MARK 2
2
Atot Kangwe Kiso Kapame
(Mot. 9:1-8; Luk. 5:17-26)
1Konam angkhan arni aphel Jisu Kaparnaum yok dam phakngo, anang hem longsi do pusi arjulo. 2La-an rat ako-ong chingrumo apot, owa amahangyok, anghor wedet no; la-amun anang analiyok kime-alamthe paharo. 3Laparake angkhan arleng, lake bang-phili arleng chirchongsi ihut atot kangwe kiso po yok anang dungyok wano. 4Aro konam anali Jisu kido hem arloyok wan un-ehsi rat kitan-ong anat, anali sarnuk tereksi aro awak otesi, atot kangwe kisopo ki-ih atar pen pasuno. 5Konam Jisu anali kikrol thekngo, anang atot kangwe kisopo yok pulo, “Ei oso po, nang pap rontango.” 6Minon ke lalong kanong paklang abang iningsi kido, anali angthin long chirwalsi pulo, 7“Piyok labang arleng po ladi alamthe pulo? Arnam yoksi patharak do! Manta ihutdet Arnam aparke ingho pap ron unman? 8Lajongsi Jisu ajiuli long anali dak ladi kachirwal atot chihlongo; aro anang lahelyok pulo, “Piyok nali ingthin long ladi chirondo? 9Atot kangwe kisopo yok kipu, dak bangpo te kajalso chot, nang pap ron tango; lale “Thurnot, aro nang tar chi-olnot aro akeng chijornot? 10Manta pirthimipe long pap kiron unyok Arleng Aso apharan do,” bangpo nali chini unyok— anang atot kangwe kisopo yok pulo— 11“Ne nangyok nang thando, thur not, nang tarpo chi-olnot, aro nang hemyok damot.” 12Aro anang thuro, aro parjangwet si tarpo chi-ol pono aro anali ahuwit ango dam phlungo; la-amun ahuwit asombhik hlongo aro Arnam ayok jortangpo pilo, pulo, “Hali labadi jatsi thek hlonghle yong!”
Jisu Lebi poyok Kataram
(Mot. 9:9-13; Luk. 5:27-32)
13Jisu langpe akungyok olesi dam phakngo; rat athawolsi anang dungyok wango, aro anang lahel yok lamthe paklango. 14Anang damjongsi kido apor, Alphayus po aso Lebi po yok, khajana ki-en ahem iningsi kido thekngo, aro anang anangyok pulo, “Ne phel-phel wang dunot.” Aro anang thuro aro anang phel-phel duno. 15Aro anang Lebi po ahem anethu an-asan kichoyok iningo, la-amun ako-ong kalukdar aro papi arleng, anang aro adun hel pen iningo— piyok pu tene lahel ako-ong arleng anang phel-phel kidun. 16Konam anang papi aro kalukdar helpen kicho thek duno, la-amun Pharisi hel aro kanong paklang abang Jisu adun helyok pulo, “Kalukdar aro papihel pensi anang piyok cho-jun dunman?” 17Jisu labang arjusi analiyok pulo, “Akime arleng hel ojha nangne, manta kisohel aphansi; ne dhorom kangthir abang aphan ke wangwe yong, manta papi yok kataram aphansi wangdo.”
An Kihum Alam Karju
(Mot. 9:14-17; Luk. 5:17-26)
18Minonke Johon po adun hel aro Pharisi hel ke an-kihum; aro arleng hel wango aro Jisu yok pulo, “Johon po adun pen Pharisi adun hel ke an-humman, manta piyok te nang adun helke an humhe?” 19Jisu analiyok pulo, “Jorme-pachihap long don hel oso po analipen kido amun anali an-hum unman ma? Konbak arniyok oso po analipen kido jong alengke, anali an-hum un-eh. 20Manta ladi arni wange konam Oso po yok anali sitem para pondetne, la-arni anali an-hume. 21“Kaita aban ape athakpe akimi bang-tunte; ladine inghol tene, aban po yok pangrak pon phlene, lake akimi pe abeng aban ape yok pangrak phlenman, aro la-amun ingrak chot-chotman. 22Aro aban areng amathi long akimi ahor kaita bibe; bi yongta, horpo la arengyok pangbop phunne, aro la-amun hor po alang aro arengpo inghon detne; manta hor akimi ke akimi thon areng amathi longsi thalman.”
Kisang-Arni Alam Karju
(Mot. 12:1-8; Luk. 6:1-5)
23Inirsi kisang-arni bithar asitem kidam jongsi kido; aro damjongsi kido amun anang adun hel sok ingphrum ponhilo. 24Pharisi hel Jisu yok pulo, “Langot, kisang-arni potsi katiki hopot bangposi lahel piyokte tiki do?” 25Aro Jisu analiyok pulo, “Dabhit po konam anang aro anang alokjor hel an-kangchir aro an kanange kido, labang alam chiporhe hlonghle yongma? 26Konam Abiyathor po bor-bangthe kido amun, aro anang Arnam ahem lut damsi, bangthe hel apar ke, kaita kicho-hopot Arnam yok kangton ahimpo cholo, aro alokjor helyok ta pilo.” 27Laparake Jisu analiyok pulo, “Kisang-arni munusi aphansi ingholo, munusi ke kisang arnipe aphanke kalek; 28la-apotsi Arleng Aso si kisang-arni aphanta ahemphu lo.”
Valgt i Øjeblikket:
MARK 2: AMRI-BSI
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Amri Karbi N.T. - AKIMI ANGTON N.T.
Copyright © 2017 by The Bible Society of India
Used by permission. All rights reserved worldwide.