San Lucas 24
24
Jesús jyuugypyu̶jky
(Mt 28.1-10; Mc 16.1-8; Jn 20.1-10)
1Ko je̱'e̱ sumaan y'u̶xtu̶gu̶u̶y je̱'e̱ Domingo xu̶u̶, janch jopyñu̶ je̱'e̱ to'oxyu̶jktu̶jk ñú̶kxku̶xy ma je̱'e̱ o'kpu̶ juttu̶ñ#24.1 Nije̱' wiingpu̶ versión myu̶na'añ: nan panu̶kxu̶ myu̶do'oxyu̶jktu̶jk nije̱' ajku̶xy. mu̶nu̶kxy je̱'e̱ perfume ajku̶xy, je̱'e̱ mu̶dyiibu̶ najty tu̶ yaj'oyu̶u̶ygyu̶xyu̶ñ. 2Ko jim jya'tku̶xy, chi je̱'e̱ tzaa oy paatku̶xy mu̶dyiibu̶ je̱'e̱ o'kpu̶ jut najty mu̶u̶d y'agu̶'u̶yu̶chu̶ñ, tu̶gu̶'u̶duum najty je̱'e̱ tyu̶gue̱jknaayñu̶. 3Y chi jutjooty tyu̶gu̶u̶ygyu̶xy, ka'p je̱'e̱ Windzú̶n Jesús ñi'kx paattu̶ ajku̶xy. 4Janch tzu̶gu̶u̶ygyu̶xp najty jiiby jutjooty, ka'p najty oknejwu̶u̶ygyu̶xnu̶ tii tyuungu̶xu̶byu̶ñ, peru̶ ko tzojku̶ ñayyajni'igu̶xu̶'ku̶ y tyu̶na'ay ma je̱'e̱ ñamu̶jk ajku̶xyu̶ñ me̱tzk je̱'e̱ ja'ay janch adu̶kxpjaty je̱'e̱ wyit ajku̶xy. 5Chi janchmu̶k chu̶gu̶u̶ygyu̶xy y ñaax'ijxtaaygyu̶xy y chi je̱'e̱ me̱tzkpu̶ ja'ay ñu̶maayu̶ ajku̶xy:
—¿Ti je̱'e̱ juugypyu̶ ko m'u̶xtaaygyu̶xy ma je̱'e̱ tu̶u̶bu̶ y'o'ogyu̶ñ? 6Ka'p je̱'e̱ yaa, tu̶ je̱'e̱ jyuugypyú̶ky; ja'aymye̱jtzku̶x du'un neby jim Galilea xyñu̶maayu̶ñ ajku̶xy ko najty jyímnu̶ju̶ch: 7Ko tzipku̶xp u̶u̶ch je̱' je̱'e̱ ja'ay mu̶dyiibu̶ tzon tzajpjooty, nyajku̶'u̶yé̱gu̶chu̶ch pokyjya'aygyu̶'u̶'aam. Je̱' u̶u̶ch xyajcruutzpé̱du̶p ajku̶xy, chi u̶u̶ch kudu̶gu̶u̶g xu̶u̶ ja'adu'ook njuugypyú̶gu̶ch.
