San Lucas 2
2
Jesús mya'axung'áty
(Mt 1.18-25)
1Je̱'e̱ mu̶'it tiempo je̱'e̱ mu̶j'ane̱'e̱mbu̶ Augusto y'ane̱'e̱mu̶ñ pu̶daaky ko je̱'e̱ ja'ay wan nu̶kxy ku̶xyu̶ nakypye̱jtaaygyu̶xy. 2Je̱'e̱ jayu̶jp'ajtpu̶ nakypye̱du̶u̶ je̱' je̱' yajtzondaak je̱'e̱ Cirenio, je̱'e̱ mu̶dyiibu̶ najty gobernador'ajtp jim Siria naaxjooty. 3Chi je̱'e̱ ja'ay nigu̶xyu̶ ñu̶kxtaay yajkujayu̶u̶byu̶ nidu'ug nidu'ug ma je̱'e̱ kyu̶'u̶mgajptu̶ñ.
4Paady je̱'e̱ José jim Galilea naaxjooty choñ ma je̱'e̱ kajpt mu̶dyiibu̶ xu̶u̶'ajtpu̶ñ Nazaret, y ñu̶kxy ajku̶xy jim Belén, jim Judea naaxjooty ma je̱'e̱ mu̶j'ane̱'e̱mbu̶ David myiindaakyu̶ñ. Je̱' ko y'apteedy'ajtypy ijty je̱'e̱ mu̶j'ane̱'e̱mbu̶ David, paady je̱'e̱ José jim Belén ñu̶kxy ajku̶xy. 5Chi je̱'e̱ José yajkujayu̶u̶y censojooty mu̶u̶d je̱'e̱ María, je̱'e̱ to'oxyu̶jk mu̶dyiibu̶ najty mu̶u̶d pyu̶ga'añu̶ñ, y ungjoom najty je̱'e̱ju̶ñ. 6Chi du'un jyajty ko najty jyímu̶ch ajku̶xy jim Belén, chi oy myu̶baad'ajtnu̶ mu̶naa je̱'e̱ María y'ungpadaanu̶ju̶ñ. 7Y jim je̱'e̱ kyob'ung paaty, y chi ni'ibe'eñ ni'imojch mu̶u̶d je̱'e̱ myotz, y ago'ogu̶u̶y ma je̱'e̱ ju̶yujk mukxu̶'u̶ñdyu̶ñ, je̱' ko ka'p najty je̱'e̱ jya'ttaakt tu̶ paatku̶xy ma je̱'e̱ jimbu̶ ja'ttaaktu̶ñ.
Je̱'e̱ ángelestu̶jk ajku̶xy y je̱'e̱ borreegu̶ kweentu̶'ajtpu̶ ajku̶xy
8Mu̶wingón je̱'e̱ Belén kajpt jim najty ja'ay nije̱' byorreegu̶ kweentu̶'ajtku̶xy, je̱' najty wyin'u̶ñaaby wyindzuunajxku̶xypy je̱'e̱ byorreegu̶ ajku̶xy. 9Chi je̱'e̱ Windzú̶n Dios y'ángel tu'ug ñigu̶daaku̶ ajku̶xy, y y'adu̶kxkoty je̱'e̱ Windzú̶n Dios y'oy'ajtu̶ñ ju'uwu̶dítyu̶ ma najty je̱' ajku̶xyu̶ñ. Y chi mu̶k jyanchtzu̶gu̶u̶y ajku̶xy. 10Mu̶'it je̱'e̱ ángel ñu̶maayu̶ ajku̶xy: “Ka'p mdzu̶gu̶u̶ygyu̶xy, cham u̶u̶ch miich n'awa'anaanu̶ ajku̶xy je̱'e̱ oybyu̶ ayuuk mu̶dyiibu̶ yajjootkugu̶'u̶wu̶bu̶ñ ku̶xyu̶ je̱'e̱ naax kajpt. 11Mu̶u̶d miich kyu̶xpu̶ ajku̶xy tu̶ mya'axung'áty cham ma je̱'e̱ David kyajptu̶ñ tu'ug je̱'e̱ ja'ay mu̶dyiibu̶ miich xyñiwa'anaamb xyajtzo'ogaamb ajku̶xyu̶ñ. Je̱' je̱' je̱'e̱ Cristo#2.11 Hebreo'ayuuk: je̱'e̱ Mesías, u̶u̶ch nWindzu̶n'ajtu̶m ajku̶xy. 12Je̱' je̱' ijxpe̱jt mu̶dyiibu̶ mu̶u̶d m'u̶xkábu̶ch ajku̶xy, mbaadku̶xu̶ch je̱'e̱ ung ma'axúng ñi'imóchu̶ch mu̶u̶d je̱'e̱ myotz, y y'ago'ogu̶'u̶yu̶ch ma je̱'e̱ ju̶yujk mukxu̶'u̶ñdyu̶ñ.”
