Lukas 13
13
Maŋgwad rav
1Dapa ŋgesey ana, ndana hay faŋga ɓa, ac ka gwaɗa Yesu, gege: «Pilatu ka kəɗa ndah Gelile ana hay avəda cukw cukw dapa masa aca ŋgə kwakwas kad Zlavay. Ka cama bembez teceŋ eve bembez ta gənaw hay fa slam ana.» 2Yesu ke vehecen, gege: «Akwa wulakiya sə, ac ndah maŋga mebər hay ka fəna Gelile hay dərziya mafay ta masa ec ke məcec ara ŋga geyey? 3Ya gwaɗakwa, ec ke fənec aabay, amaa daha akwar ka ŋgwada rav takwar aabay sə, akwar ta zə takwar fakwanay ara eceŋ ana may. 4Yaw, mawulakaw da yaŋ ndah kuraw dapa yaŋ ana cahkar, masa way mazambəla ana da gəva te Siluwey te mbeɗ kad yaŋ eceŋ. Akwa wulakiya ŋgesey sə, ndah ana hay ec ke fənec ndah dərziya de Zeruzelem eve mebər hay geyey? 5Ya gwaɗakwar, ec ke fənec aabay, amaa daha akwar ka ŋgwada rav takwar aabay sə, akwar ta zə takwar fakwanay ara eceŋ ana may.»
Ma maɗəva da yaŋ maftay
6Yesu ke gweɗec ava ma maɗəva, gege: «Ndana ɓa, maftay mapəca de ley tata. Ke dekey ka ta ŋgal wudiya ana, amaa maftay ana mahaya aabay. 7Bay te wudez ana, ka gwaɗa nda mapana ndey fe ley sə, gege: “Wala maftay nesey, mavay mahkar ye ke dekey ka ta ŋgal wudiya ana, amaa mahaya aabay. Ŋgəla avəda, bəna a fas slam de ley taambəla”. 8Amaa nda mapana ndey fe ley ana ka vahan, gege: “Bay aɗaw, gərda ta laməna na ɗagay, ya da tatəha dar te wudez ana, ya da həlana gəraŋ a dar ana. 9Gəla tasəfa sə, e te heyek kwa. Daha ke te heyə aabay suwar sə, ka da ŋgəlaw.”»
Yesu a mbəl ŋgwaz pas ta masasak vaw
10Pas ta masasak vaw ɓa, Yesu aŋga dapa mesesərekec ndana hay dapa Way ta macə mbahw te Zuwef hay. 11Ŋgwaz ɓa dapa way ana faŋga, aŋga eve mesfen maləza mavay kuraw dapa yaŋ ana cahkar. Mesfen maləza ana, ka hwarma avəda. A zlafa mezlec nduwak bay. 12Masa Yesu a wala ŋgwaz ana sə, ka zala, ka gwaɗa, gege: «Mamaŋ taaɗaw, mesfen maləza mahurmakaa nesey sə, ka gərdaka cay.» 13Yesu ka pafa ha ŋgwaz ana. Faŋga faŋga ana, ŋgwaz sə, ke zlecey, ka hahəm Zlavay.
14Amaa, bay ta Way ta macə mbahw te Zuwef hay ana, rav ka haca mabay mafay ta masa Yesu masa aŋga ta mbəl ndana pas ta masasak vaw. Mafay ana, ke gweɗec ndah dapa way ana faŋga, gege: «Manah makwa ɓa te meŋgə mezlər hay, daha akwa wal membəley sə, medek pəsaŋga ana hay ŋgesey, amaa akwar te dek pas ta masasak vaw bay.»
15Bay Mazlakava ka vahan, gege: «Akwar ndah masa neneŋ hay dapa ma ecew ecew! Pas ta masasak vaw sə, akwa pal zla takwar hay va zaŋgwa takwar hay dapa slam ta mandə jene tec hay ka ta sə yam aabay geyey? 16Yaw, ŋgwaz nesey, aŋga dapa tərsam ta Abəraham, aŋga majawa dapa ha ta Saadan mavay kuraw dapa yaŋ ana cahkar. Tata sə, ya da pəliya pas ta masasak vaw bay sə, mafay te mey?» 17Mafay ta ma ana hay nesey, hwar ke ŋgec maslagəra tata hay fakwanay. Amaa ta ndah dərziya makwasa faŋga sə, ec ke wesley da yaŋ mezlər hay mekele mekele mambəla ana masa Yesu te ŋgeceŋ.
Ma maɗəva da yaŋ wut te venjeh
(Mat 13.31-32; Mar 4.30-32)
18Ara nesey, Yesu ke gweɗ, gege: «Wunam ta bay ta Zlavay sə, aŋga ara mey? Ya da cacaliya eve mey? 19Ya zlafa macacaliya ava wut te venjeh masa ndana ta kəsiya, a sləkaɗ e ley tata. Wut te venjeh ana e pəcekey, e gəl ka gamslak mazlakava ana. Ɗiyak hay aca lam way fa ha ana hay.»
