Johaneb 2
2
ǃGameǁâus, Kanas tawa
1 ǃNona tsēdi khaoǃgâ i ge ǃgameǁâu-e Galileab ǃnâ ǂnôa ǃās Kanas ǃnâ ge hâ i. Jesub îs tsîn ge ǁnāpa ge hâ i. 2Jesub tsî ǁîb di ǁkhāǁkhāsabegu* tsîn ge ǁkhāti ǁnāpa ge ǁkhauhe hâ i. 3Tsî ǂauxûi-i ge toa, os ge Jesub îsa ǁîba ǃoa ge mî: “ǂAuxûi-i ge go toa.”
4“Mâtis nēsa samma ra tsâǀkhā?” Tib ge Jesuba ge dî. “Ti ǁaeb kom ganupe hā tamao.”
5Xawes ge ǁîb îsa ǃgāgu ǃoa ge mî: “Mîb ga xū-i hoa-e dī re.”
6ǁNāpa di ge ǃnani ǀuiǁgamxapade ge mâ i, ǁîdi ge Jodeǁîn ǃanuǃanusens di ǁnaetib ǃoa gere sîsenūhe tsî ǁkhaisadisisa xu ǀguikaidisiǀgamdisi literga ǃkhōǂgā ǁkhā. 7Ob ge Jesuba ǃgāgu ǃoa ge mî: “ǁGammi ǀkha ǁgamxapade ǀoaǀoa.” Tsî xapade gu ge ams kōse a ǀoaǀoa, 8ob ge ǁîgu ǃoa ge mî: “Nēsi ǃkhā, î ǁâudīb ǂgaeǂgui-aoba sī mā!” O gu ge mîmāsa ge dīǀoaǀoa.
9Tsî ǁâudīb ǂgaeǂgui-aob ge ǁgam-i, ǂauxûi kai go-e ge tsâtsâ, ǂan tamab hâ mâpa xu i hâsase, (xawe ǃgāgu ge ge ǂan i) ob ge ǁâudīb ǂgaeǂgui-aoba ǃgame-aoba ǂgai 10tsî ge mî: “ǁKhau-aob kom aibe ǃgâi ǂauxûi-e mā tsî ākhanun kao ǀgui, ǂkhabusa ǂauxûi-e ra māo. Xawets ge satsa ǂoaǂamsa ǂauxûi-e nēs kōse go ǃkhō-oa hâ i.”
11Nē tsoatsoas saodi disab ge Jesuba Kanas hîa Galileab ǃnâ ǂnôas tawa ge dī, tsîb ge ǁîb ǂkhaisiba ge ǂhaiǂhai. Tsî gu ge ǁkhāǁkhāsabegu âba ǁîb ǃnâ ge ǂgom.
12ǃGameǁâus khaoǃgâb ge ǀoro tsēdeb ǁnāpa sī nî hâse ǁîb îs, ǁîb ǃgâsagu tsî ǁîb ǁkhāǁkhāsabegu tsîn ǀkha Kapernaums ǁga ge ǃgû.#Mat. 4:13
Tempeli di ǃanuǃanuhes
(Mateub 21:12-13; Markub 11:15-17; Lukab 19:45-46)
13 #
Eks. 12:1, 27 Kurikorobe ra hâ Jodeǁîn di Pasxaǁâudīb ǁaeb ge a ǀgū, ob ge Jesuba Jerusalems ǁga ge ǃgû. 14Tempeli ǃnâb ge goman, gūn tsî ǂnabun ǀkha ra ǂharugu khoen tsî mariǂharugu-aon hîa ǁîn di tāgu tawa ǂnôana ge mû. 15Ob ge Jesuba tsurigu ǀkha ǃnaba-e dībasen tsî khoena Tempela xu ge sauruǂui, gūn tsî goman tsîna ǁkhāti ǃkhōǂgā hâse. ǁKhātib ge mariǂharugu-aon di ǂkhari marina ǂaiǂgawab ai tsoroǁgui tsî ǁîn di tāga ge ǂhāǃgau. 16Tsîb ge ǂnabuna ra ǁamaxūgu ǃoa ge mî: “Nēna nēpa xu ūbē. Tā ti Îb omma ǂharugu-omse dī!”
17 #
Psa. 69:9
O gu ge ǁkhāǁkhāsabegu âba ge ǂâihō, Xoas ǃnâ xoahe hâ ǃkhais “Elob di ommi ǃaroma hâ ǀnammi ge tita ǃnâ ǀaes khami ra khau” ti ra mîsa.
18“Mâ ǂhanu-ets nēna dīs ǃaroma ūhâ?” ti gu ge Jodeǁî ǂgaeǂgui-aoga ge ǂgaoǀkhā bi. “Nē ǁkhāsibats ga Eloba xu ūhâo, o sao-e dī nēsats nî ǁgauǂuise.”
19 #
Mat. 26:61; 27:40; Mrk. 14:58; 15:29 “ǂHanu a” tib ge Jesuba ge ǃeream. “Nē Tempela khôaǁnâ, o ta ge ǁîba ǃnona tsēdi ǃnâ nî omkhâi.”
20On ge Jodeǁîna ge ǂgaiǂui. “Nē Tempeli ge hakadisiǃnaniǀa kuriga ge omhe, ots kha satsa ǃnona tsēdi ǃnâ nî omkhâi bi?” 21Xawe “nē Tempeli” ǀkhab ge Jesuba ǁîb sorosa gere ǂâibasen. 22ǁŌ hâna xub ge khâis khaoǃgâ gu ge ǁkhāǁkhāsabega nēsab ge mî hâ i ǃkhaisa ge ǂâihō. Tsî gu ge Jesub ge mîǀî gu mîs tsî Xoas tsîra ge ǂgom.
Jesub di ǂans khoesi ǂūsib dis
23Jerusalems tawab Pasxaǁâudīb ǁaeb ǃnâ buruxa saode ra dī ǃkhaisan ge mû, xui-aon ge ǂguina ǁîb ǀons ǃnâ ge ǂgom. 24Xaweb ge Jesuba ǁîna ge ǂgomǃgâ tama hâ i, khoen ǂgaogab ge ǂan i xui-ao. 25Khoe-i xare-i ge Jesuba nau khoe-i ī ǀgausa a mîba ǁoa, ǁîb ǀnai khoe-i ǂgaoba a ǂan xui-ao.
Valgt i Øjeblikket:
Johaneb 2: KKG20
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Khoekhoegowab Elobmîs © Bible Society in Namibia, 2020.
