Lukab 15
15
Kā hâ gūs di ǂkhōs*
(Mateub 18:12-14)
1 #
Luk. 5:29-30
ǀGuitsēn ge ǂgui ǁgui-aimariǃkhōǃoa-aon* tsî ǀnî ǁore-aon tsîna Jesub ǃoa ge hā, ǁîban nî ǃgâse, 2o gu ge Farisegu* tsî Moseb ǂhanub* di ǁkhāǁkhā-aoga ge hununutsoatsoa: “Nē khoeb ge ǁore-aona ǁkhoreǁhare tsî ǁîn ǀkha ra ǂû.” 3Ob ge Jesuba nē ǂkhōsa* ǁîga ge ǁgamba:
4“ǂÂis ǀguisa hî re, sago ǀguib ga ǀguikaidisi gūna ūhâ tsîs ga ǀguisa ǁîna xu a kā, o tare-eb nî dī? Nau khoesedisikhoeseǀa gūna ǃûǃkhaib ai ǁnāxū tsîb ǁnā ǀguisa ôa tide, ǁîsab nî hōs kōse? 5Tsî hōb ka, ob ge ǃgâiaǂgao tsî ǃhōra âb ai ǁgui 6tsî ǁîb oms ǁga ra tani. Tsîb ge hoaraga horesan tsî ǁanǁare-aon âba ǂgaiǀhao tsî ǁîn ǃoa ra mî: ‘Tita ge kaise ra ǃgâiaǂgao, ti gūs kā go hâ isa ta go ǁkhawa hō-oa xui-ao. A da ǃgâiaǂgaoǀhao re!’ 7Mîba du ta ra, ǁnātib ge ǁkhāti ǀhommi ǃnâ ǃnāsa ǃgâiaǂgaoba nî hâ, ǀgui ǁore-ao-i hîa go ǃhobasen-i ǂama, khoesedisikhoeseǀa ǂhanu-ai khoen, ǃhobasenn nî ǃkhaisa ǂhâbasa taman ǃgâ-ai.
Kā hâ maris di ǂkhōs*
8“Tamas ka io ǂâi re, disi ǀhaiǀurimaride ūhâ taras ga ǀguis xa kāxūhe, o tare xū-es ra dī? ǁÎs ge ǃamǀaesa ǃam, omsa ǀnapuǂui tsî mâ ǃkhai-i hoa-i ai ǂōrisase ra ôa, ǁîsas nî hōs kōse? 9ǁÎsas ga hō, os ge horesadi tsî ǁanǁare-aodi tsîde ǂgaiǀhao tsî ǁîdi ǃoa ra mî: ‘Tita ge kaise ra dâ ti maris kā go hâ isa ta go ǁkhawa hō xui-ao. A se ǃgâiaǂgaoǀhao re!’ 10Mîba du ta ra; ǁNātib ge ǁkhāti ǃgâiaǂgaoba Elob ǀhomǃgān ǃnâ nî hâ, ǀgui ǁore-ao-i hîa go ǃhobasen-i ǃaroma.”
Kā hâ ǀgôab di ǂkhōs*
11ǃAruǀîb ge Jesuba ge mî: “Khoeb ge ǀgam ǀgôakha ge ūhâ i. 12ǂKhammi ge ǁgûb ǃoa ge mî: ‘Ti îtse, tita nî hōse ī xūn di ǃâsa mā te.’ Ob ge xūna nē ǀgôakha ǃnâ ge ǀgora. 13ǁNās khaoǃgâb ge ǂkhamma xūn âba ǀhaoǀhao tsî ǃnū ǃhūba ǃoa ge ǃgû. ǁNāpab ge mari-i âba sī ǁgauoǃnâse ûis ǀkha ge hîǀhuru. 14Hoanab ge hîǀhurutoas khaoǃgâb ge kai ǃâtsūǀkhāba ǁnā ǃhūb ǃnâ ge hā tsîb ge ǁîb tsîna ǃgomma ge tsâtsoatsoa. 15Ob ge ǁnā ǃhūb khoen di ǀguib tawa sī ge sîsenôa tsî ǁîb xa ǃgaroǃāro-i âba ǃoa ge sîhe, hāgūnab sī nî ǃûise. 16ǁÎb ge hāgūn ǂûn xa ǂûsa gere ǁkhore, xaweb ge ǁî-i xawe-i tsîna ge māhe tama hâ i, ǂû nîse. 17ǀUnis aib ge ǁî-aitsama ǂâiǃgâ tsî ge mî: ‘Ti îb di ǃgān hoaragan ge ǂâu hâ ǂûna ūhâ tsî ta ge tita ge nēpa ǃâs xa ra ǁō. 18Tita ge khâi tsî ti îb ǃoa oa tsî ǁîb ǃoa nî mî: Ti îtse, ǁore ta ge go, ǀhommi ǃoagu tsî sats ǃoagu. 19Anu tama ta ge hâ ǃaruǀî sa ôase ǂgaihesa; sa ǃgāgu di ǀgui-i ase sîsenū te.’ 20ǀHabe tamase khâi tsîb ge ǁgûb ǃoa ge ǃgû.
