Jaratılıs 29
29
Yaqıptıń Labanǵa barıwı
1Yaqıp jolın dawam etip, shıǵıs xalıqlarınıń jerlerine jetip keldi. 2Ol sol jerdegi dalada bir qudıqtı hám qudıqtıń janında jatırǵan úsh súriw qoydı kórdi. Óytkeni qoylar sol qudıqtan suwǵarılatuǵın edi. Qudıqtıń awzında úlken tas bar edi. 3Barlıq súriwler ol jerge jıynalǵanda, shopanlar qudıqtıń awzınan tastı alıp qoyıp, qoylardı suwǵaratuǵın edi. Sońınan olar tastı jáne óz ornına, qudıqtıń awzına qoyatuǵın edi.
4Yaqıp shopanlardan:
– Tuwısqanlarım, qay jerdensizler? – dep soradı.
Shopanlar oǵan:
– Bizler Xarannanbız, – dep juwap berdi.
5Yaqıp olardan:
– Naxordıń aqlıǵı Labandı tanıysızlar ma? – dep soradı.
– Awa, tanıymız, – dep juwap berdi olar.
6Yaqıp olardan jáne:
– Onıń hal-jaǵdayı jaqsı ma? – dep soradı.
Olar:
– Jaqsı, áne, onıń qızı Rahila qoyların aydap kiyatır, – dedi.
7Yaqıp olarǵa:
– Kún batıwǵa ele kóp waqıt bar, házir súriwdi jıynaytuǵın waqıt emes-ǵo. Qoylarıńızdı suwǵarıp bolıp, jáne otlatıp qaytqanıńız jaqsı emes pe? – dedi.
8Shopanlar:
– Barlıq súriwlerdi jıynap, qudıqtıń awzındaǵı tastı alıp taslaǵanımızdan keyin ǵana, bizler qoylardı suwǵara alamız, – dedi.
9Yaqıp shopanlar menen sóylesip turǵanda, Rahila ákesiniń qoyları menen kelip qaldı. Sebebi ol qoy baǵatuǵın edi. 10Yaqıp dayısı Labannıń qızı Rahilanı hám onıń qoyların kórgende qudıqqa barıp, onıń awzındaǵı tastı alıp tasladı da, dayısı Labannıń qoyların suwǵardı. 11Sońınan Yaqıp Rahilanı súyip, ókirip jılap jiberdi. 12Ol Rahilaǵa ákesiniń jiyeni, Rebekkanıń ulı ekenin ayttı. Sonda Rahila juwırıp barıp, ákesine xabar berdi.
13Laban jiyeni Yaqıptıń kelgenin esitiwden-aq, onı qarsı alıw ushın juwırıp shıqtı. Onı qushaqlap súydi hám úyine alıp keldi. Yaqıp oǵan bolǵan waqıyalardıń hámmesin aytıp berdi.
14Sonda Laban Yaqıpqa:
– Awa, shınında da sen meniń qanlas tuwısqanım ekenseń! – dedi.
Yaqıptıń xızmet etiwi hám úyleniwi
Yaqıp Labandikinde bir ayday jasaǵannan keyin, 15Laban Yaqıpqa:
– Aǵayinim bolǵanıń ushın, maǵan teginge xızmet etiwiń kerek pe? Maǵan ayt, xızmet haqıńa qansha tóleyin? – dedi.
16Labannıń eki qızı bolıp, olardıń úlkeniniń atı Lea, kishkenesiniń atı Rahila edi. 17Leanıń kózleri múláyim, al Rahila qáddi-qáwmeti kelisken, shıraylı edi. 18Yaqıp Rahilanı súyip qaldı. Ol Labanǵa:
– Kishkene qızıńız Rahila ushın, men sizge jeti jıl xızmet etemen, – dedi.
19Laban oǵan:
– Basqa birewge bergennen góre, onı saǵan bergenim jaqsı. Menikinde jasay ber, – dedi.
20Solay etip, Yaqıp Rahila ushın jeti jıl xızmet etti. Yaqıp Rahilanı súygenlikten, bul jeti jıl ol ushın bir neshe kúndey bolıp kórindi.
21Sonda Yaqıp Labanǵa: «Kelisilgen waqıt keldi, endi qızıńızdı beriń, men oǵan úyleneyin», – dedi.
22Solay etip, Laban ol jerdiń barlıq xalqın jıynap, toy berdi. 23Biraq túnde ol qızı Leanı ákelip, Yaqıpqa berdi hám Yaqıp onıń menen jattı. 24Laban shorısı Zilpanı qızı Leaǵa xızmetshi etip berdi.
25Yaqıp azanda turıp qarasa, janında Lea jatırǵanın kórdi. Ol Labanǵa:
– Bul ne qılǵanıńız? Men sizge Rahila ushın xızmet etkenim joq pa edim? Meni nege aldadıńız? – dedi.
26Laban oǵan:
– Bizlerdiń dástúrimiz boyınsha, úlken qızınan burın kishkene qızın uzatpaydı. 27Bul toylaw háptesi tamam bolsın, sońınan saǵan Rahilanı da beremiz. Biraq onıń ushın jáne jeti jıl xızmet qılasań, – dedi.
28Yaqıp buǵan kelisim berip, sol bir hápteni Lea menen birge ótkizdi. Sońınan Laban oǵan qızı Rahilanı da hayallıqqa berdi. 29Laban óz shorısı Bilhanı qızı Rahilaǵa xızmetshi etip berdi. 30Yaqıp Rahila menen de jattı hám ol Rahilanı Leadan góre kóbirek jaqsı kórdi. Solay etip, Yaqıp Labanǵa jáne jeti jıl xızmet etti.
Yaqıptıń balaları
31Jaratqan Iye Yaqıptıń Leada kewli joq ekenin kórgende, onı tuwatuǵın qıldı. Al Rahila biyperzent edi. 32Lea hámiledar bolıp, bir ul tuwdı. Ol: «Jaratqan Iye meniń baxıtsızlıǵımdı kórdi. Endi kúyewim meni jaqsı kóretuǵın boladı», – dep, ulına Ruben#29:32 Ruben – «uldı kór» degendi bildiredi. dep at qoydı.
33Ol jáne hámiledar bolıp, ul tuwǵanda: «Jaratqan Iye kúyewimniń mende kewli joq ekenin esitti hám maǵan bul uldı da berdi», – dep, ulına Shimon#29:33 Shimon – «esitiw» degen mánini beretuǵın sózge uqsaydı. dep at qoydı.
34Ol jáne hámiledar bolıp, taǵı bir ul tuwǵanda: «Endi kúyewim maǵan baylanadı, óytkeni men oǵan úsh ul tuwıp berdim», – dep, ulına Lebiy#29:34 Lebiy – «baylanǵan» degen mánini beretuǵın sózge uqsaydı. dep at qoydı.
35Keyin ol jáne hámiledar bolıp, taǵı bir ul tuwǵanda: «Bul ret men Jaratqan Iyeni alǵıslayman», – dedi hám ulına Yahuda#29:35 Yahuda – «alǵıs» degendi bildiredi. dep at qoydı. Soń ol bir qansha múddet bala kótermedi.
Valgt i Øjeblikket:
Jaratılıs 29: QrqMK22
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© Институт перевода Библии, 2022