Jaratılıs 27
27
Ísaqtıń Yaqıpqa pátiya beriwi
1Ísaq qartayıp, kózi kórmey qaldı. Ol úlken ulı Esawdı shaqırıp alıp, oǵan:
– Ulım! – dedi.
– Lábbáy! – dep juwap berdi Esaw.
2Ísaq oǵan bılay dedi:
– Mine, men qartayıp qaldım, qashan óletuǵınımdı bilmeymen. 3Endi sen qurallarıńdı: sadaq hám oqlarıńdı al da, dúzge ketip, men ushın bir ań awlap kel. 4Keyin men jaqsı kóretuǵın mazalı awqat tayarlap, maǵan alıp kel. Men onı jep, ólmesimnen burın saǵan pátiya bereyin.
5Ísaq ulı Esawǵa bul sózlerdi aytıp atırǵanda, bunı Rebekka esitip turǵan edi. Esaw ań awlap ákeliw ushın dúzge ketkende, 6Rebekka ulı Yaqıpqa bılay dedi:
– Men ákeńniń ájaǵań Esawǵa aytqan gápin esitip qaldım. Ákeń oǵan: 7«Maǵan bir ań awlap ákelip, mazalı awqat tayarla. Men onı jep, ólmesimnen burın saǵan Jaratqan Iye aldında pátiya bereyin», – dedi. 8Ulım, endi meni dıqqat penen tıńlap alıp, aytqanlarımdı isle: 9súriwge barıp, ol jerden maǵan eki ılaqtı saylap ákel. Men olardan ákeń jaqsı kóretuǵın mazalı awqat tayarlayın. 10Sońınan sen onı jewi ushın ákeńe aparasań. Sonda ákeń ólmesinen burın saǵan pátiyasın beredi. 11Yaqıp anası Rebekkaǵa:
– Biraq ájaǵam Esawdıń denesin jún basqan, al meniń denemde jún joq. 12Eger ákem meni sıypalap kórse ne qılaman? Onı aldap atırǵanımdı bilip qoysa, pátiya ornına ǵarǵıs alaman-ǵo, – dedi.
13Anası oǵan:
– Balam, saǵan keletuǵın ǵarǵıs maǵan kelsin. Sen meniń gápime kirip, ılaqlardı alıp kel! – dedi.
14Sonda Yaqıp barıp, ılaqlardı anasına ákelip berdi. Anası olardan Ísaq jaqsı kóretuǵın mazalı awqat tayarladı. 15Sońınan Rebekka úlken ulı Esawdıń úydegi eń jaqsı kiyimlerin alıp, kishi ulı Yaqıpqa kiygizdi. 16Onıń qolların hám moynınıń júnsiz jerlerin ılaqlardıń terisi menen oradı. 17Keyin ózi tayarlaǵan mazalı awqat penen nandı ulı Yaqıptıń qolına berdi.
18Solay etip, Yaqıp ákesiniń janına kelip:
– Aǵa! – dedi.
Ákesi oǵan:
– Lábbáy, ulım, sen kimseń? – dedi.
19Yaqıp ákesine:
– Men seniń tuńǵısh ulıń Esawman. Men seniń aytqanıńdı isledim. Tikeyip otırıp, men ákelgen ańnıń góshinen je. Solay etip, maǵan pátiyańdı ber, – dedi.
20Ísaq ulınan:
– Qalayınsha bunsha tez taptıń, ulım? – dep soradı.
Yaqıp ákesine:
– Seniń Qudayıń bolǵan Jaratqan Iye meniń jolımdı berdi, – dep juwap berdi.
21Sonda Ísaq Yaqıpqa:
– Jaqınıraq kel, ulım. Sen ırasında da, ulım Esawsań ba yamasa ol emesseń be, sonı biliw ushın seni bir sıypalap kóreyin, – dedi.
22Yaqıp ákesi Ísaqqa jaqınladı. Ákesi onı sıypalap kórip: «Dawısı – Yaqıptıń dawısı, biraq qolları – Esawdıń qolları», – dep sóylendi. 23Yaqıptıń qolları ájaǵası Esawdıń qollarınday júnli bolǵanlıǵı sebepli, Ísaq onı tanımadı. Sonlıqtan ol pátiyasın bermekshi bolıp atırıp, 24jáne onnan:
– Sen ırasında da, ulım Esawmısań? – dep soradı.
– Awa, Esawman, – dep juwap berdi Yaqıp.
25Sonda Ísaq oǵan:
– Ulım óziń ákelgen ańnıń góshin alıp kel. Men onı jep, saǵan pátiyamdı bereyin, – dedi.
Yaqıp dáslep awqattı, keyin sharaptı ákelip, ákesine berdi. Ákesi awqattan jep, sharaptan ishti. 26Sońınan Ísaq oǵan:
– Jaqınıraq kelip, meni súy, ulım! – dedi.
