Psom 58
58
Bondie ziz move dimounn
Pou sef koral. Enn poem David lor ler “Pa amenn destriksion.”
1E zot bann kreatir dan lesiel
eski zot zizman li korek?
Eski zot ziz dimounn ar zistis?
2Non. Zot lespri ranpli ar lemal
e zot responsab violans ek krim dan lemond.
3Move dimounn lor lapant pese depi dan vant mama;
e depi zot nesans zot nek konn koz manti.
4Kouma serpan zot lalang plin ar venin;
kouma kobra zot zwe sourd
5pou pa tann lavwa donter serpan,
pou pa ipnotize par zot lamizik.
6Bondie, grenn zot ledan,
aras ledan bann zenn lion, O SEGNER;
7fer zot disparet kouma dilo dan kanal;
kraz zot kouma move lerb dan lale.
8Kouma kourpa, zot disparet dan lagli;
kouma mor-ne ki zame trouv soley.
9Avan mem ki dife lapay sof zot marmit,
lakoler Bondie pou fer zot anvole kouma lapousier.
10Dimounn ki viv drwat pou aplodi ler
bann dan pese pe pey ser.
Zot lipie pou tranp dan disan bann kriminel.
11Dimounn pou dir for-for,
“Vremem, dimounn ki viv drwat pe gagn rekonpans;
vremem, ena enn Bondie ki zize lor later!”
Valgt i Øjeblikket:
Psom 58: KMNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Nouvo Testaman Kreol Morisien Harmonisation NTPS KM © Bible Society of Mauritius, 2021.