मरकूस 14
14
ईसू एचे ञेड एंडा लगाकू ओंगलेःआ
(मती 26:1-5; लूका 22:1,2; एहुना 11:45-53)
1बार दिन तयोमरे पसहा परोब#एचे उडुंग 12:1-27 अरू रुटीराः परोब निचकाःआ। मरंग पुजउरीकू अरू नियम चेडदार होड़कू ईसू कलेकाल एचे साबकिडिगखन ञेड एंडागेय लगाकू ओंगलेःआ। 2मनदो हँकू कताया, “होड़कू एचेरे तोनोंग इयाराः हलो गदोड़ी अहा होयाः। हनालगा परोबराः दिनरे हाँय अलोबू एचे सबेय।”
ईसूराः बोःरे जटामसी सुनुमे दूलतेरा
(मती 26:6-13; एहुना 12:1-8)
3बेतनिया गाँवरे सिमोन ञावीग मी होड़ होड़ दोहोना। हाँय मड़ंगरे कुड़गा होड़े दोहोना। आँयग ओड़ाःरे जोजोम लगा ईसू दुड़ुःनेना। दो मी होड़ अइमी मुरुक सुघर दिरिराः बोतोलरे मुरुक किमइतराः अरू नपाय महका हना जटामसी सुनुमे अगूतेरा। अरू हाँय बोतोल राबतेडखन हना सुनुम ईसू बोःरेय दूलगोतेड।
4हनते तोनोंग तोनोंग होड़कू अँननकू अँकू जीवरे रीसवाडखनकू कताया, नाःआ सुनुम चिला लगा नाःआ इयाय एचे एंडागोतेडा? 5नाःआ अकिरिंगवाडखन मी होड़राः मी बरिसराः बुता बनी मिनते गरीब होड़कू लगा हटिंगवाकेकुःआ। अरू हँकू हाँयग अइमी बदीरेकू कुरबुराःआ।
6दो ईसू कतातेड, “नाँयग अइमी अड़ाःगोडेयपे। नाँय चिला लगापे हलकइनगेयतना? नाँय ईंग लगा नाय नपाये एचेकेरा। 7गरीब होड़कू अपे सुदा जमा बेलाकू दोहोनता, मनदो ईंग अपे सुदा सगर दिन ओरोयिंग दोहोनेना। 8नाँयग अइमी एचे अवेःआ हनानाःए एचेकेरा। नाँय ईंगकू तील अते मड़ंग ईंग धाररे सुनुमे तिलाःकेरा। 9अपे ईंगपे अयूम, जमा चउंदीसरे तोनोंगाः ततेररे नपाय सरवनकू परसारगेता, हंडा नाँयराः बुताराः बदीरे होड़कूकू कता उहियारता।”
ईसू एचे साबगेय लगा जूदा राययान
(मती 26:14-16; लूका 22:3-6)
10हनते ईसूरिकुःआ बारहगोटोंग मूक चेलाकूतेन अते मी होड़ जूदा इसकरियोती मरंग पुजउरीकू एचेरे ईसू एचे सबेय लगाय सेनेडा। 11हँकू नाःआ बड़रा अयूमतेडखन मुरुककू बहालयान अरू जूदा इसकरियोती लगा ढिबुवा एमे लगाकू जबानतेरा। अरू हाँय, ईसू एचे साबगेय लगा दोंगे ञामा।
पसहा परोबराः रुटी जोम
(मती 26:17-29; लूका 22:7-23; एहुना 13:21-30; 1 कुरिंती 11:23-26)
12रुटीराः परोबराः मड़ंग दिन इसराएल होड़कू पसहा परोब लगा भेड़ा होनराः बलिदानकू देगता। दो ईसूरिकुःआ चेलाकू ईसू एचेरेकू होंबोरतेरा, “ने गुरुजी, पसहा परोबराः रुटी जोम लगा अले करे सेनेकियानखन आम लगाले सरबहा हताड़गे?”