“Mûǃāhe ǁkhāb a ǃnūsib aib ǃgoaxa hîab ge ǁgûba mûǃgoaxa bi tsî kaise ǃoatsâsib xa ge khâiǃnâhe. ǁÎb ge ǃkhoeǃoa bi, ǁnam bi tsî ge ǁoa bi. 21Ob ge ǀgôaba ǁîb ǃoa ge mî: ‘Ti îtse, ǁore ta ge go ǀhommi ǃoagu tsî sats ǃoagu. Anu tama ta ge hâ ǃaruǀî sa ôase ǂgaihesa.’ 22Xaweb ge ǁgûba ǃgān âba ǂgaiǀhao tsî ge mî: ‘ǃHaese dī, î ǂoaǂamsa saraba ǀkhī-ū, î ana bi. ǀKhunuǂnûidasa ǀkhunub âb ai ǂgā, î ǀkhapura ǂgaeǂgā bi. 23ǃGû, î kaukauhe hâ tsâuba hā-ū, î da ǂû tsî ǃgâiaǂgao ǁâudīb ǀkha! 24Nē ǀgôab tib ge go ǁō hâ i tsî ǁkhawa go ûi, kāb ge go hâ i tsî ta ge ǁkhawa go hō-oa bi.’ Tsîn ge dâǁâusa dīs ǀkha ge tsoatsoa.
25“Kai ǃgâsab ge ganupe tsēs di sîsenni ǀkha ge ǀhabe i. Tsî oaǀkhī tsîb ra oms ǀgūse hā hîab ge ǁnaeb tsî ǂnāb tsîna ge ǁnâu. 26Ob ge ǃgān ǀguiba ǂgai tsî ge dî ‘Tare-e nēpa ra dīhe?’ ti. 27Ob ge ǃgāba ge ǃeream: ‘Sa ǃgâsab ge go oahā tsîb ge sa îba kaukauhe hâ tsâuba go ǂā, ǁîbab go ǂuruse hō-oa ǃkhais ǃaroma.’ 28Kai ǃgâsab ge kaise ge ǁaixa tsî oms ǃnâ ge ǂgâ ǂgao tama hâ i. Ob ge ǁgûba ǂoa tsî ge ǀkhoma bi, îb ǂgâxa. 29Xaweb ge ǁîba ǁgûba ǃhoaǃoa tsî ge mî: ‘Kō re, nē kurigu hoaga ta ge ǃgā-i khami ra ǃoaba tsi tsî tātsē sa mîmāde ǁnâuǀnamoǃnâ tama hâ. Tare-ets ge mā te? Piriro-i xawe-i tsînats ge mā te tama hâ ti horesan ǀkha ǁâudī tsî ta nî ǃgâiaǂgaose! 30Xawets ge nē ǀgôab sab hîa sa xūna ǀai-aodi ǀkha hîǀhuru tsî go oaǀkhība kaukauhe hâ tsâuba go ǂāba.’ 31‘Ti ôatse’ tib ge ǁgûba ǁîb ǃoa ge mî, ‘sats ge hoaǁae tita ǀkha hâ tsî tin hoan ge a sa. 32Xawe da ge ǃgâiaǂgao tsî dâs ǀguisa a hî ǁkhā; nē sa ǃgâsab ge go ǁō hâ i tsî ǁkhawa go ûi, kāb ge go hâ i tsî da ge ǁkhawa go hō-oa bi.’ ”
Valgt i Øjeblikket:
Lukab 15: KKG20
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Khoekhoegowab Elobmîs © Bible Society in Namibia, 2020.