8Mu̶'it je̱'e̱ to'oxyu̶jktu̶jk oy ja'aymye̱jtzpaatku̶xy neby je̱'e̱ Jesús najty tu̶ myu̶na'añu̶ñ. 9Y ko jim wyimbijttaaygyu̶xnu̶ ma je̱'e̱ o'kpu̶ jutu̶ñ, chi ku̶xyu̶ yajmu̶dmu̶dyaaktaaygyu̶xy du'un neby najty tu̶ ijxku̶xy tu̶ mu̶doogu̶xyu̶ñ je̱'e̱ nimajktu'ugpu̶ apóstolestu̶jk y ku̶xyu̶ je̱'e̱ mayjya'ay mu̶dyiibu̶ najty jim yajpaatku̶xpu̶ñ ma je̱' ajku̶xyu̶ñ. 10Je̱'e̱ to'oxyu̶jktu̶jk mu̶dyiibu̶ je̱'e̱ ayuuk mu̶ja'tku̶xu̶ñ ma je̱'e̱ apóstolestu̶jk ajku̶xyu̶ñ je̱' je̱'e̱ ajku̶xy: je̱'e̱ María je̱'e̱ mu̶dyiibu̶ najty Magdala kugajptu̶ñ, mu̶u̶d je̱'e̱ Juana y mu̶u̶d je̱'e̱ María, je̱'e̱ Santiago tyaj, y jaknaagu̶ñ je̱'e̱ myu̶do'oxyu̶jktu̶jk ajku̶xy. 11Peru̶ je̱'e̱ apóstolestu̶jk ka'p je̱'e̱ to'oxyu̶jktu̶jk y'ayuuk mu̶jpu̶daaku̶ ajku̶xy; du'un najty je̱'e̱ myu̶naangu̶xy; nigoo ndijy najty je̱'e̱ du'un kyápxku̶xy myu̶dyaakku̶xy, paady najty ka'p mu̶bu̶jkku̶xy.
12Chi je̱'e̱ Pedro tyu'ubu̶jky ñu̶kxy poyu̶'u̶gyu̶ ma je̱'e̱ Jesús najty tu̶ ñaaxtu̶gu̶'u̶yu̶ñ, y ko kyu'ixu̶u̶y ma je̱'e̱ o'kpu̶ jutu̶ñ, chi ijxy ko ka'p jiiby pu̶n; je'eyu̶ je̱'e̱ poob wit ijxy y'oxna'ay mu̶dyiibu̶ je̱'e̱ Jesús najty mu̶u̶d tu̶ yajmo'oñu̶ñ. Chi wyimbijtnu̶ ma je̱'e̱ tu̶jku̶ñ, y mu̶k yajnú̶kxy yajju̶wu̶u̶y ko du'un ijxy neby najty tu̶ tyuñ tu̶ jyadyii.
Ma je̱'e̱ Emaúspu̶ tu'uju̶ñ
(Mc 16.12-13)
13Nan je̱'e̱ mu̶'it xu̶u̶ je̱'e̱ discípulotu̶jk najty nime̱tzk ñú̶kxku̶xy ma tu'ug mutzk kajpt mu̶dyiibu̶ xu̶u̶'ajtpu̶ñ Emaús, jii da'a jyu̶gué̱mu̶ch mu̶u̶d Jerusalén majktu'ug kilómetro. 14Kápxu̶p mu̶dyaaku̶p najty ñú̶kxku̶xy y nigapx nimu̶dyaakku̶xy ku̶xyu̶ neby je̱'e̱ Jesús najty tu̶ jyaty tu̶ y'abetyu̶ñ. 15Y du'un jyajty cham najty kyápxku̶xy myu̶dyaakku̶xy y y'amayu̶u̶ygyu̶xy, chi je̱'e̱ Jesús ku̶'u̶m nimu̶jwa'ky je̱'e̱ nime̱tzkpu̶ y mu̶dnu̶kxy kipxy ajku̶xy. 16Je̱' ajku̶xy oy najty je̱'e̱ ja'a'ijxku̶xy, peru̶ ka'p najty kweentu̶tuungu̶xy pu̶n je̱' najtyu̶ñ. Du'un je̱'e̱ najty ju̶wu̶u̶ygyu̶xy neby pu̶ndu'umbu̶ y'agapxtugyiiju̶ñ ajku̶xy, ka'pu̶ u̶xkajpku̶xu̶ch.
17Chi je̱'e̱ Jesús yajtu̶u̶wu̶ ajku̶xy:
—¿Ti du'un mjanchnimu̶dyaakku̶xypy ma yam mdu'uyo'oygyu̶xyu̶ñ?