13दो ईसू चेलाकूतेन अते बार होड़ नाःआ इया कतावाडखने वारगोतेडकिन, “अबा सहररेबा सलाव जुवाः अरू मी होड़ होड़ गगरीरे दाः रेम गोः मेलाबा जुमाःता। हनाँयग होड़ देह दूरबा ओतोंग सेन। 14हाँय बोलता हना ओड़ाःराः मालिक एचेरेबा कताय, गुरुजी होंबोरकेरा, ईंग अरू ईंगरिकुःआ चेलाकू पसहा परोबराः रुटी करा छिनारेले जोम? 15हाँय ओड़ाः सेरमोराः सपड़ावतो मीटोंग मरंग छिनाय उदुःवाबाता। हनानाः छिनारे अबू जमाकू जोम लगाबा संजोड़का।”
16चेलाकिन उडुंगनेनखन सहररेकिन सोदोरनेना अरू ईसू कतातेरा हनन इयाकिन सेने ञामतेरा अरू पसहाराः सरबहाकिन संजोड़तेरा।
17दो हना सिंगाड़ मेला ईसू बारहगोटोंग चेलाकूतेन सुदाय वेजेडा। 18दो दुडुःकियानखनकू जोजोमा हनमेला ईसू कतातेरा, “ईंगराः कतापे अयूम, ईंग सुदापे जोजोमतानकू अपे अते मी होड़ ईंगपे एचे साबिंगता।”
19दो हँकुःआ मूक चेलाकूतेनराः जीव हुडिंगयान अरू मेमेड होड़ मेमेड होड़ ईसूकू होंबोरा, “हाँयग होड़ ईंग हवे जा?”
20हनते ईसू हँकू एचेरेय कतातेड, “ईंग सुदा छिपीराः सुरुवारे रुटी लोटाव घड़ीने जोमतना हनाँय अपे बारहो होड़कू अते मी होड़ हवे। 21मनुवारीग बेटात बदीरे भगवानराः कागदरे ओजाःतो इदा हनन इयाय गुजुःता। #सेरेंगकून 41:9 मनदो मनुवारीग बेटाते एचे साबेयता, हाँयग होड़राः जीव नपाय कहियो ओरो दोहोनेना। हाँय अनाहाय जनमावकुः दो, हाँय लगा नपाय दोहोकुःआ।”
22हँकू जोजोमा हननमेला ईसू रुटीय साबतेड अरू भगवान जागतेडखन हना रुटीय डुंडीगतेरा। हनते हँकूय ओवातेडकूखने कतातेरा, “नापे, नाःआ ईंगराः देह हवे।” 23हनते हाँय अंगूर रसराः डुबहा साबतेडखन भगवाने धनियाबादतेरा अरू हँकूय ओवातेडकू। अरू हँकू जमाकू हना डुबहातेकू ञूतेरा। 24दो हाँय हँकू एचेरेय कतातेड, “नाःआ रस ईंगराः बलंगी हवे अरू मुरुक बगरा होड़कू लगा ईंगराः बलंगी तूःता। नानाः अते होड़कू सुदा भगवान कता-जमकावकूता। #एचे उडुंग 24:6-8 25अपे ईंगपे अयूम! नुँहू अते भगवानराः राइजरे नँवा अंगूरराः रस अरीनिंग ञू वरी हान ओरोयिंग ञूयतेरा।”
पतरसराः किरिया जोम
(मती 26:30-35; लूका 22:31-34; एहुना 13:36-38)
26हनते हँकू मीटोंग सेरेंग सेरेंगनेनखन#14:26 ईसू अरू आँयगरिकुःआ चेलाकू होनोयाःकून करे जुना नियमराः सेरेंगकून अते मीटोंग सेरेंगकू सेरेंगा। एहूदाकूराः रिवाज इया पसहा परोब जोजोम मेला सेरेंगकूनकू सेरेंगता। जोजोम मड़ंगरे सेरेंगकून 113–114 अते हँकू सेरेंगा अरू जोजोम तयोमरे हँकू सेरेंगकून 115–118 अते हँकू सेरेंगा। जइतून पहाड़ होर तोराकू।
27दो ईसू हँकू एचेरेय कताया, “भगवानराः कागदरे नाःआ इया ओजाःतो इदा,
ईंग सरवाहा होड़िंग ञेड एंडाता,
