MOTHI 12
12
Kisang-Arni Alam Karju
(Mrk. 2:23-28; Luk. 6:1-5)
1La-apor Jisu kisang-arni sok-abithar asitem kidam jong amun, anang adun hel kangchir ongsi, sok ingphrum ponhisi chopon no. 2Manta Pharisi hel bangpo theksi Jisu yok pulo, “Langot, jipe asal kisang-arni tiki hopot, bangpo nang adun hel tikido.” 3La-amun anang lahelyok pulo, “Dabhit po aro anang alok hel kangchir amun, 4pot badi, anang Arnam ahem lut damsi, bangthe aparke kanong badike chohopot, kangton ahim chosi, anang aro anang lokjor hel potsi tikilo, bangpo nali chiporhe hlonghle yong ma? 5Lale kisang-arni bangthe hel Arnam ahem long kisang-arni kanong pangho yongta ado weh, bangpo kanong alo long chiporhe hlonghle yong ma? 6Manta ne naliyok thando, Arnam ahem yokta akithe ihut holek do. 7Aro “Ne buli karkli hanghe, jinso si hangdo.” Nali labang alam achopo kithan un nang tene, adai kangwe helyok adai kolke yongo hoi. 8Piyok pu tene Arleng Aso kisang-arni ahemphu lo.”
Ari Atot Kangwe Kiso Kapame
(Mrk. 3:1-6; Luk. 6:6-11)
9Laparake Jisu labang athem po tikangsi anali kachirdom ahem long lut damo. 10Aro langot, lalong ari atot kangwe ihut arleng kido. La-amun Jisu yok ado kipiyok chironsi anali anang yok arjulo, “Kisang-arni kiso kapame kanong long doma?” 11La-amun Jisu analiyok pulo, “Nali sitem inghone bak arlengpo ijon bherabik do aro labang bherabik ijon kisang-arni ahilik long ingjang, tene anang anangyok otsi ka-olele, ladi inghote do? 12Ijon bherabik yok ke arleng ihut konbak ador dochot! La-apotsi, kisang-arni kanong badike akime asal tiki un. 13Lapara anang arlengpo yok pulo, “Nang aripo pakeng.” La-amun anang aripo pakengo, aro ha aga aripo badisi medetno. 14Manta Pharisi hel mokol damsi anangyok pot badi mari une, anangyok lang setsetsi lam chirhep mo.
Arnam Karwal Murkiya
15Manta Jisu labang po atot chihlongsi, lalong para dam hrolo; lalong arleng ako-ong anang phel duno; aro anang lahel ahuwit yokta pame detno; 16aro anangyok bang angot anang lam pathan hlonghle yok anang than klakngo. 17Jisoya turki po parasi kipathan, lake, 18“Langot, ne murkiyapo, ne arwalo, ne nengdok po nanglongsi ne neng ingsamman. Anang phuthak ne jiuli piye, aro anang Bang-ajat hel yok kangthir bisar alam pahare. 19Anang chiprong preye lale suru hang-wong wehye, lale duwar ajon ihut bakta anang asi arjujeye. 20Anang kangthir bisar kihal chokche leng ke, anang kilerpak ingkra ingbengbe ye, lale kar lip-lip mihik kiwangsu hola ame pajutje ye; 21aro anang men pensi Bang-ajat hel chiha ye.” labang alam kichokyok ladisi chiplango.
Jisu Aro Belsabul
(Mrk. 3:19-30; Luk. 11:14-23)
22La-amun si-ik kihap kalar aro chotok ihut anang dungyok wano; aro anang anangyok pame detno, aro la apotsi kalarpo lam than uno aro amek thekngo. 23Aro ahuwit arleng hel asombhik hlongsi pulo, anangsi Dabhit po aso kipupo ma? 24Manta konam Pharisi hel labang alam arju hlongsi anali pulo, lake si-ik arecho Belsabul po pensi labang arlengpo si-ik helyok ujhar man. 25Anali kachiron hel Jisu ke than unsi, anang analiyok pulo, “Alongriten chilang set-set tene chiphlak detsi arjap un-eh ye aro rongpe lale hem abithang adak chilang setsetne dota chirjap un-eh ye. 26Aro si-ik ke si-ikyok chi-ujhar tene anali bithang chilang setsetsi chiphlak detne. Tene, pot badi anali longripo chirjapme? 27Aro ne Belsabul po pen si-ik helyok ujhar tene, ingho pente nali sohel analiyok ujhare? La apotsi naliyok analisi bisarpo chiplange. 28Manta Arnam Jiuli pen ne si-ik ujhardo tene, Arnam longri nali dung wang hlengo. 29Ajakong kido arlengpo ahem ingho bangpo lut dam une? Ango anangyok kok ke lengke kanghupo bihinihel ching-hu pon un-eh. Laparake anang hem para ching-hu pon une. 30Inghosi ne pen dode, anangke neyok lang un-eh; aro inghosi ne pen chingrumre anangke chidat salman. 31Lasi ne nali thando, arleng apap hel aro Arnam yok kapatharak arleng hel yok ronne, manta Jiuli yok kapatharak poyok ke ronreye. 32Inghosi Arleng Aso yok kilang un-eh alam puye anangyok ke ronne, manta inghosi Jiuli-Kangthir yok kilang un-eh alam ingjeye anangyok ke minon aro mophel awe yokta ron un-eh ye.”