Chi táju̶p maayu̶p wya'kxu̶jpy ajku̶xy, 18y chi nidu'ugtu̶ mu̶dyiibu̶ najty xu̶u̶'ajtpu̶ñ Cleofas, y'adzooy:
—Janch ku̶xyu̶ je̱'e̱ mayjya'ay nejwu̶ydya'ay neby je̱'e̱ ayo'on cham tu̶ tyuñ tu̶ jyadyii. ¿Y miich jim naydyu'um ja'ttaak jim Jerusalén y ti ko mga'anejwu̶'u̶y?
19Chi je̱'e̱ Jesús yajtu̶u̶wu̶ ajku̶xy:
—¿Ti tu̶ tyuñ tu̶ jyadyii?
Chi y'adzoogu̶xy:
—Je̱'e̱ Jesús Nazaretpu̶, mu̶dyiibu̶ ijty ijtp Dios y'ayuuknajtzkapxu̶u̶ybyu̶, y je̱' ijty y'ayuuk mu̶j'ijtp ma je̱'e̱ Dios winduuyu̶ñ y ma je̱'e̱ naax kajpt kú̶xyu̶ju̶ñ y mu̶u̶d je̱'e̱ mu̶jwinma'añ mu̶dyiibu̶ tyuumybyu̶ñ. 20Y je̱'e̱ teedy windzu̶ndu̶jk y u̶u̶ch je̱'e̱ n'amu̶jja'aydyu̶jk ajtu̶m ajku̶xy tu̶ ku̶'u̶ye̱jkku̶xy ko wan yajcruutzpedyii y yaj'o'ogu̶u̶ju̶ch. 21Je̱'e̱ Jesús najty u̶u̶ch njanchja'ay'e̱jxpu̶py ajku̶xy ko je̱' ndijy je̱'e̱ Israel ja'ay niwa'anu̶p ajku̶xy ma je̱'e̱ myu̶dzip ajku̶xyu̶ñ. Cham myu̶du̶gu̶u̶gxu̶u̶ju̶u̶yñu̶ maabu̶ du'un ku̶xyu̶ tyuñyii jyadyii. 22Cham je̱'e̱ to'oxyu̶jktu̶jk nije̱' xyjyanch'adzu̶u̶ygyu̶u̶ygyu̶xyu̶ch u̶u̶ch je̱'e̱ nmu̶gu'ugtu̶jk ajku̶xy ko tu̶ y'ooygyu̶xy janch jopyñu̶ ma je̱'e̱ o'kpu̶ jutu̶ñ. 23Y je̱' ko ka'p tu̶ paatku̶xy je̱'e̱ Jesús ñi'kx, chi tu̶ wyimbijtku̶xnu̶; myu̶naangu̶xy ko je̱'e̱ ángelestu̶jk nije̱' tu̶ ñayyajni'igu̶xu̶'u̶gyii ma je̱' ajku̶xyu̶ñ y ko du'un tu̶ ñu̶maayu̶gu̶xy ko je̱'e̱ Jesús jyuugyu̶ch. 24Mu̶'it u̶u̶ch je̱'e̱ nmu̶gu'ugtu̶jk nije̱' u̶x'aam tu̶ y'ooygyu̶xy ma je̱'e̱ o'kpu̶ jutu̶ñ, y nandu'un tu̶ paatku̶xy neby je̱'e̱ to'oxyu̶jktu̶jk tu̶ myu̶naangu̶xyu̶ñ, peru̶ ka'p je̱'e̱ Jesús maa tu̶ ijxku̶xy.
25Mu̶'it je̱'e̱ Jesús ñu̶maayu̶ ajku̶xy:
—¡Miich ja'ay ajku̶xy oy mjanchku'ujuuñ mjanchjootjuuñu̶ch ajku̶xy, ka'p du'un ku̶xyu̶ tu̶ mja'amu̶bu̶gaangu̶xy neby je̱'e̱ Dios y'ayuuknajtzkapxu̶u̶ybyu̶du̶jk myu̶naañu̶ñ ajku̶xy! 26¿Nej ka'p mdijy je̱'e̱ Cristo najty tzipku̶xp jayu̶jp y'ayo'onbaada'añ, y mu̶'itnu̶ tyu̶gu̶'u̶wu̶ch tzajpjooty ma je̱'e̱ oybyu̶ y'ijttaaktu̶ñ?