13Chi janch mu̶k'eemby ñayyajni'igu̶xu̶'ku̶ ma je̱'e̱ ángel, may je̱'e̱ wiingpu̶ ángelestu̶jk tzajpjootychu̶naaybyu̶ ajku̶xy, jyanch Dios o'owu̶dajtku̶xy, myu̶naangu̶xy:
14“¡Janchku'umáy janchmu̶j je̱'e̱ Dios tzajpjootypyu̶!
¡Jii jootkujk'ajtu̶ñ naaxwiiñ mu̶u̶d je̱'e̱ ja'ay gyu̶xpu̶ ajku̶xy mu̶dyiibu̶ je̱'e̱ Dios kyu'umaaybyu̶ñ!”#2.14 Je̱'e̱ ja'ay gyu̶xpu̶ ajku̶xy mu̶dyiibu̶ je̱'e̱ Dios kyu'umaaybyu̶ñ: nije̱' wiingpu̶ jaaybyu̶du̶jk myu̶naangu̶xy: mu̶dyiibu̶ jootkujku̶ñ mu̶u̶d je̱'e̱ Dios.
15Ko je̱'e̱ ángelestu̶jk ñu̶kxtaaygyu̶xnu̶ tzajpjooty, chi je̱'e̱ borreegu̶ kweentu̶'ajtpu̶ ñayñu̶maaydyu̶gu̶u̶yu̶ ajku̶xy amíñ u̶xyu̶py:
—Tzu̶k jaamu̶m ajku̶xy jim Belén, neby mu̶baad n'ijxu̶mu̶ñ ajku̶xy tii tu̶ tyuñ tu̶ jyadyii mu̶dyiibu̶ je̱'e̱ nWindzú̶n Dios tu̶ xy'awaanu̶yu̶ ajtu̶m ajku̶xy.
16Chi janchjoottu̶góy ñu̶kxy ajku̶xy, y oy paatku̶xy je̱'e̱ María mu̶u̶d je̱'e̱ José, y je̱'e̱ ung ma'axúng y'ago'ogu̶'u̶yu̶ch ma je̱'e̱ ju̶yujk mukxu̶'u̶ñdyu̶ñ. 17Ko ijxku̶xy je̱'e̱ María y je̱'e̱ ung ma'axúng, mu̶'it nigapxtaay nimu̶dyaaktaay ajku̶xy du'un neby je̱'e̱ ángel najty tu̶ ñu̶ma'ayiiju̶ñ ajku̶xy mu̶u̶d je̱'e̱ pi'kma'axúng kyu̶xpu̶. 18Y ku̶xyu̶ je̱'e̱ ja'ay mu̶dyiibu̶ mu̶doogu̶xu̶ñ, mu̶k je̱'e̱ tyajy myaay ajku̶xy du'un neby je̱'e̱ borreegu̶ kweentu̶'ajtpu̶ myu̶naañ ajku̶xyu̶ñ. 19María yajwu̶'u̶mdaay adayaaba ayuuk ma je̱'e̱ jyoot wyinma'añdyu̶ñ, y ka'p mu̶baad nineby'eemby ja'aydyu̶góy. 20Chi je̱'e̱ borreegu̶ kweentu̶'ajtpu̶ wyimbijttaaygyu̶xnu̶ cham je̱'e̱ xu̶u̶ Dios ku'umáy ja'aymye̱jtzku̶xy, y y'alabaanzu̶ u̶u̶gu̶xy mu̶u̶d je̱'e̱ Dios kyu̶xpu̶, neby najty ku̶xyu̶ tu̶ ijxku̶xy mu̶doogu̶xyu̶ñ. Y ku̶xyu̶ du'un tyuunu̶ jyajtu̶ neby je̱'e̱ ángel najty tu̶ ñu̶maayu̶gu̶xyu̶ñ.
