मरकूस 2

ईसू लकवा होड़े नपायतेरा

(मती 9:1-8; लूका 5:17-26)

1तोनोंग दिन तयोमरे ईसू कपरनहूम सहर अगीय कुदा वेगा। दो हंडाकुःआ होड़कू अयूमतेरा, ईसू अनँयग ओड़ाःरेय सोदोरयना, माःआन। 2दो हंडा मुरुक बगरा होड़कू जुमावनेना, जेमहा ओड़ाः अते दुवार वरी हों ततेर मेर दोहोगान। अरू ईसू भगवानराः सरवन पना पपरसार मेला, 3चइरगोटोंग होड़कू ईसू एचेरे मी होड़ लकवा ञेडतिरिया हाँयग होड़ पटियातेकू तूल अगूतिरिया। 4हंडा बगरा होड़कू दोहोना। हनालगा हँकू हाँयग लकवा होड़ ईसू एचेरे मेरकू इदी अवेगडीग अरू सड़ुम चोटरेकू गोः देगतिरिया। हँकू सड़ुम उघाड़तेडखन हना दुलूते हाँय पटिया सुदा ईसू मड़ंगरेकू जुवांग लोजोरतिरिया। 5दो ईसू हँकूराः बिसवास सुदीतेडखन हाँयग लकवा होड़ एचेरेय कतातेरा, “ने बेटा, आमराः कसूर बराव एंडायना।”

6हंडा मुरुक एहूदा नियम चेडदार होड़कू होंकू दुड़ुःआ। हँकू अँननकू अँकू ओंगोलतेरा, 7नाँय दो चिला लगा नाःआ उड़ीय कतायतना? भगवान बदीतेडखने कतायतना। भगवान अड़ाःकेडखन इये कसूरे बराव एंडा अवेता, माःआन?#एस 43:25

8दो ओहेन ईसू सुदीगोतेड, नँकू नाःआ इयाकू ओंगलेतना अरू हँकू एचेरेय कताया, “अपे चिला लगा नाःआ उड़ीपे ओंगलेतना? 9ईंग आमराः कसूरिंग बराव एंडातेरा, माःआन कताय लगा जा, आम पटिया रेमकेडखनमे सेन, माःआन कताय लगा रिता इदा? 10मनदो अपे नाःआ कता सुदीयपे, मनुवारीग बेटातके चउंदीसरे मनुवाकूराः कसूर बराव एंडा लगा हातपात इदा।” 11हनते हाँय लकवा ञेडतिरिया हाँयग होड़ एचेरेय कताया, “ईंगमे अयूम। रिमुःमे अरू आमराः पटिया रेमकेडखन ओड़ाःमे सलाव जुवाः।” 12हँकुःआ होड़कू ञेञेला हनन मेलारे हाँय ओहेन रेमकेडखन पटियाय रेमतेड अरू अनँयग ओड़ाः होर तोराय। जमा होड़कू बयावयान अरू भगवान जागतेडखनकू कतातेड, “अबू नाःआ इया तोनोंगाः कहियो ओरोबू ञेलतेरा।”

ईसू लेवीय राःतना

(मती 9:9-13; लूका 5:27-32)

13हनते ईसू हुडिंग समुंदर धरीरे अरूय सेनेडा। हनमेला मुरुक होड़कू ईसू एचेरेकू वेजेडा अरू हाँय हँकूय चेडा। 14सेन मेला ईसू, अलपियूसरीग बेटात लेवी#2:14 लेवीराः एटाः ञाव दोहोना मती। ननाँय मती, मती ओजाःतेरा भगवानराः नपाय सरवने ओजाःतेरा। मलगुजारी गोः लगा दोफा दूर कुटीरे दुड़ुःतोय ञेलतिरिया। ईसू हाँय एचेरेय कतातेड, “ओतोंग वेगमे।” अरू हाँय रेमनेनखन ईसू देह दूर तोराया।

15मुरुक मलगुजारी गोः होड़कू अरू कसूर होड़कू हों ईसू देह दूरकू सेना। हँकू, ईसू अरू आँयगरिकुःआ चेलाकू सुदा लेवी ओड़ाःरे जोजोम लगाकू दुड़ुःनेना। 16दो एहूदाकूरिकुःआ नियम चेडदार होड़कू अरू फरीसी होड़कू ईसू, मलगुजारी गोः होड़कू अरू एटाः कसूर होड़कू सुदाय जोमा हनाकू ञेला अरू हाँयगरिकुःआ मूक चेलाकू एचेरेकू होंबोरतेड, “अपेरीग गुरुजी चिला लगा मलगुजारी गोः होड़कू अरू एटाः कसूर होड़कू सुदाय जोमता?”

