मरकूस 5
5
भूत समसावतिरिया हाँय होड़ ईसू नपायतेरा
(मती 8:28-34; लूका 8:26-39)
1ईसू अरू आँयग चेलाकू हुडिंग समुंदर पारनेनखन गिरासेन छतररेकू सोदोरयान। 2ईसू डोंगा अतेय उतरावनेन दो, भूत समसावनेना मी होड़ मड़गट अते उडुंगकियानखन ईसू सुदाय जुमावनेना। 3हाँयग होड़ मड़गटरेय दोहोना अरू तोनोंगीग हाँय सिकिड़ीते हों तोतोल लगा मेरकू अवेगडीग। 4होड़कू हाँय सिकिड़ी अरू बिरीतेकू तोलेया। हनारे हों हाँय हना सिकिड़ीय सीडगोडा अरू बिरी गुन लकने सीड खुटी कटड़ा एंडागोडा। तोनोंगीग हाँय मेरकू कबू अवेगडीग। 5हाँय सगर सइट मड़गट अरू पहाड़रेय खिररीःआ अरू दिरिते अनँयग आँयगतेय ञिडुःआ।
6हाँय ईसू मुरुक लंकातेय ञेलतिरिया अरू बतकाव सेनेडखन ईसू मड़ंगरे उकुड़ोमवाडखने सलामतिरिया। 7दो ईसू हाँयग भूत एचेरेय कताया, ने भूत, आम नाँयग होड़ अतेम उडुंग जुवाः, माःआन। 8हनालगा हाँय मरंग बकाते ईसू एचेरेय कतातेड, “ने ईसू, भाबी भगवानरीग बेटा! आम ईंग चिला लगाम हलकइनगींगतना? भगवानराः किरिया जोमवाडखनिंग कतायता, ईंग पीरा अलोम एमेवायिंग।”
9दो ईसू हाँय एचेरेय होंबोरतेरा, “आमराः ञाव चेले माःआन इदा?”
दो हाँय कतातेड, “अले मुरुक इदानलेःआ। हनलगा ईंगराः ञाव सइना हवे।”
10दो भूत ईसू एचेरे असे घड़ीने कताया, “अले नाःआ देस अते अहम वार उडुंगले।”
11दो हंडा मुरुक बटूड़ सुकरीकू बुरचूड चोटरेकू सराःआ। 12हँकुःआ भूतकू ईसू एचेरे असे घड़ीनकू कताया, “अले मँकूदेराः सुकरीकू एचेरे वार बोलोगोडले।” 13अरू ईसू हँकूय वारगोतेडकू। हनते हँकुःआ भूतकू हाँयग होड़ अते उडुंगकियानखन बार हजार सुकरीकू एचेरेकू बोलोयान। दो सुकरीकू दरा अते बतकाव उतरावनेनखन समुंदररेकू बोलो बुडावयान।
14सुकरी सरवाहाकू ञीरयान अरू सहर अरू गाँवकूनरे हना सरवनकू कता उदुःतेड अरू हंडा होयानेना हना ञेल लगा मुरुक होड़कू सेनेडा। 15हँकुःआ होड़कू ईसू एचेरेकू सेनेडा दो मड़ंगरे मुरुक भूतकू समसावनेना हाँयग होड़ सुरतानेनखन सोनहे तुसिंगकेडखने दुड़ुःयान, हना ञेलवाडखनकू बयावयान। 16दो हंडाकू दोहोना हँकुःआ होड़कू, मड़ंगरे भूतकू समसावनेना हाँयग होड़ बदीरे अरू सुकरीकू बदीरे जमाकूनकू कता उदुःतेरा। 17हनते हँकुःआ होड़कू ईसू एचेरे असे घड़ीनकू कताया, “ने साहेब, आम अले सिमान अते सलाव जुवाःमे।”
18ईसू डोंगारेय देगयान दो मड़ंगरे भूत समसावनेना हाँयग होड़ ईसू एचेरेय कताया, “ईंग आम सुदा सेने ओवायिंगमे।”
19मनदो ईसू हाँय सेन लगा मेरेय एमेवागाडीग अरू हाँय एचेरेय कतातेड, “आम ओड़ाःमे कुदा जुवाः अरू भगवान सोगावाडमेखन आम जीव करा इयाय नपायकेडमेःआ, हना होड़कू एचेरेम कता उदुःगे।” 20दो हाँय तोराय अरू अनँयग देस दिकापुलीसरे#5:20 दसगोटोंग सहरकून ईसू एचेतेरा हना जमाकू एचेरेय कता उदुःतेड अरू जमा होड़कू बयावयानकू।
ईसू मी अइमीय नपायतेरा
(मती 9:18-26; लूका 8:40-56)
21हनते ईसू डोंगारे हना हुडिंग समुंदर अरू पारनेनखन मार परोमे कुदा सेनेडा अरू हना समुंदर धरीरेय दोहोना। दो मुरुक होड़कू ईसूराः चइरो गतरकू जुमावयान। 22दो हंडा मी होड़ आईर ञावीग होड़ दोहोना। हाँय अरजी ओड़ाःरिकुःआ हातपात होड़कू अते मी होड़े दोहोना। हाँय ईसूय ञेलवाडखन ईसूराः काटतरे उकुड़ोमवाडखन मुरुके असेया, 23“ईंगरीग हुडिंगीग बिटी गुजुः इया इदानिया। आम ईंग ओड़ाःरे वेगकियानखन हाँय चोटरे तिःईम मंडाव। दो हाँय नपायकियानखन जीयते दोहोनता।” 24दो ईसू हाँय सुदाय सेनेडा।
