Mataayo 17
17
ɄYeesu agaluuhana ɨsheeni na menda
(Maalʉko 9:2-13; Luuka 9:28-36)
1Lwa zyashila ɨnsiku nʼtanda, ʉYeesu ahamʼmwega ʉPeeteli, ʉYaakobo nʉ Yoohani ʉnʼdoodo wa Yaakobo, ahazʉbha peeka nabho hwi‑igamba itali, bhahabha bheene ʉhwo. 2Ɨpo lwa bhali paala, ʉYeesu ahagaluuhana ɨsheeni pitagaalila lyabho. Ɨsheeni shaakwe shahalapuuhana nanshi isanya na menda gaakwe gahabha mazelu tee nanshi ʉlukhozyo lwi‑isanya. 3Pɨnɨɨpo lwene bhahanʼnoleshela ʉMoose nʉ Eliya, abhakuwi bha Ngʉlʉbhɨ abhɨ mandɨ,#17:3 ɄMoose nʉ Eliya bhahali bhakuwi bha Ngʉlʉbhɨ abhagoosi tee hwi‑Ilagano ɨlyɨ Mandɨ. Bhaazya ɨNyiizuho 34:10; 1 aBhamwɨnɨ 17-2 aBhamwɨnɨ 2. bhayanga nʉ Yeesu. 4Ɨpo ʉPeeteli ahamʼmʉʉzya ʉYeesu ahaga, “Wee Mwɨnɨ, shinza tee huje atɨ tibhe ɨpa! Nkashele ʉhunɨtɨshɨzya, ɨnza‑azenje ɨpa amasebhele gataatu. Lyeka libhe lyaho, ɨlyamwabho libhe lya Moose nɨ lyamwabho libhe lya Eliya.”
5ɄPeeteli lwa‑ali sha‑ayanga, enya, ibhɨngo lya lilawuha lyahɨnza na hubhagubishe. Ɨpo lyahʉmvwɨha izwi afume mwi‑ibhɨngo lyahaga, “Ʉnʉ Mwana waanɨ ʉnʼkʉndwe, ahungwɨzya ʉmwoyo, mumʼmwʉmvwaje yʉʉyo!” 6Abhasundwe bhaakwe bhaala lwa bhʉmvwa ɨzyo, bhahoogopa tee, bhahagwa kupama pa nsi. 7ɄYeesu ahasejeela pa pɨɨpɨ, ahabhapalamansya, ahabhabhʉʉzya ahaga, “Ɨmɨɨlɨli, mugandi hwogope!” 8Lwa bheenya amaaso gaabho hu mwanya, saga bhahanʼnola ʉmuntu ʉwamwabho, lyoli ʉYeesu mwene asyalile. 9Ɨpo lwa bhahwiha mwi‑igamba liila, ʉYeesu ahabhalajizya, ahaga, “Musahasheele humʼmʉʉzye ʉmuntu wowonti gonti ɨgo mwagalola afishe hu habhaazyo ɨho anɨ nɨMwana wa Muntu lwa nazyʉha afume hwa bhafwe.”
10Abhasundwe bhaakwe bhahamʼmʉzɨɨlɨzya ʉYeesu bhahaga, “Hu nongwa wɨlɨ abhamanyizyi abhɨ ndajizyo zya Moose bhayiga, ‘Ɨhwanziwa huje ʉnʼkuwi ʉEliya ayɨnze nasʉʉti sha‑asɨɨle ahwɨnze ʉKilisiti’?” 11ɄYeesu ahabhaamula ahaga, “Lyoli, ʉEliya ahwanziwa huje ayɨnze nasʉʉti huzilɨngaanye zyonti. 12Leelo ɨhubhabhʉʉzya huje ʉEliya ahali ayɨnzɨle,#17:12 ʉEliya ahali ayɨnzɨle ɄYeesu ahalɨnganisiizye ʉYoohani ʉMwozi nʉ Eliya. ɄYoohani ʉMwozi ahabhombile ɨmbombo ɨyo aBhayahuudi bhahasʉbhɨlaga huje, ʉEliya ahayibhomba. Ɨmbombo ɨyo yahali ya hunʼnɨngaanyizye ʉYeesu idala. Bhaazya Mataayo 11:10. leelo abhantu saga bhahamʼmɨɨnye, bhahamʼmombɨɨye shibhiibhi. Shɨnɨɨsho bhahayihundavya anɨ nɨMwana wa Muntu.” 13Ɨpo abhasundwe bhaala bhahazyaganya huje ʉYeesu ahali ayanga nabho ɨnongwa ɨzya Yoohani ʉMwozi.
ɄYeesu ahulishɨmbɨzya ipepo hwa mwana
(Maalʉko 9:14-29; Luuka 9:37-43)
14ɄYeesu na bhasundwe bhaakwe lwa bhaweela pa mpʉga ɨla ɨya bhantu, ʉmuntu ʉmo ahabhala pa Yeesu, ahasugamila pitagaalila lyakwe. 15Ahamʼmʉʉzya ʉYeesu ahaga, “Wee Mwɨnɨ, ɨhulaabha ʉnʼnolele ɨnkʉmbʉ ʉmʼvwɨlɨ waanɨ, pɨpo ali nɨ mpʉngo ɨyɨ shizilisi. Ɨmpʉngo ɨyo ɨhunʼtaamya tee. Hu habhaazyo ahinji agwɨla mu mwoto na mu mɨnzɨ. 16Nahanʼneetile hwa bhasundwe bhaaho huje bhamʼponie, leelo abheene bhahapotiilwe.”