अरू भेड़ाकू सितिर-बितिर जुवाःताकू।#जक 13:7
हनालगा अपे जमा होड़कू ईंग अड़ाःकेडखनपे सलाव जुवाःता।
28मनदो ईंग जियाव रिमुः हना तयोमरे अपे अते मड़ंग गलील छतरिंग सेनता।”
29हनते पतरस कतातेड, “गुरुजी, जमा होड़कू अड़ाःगोडमेकू दो ईंग ओरोयिंग अड़ाःतेडमेःआ।”
30दो ईसू पतरसे कतावाड, “ईंग कताम अयूम, आम तिनिसिंग रइत कुकुड़ा बार तुरहा कुकूड़चुः अते मड़ंग पेय तुरहा ईंगमे आड-बेकारवाता।”
31हनते हाँय मी सुटीय कतातेरा, “ईंग आम सुदा गुजुः हों पराः, आम ओरोयिंग आड-बेकारवातेडमेःआ।” हनन उड़ी एटाः चेलाकू होंकू कतातेरा।
गतसमनीरे ईसूराः अरजी
(मती 26:36-46; लूका 22:39-46)
32हनते ईसू अरू आँयगरिकुःआ चेलाकू गतसमनी बगइचारेकू सेनेडा अरू ईसू हँकू एचेरेय कतातेरा, “ईंग अरजी मेला अपे नानडापे दुड़ुःकुः।” 33हनते ईसू पतरस, एकूब अरू एहुना आँयग सुदा अरू तोरेरेय गोःयाडकू अरू हाँयराः जीव मुरुक हुडिंगयान अरू कटसियायान।
34अरू हाँय हँकुःआ मूक चेलाकूतेने कतावातेरा, “ईंगराः जीव मुरुक उदबासयना अरू गुजुः इयायिंग होयायना। अपे ननडापे दोहोन अरू जगलेपे दोहोन।”
35हनते हाँय गुनमिन तोरेय सेनेडा अरू ओतरे तबेरनेनखन भगवान एचेरेय अरजीःआ, “ने अपांग, होया अवेन दो नाःआ कटसियाराः बेला ईंग अते चलाः जुवाः। 36ने अबबा#14:36 इबरानी भासीरे अबबाराः मतलोब अपांग हवे।, आम अते जमाकून होनोया जुवाःता। नाःआ कटसियाराः दूर ईंग अतेम चलाःगोड। मनदो ईंगराः हिछा इया कोवान, मनदो अनमराः हिछा इया होयाः।”
37दो ईसू अरजीवाडखने वेजेडा अरू अपीगतोय ञेलतेडकुःआ अरू पतरस एचेरेय कतातेरा, “ने सिमोन, आम गुनमिन हों मेरेम बेरेड अवेनता जा? 38जगलेम दोहोन अरू भगवान एचेरे अरजीगोड ञवनमे, जेमहा आम तोनोंग इयाःआ अंदजावरे अलोम पराः। जीव बिरुवा सपड़ावतो इदा, मनदो नाःआ देह जंगर कुड़ही इदा।”
39हनते ईसू अरजी लगा अरूय सेनेडा अरू मड़ंगरेय अरजीतेरा हनन इयाय अरजीतेरा। 40दो ईसू हँकुःआ मूक चेलाकू अपीगतोय वेग ञामतेडकुःआ। हँकू अपिगरेकू मथलावयान अरू ईसू एचेरे चेले माःआनबू कता कुदागे, हना मेरकू सुदीया।
41हनते पेय तुरहा ईसू वेजेडा दो हँकू एचेरेय कताया, “अपे नुँहूमिन अपीगगोड ञवनतनापे जा? होयायना। कसूर होड़कू एचेरे मनुवारीग बेटाते एचे साबगेयता हना बेला सोदोरयना। 42रिमुःपे। दोबू अबू सेन। अरू ञेलकूपे, ईंगे एचे सबिंगता हाँयग होड़ वेगयनाय।”
ईसूकू एचे साबा
(मती 26:47-56; लूका 22:47-53; एहुना 18:2-11)
43ईसू कनताय कताय मेला बारहगोटोंग मूक चेलाकू अते मी होड़े दोहोना, हाँयग जूदा वेगनेना। मरंग पुजउरीकू अरू नियम चेडदार होड़कू अरू इसराएलरिकुःआ मूक होड़कू हों आँयग सुदा मुरुक बगरा होड़कूय अगू सोदोरतेरा। हँकुःआ होड़कू तलवइरकून अरू हापकून साबतेडखनकू वेजेडा।