27Yaqıp jaqınıraq barıp, ákesin súydi. Ísaq onıń kiyimlerinen Esawdıń iyisin sezdi hám Yaqıpqa pátiyasın berip, bılay dedi:
«Mine, ulımnıń iyisi,
Megzer Jaratqan Iye jarılqaǵan dala iyisine.
28Bersin Quday saǵan aspan shıǵın,
Hám jerdiń ónimdar topıraǵın,
Mol ǵálle hám júzim suwın.
29Xalıqlar saǵan xızmet etsin,
Milletler aldıńda bas iysin.
Biylik et tuwısqanlarıńnıń ústinen,
Qanalaslarıń aldıńda bas iysin.
Seni ǵarǵaytuǵınlar ǵarǵısqa ushırasın,
Seni jarılqaytuǵınlar jarılqansın».
30Yaqıp Ísaqtıń pátiyasın ala sala, onıń aldınan shıǵıp baratırǵan waqıtta-aq, ájaǵası Esaw ańnan qaytıp keldi. 31Esaw da mazalı awqat tayarlap, ákesine ákeldi. Sońınan ol ákesine:
– Aǵa! Tikeyip otırıp, men ákelgen ańnıń góshinen je. Solay etip, maǵan pátiyańdı ber, – dedi.
32Ákesi onnan:
– Sen kimseń! – dep soradı.
– Men – seniń tuńǵısh ulıń Esawman, – dep juwap berdi ol.
33Sonda Ísaq qattı shorshıp, dirildep ketip:
– Haw, olay bolsa, maǵan ań awlap ákelgen kim edi? Sen kelmesten burın, men tap jańa ǵana awqattı jep, oǵan pátiyamdı bergen edim. Endi pátiya alǵan ol boladı, – dedi.
34Esaw ákesiniń sózlerin esitkende, ashshı dawıs penen baqırıp jılap:
– Maǵan da pátiyańdı ber, aǵa! – dedi.
35Biraq ákesi oǵan:
– Iniń hiylekerlik penen kelip, saǵan tiyisli pátiyanı alıp ketti, – dedi.
36Sonda Esaw ákesine:
– Ol biykarǵa Yaqıp dep atalmaǵan shıǵar! Ol meni eki ret aldadı-ǵo: dáslep tuńǵıshlıǵımdı aldı, al endi maǵan tiyisli pátiyanı da alıp ketti, – dedi. Sońınan ol jáne: – Men ushın hesh qanday pátiya qaldırmadıń ba? – dep soradı.
37Ísaq oǵan bılay dep juwap berdi:
– Men inińdi seni biyleytuǵın qıldım, barlıq tuwısqanların oǵan xızmetshi ettim. Onı ǵálle hám jańa sharap penen támiyinledim. Endi men sen ushın ne isley alaman, ulım?
38Esaw ákesine:
– Aǵa! Sende pátiya tek birew me? Maǵan da pátiyańdı ber, aǵa! – dep dad salıp jılay basladı.
39Sonda Ísaq ulına bılay dep juwap berdi:
«Seniń mákanıń ónimdar topıraqtan,
Aspan shıǵınan jıraq boladı.
40Qılıshıńnıń kúshi menen jasap,
Inińe xızmet eteseń.
Biraq oǵan qarsı bas kótergenińde,
Ol salǵan moyıntırıqtı ılaqtırıp taslaysań».
41Ákesi pátiyasın Yaqıpqa bergeni ushın, Esaw inisi Yaqıptı jek kórip qaldı. Esaw: «Ákemniń ólimi shamalastı. Onı azalaw kúnleri ótkennen keyin, inim Yaqıptı óltiremen», – dep oylap júrdi.
42Biraq Rebekka úlken ulı Esawdıń oyınan xabardar bolǵanda, kishi ulı Yaqıptı shaqırtıp alıp, oǵan bılay dedi:
– Mine, ájaǵań Esaw seni óltiriwdi oylap, ózin jubatıp júripti. 43Endi ulım, meniń sózime qulaq sal: házir-aq Xaranǵa, ájaǵam Labannıń janına qashıp ket. 44Ájaǵańnıń ashıwı basılaman degenshe, bir qansha waqıt Labannıń janında qal. 45Ájaǵańnıń ashıwı basılıp, oǵan islegen isiń esinen shıqqannan soń, men birewdi jiberip, ol jerden seni aldıraman. Bolmasa, men bir kúnde ekewińizden de ayırılıp qalaman-ǵo.
46Keyin Rebekka Ísaqqa:
– Mına xet kelinlerimiz meni janımnan toydırdı. Eger Yaqıp ta bul jerdiń qızlarına, xet qızlarǵa úylense, onda maǵan jasawdıń nege keregi bar? – dedi.
Valgt i Øjeblikket:
Jaratılıs 27: QrqMK22
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© Институт перевода Библии, 2022