Psom 118
118
Lapriyer pou dir mersi Bondie
1Nou remersie LESEGNER parski li vremem bon,
so lamour infini li eternel.
2Twa pep Izrael, dir for-for,
“So lamour infini li eternel.”
3Bann desandan Aaron dir,
“So lamour infini li eternel.”
4Nou tou ki ador li, anou dir,
“So lamour infini li eternel.”
5Kan mo ti dan detres, mo ti kriye LESEGNER
e li ti tann mo lapriyer e li ti liber mwa.
6LESEGNER li ar mwa mo pa per nanye;
kisann-la kapav tous mwa?
7Gras-a led ki LESEGNER donn mwa
mo trouv defet mo bann lennmi.
8Preferab met nou lavi dan lame LESEGNER,
ki fer konfians enn imin.
9Preferab met nou lavi dan lame LESEGNER,
ki fer konfians bann dirizan imin.
10Tou bann nasion ti fini antour mwa;
gras-a pwisans LESEGNER mo ti detrir zot.
11Zot ti fons lor mwa partou kote;
gras-a pwisans LESEGNER mo ti detrir zot.
12Zot ti desann lor mwa kouma enn niaz mous zonn
me lor vites zot tengn kouma dife dan pikan;
gras-a pwisans LESEGNER mo ti detrir zot.
13Enn latak feros ti bouskil mwa, pou sey zet mwa anba,
me LESEGNER ti ed mwa.
14LESEGNER ti fer mwa vinn for ek pwisan,
limem mo Sover.
15Ekout bann sante laviktwar ek delivrans
sorti depi dan latant lepep Bondie:
“Lafors LESEGNER finn triyonfe!
16Se so pwisans ki finn donn nou laviktwar,
Lafors LESEGNER finn triyonfe!”
17Non, mo pa pou mor; okontrer mo pou viv mo lavi
pou mo rakont bann mervey ki LESEGNER finn realize.
18Li finn pini mwa severman pou mo erer
me li pa finn detrir mwa.
19Ouver laport Tanp ki rezerve pou bann fidel;
mo pou al andan pou dir mersi LESEGNER.
20Samem laport LESEGNER;
bann dimounn drwat kapav rant andan.
21Mo dir twa mersi parski to finn reponn mwa,
tomem mo Sover.
22Ros ki mason ti rezete,
zordi li ros prinsipal ki pe tini soubasman.
23Sa li plan LESEGNER;
pli merveye ki sa pena!
24Zordi se zour ki LESEGNER finn fer;
nou tou ere; anou selebre lazwa sa gran zour-la.
25Delivre nou, SEGNER, delivre nou!
O SEGNER, nou sipliy twa, donn nou sikse!
26Ki Bondie beni seki rant isi dan nom LESEGNER.
Depi dan so Tanp, nou partaz so benediksion ar zot.
27LESEGNER, limem Bondie; li finn donn nou so lalimier.
Trap bann ramo dan zot lame,
koumans prosesion festival, e fer letour lotel.
28Tomem mo Bondie, mo sant to louanz.
Tomem mo Bondie, mo pou proklam to grander.
29Nou remersie LESEGNER parski vremem li bon,
so lamour infini li eternel.
Valgt i Øjeblikket:
Psom 118: KMNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Nouvo Testaman Kreol Morisien Harmonisation NTPS KM © Bible Society of Mauritius, 2021.