44ईसू साब लगाकू वेजेडा हँकुःआ होड़कू एचेरे जूदा मड़ंगरेय कतावातेडकुःआ, “ईंग अंजोडगेय हनाँय हवे। हाँय साबकिडिगखनपे गोःयाय।” 45दो जूदा वेजेडा अरू ओहेन सेनेडखन ईसू एचेरेय कतातेड, “ने रबबी”#14:45 गुरुजी, अरू हाँये अंजोडतेरा। 46हनते जूदा सुदाकू वेजेडा, हँकुःआ होड़कू ईसूकू कबा रहावबाःकागोतेडीग अरूकू साबतिरिया। 47मनदो हंडाकू चड़ाँकुःआ हँकू अते मी होड़ तलवइर ओरतेडखन मूक पुजउरीरीग सेवादार एचेरेय सलावतेरा अरू हाँयराः लुतूरे तपेगबाःगोतेड।
48दो ईसू हँकू एचेरेय कतातेड, “अपे लुड़ी होड़ ओंगोलवाडिंगखन ईंग साब लगा तलवइरकून अरू हापकून साबकेडखनपे वेगकिया जा? 49ईंग सगर दिन भगवान ओड़ाःरे अपे सुदायिंग दोहोना अरू होड़कूयिंग चेड उदुःआ, दो अपे हंडा ईंग मेरपे साबगडिंग। मनदो भगवानराः कागदरे ओजाःतो इदा हना कता पुराः लगा इदा।” 50नाःआ अते जमा मूक चेलाकूतेन ईसू अड़ाःतिरिगखनकू ञीरयान।
51दो मी होड़ डिंघा एकेते सोनहे ओयोतेडखन ईसू देह दूरे सेना। अरू होड़कू हाँयकू साबगोतेडीग।#14:51 होनोयाःकून करे ननाँयग डिंघा नाःआ नपाय सरवने ओजाःतेरा हाँयग मरकूस हवे। 52हनते हाँय सोनहे अड़ाःतेडखन एकेतेय ञीरयान।
मरंग पंचाइतरे ईसूकू गोःतेरा
(मती 26:57-66; लूका 22:54-55; एहुना 18:13-14)
53हनते हँकुःआ होड़कू ईसू मूक पुजउरी एचेरेकू गोःयाडीग। हंडा मरंग पुजउरीकू अरू इसराएल मूक होड़कू अरू नियम चेडदार होड़कू जमाकू जुमावनेना। 54पतरस ईसू अते गुनमिन तोनोरे तोरेते हाँय देह दूर मूक पुजउरीराः ओड़ाः राच मिने बोलोनेना। हाँय अगुरा होड़कू सुदा दुड़ुःनेनखन सेंगेलरेय एलांगगुःआ। 55मरंग पुजउरीकू अरू मरंग पंचाइतरिकुःआ जमा होड़कू ईसू ञेड गोएग एंडागे लगा हाँय बदीरे बेलूराः हिदइतकू ञामा। मनदो हँकू मेरकू ञाम अवेगड। 56ईसू बदीरे मुरुक होड़कू बेलूर हिदइतकू उदुःआ, मनदो हना हों मेर जुमावगान।
57अदोम होड़कू रेमवाडखन लबरा हिदइतकू उदुःतेड। हँकू कतातेड, 58नाँयग होड़ नाःआ इयाय कताया हनाले अयूमकेरा, तिःईतेकू तुलाकेरा हना भगवानराः ओड़ाः एचे रूब एंडागोडतिंग अरू तिःईते मेरकू तुलागरा एटाःआ ओड़ाः पेय दिनरेयिंग तुलागोडता, माःआन।#एहु 2:19 59नाःआ कतारे हों हँकुःआ होड़कूराः हिदइत मेर जुमावगान।
60हनते मूक पुजउरी हँकुःआ होड़कू मड़ंगरे चड़ाँनेनखन ईसू एचेरेय होंबोरतेरा, “आम चिला लगा तोनोंग माःआन मेरेम कतायतना? नँकुःआ होड़कू आम बदीरे चेले माःआन हिदइतकू एमेतना?” 61हनते हों ईसू कलेकाले दोहोना अरू कही मेरेय सालगान।
मूक पुजउरी अरूय होंबोरतिरिया, “हाँयग मुरुक नपाय भगवानरीग बेटात मसी अनम हवे जा?”