27Mu̶'it je̱'e̱ Jesús yajmu̶dmu̶dyaaktu̶gu̶u̶yu̶ ajku̶xy ku̶xyu̶ je̱'e̱ Dios y'ayuuk kuja'aybyu̶, yajtzondaaky ma je̱'e̱ Moisés ñakyu̶ñ y ku̶xyu̶ je̱'e̱ mayñaky mu̶dyiibu̶ je̱'e̱ Dios y'ayuuknajtzkapxu̶u̶ybyu̶du̶jk jyaay ajku̶xyu̶ñ, yajxón yajni'ixu̶ydyaayu̶ ajku̶xy neby kyuja'ayu̶chu̶ñ mu̶u̶d je̱'e̱ Cristo kyu̶xpu̶.
28Ko oy jya'tku̶xy ma je̱'e̱ mutzk kajpt ma najty ñú̶kxku̶xyu̶ñ, chi je̱'e̱ Jesús du'un ñaybyu̶daaku̶ neby nu̶wu̶'u̶y jayu̶jp jyaknu̶kx'adu̶'u̶dza'añu̶ñ. 29Peru̶ je̱' adzip yajwu̶'u̶mgu̶x, nu̶maay ajku̶xy:
—Wu̶'u̶m mu̶u̶d u̶u̶ch ajku̶xy, je̱' ko tu̶ chu'uju̶u̶yñu̶ y koodzu̶u̶y'adu̶u̶tznu̶py yam.
Chi je̱'e̱ Jesús kyajpttu̶gu̶u̶y y wyu̶'u̶my mu̶u̶d je̱' ajku̶xy. 30Chi du'un jyajty ko najty tu̶ ñaxwé̱tzku̶xy meesu̶winduuy, chi je̱'e̱ Jesús tzajkaagy tu'ug konu̶'ky, y yejky je̱'e̱ Dioskujuuyu̶p, mu̶'it adugu̶u̶y y mooy je̱'e̱ nime̱tzkpu̶ ajku̶xy. 31Timymyu̶'ityu̶ je̱'e̱ Jesús oy u̶xkajpku̶xy, chi je̱'e̱ Jesús du'uñyu̶ y'adu̶goyu̶u̶y. 32Y chi ñayñu̶maaydyu̶gu̶u̶yu̶ ajku̶xy amíñ u̶xyu̶py:
—Paatyu̶m je̱'e̱ myu̶k'ajt du'un tu̶ xyajju̶wu̶u̶yu̶m ma je̱'e̱ njoot nwinma'añ ajtu̶mu̶ñ ko najty jim tu'u'aam mmu̶dyaaku̶m xymyu̶dmiinu̶m, xyñajtzkapxu̶u̶yu̶ ajtu̶m je̱'e̱ mu̶dyiibu̶ kuja'ay miimb ma je̱'e̱ Dios ñakyu̶ñ.
33Y timymyu̶'ityu̶ tyu'ubu̶jky ajku̶xy, wyimbijtku̶xnu̶ jim Jerusalén, y jim je̱'e̱ nimajktu'ugpu̶ apóstolestu̶jk oy paatku̶xy najty tu̶ ñayñi'imugu̶u̶yu̶gu̶xy mu̶u̶d je̱'e̱ myu̶gu'ugtu̶jk ajku̶xy. 34Chi je̱'e̱ nime̱tzkpu̶ myu̶gu'ug ñu̶maayu̶ ajku̶xy:
—Jaanch je̱' ko je̱'e̱ Windzú̶n Jesús tu̶ jyuugypyú̶ky, tu̶u̶ ñayyajni'igu̶xu̶'u̶gyii ma je̱'e̱ Simongu̶ñ.