Pi'k Jesús yajkapxku̶xu̶'u̶gy ma je̱'e̱ mu̶jtzajptu̶jku̶ñ
21Kuduktujk xu̶u̶ maabu̶ najty mya'axung'áty, mu̶'it je̱'e̱ ung ma'axúng tu̶y'ajttu̶u̶y ajku̶xy, y chi xu̶u̶mooy ajku̶xy Jesús, du'un neby je̱'e̱ María ángel najty tu̶ ñu̶ma'ayiiju̶ñ maabu̶ najty ka'anu̶ y'ungjomu̶'u̶gyñu̶ju̶ñ.
22Ko je̱'e̱ xu̶u̶ oy paatnu̶ mu̶naa je̱'e̱ María najty wya'adzpu̶dzu̶maanu̶ du'un neby je̱'e̱ Moisés y'ane̱'e̱mu̶ñ y'ane'emyu̶ñ. Chi je̱'e̱ ma'axúng mu̶dnu̶kxy ajku̶xy jim Jerusalén, kapxku̶xu̶'u̶gaangu̶xy ma je̱'e̱ Windzú̶n Dios wyinduuyu̶ñ. 23Paady je̱'e̱ du'un tuungu̶xy, je̱' ko du'un najty kyuja'ayu̶ch ma je̱'e̱ Windzú̶n Dios ñakyu̶ñ: “Ku̶xyu̶ kob'ung ya'ay'ana'kpu̶ mu̶dyiibu̶ ma'axung'ajtpu̶ñ, abu̶ky je̱'e̱ wyu̶'u̶mu̶ch mu̶u̶d je̱'e̱ Windzú̶n Dios kyu̶xpu̶.”
24José y mu̶u̶d je̱'e̱ María oy je̱'e̱ windzu̶gu̶'u̶ñ ye̱jkku̶xy, du'un neby je̱'e̱ Windzú̶n Dios ñaky myu̶na'añu̶ñ: me̱tzk woo muuxy o jaam muuxy.
25Je̱'e̱ Mu̶'it tiempo jim Jerusalén najty ja'ay tu'ug chu̶na'ay mu̶dyiibu̶ xu̶u̶'ajtpu̶ñ Simeón. Tu'uda'agyjya'ay je̱'e̱ najty, y oy najty Dios je̱'e̱ ja'aymyéch o'owu̶dáty. Simeón jya'ay'ejxypy najty je̱'e̱ mu̶naa je̱'e̱ Dios miñ yajjootkujk'ada'añ je̱'e̱ Israel ja'ay ajku̶xy, y myu̶dajtpy najty je̱'e̱ Espíritu Santo. 26Y tu̶ najty je̱'e̱ Espíritu Santo yajnejwu̶'u̶yii ko ka'p chojk o'ogu̶ch, u̶xtu̶ koonu̶ jayu̶jp ok'íxu̶ch je̱'e̱ Cristo mu̶dyiibu̶ je̱'e̱ Windzú̶n Dios najty kye̱xe̱e̱mbyu̶ñ. 27Je̱'e̱ Espíritu Santo yajmiin yajme̱jtzu̶ je̱'e̱ Simeón wyinma'añ, ko wan nu̶kxy ma je̱'e̱ mu̶jtzajptu̶jku̶ñ, mu̶'it je̱'e̱ Jesús tyaj tyeedy myu̶dnu̶kxu̶ je̱'e̱ ung ma'axúng ma je̱'e̱ mu̶jtzajptu̶jku̶ñ, kuydyuuñ du'un ajku̶xy neby je̱'e̱ Dios ñaky y'ane'emyu̶ñ. 28Chi je̱'e̱ Simeón tze̱ndzooy je̱'e̱ ung ma'axúng, y chi je̱'e̱ Dios mu̶bu̶jktzooy mu̶u̶d je̱' gyu̶xpu̶, myu̶naañ:
29“Jada'achám Windzú̶n Dios, mu̶baad myajku'udujknu̶
ko je̱'e̱ mduumbu̶ wan jootkujk o'knu̶,
je̱' ko tu̶ du'un mguydyúñ neby u̶u̶ch xyñu̶maayu̶ñ.