अरू सेनेन सेन दूररे मुरुक होड़कू हों रेहेड-तेपेडकू सेनेडा। 25दो हंडा मी होड़ अइमी दोहोना। हाँयके बारह बरिस वरीते नहावन दोहोना। 26हाँय मुरुक जिड़ीदारकू ओजाहते मुरुक पिराय सहावनेन अरू आँयगराः जमा आन-धान नाःआ बेमारी लगाय चबागोतेड। हनारे हों तोनोंग नफा मेरेय पवावगान, मनदो हाँयराः बेमारी अनउर बगरायान। 27हाँय ईसू बदीरेय अयूमतेरा अरू हना रेहेड-तेपेडरे ईसू देह दूर सेनेडखन हाँयराः सोनहेराः असराय टोँवावतेरा। 28हाँयग अइमी अनँयग जीवरेय कतातेरा, ईंग हाँयराः सोनहेराः असरायिंग टोँवाव दो ईंग ननपाय जुवाःता, माःआन। 29हननमेला हाँयग अइमी नहावन बेमारीते नपाययान अरू हना हाँय अनँयग देहरे ओहेने सुदीगोतेड।
30हाँयग अइमी ईसूय टोँवावतेड ओहेन ईसू सुदीबाःगोतेड, ईंग अते जंगर उडुंगकिया, माःआन। दो हाँय उलटावनेनखन जमा होड़कू एचेरेय होंबोरतेरा, “ईंगराः सोनहे इये टोँवावकेरा?”
31दो चेलाकू हाँय एचेरेकू कतातेरा, “परबू, नाःआरे मुरुक बगरा होड़कू इदा अरू रेहेड-तेपेड इदानकुःआ अरू आम कतायतना, इये ईंगे टोँवावतेरा, माःआन।”
32हनते ईसू इये ईंगे टोँवावकेरा हना सुदीगेय लगा आँयग अउग-बउगे ञेला। 33दो हाँयग अइमी सुदीगोतेडे, ईंग नपाययना, माःआन अरू बोतोरते कलपाः घड़ीन ईसूराः मड़ंगरे उकुड़ोमवाडखन अनँयग एचेरे होयानेना हना जमाकूने कताया।
34दो ईसू हाँय एचेरेय कताया, “ने दिदी, आम ईंग एचेरेम बिसवासतेरा। हनालगा आम नपाययना। सलसततेम सलाव जुवाः।”
35ईसू कनताय मेला आईरराः ओड़ाः अतेकू वेगिकिया हँकुःआ होड़कू हाँय एचेरेकू कताया, “आम बिटी गोएगयनाय। दो गुरुजी चिला लगाम हलकइनगेयतना?”
36हना बड़रा ईसू अयूमतेरा दो हाँय हना बड़रा मेरेय अयुमेःआ हना इया आईर एचेरेय कताया, “अलोम बोर, ईंग एचेरेम बिसवासगोड ञवन।”
37दो ईसू आँयग सुदा सेन लगा पतरस, एकूब अरू एकूबरीग बोहोत एहुना अड़ाःवाडखन तोनोंगीग मेरेय एमेगाड। 38हँकू, अरजी ओड़ाःरीग हातपात होड़राः ओड़ाःरेकू सोदोरनेन अरू ईसू हंडाकुःआ होड़कू मुरुक फिकीर घड़ीनकू इयामा, हनाय ञेला। 39दो हाँय ओड़ाः पेंदारे सेनेडखन हँकुःआ होड़कू एचेरेय कताया, “अपे चिला लगा फिकिराः घड़ीनपे इयामतना? नाँयग एराहोन मेरेय गोएगगान। नाँय दो अपीगतनाय।” 40दो हँकुःआ होड़कू ईसूकू लंदावाःआ, मनदो ईसू जमा होड़कू बहरीय उडुंगगोतेडकू अरू एकला हाँयग एरा होनरिकिनाः एंगात अपात अरू अनँयग चेलाकू सुदा हाँयग एराहोनकू एचे गेतेगा हना छिनारेकू बोलोयान। 41हनते ईसू हाँयग एराहोनराः तिःई साबतेडखने कताया, “तलीता कूमी!” (नाःआराः मतलोब नाःआ हवे, ने एराहोन रिमुःमे।) 42हननमेला हाँयग एराहोन चड़ाँनेना अरूय सेना। (हाँय बारह बरिसीग एराहोन दोहोना।) अरू हँकू जमाकू मुरुककू बयावयान। 43हनते हाँय हँकू एचेरे हुकुमवाडखने कतातेरा, “नाःआ कता तोनोंगीग एचेरे अपे अहापे उदगे”, अरूय कताय, “नाँय जोम लगा कहिसाः एमेवायपे।”
Valgt i Øjeblikket:
मरकूस 5: kfp
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© (Active) Wycliffe Bible Translators, Inc. All rights reserved.