Thengpe Arong Pen Anang Athe
(Mot. 7:15-20)
33Thengpe arongpe metene atheta meye, aro thengpe arongpe meme tene atheta meme. Thengpe arong athepo parasi pachini unman. 34Nali phurul ajat badi angho abi kido abang, nali akangho aneng para pot badi akime nali than une? Nang thin long potsi doma ladisi thanman. 35Akime arlengke akime apuru long para akime abihini wanman, aro akangho arlengke anang kangho apuru long para kangho wanman. 36Ne naliyok thando, arleng hel konbak kangwe alam than, bisar kangning arni lamehel ahuwit alam alekha pihlonge. 37Piyok pu tene nang bithang lamthe parasi ado kol le, lale abithang lamthe parasi ado pusi alekhot enne.”
Jona po Asin
(Luk. 11:29-32)
38La-amun kanong kapaklang helpen Pharisi hel anang yok pulo, “Paklangpo, nang para hali asin isi kilange anengdo.” 39Manta anang analiyok puphakngo, “Nali kangho aro kidoner owe abang, nali asin isi kapaklang yok arjudo, manta Jona turki po para kamprek asombhik asin nali pipe ye. 40Jona po ok akithe apok arlo ni-thom adin aro nuwe kithom kido, lasi Arleng Aso ta ni-thom adin pen nuwe kithom lungle arlo doye. 41Ninebi arleng hel labang owepo pen bisar long arjap dunsi ado piye, piyok pu tene Jona po kapahar amun anali neng chipharlepmo, aro langot, holek Jona po yokta aghaichot ihut do. 42Ni-ting aga rechope thursi labang owepo pen bisar long arjap dunsi ado piye, piyok pu tene anang pirthimipe kijut para Solomon po kapaklang agiyan ka-oneyok kiwang; manta langot, Solomon po yok ke kithe chot ihut do.”
Kangho Jiuli Kiwang Phak
(Luk. 11:24-26)
43Konam kangho ajiuli kachu-u ihut para olesi dam, la-amun lang kangwe athem long kisang yok bisar damman, manta anang pahlong un-eh. 44La-amun anang puye, “Ne tikangne kiwang ahempo yoksi ne dam phakbo.” Anang lalong kihlengyok ke hempo ahuna pangthir phlensi meso kibi wang thekngo. 45La-amun anang damsi, anang angoyok kanghochot thorok-isi kamprek ajiuli chiwansi, lalong lut damsi dolo. Aro labang arlengpo angoyok ke aphelsi ingho chotman. Labang adin kangho arleng helta chiplangbo.”
Jisu Anang Ai Pen Amuso Hel
(Mrk. 3:31-35; Luk. 8:19-21)
46Jisu arleng hel angot lam than jongne kido amun, langot, anang ai pen amusohel wangsi anang pen lam kachithan yok mokol arjap phrongsi kido. 47Inghone bak anangyok pulo, “Nang ai aro nang musohel wangsi nang pen lam kachithan yok mokol long inghong phrong si do.” 48Manta anang labang arlengpo yok pudun phakngo, “Ne ai ke ingho te? Aro ne muso hel ke ingho te?” 49La-amun anang adun hel aga anang aripo jongsi pulo, “Holek kido abangsi ne ai aro ne kortehel. 50Inghosi ethakpe long kido ne Apa aneng ateng mainot analisi ne muso aro ne ingjir aro ne ai.”
Valgt i Øjeblikket:
MOTHI 12: AMRI-BSI
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.