30Cham tu̶ u̶u̶ch n'ixy je̱'e̱ niwaambu̶ yajtzookpu̶,
31mu̶dyiibu̶ tu̶ mni'ixu̶'u̶y ma je̱'e̱ naaxwiiñjya'ay ku̶xyu̶ ajku̶xu̶ñ.
32Je̱' je̱'e̱ tu̶y'ajt yé̱gu̶p ma je̱'e̱ ja'ay mu̶dyiibu̶ ka'p jyudíoja'ayu̶chu̶ñ ajku̶xy,
du'un je̱' neby je̱'e̱ ju̶u̶n tu'ug mu̶dyiibu̶ je̱'e̱ ja'ay kudú̶kxu̶bu̶ñ.
Y ku'umáy je̱'e̱ Israel ja'ay y'ídu̶ch ajku̶xy.”
33José y Jesús tyaj mu̶k je̱'e̱ tyajy myaay, y yajnú̶kxy yajju̶wu̶u̶y ajku̶xy ko oy du'un mu̶doogu̶xy neby je̱'e̱ Simeón nigapxyu̶ñ je̱'e̱ pi'k ma'axúng. 34Chi je̱'e̱ Simeón kyunukxu̶ ajku̶xy, y nu̶maay je̱'e̱ María, je̱'e̱ Jesús tyaj:
—Adayaaba pi'k'ana'k je̱' adaa tu̶ aminu̶'u̶y ko je̱'e̱ Israel ja'ay jyoot wyinma'añ may yajtu̶góyu̶ch ajku̶xy ma je̱'e̱ Diosu̶ñ, y nan ko je̱'e̱ Israel ja'ay jyoot wyinma'añ may yaj'oyu̶'u̶wu̶ch ajku̶xy ma je̱'e̱ Diosu̶ñ. Yu̶'u̶ je̱'e̱ tu'ug ijxpe̱jt ko ka'p je̱'e̱ ja'ay y'ixa'anu̶u̶ choga'anu̶u̶ju̶ch, 35y du'un ku̶xyu̶ yajnejwu̶ydya'awu̶ch neby je̱'e̱ jyoot wyinma'añ nidu'ug nidu'ug mu̶u̶du̶chu̶ñ ajku̶xy. Y miich mbaadu̶py je̱'e̱ mu̶j'ayo'on mu̶jjootmáy du'un neby je̱'e̱ espaadu̶ xyajtzu̶chu̶'u̶yu̶ñ.
36Nan jim Jerusalén najty to'oxyu̶jk tu'ug mu̶dyiibu̶ xu̶u̶'ajtpu̶ñ Ana, Dios najty y'ayuuknajtzkapxu̶u̶ybyu̶ je̱'. Y je̱'e̱ Fanuel je̱'e̱ tyeedy'ajt, je̱'e̱ Aser y'ok'ung y'ok'ana'k, janch amu̶jja'ay najty je̱'e̱ju̶ñ. Mutzk'ana'knu̶ je̱'e̱ pyu̶jky, y je'eyu̶ je̱'e̱ ña'ay juxtujk jumu̶jt mu̶dtzu̶naay, 37mu̶da'px mu̶daaxk jumu̶jtu̶u̶by najty maabu̶ kyu'o'ogyu̶ñ.#2.37 Mu̶da'px mu̶daaxk jumu̶jtu̶u̶by najty maabu̶ kyu'o'ogyu̶ñ: nije̱' wiingpu̶ jaaybyu̶du̶jk myu̶naangu̶xy: ku'o'ogy je̱'e̱ najty, y mu̶da'px mu̶daaxk najty jyumu̶jt je̱'. Y nimu̶naaxu̶u̶ najty je̱'e̱ kya'atu̶goy'áty ma je̱'e̱ mu̶jtzajptu̶jku̶ñ, xu̶u̶m tzum najty je̱'e̱ Dios mu̶dúñ; cham y'ayuu'áty y Dios o'owu̶dáty.