Ma maɗəva ava is
(Mat 13.33)
20Yesu ke gweɗec saya, gege: «Ya da cacal Wunam ta bay ta Zlavay sə, eve mey? 21Ya zlafa macacaliya ava is masa ŋgwaz ta həliya kusetke, a haɗiya ava kəfa ta makala gaa, afa a da ɓəsla fakwanay.»
Mesehw kad pa Wunam ta bay ta Zlavay
(Mat 7.13-14)
22Yesu ke dey e Zeruzelem, ke də jaka pe berne hay va wunam hay dapa səɓak, ke sesərekec ndana hay.
(Mat 7.13-14)
23Dapa ŋgesey ana, ndana ɓa ka nəkafa, gege: «Bay Mazlakava, Zlav a ta mbəl sə, ndana hay gaa aabay war geyey?» Yesu ke gweɗec ndana hay faŋga, gege: 24«Meŋgə gədaŋ, te mesehw jaka pə ma ta way menjezl ana. Ya gwaɗakwar, ndana hay gaa ac ta yah mesehw kad pa, amaa ac ta zlafa bay.»
(Mat 25.10-12)
25«Yaw, pas amta, bay ta way e te zleftek ka ta ɓazl ma ta way. Ara nesey, akwar te zlec da vəda, akwar te zel fəma ta way, akwar te gweɗey: “Bay Mazlakava, wunandan ma ta way!” A ta vahakwaɗ, gege: “Akwa dek da ma, ya sənakwar bay.”
(Mat 7.22-23)
26Ava dəɓa ana, akwar ta zlar magwaɗa, gege: “Andə ka ndakwa ɗaf fa slam ana, andə ka səkwa jene fa slam ana, ka ka sasərakandaw dapa cəv ta maŋgway taciya hay”. 27A ta gwaɗakwar saya, gege: “Akwa dek da ma, ya sənakwar bay. Akwar fakwanay ndah maŋga jene hay masa ece teh bay, madaɓa dəreŋ eve yey!”
(Mat 8.11-12)
28Pas masa akwar ta wala Abəraham, Izak, Zakwab va ndah mehwedek ma fakwanay manjaha dapa Wunam ta bay ta Zlavay, takwar sə, akwar magəra da vəda! 29Ara nesey, ndana hay ec te dekey jaka bəlam va jaka ma ta wudam, jaka sakatay va jaka hwahwaɓay ka ta ndə ɗaf ta macunam dapa Wunam ta bay ta Zlavay.
(Mat 19.30; 20.16; Mar 10.31)
30Yaw, ŋgeɗ hay deveŋ ndah metekweɗ ana, ec te tərec ndah mama hay. Deveŋ ndah mama, ec te tərec ka ndah metekweɗ ana.»
Yesu aŋga fəma ta maməcay
31Pəsaŋga ana ŋgesey, ndah deveŋ Farisa hay ɓa, ac ka ŋgucafa vaw Yesu aca ra ŋguzdana ma, ac ka gwaɗa, gege: «Zleftek fana, daɓa pa slam mekele, afa Herawt a wal ma ta kəɗakaa ka macəhwandaw.» 32Yesu ke vehecen, gege: «Madaɗ ma ta gwaɗa gwebegwebekw#13.32 Gwebegwebekw Yesu a zal Herawt gwebegwebekw sə, afa dapa mawulak yaŋ te Zuwef hay sə, gwebegwebekw sə, jə te ley masa e ŋgə mezlər ve wewer elehey, amaa ndana a ŋgə zidaw fətiya aabay, afa aŋga jə mekusetke ana. ana: “Aha, ya mbas damkwaw hay, ya mbəl ndana hay dapa mehecey, pəsna, tedew, dapa manah mamahkar ana sə, ya ta ndəvda mezlərey aɗaw”. 33Amaa a lada ya kəs cəvey, ye də pəsna, tedew, badamta saya, afa gədaŋ dapa kad ndana hay ac da kəɗ nda mehwedek ma dəreŋ eve Zeruzelem.»
Yesu a kuɗa mafay te Zeruzelem
(Mat 23.37-39)
34Ava dəɓa ana, Yesu ke gweɗ, gege: «Zeruzelem, Zeruzelem, Zlav ka zləraka ndah mehwedek ma tata, ke ke kəɗec avəda cukw cukw. Ka zlərakwar maslaŋ tata hay, ke ke kelec eve kekeŋ. Pas mekele, ya ka wal maɓəc wudiyak hay ara mamaŋ siyakw ta ɓəc wudiya hay pa pərkwasla tata, amaa akwar ka walaw aabay! 35Macəna, Zlav a ta həla ha tata da yaŋ akwar. Way ta kwakwas takwar a ta tərata ke yidey. Ya gwaɗakwar, akwar te weleyey fe ndey ɓasabay, kasl pa pas masa akwar te gweɗey: “Mapəsma de ŋgey da yaŋ nda masa e dek eve mezel ta Bay Mazlakava.”»
Valgt i Øjeblikket:
Lukas 13: CUVnt
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2022 CABTAL