Psom 81
81
Enn sante pou selebre enn gran zour
Pou sef koral, avek lakonpagnman lor laarp Gat. Enn Psom Asaf.
1Anou sant nou lazwa pou Bondie, nou lafors;
avek lazwa anou loue Bondie ki Zakob ti adore.
2Larg lamizik, tap nou tanbour;
fer lagitar ek sitar sant zoli melodi.
3Soufle tronpet, soufle bigoul
pou demar festival nouvel-linn,
e letan plennlinn, e pou festival.
4Sa enn lalwa dan Izrael;
enn instriksion Bondie
ki Zakob ti adore.
5Li ti donn sa lalwa la lepep Izrael
kan li ti atak Lezip.
Enn lavwa, ki zame mo finn tande avan, dir,
6“Mo finn tir fardo lor zot zepol;
mo finn tir pwa lour dan zot lame, finn depoz li anba.
7Kan zot ti dan difikilte, zot ti dimann mo led
mo ti reponn depi dan berso loraz.
Mo ti teste zot kan mo ti fer lasours Meriba sek.
8Ayo mo pep, ekout mo avertisman;
Izrael, si selman to ti kapav ekout mwa!
9Fode pena bondie etranze parmi zot.
Pa ador enn lot ki mwa.
10Mwa mo LESEGNER to Bondie;
Mwa ki ti tir zot depi Lezip.
Ouver zot labous e mo pou plin zot vant.
11Me mo pep ti aret ekoute;
Izrael ti refiz obeir mwa.
12Akoz sa mo ti les zot fer zot teti
e debrouy zot difil kouma zot ti oule.
13Si selman mo pep ti ekout mwa;
si selman zot ti obeir mo instriksion.
14Vit-vit mo ti pou detrir zot lennmi;
lor vites mo aneanti bann ki rod fer zot ditor.
15Bann ki ayir LESEGNER pou kourbe ar lafreyer divan li,
zot pinision pa pou ena finision.
16Me mo pep ti pou manz meyer dible;
e ti pou bwar meyer dimiel sovaz.”
Valgt i Øjeblikket:
Psom 81: KMNT
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Nouvo Testaman Kreol Morisien Harmonisation NTPS KM © Bible Society of Mauritius, 2021.