38Nan timymyu̶'ityu̶ je̱'e̱ Ana nimiiñ je̱'e̱ José mu̶u̶d je̱'e̱ María jiiby ma je̱'e̱ mu̶jtzajptu̶jku̶ñ, y chi je̱'e̱ Dioskujuuyu̶p yejky, y nimu̶dyaaktu̶gu̶u̶y je̱'e̱ pi'k Jesús ma je̱'e̱ ja'ay ku̶xyu̶ ajku̶xyu̶ñ jim Jerusalén, mu̶dyiibu̶ najty ju̶jp'ijxku̶xpu̶ñ mu̶naa je̱'e̱ Dios niwa'ana'añ yajtzo'oga'añ je̱'e̱ Israel ja'ay ajku̶xy.
Wyimbijtku̶xnu̶ jim Nazaret
39Ko oy ku̶xyu̶ kuydyuundaaygyu̶xy du'un neby je̱'e̱ Windzú̶n Dios ñaky y'ane'emyu̶ñ, chi je̱'e̱ José mu̶u̶d je̱'e̱ María wyimbijtku̶xnu̶ jim Galilea naaxjooty ma je̱'e̱ kyu̶'u̶mgajptu̶ñ ajku̶xy Nazaret. 40Je̱'e̱ pi'k Jesús ye̱e̱kp je̱'e̱ najty oy mu̶k mu̶u̶d je̱'e̱ wij'ajt ke̱j'ajtu̶ñ y mu̶u̶d je̱'e̱ Dios myay'ajt y'oy'ajtu̶ñ.
Pi'k Jesús yajpaady ma je̱'e̱ mu̶jtzajptu̶jku̶ñ
41Jumu̶jt jumu̶jt je̱'e̱ ungtaj ungteedy najty ñú̶kxku̶xy jim Jerusalén ko najty je̱'e̱ Pascua xu̶u̶ paady. 42Ko je̱'e̱ Jesús jyumu̶jt majmé̱tzk y'abejty, chi nigu̶xyu̶ pya'ttu̶gu̶u̶y ajku̶xy jim Jerusalén ko najty je̱'e̱ Pascua xu̶u̶ paady, du'un neby najty je̱'e̱ kostumbre mu̶dajtku̶xyu̶ñ. 43Ko je̱'e̱ xu̶u̶ ñajxnu̶ chi wyimbijtku̶xnu̶, y je̱'e̱ pi'k Jesús wu̶'u̶mu̶u̶y je̱'e̱ Jerusalén. Y ka'p je̱'e̱ tyaj tyeedy ñejwu̶u̶yu̶ ajku̶xy ko najty tu̶ wyu̶'u̶my. 44Du'un je̱'e̱ myu̶naañ ajku̶xy: “Mayjya'ayjyooty ndijy je̱'e̱ pi'k Jesús najty myiñ mu̶u̶d je̱'e̱ myu̶gu'ugtu̶jk ajku̶xy.” Tu'kxu̶u̶ najty tu̶ yo'oygyu̶xy, chi je̱'e̱ y'ung u̶xtaaydyu̶gu̶u̶y ajku̶xy ma je̱'e̱ y'amu̶gu'ugtu̶jk ajku̶xyu̶ñ y mu̶dyiibu̶ mu̶u̶d ñay'ixy'adyii ñaymyu̶gu'ug'adyiiju̶ñ. 45Ko je̱'e̱ y'ung ka'apaaty ajku̶xy, chi ja'adu'ook wyimbijtku̶xnu̶bu̶ jim Jerusalén ung u̶xtaaybyu̶.