35Chi je̱'e̱ Cleofas mu̶u̶d je̱'e̱ myu̶gu'ug du'un myu̶dyaaky ajku̶xy neby najty tu'u'aam tu̶ mu̶dnaybyaattu̶gu̶xy je̱'e̱ Jesús, y neby u̶xkajpku̶xyu̶ñ ko je̱'e̱ tzajkaagy adugu̶u̶y.
Jesús ñayyajni'igu̶xu̶'ku̶ ma je̱'e̱ dyiscípulotu̶jku̶ñ
(Mt 28.16-20; Mc 16.14-18; Jn 20.19-23)
36Jiiby najty adayaaba ayuuk janch nimu̶dyaakku̶xyñu̶ ko je̱'e̱ Jesús oy ñayyajni'igu̶xu̶'u̶gyii ma je̱' ajku̶xyu̶ñ, ñaybyu̶daaku̶ kujkjooty y yajpókxu̶ ajku̶xy myu̶naañ:
—Jootkugu̶u̶ygyu̶x miich ajku̶xy.
37Je̱' mu̶k je̱'e̱ jyanchtzu̶gu̶u̶ygyu̶xy, myu̶naangu̶xy ko aanu̶mu̶ ndijy je̱'e̱ du'un y'ijxku̶xypy. 38Y chi je̱'e̱ Jesús ñu̶maayu̶ ajku̶xy:
—¿Ti ko mjanchtzu̶gu̶u̶ygyu̶xy? ¿Ti ko mga'amu̶bu̶jkku̶xy ko u̶u̶ch je̱'e̱ du'un? 39Ijxu̶u̶ygyu̶ch ajku̶xy je̱'e̱ ngu̶'u̶ y je̱'e̱ ndékyu̶ch. Je̱'e̱nu̶ch u̶u̶ch. Ni'idoongu̶ch y ijxku̶ch ajku̶xy; je̱'e̱ aanu̶mu̶ ka'p chu'uch pyajk je̱'e̱ mu̶u̶du̶ch du'un neby miich m'ijxku̶xyu̶ñ nmu̶u̶du̶chu̶ñ u̶u̶ch.
40Ko du'un ñu̶maayu̶ ajku̶xy, chi je̱'e̱ kyu̶'u̶ y je̱'e̱ tyeky yaj'ijxu̶ ajku̶xy. 41Peru̶ je̱' ka'p je̱'e̱ mu̶bu̶jky ajku̶xy, je̱' ko najty jyanchjootkujku̶ch ajku̶xy y ko najty mu̶k yajnú̶kx yajju̶wu̶u̶ygyu̶xy, chi je̱'e̱ Jesús ñu̶maayu̶ ajku̶xy:
—¿Mu̶u̶d ya ajku̶xy ti ii ngaayu̶mu̶byu̶ñ?
42Chi akxtza'ay tu'ktúky mooy ajku̶xy.#24.42 Nije̱' jaaybyu̶du̶jk myu̶naangu̶xy: y tu'kju̶u̶dy seru̶pa'ag. 43Y je̱' kyu'ubu̶jk je̱' chi jim kyaay y'uuky ma je̱'e̱ wyinduuy ajku̶xyu̶ñ. 44Mu̶'it je̱'e̱ Jesús ñu̶maayu̶ ajku̶xy:
—Neby u̶u̶ch tu̶ njaty tu̶ n'ayoy mu̶dyiibu̶ miich tu̶ m'ijxku̶xyu̶ñ, je̱' je̱'e̱ du'un mu̶dyiibu̶ nyajmu̶dmu̶dyaaku̶ñ ajku̶xy ko najty nmu̶d'ijtku̶xyñu̶: ko tzipku̶xp du'un ku̶xyu̶ yajkuydyuunda'awu̶ch neby kyuja'ayu̶chu̶ñ mu̶u̶d u̶u̶ch kyu̶xpu̶ ma je̱'e̱ Moisés ñakyu̶ñ y ma je̱'e̱ Dios y'ayuuknajtzkapxu̶u̶ybyu̶du̶jk ñaky ajku̶xyu̶ñ, y ma je̱'e̱ Salmo nakyu̶ñ.
