Psom 41
41
Lapriyer enn dimounn malad
Pou sef koral. Enn Psom David.
1Bienere dimounn ki pran kont ek ed bann pov
kan zot dan difikilte, LESEGNER pou delivre zot.
2LESEGNER protez ek gard zot vivan;
zot ere lor later.
To pa abandonn zot dan lame zot lennmi.
3LESEGNER pou pran zot swin ler zot malad
e refer zot vinn fringan.
4Mo ti konfese, “Mo finn fer pese kont twa SEGNER;
pardonn mwa e donn mwa gerizon.”
5Bann ki deteste mwa zot kalomnie mwa;
zot swete ki mo mor e ki mo nom disparet.
6Mem bann ki rann mwa vizit
zot pa sinser;
zot vinn tir linformasion
e lerla zot fann rimer.
7Tann zot pe mirmire dan zorey zot vwazin!
Zot pe priye ki mo fini mal.
8Zot dir, “Li pa pou sape ar sa maladi-la!
Pena li sape sann-fwa la!”
9Mem mo meyer kamarad, mo ti kapav met lame dan dife pou li;
nou ti partaz tou
li mars ar bann-la aster.
10Me twa, SEGNER, par pitie
re-donn mwa lasante
e lerla mo fer mo lennmi peye.
11Mo kone ki to ena afeksion pou mwa,
parski mo lennmi pa finn gagn viktwar lor mwa.
12To finn relev mwa akoz mo lintegrite,
to pou gard mwa dan to prezans eternelman.
13Laglwar pou Twa SEGNER, Bondie Izrael,
aster, pli divan ek touletan.
Amen! Amen!
Valgt i Øjeblikket:
Psom 41: KMNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Nouvo Testaman Kreol Morisien Harmonisation NTPS KM © Bible Society of Mauritius, 2021.