17नाःआ अयूमतेडखन ईसू कतातेड, “जिड़ीदार बेमरियाकूय संघरावाता, मनदो सुलटीगरेय दोहोनता हाँयग होड़के जिड़ीदारराः जरूरी मेर दोहोनता। ईंग बेगर गारबार होड़कू राः लगा कोवान, मनदो कसूर होड़कू राः लगायिंग वेगकिया।”

उपास बदीरे सवालराः जबाब

(मती 9:14-15; लूका 5:33-35)

18बतिसमा एमेयीग होड़ एहुनारिकुःआ चेलाकू अरू फरीसी होड़कूरिकुःआ चेलाकू उपासकू दोहोना। दो तोनोंग तोनोंग होड़कू ईसू एचेरे वेगकेडखनकू होंबरेःआ, “ने गुरुजी, एहुनारिकुःआ चेलाकू उपासगेतना अरू फरीसीरिकुःआ चेलाकू हों हनन उड़ीकू एचेयता, मनदो आमरिकुःआ चेलाकू उपास मेरकू दोहोनता।”

19दो ईसू हँकू एचेरे मीटोंग कहड़ीय कतातेरा, “बरवा सुदाकू दोहोनता हँकुःआ बरतिया होड़कू करा उड़ी उपासकू दोहोन? हँकू सुदा बरबाबू दोहोनता हना वरी हँकू ओरोकू उपासनेना। 20मनदो मी दिन बरबाबू हँकू अते रेनहाकू गोःगेयता। दो हनमेला हँकू उपासकू दोहोनता।”

ईसू नँवा दूरे उदुःगेतना

(मती 9:16-17; लूका 5:36-39)

21ईसू अरू मीटोंग कहड़ी हँकू एचेरेय कता उदुःगेःआ, “तोनोंगीग होड़ जुना सोनहेरे नँवा सोनहेराः चिरकूट ओरोय सोःतेरा। नान उड़ीय एचेय दो नँवा सोनहे, जुना सोनहे ओरगोडता अरू मड़ंगते बनागरा हिराः जुवाःता। 22तोनोंगीग होड़ नँवा अंगूरराः रस जुना हेड़ेराः बगलीरे ओरोय सोलोंगतेरा। नान उड़ीय एचेय दो नँवा अंगूरराः रस रंजाव जुवाःता अरू बगली सिराव जुवाःता अरू हना रस तू जुवाःता। हनालगा नँवा रस नँवा बगलीरे सोसोलोंग इदा।”

ईसू लोड़ोनराः दिनरीग परबू हवे

(मती 12:1-8; लूका 6:1-5)

23लोड़ोनराः दिनरे ईसू अरू आँयगरिकुःआ चेलाकू दोहोड़ तला दूररेकू सेना। दो चेलाकू बलीकू सीडतेडा।#दो. नि. 23:25 24दो फरीसी होड़कू ईसू एचेरेकू कतातेड, “मन ञेलमे, आमरिकुःआ चेलाकू अबूराः नियम इया लोड़ोनराः दिनरे मेरबू एचेता, हनाकू एचेतना।”

25दो ईसू हँकू एचेरेय कताया, “अपे भगवानराः कागदरे मेरपे बछावगना जा, दाऊद राजा अरू आँयगरिकुःआ सउंगताकू रंगेगतेड मेला चिलाकू एचेतेरा? 26दो हनमेला अबियातर मूक पुजउरीय दोहोना। दाऊद राजा भगवानराः मरंग टपइर ओड़ाःरेय बोलोयान अरू पुजउरीकू एकला जोम अवेयता हना सुद रुटीय जोमतेरा अरू आँयगरिकुःआ सउंगताकू होंय एमेवातेरा।”#लेवी 24:9; 1 समु 21:1-6

27हनते ईसू फरीसी होड़कू एचेरेय कतातेरा, “लोड़ोनराः दिन लगा भगवान मनुवा मेरेय तुलागडिया, मनदो मनुवा नपाय दोहोन लगा भगवान लोड़ोनराः दिने तुलाकेरा। 28हनालगा मनुवारीग बेटात, लोड़ोनराः दिनरीग हों परबू हवे।”

Valgt i Øjeblikket:

मरकूस 2: kfp

Markering

Del

Kopiér