45Y du'un je̱'e̱ Dios ñaky yajwinju̶wu̶u̶yu̶ ajku̶xy, 46y ñu̶maayu̶ ajku̶xy:
—Du'un kuja'ay y'ity ma je̱'e̱ Dios ñakyu̶ñ ko tzipku̶xp je̱'e̱ Cristo y'o'ogu̶ch, y jyuugypyú̶gu̶ch kudu̶gu̶u̶g xu̶u̶ maabu̶ naty y'o'ogyu̶ñ. 47Y wan yajkapxwa'kxy je̱'e̱ Dios y'ayuuk tyu̶y'ajt mu̶u̶d je̱' gyu̶xpu̶ xyu̶u̶ ma je̱'e̱ naaxwiimbu̶ kú̶xyu̶ju̶ñ, chonda'agu̶ch yaa Jerusalén, ko je̱'e̱ ja'ay wan jootwimbijtku̶xy ma je̱'e̱ Diosu̶ñ, wan je̱'e̱ pyoky kyu̶dyeey yajwinmé̱kxu̶ch ajku̶xy. 48Miich mnidu̶y'ajt'ádu̶p ajku̶xy du'un neby yam ku̶xyu̶ tu̶ m'ijxku̶xy mdú̶kxku̶xyu̶ñ. 49Y u̶u̶ch ngué̱xu̶py ma miich ajku̶xyu̶ñ je̱'e̱ Dios y'Espíritu Santo mu̶dyiibu̶ u̶u̶ch je̱'e̱ nDeedy tu̶ xyajwinwaanu̶u̶ygyu̶xyu̶ñ. Peru̶ wu̶'u̶mgu̶x miich yaa ma je̱'e̱ Jerusalén kajptu̶ñ u̶xtu̶ koonu̶ xy'adu̶gu̶'u̶wu̶ch xyjyoottu̶gu̶'u̶wu̶ch ajku̶xy je̱'e̱ Dios myu̶k'ajtu̶ñ mu̶dyiibu̶ tzonaambu̶ñ jiiby tzajpjooty.
Jesús pya'ttu̶gu̶u̶yñu̶ tzajpjooty
(Mc 16.19-20)
50Mu̶'it xu̶u̶ je̱'e̱ Jesús dyiscípulotu̶jk mu̶dtzoñ, mu̶dkajptpu̶dzu̶u̶my ajku̶xy, y mu̶dnu̶kxy ajku̶xy u̶xtu̶ Betania. Chi je̱'e̱ Jesús kyu̶'u̶ yujkxaju̶'ky kyunukxu̶ ajku̶xy. 51Chi du'un jyajty cham najty kyunúkxu̶gu̶xyu̶, chi y'abu̶kypyu̶dzu̶u̶mnu̶ ma je̱' ajku̶xyu̶ñ y yajpa'ttu̶gu̶u̶yu̶nu̶ tzajpjooty. 52Chi je̱' jim jyakwa'kxu̶jpy ajku̶xy Dios o'owu̶dajtpu̶, y chi wyimbijttaaygyu̶xnu̶ oy Jerusalén jya'tku̶xnu̶ janch jootkujk. 53Y jaboom jaboom najty yajpaatku̶xy ma je̱'e̱ mu̶jtzajptu̶jku̶ñ, ja'aymye̱jtzku̶xy o'owu̶dajtku̶xy je̱'e̱ Dios. Jaanch adaa du'un.
Valgt i Øjeblikket:
San Lucas 24: MIXE
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Nuevo Testamento en Mixe de Mazatlán y Tutla, Oaxaca, México © Sociedad Bíblica de México, A.C. 2005