62दो ईसू कतातेड, “ईंग हवे अरू अपे मनुवारीग बेटात अगम जंगरदार भगवानराः खउना गतर दुड़ुःतोय अरू सेरमो देस अते बदरीरे उतराव वेगतोपे ञेलेयता।” #दानि 7:13
63हनते मूक पुजउरी मुरुके रीसनेना अरू आँयगराः सोनहे सिराववाडखने कतातेड, “नुँहू अबू लगा तोनोंगीग होड़ अते, अरू हिदइत गोगोः कोवानेःआ। 64अपे जमाकू अयूमकेरापे नाँय भगवान बदीकेडखन चेले माःआने कताकेरा? अपेराः चेले माःआन सलाह इदा?”
हँकू जमा होड़कू कतातेरा, “नाँय ञेड एएंडा लगा इदा।”#लेवी 24:16 65दो अदोम होड़कू ईसू चोटरेकू बेगतेरा अरू अदोम होड़कू मेड हुमूतेनकू तोल रेडगोतेड अरू मुटकातेकू ञेंडेया। हँकू हाँय एचेरेकू कताया, “भगवानराः बड़रा उदुःगेमे।” अरू अगुरा होड़कू हों हाँयकू चपड़तेरा।
पतरस ईसूय आड-बेकारवातेरा
(मती 26:69-75; लूका 22:55-62; एहुना 18:15-18,25-27)
66हनमेला पतरस राचरेय दोहोना अरू मूक पुजउरीरीग सेवकियायीन हंडाय वेजेडा।
67अरू पतरस सेंगेलरेय दुड़ुःकुःआ हनमेला हाँयग सेवकियायीन तनी-बनी सिनहातिरिगखन पतरसे कतावाःआ, “आम हों दो नसरतरीग होड़ ईसू सुदाम दोहोना।”
68दो पतरस ईसू आड-बेकारवडीगखने कतातेड, “ईंग मेरिंग सुसुदीतना अरू मेरिंग बुझाःतना आम चेले माःआनमे कतायतना।” हनते हाँय राच दुवार बहरी होरे सेनेडा [अरू कुकुड़ा कुकूड़चुःनेना।]
69अरू हनाँयग सेवकियायीन हंडाकू चड़ाँकुःआ हँकू एचेरे अरूय कताया, “नाँय हँकुःआ होड़कू अते मी होड़ हवे।”
70दो पतरस अरूय कतातेड, “ईंग ना लवे।”
मी घड़ी तयोमरे हंडा चड़ाँकुःआ हँकुःआ होड़कू पतरस एचेरेकू कतातेड, “आम गलील छतररीग होड़ हवे, हनालगा आम हों हँकुःआ होड़कू अते मी होड़ हवे।”
71पतरस अनँयग आँयग सती-सरापगुःआ अरू किरिया जोमवाडखने कताया, “अपे बड़रातना, हाँयग होड़ बदीरे ईंग मेरिंग सुसुदीतना।”
72हनते हना तयोमते अरू कुकुड़ा कुकूड़चुःनेना। हनन मेला पतरस ईसू हाँय एचेरेय कतातेरा हनाय उहियार अगूतेरा, कुकुड़ा बार तुरहा कुकूड़चुः अते मड़ंग आम पेय तुरहाम आड-बेकारवायिंगता, माःआन। अरू हाँय नाःआ कता ओंगोल अगूतेडखने इयामा।
Valgt i Øjeblikket:
मरकूस 14: kfp
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© (Active) Wycliffe Bible Translators, Inc. All rights reserved.