17ɄYeesu ahabhaamula ahaga, “Amwɨ mubhantu bhɨ habhaazyo ɨha, muteejile idala igolosu ɨlya hunʼsʉʉbhɨle ʉNgʉlʉbhɨ! Ɨmbajimbiilile amwɨ afishe ndi? Nʼneeti ɨpa ʉmwana ʉyo!” 18Lwa bhɨnza nawo, ʉYeesu ahalikhajila ipepo ɨlyo lyahali muuhati yaakwe, lyope lyahafuma. Nalinaali, ʉmwana ʉla ahapona. 19Ɨpo abhasundwe bha Yeesu bhahamʼmalila hu mfiso, bhahamʼmʉzɨɨlɨzya bhahaga, “Yeenu atɨ tipotiilwe hulyefwe ipepo ɨli?” 20Wope ahabhaamula ahaga, “Hu nongwa ya huje ʉlwɨtɨho lwenyu ludoodo. Lyoli ɨhubhabhʉʉzya, nkashele muli nʉ lwɨtɨho nanshi ɨmbeyu yi‑ihaladaali, mugalibhʉʉzya igamba ɨli huje, ‘Sogola ɨpa, ʉbhale paala,’ lyope ligasogola. Ɨsho nahamo ahantu ɨho mugapootwa. 21Peeka nɨ‑ɨgo, ipepo lya lili ɨsho, saga mugalishɨmbɨzya, lyoli lwene hwi‑idala ɨlya hunʼnaabhe ʉNgʉlʉbhɨ na hwiyiime alye ɨshalye.”#17:21 Amazwi agɨ lwoli ʉlwu saga galɨɨho mu nsimbo zimo ɨzyɨ mandɨ ɨzyɨ Shiyunaani.
ɄYeesu ayanga nantele afwe na‑azyʉshe hwakwe
(Maalʉko 9:30-32; Luuka 9:43-45)
22Hu habhaazyo ɨho ʉYeesu ahali peeka na bhasundwe bhaakwe hu mukowa ʉgwɨ Galilaaya, ahabhabhʉʉzya ahaga, “Anɨ nɨMwana wa Muntu nahayikhatwa na‑abhɨɨhwe mu nyoobhe zya bhalʉgʉ, 23na‑agogwe. Leelo isiku ɨlya taatu, nahayizyʉha.” Abhasundwe bhaakwe lwa bhʉmvwa ɨgo, bhahazugumiiye tee.
Asombe ɨsonko ɨyɨ nyumba ɨmfinjile ɨya Ngʉlʉbhɨ
24ɄYeesu na bhasundwe bhaakwe lwa bhaafiha hwi‑ibooma ɨlyɨ Kapelenawumu, abhasomvya sonko abhɨ nyumba ɨmfinjile#17:24 abhasomvya sonko abhɨ nyumba ɨmfinjile ɄNʼnyahuudi wowonti ʉnʼnume wa‑ahali na maaha amashʉmi gabhɨɨlɨ awe ashile, ahanziiwe asombe ɨsonko ɨya‑abhombele mu nyumba ɨmfinjile shila mwaha. Ɨmpɨɨya ɨyo yahalɨngaanaga nʉ mʼposheelo ʉgwa humʼposheezye ʉmuntu hu nsiku zibhɨɨlɨ. Bhaazya Afume 30:13-16; 2 ɨMbalilo 24:9-14; Nehemiya 10:32. ɨya Ngʉlʉbhɨ bhahamʼmalila ʉPeeteli. Bhahamʼmʉzɨɨlɨzya bhahaga, “Wɨlɨ, ʉMʼmanyizyi weenyu wope afumya ɨsonko ɨya mu nyumba ɨmfinjile ɨya Ngʉlʉbhɨ?” 25ɄPeeteli ahabhaamula ahaga, “Ena, afumya.” Ɨpo ahatʉʉha mu nyumba ʉmwo mwa‑ahali ʉYeesu. Leelo hu habhaazyo ɨho ʉPeeteli sha‑asɨɨle ayanje lyolyonti, ʉYeesu ahanda humʼmʉzɨɨlɨzye ahaga, “Wee Siimoni, ʉlola wɨlɨ? Abhamwɨnɨ abha mu nsi ɨnɨ bhasomvya ɨsonko hwa bhakhaaya awe hwa bhajenu?” 26ɄPeeteli ahaamula ahaga, “Bhasomvya hwa bhajenu.” ɄYeesu ahamʼmʉʉzya ahaga, “Nkashele sha zili, bhabhasajiiye abhakhaaya bhaabho asombe ɨsonko. 27Leelo huje tisahasheele hubhaviisye abhantu ɨbha, bhala, ʉteje ʉlwonzo mu nsʉmbi. Ɨnswɨ ɨya hwande ɨyo ʉnza huyikhate, ʉyasamishe ilomu lyakwe, ʉnza huyaaje ɨmpɨɨya muuhati. Ɨpo ʉyeeje ɨmpɨɨya ɨyo, nkʉ‑ʉbhale ʉsombe ɨsonko yaanɨ nɨ yaaho.”
Valgt i Øjeblikket:
Mataayo 17: SBK
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2022, Wycliffe Bible Translators, Inc. All rights reserved.