग कतायतना, हाँयग मालिक मयांग कासवाडखन हँकुःआ सेवकिया होड़कू जोम लगाय एचे दुडुःकूता अरू हँकूय नेत-नेवारकूता। 38मालिक हटिंग बरा रइतरे सहे मरंग भिनसाररे वेग होले, सपड़ावतोकू दोहोनता हँकुःआ सेवकिया होड़कूराः जीव नपाय दोहोनता।”
39हनते ईसू हँकू एचेरे एटाः कहड़ीय कतातेरा, “मीटोंग ओड़ाःरीग मालिक इनिग होड़ तुमिन बेलाय वेगता हनाय सुदी दो, हाँय जगलेय दोहोनता अरू इनिग होड़ मेरेय बोलो ओवायता। 40अपे मेनेरपे ओंगोलेता हनानाः बेला मनुवारीग बेटा वेगता। हनालगा अपे हों सपड़ावतोपे दोहोन।”
बिसवासगेयीग दोहोन बदीरे
41दो पतरस होंबोरतेड, “ने परबू, नाःआ अउल-तउल कहड़ी आम अले एकला लगाम कतायतना जा, जमा होड़कू लगा?”
42दो परबू ईसू कतातेड, “अपे अते कनहूनदार अरू नपाय दोदोहोयीग जिमेवारी होड़ इये हवे? एटाः सेवकिया होड़कू नपाय बेलारे जोम जिनिसकून एमेवाकू लगा मालिक मूक होड़े बड़ाँवतिरिया हनाँय हवे। 43मालिक वेग मेला हाँयग सेवकिया होड़ अनँयग बुता नपाय एचेयतेय ञेलेयता दो हाँयग सेवकिया होड़राः जीव नपाय दोहोनता। 44अपे ईंगपे अयूम, हाँयग मालिक हनाँयग सेवकिया होड़ एचेरे आँयगराः जमा जिनिसकूने जिमागोडता।
45मनदो अपे ओंगलेपे, हाँयग सेवकिया होड़ मालिकराः बदीरेय ओंगलेता, मालिक वेग लगाय कुबेरगेतना अरू हाँय एटाः सेवकिया, सेवकियायीनकूय ञेडता अरू आँयग जोम ञूकेडखने बूल जुवाःता। 46अरू हाँयग सेवकिया होड़ मेरेय टकागेयता हननमेला मालिक वेगता। दो हाँय मालिकतेन मुरुके डंडियावगेयता अरू बेगर बिसवासी होड़कू सुदाय वार एंडागोडेयता।
47सेवकिया होड़ मालिकराः ओंगोले सुसुदीःआ अरू सपड़ावतो मेरेय दोहोना अरू आँयगरीग मालिकराः हिछा इया मेरेय सलाःआ, हाँय मुरुक डंडे पवाःता। 48मनदो सेवकिया होड़ मालिकराः ओंगोल बेगर सुदीते बेलूर बुताय बुताता, दो हाँय मड़ंगीग अते हुडिंग डंडे पवाःता। बगराय एमेकेरा, हाँय अते बगराय असेगेता अरू बगराय जिमेवारिया हाँय अते बनागरा आभाय गोःता।”
ईसू बदीरे होड़कू बेगराव हटिंग जुवाःता
49ईसू अरूय कताया, “ईंग चउंदीसरे सेंगेल सलगावगे लगायिंग वेगकिया। अरू ईंग चहाःतना नुनुँहू वरीते हना सेंगेल सलगाव जुवाः। 50मड़ंग ईंगके मीटोंग बतिसमा#12:50 नाःआ बतिसमाते ईसू अनँयगराः गुजुः बदीरेय कतायतना। गोगोः लगा इदा। हना बतिसमा अरीन होयाः वरी ईंग जीव मुरुक कुंभलाःतना।#लूका 22:44 51अपे चेले माःआनपे ओंगलेतना, ईंग नाःआ चउंदीसरिकुःआ होड़कू एचे राजू नमाकू लगायिंग वेगकिया, जा? कोवान, ईंग होड़कू बेगराव हटिंगकू लगायिंग वेगकिया। 52नुँहू वरीते मीटोंग ओड़ाःरिकुःआ पाँचटोंग होड़कू अँननकू रीस होड़ेंगता। पेय होड़ बार होड़ सुदा अरू बार होड़ पेय होड़ सुदाकू रीसगोड ञवनता।
53अपात बेटात सुदा
अरू बेटात अपात सुदाकिन घंटाव होड़ेंगता।
एंगात बिटीत सुदाकिन घंटाव होड़ेंगता।
हनहारतो किमिनतो सुदा अरू किमिनतो हनहारतो सुदाकिन रीस होड़ेंगता।”
नाःआ जूग बदीरे बुझाः
54हनते ईसू हंडाकू दोहोना हँकुःआ होड़कू एचेरेय कताया, “अपे पछिम अगीते बदरी उडुंगतोपे ञेलतान दो अपे कतायता, नुँहू दाः उयुःता, अरू हनन उड़ी होयाःता। 55दखिन अगीते होय सलाः मेला अपे कतायता, मुरुक सितोंगता, अरू हनन उड़ी होयाःता। 56ने बार जीव ओंगोल होड़कू, सेरमो अरू ओत ञेलवाडखनपे सुदीगोडता करा इया होयाःता, हना। मनदो नाःआ जूगराः बदीरे चिला लगा मेरपे बुझाव अवेनतना?
57चिला कता नपाय इदा, हना अपे चिला लगा मेरपे सुदी अवेयतना?
मुदइ होड़ सुदा राजू नमान
58ओंगलगेमे। आम आमरीग मुदइ होड़ सुदा फड़ियावदार एचेरेबा सेन मेला, सेनेन सेन दूररे हाँय सुदा राजू नमान लगाम कुरनिसगे। नाःआ उड़ी मेरेम एचेय दो हाँय आम फड़ियावदार एचेरेय ओर गोःयामता, अरू फड़ियावदार आम सिपाही एचेरेय जिमागोडमेता अरू सिपाही आम जेहेलरेय एचे सींगगोडमेता। 59अपे ईंगपे अयूम, अपेराः जमा ढिबुवा अरीनपे एमे कुदाय वरी जेहेलते ओरोपे उडुंग अवेनेना।”
Valgt i Øjeblikket:
लूका 12: kfp
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© (Active) Wycliffe Bible Translators, Inc. All rights reserved.