46Chi kudu̶gu̶u̶gxu̶u̶nu̶ oy paatku̶xy jim ma je̱'e̱ mu̶jtzajptu̶jku̶ñ. Jesús agujk najty je̱'e̱ y'u̶ña'ay ma je̱'e̱ Dios y'ane̱'e̱mu̶ñ windzu̶ndu̶jk ajku̶xyu̶ñ, je̱' najty y'ayuuk je̱'e̱ y'amdo'ijtu̶py ajku̶xy, y nan yajtú̶y najty nandu'un tijaty. 47Ku̶xyu̶ pu̶njaty mu̶dow je̱'e̱ Jesús y'ayuuk, mu̶k je̱'e̱ yajnú̶kxy yajju̶wu̶u̶y ajku̶xy mu̶u̶d je̱'e̱ Jesús wyij'ajt kye̱j'ajtu̶ñ ko najty winju̶wu̶u̶ydya'ay y ko najty tu̶ytyu'uda'agy y'adzoy. 48Ko je̱'e̱ Jesús tyaj tyeedy y'ijxpaattu̶, chi mu̶k taj may ñayjyu̶wu̶u̶yu̶ ajku̶xy. Chi je̱'e̱ tyaj ñu̶maayu̶:
—Ay mixy, ¿ti u̶u̶ch ko du'un xytyuungu̶xy? Yu̶'u̶ mdeedy y u̶u̶ch cham joottu̶góy njanch'u̶xtaaygyu̶xy, nay'adzu̶gu̶'u̶yii nay'aju̶wu̶'u̶yiiju̶ch ajku̶xy mu̶u̶d miich kyu̶xpu̶.
49Chi je̱'e̱ Jesús y'adzoowu̶ ajku̶xy:
—¿Ti u̶u̶ch ko xy'u̶xtaaygyu̶xy? ¿Nej ka'p mnejwu̶u̶ygyu̶xy ko u̶u̶ch tzipku̶xp n'ida'añ ma u̶u̶ch je̱'e̱ nDeedy tyu̶jku̶ñ?#2.49 Ko u̶u̶ch tzipku̶xp n'ida'añ ma u̶u̶ch je̱'e̱ nDeedy tyu̶jku̶ñ: nije̱' wiingpu̶ jaaybyu̶du̶jk myu̶naangu̶xy: ko u̶u̶ch nyajkoptu̶gu̶'u̶wu̶ch je̱'e̱ nDeedyu̶ch tyuung.
50Peru̶ je̱' ka'p je̱'e̱ winju̶wu̶u̶yu̶ ajku̶xy je̱'e̱ Jesús y'ayuuk, tii du'un kyapxypy myu̶dyaakypyu̶ñ.
51Mu̶'it je̱'e̱ Jesús tyaj tyeedy mu̶dnu̶kxy jim Nazaret, ma chu̶naayu̶ñ. Cham u̶u̶mu̶doy kapxymyu̶doy je̱'e̱ tyaj teedy ajku̶xy. Y je̱'e̱ tyaj yajwu̶'u̶mdaay je̱'e̱ ku̶xyu̶ ma je̱'e̱ jyoot wyinma'añdyu̶ñ du'un neby tyuunu̶ jyajtu̶ju̶ñ. 52Y je̱'e̱ Jesús ye̱e̱g'adu̶u̶tzp najty je̱'e̱ ni'igyu̶, y ye̱e̱g'adu̶u̶tzp najty je̱'e̱ wyij'ajt kye̱j'ajtu̶ñ. Y je̱'e̱ Dios mu̶u̶d je̱'e̱ ja'ay ajku̶xy oy najty je̱'e̱ du'un janchku'umaaygyu̶xy.
Valgt i Øjeblikket:
San Lucas 2: MIXE
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005