Mattĕo 12

Dèd́è̆ Ab́èkja Munisòd́è̆

(Mărko 2.23-28; Lŭka 6.1-5)

1Hlĕnu Jezŭ lenīkôgè huklè̆ dehle abu b́ĕ Munisòd́è̆ nu. Zo bōhmubicè tòcò thaẃîgè d́ō, ce d́ea b́uzèlè̄ kî ca agè. 2Pharizè̆pho tòcò tcahtî d́ō cò d́ògè Jezŭ, “Tcabò̄, no bōhmubicè tòcò mègè dè htè ahtad́ĕd́ò dèhmèlad́îd́ă Munisòd́è̆ ani nu.”

3Ḿî Cò d́ògè lōwa tòcò, “B́ĕ Dăvid kî aòkô ca kă tòcò thaẃi d́ō, zè mègè danè̄ nu thĭ da phab́ègè ńò ā? 4Ze lenī Kib́ĭcè ahibu kî ca agè dèhlu atoko, htè cè ḿîwî, bija aòkô ca kă tòcò ḿîwî ta ab́è ńò; a ab́è ḿî phŭgi tòcò lò nu, ńò ā? 5Ḿî̆dîḿî ńò phŭgi tòcò khè̆b́a Munisòd́è̆ adèhmèla d́ŏ Zarādo abu, barasă zè dèkèḿè tò ò ńò nu, thĭ da phab́ègè d́ŏ Mŏzè adèhmèla abu ńò ā? 6Ḿî Jò d́ò̆sa thĭ dè adolĭ Zarādo ò b́ĕjo. 7Kîd́ò̆ thĭ gī thîhè̆ ma dèjî̄b́è ajo, htè ‘Ja thaèni dèkhòwèhmòb́è, tè b́è dèhluhtai ńò,’ ahtabohtab́ă d́ō, tè b́è thĭ gī cirra bija aòhlô̆òla dèkèḿè tòcò ńò. 8Manè̄ kò̄ d́òdo dō, Bija Apho ḿî Munisòd́è̆ Ab́ĭcè cè.”

Bija Acuthĭwi Dòkhò̆ Dèbwè

(Mărko 3.1-6; Lŭka 6.6-11)

9Kîd́ò̆ tcabò̄, Zè hètôĺô hwă b́ĕ nu d́ō, Ze lenīgè lōwa asinagŏgā abu. 10D́ŏnu bija acuthĭwi dòkhò̆ ògè dèkhòwè. Bija tòcò d́è̆gè Jezŭ, cò d́ò, “Munisòd́è̆ gā prahlè̆mè̄ za tèpwè dèsè̆ ā?” Ajo ḿî cab́ô̆htè za gā wāhlè kèhtabò̄ lōwa adèkèḿè nu.

11Barasă Cò d́è̆gegè lōwa tòcò, “D́ŏ thĭ klè̆ athŏ ò tod́ŏ, kî agā ladēnī ma bòbu b́ĕ Munisòd́è̆ d́ō, agī di cwihtage ńò òbò̄ dèbwèbwè ā? 12Bija nu zî līdobwîthè̆ d́olĭ bò̄d́ò̆ thŏ azî̄azô̄! Mègōnu d́ō, b́ĕ Munisòd́è̆ nu nè mè za tèpwè dèphîdèmè awîaè.” 13Mèhwă Cò d́ògè bija anu dèbwè, “Jehtabò̄ nu cukhò.”

Za j́ehta zu cukhò d́ō aègegè acab́ô̆ alewe dòkhò̆ nu. 14B́ĕnu Pharizè̆pho tòcò hèhtagè akhlŏ kî cò d́ò̆sahlè lōwa, htè agè̄ mèkè̆ mèhlè̆mè̄ Jezŭ cadè̄ nu.

Jezŭ Adèkhòwèhmòb́è

15Ḿî Jezŭ thîhè̆ ajo d́ō, Zè hèdòbògè d́ŏnu, kîd́ò̆ bija òèòò lôkô Ze le kî Zè mèhmagegè lōwa lŏcăcè. 16Barasă Zè hmèla lōwa tòcò cab́ô̆htè cò kò̄ tò d́ò̆sabò̄ bija alewe tòcò ńò nu. 17Zè mègè gōnu cab́ô̆htè Prò̆fèt Izaĭah adèd́òdòlò gē pĕhtabò̄ anikhĭ nu. 18Cò d́ò;

“Tcabò̄, Jô zôpho htè Jô rôgè,

Jè b́èlò̄ htè ab́èthob́ètha gudu Jè dèbwè nu.

Ja gā hna lakò̆ Ji Spirito Tcahtĭ Zo kho,

kî Cò kò d́òŭd́ò̆sakò̆ Jè dècirra awîakè̆ d́ŏ bijakhwĭpho tòcò ò nu.

19Za gā da darakò̆ bija ńò; tè kèwohtŏphukò̆ dè ńò.

Bija gī dî thîhè̆kò̆ Ze lē d́ŏ klè tòcò abu dèbwè̆ ńò.

20Gòbò aprî nu Zè gè̄ dèmè htè̆dū kò̆ ńò;

kîd́ò̆ hmîsè akhu we nu Zè gè̄ dè mèlabî̄kò̆ ńò.

Zè gè mèkò̆ htô̆kî dèdî̄dèhma nobè dè nu.

21Kîd́ò̆ bijakhwĭpho tòcò gā sascĭikò̆ Cè.”

Jezŭ kî Bilzabŭba

(Mărko 3.20-30; Lŭka 11.14-23)

22B́ĕnu bija lei bija ahnèò, adikhimē kî adumūtaa dèbwè d́ŏ Cò ò, kî Zè mèhmage lōwa d́ō zî jî̄b́ège kî za tcahtî za tèpwègè. 23Kîd́ò̆ bija aboahò lŏcăcè htèdômô̄dahmăgè kî cò dò, “Ajo dèbwè ḿî thòrò̆gè Dăvid Apho ā?”

24Barasă Pharizè̆pho tòcò thîhè̆b́è ajo d́ō cò d́ò, “Bija ajo dèbwè hna hèhta dèscidèhnè nu ḿî dèscidèhnè Asaphra Bilzabŭba acô̆thèlè̆ abu lò.”

25Jezŭ thîhè̆ cè tòcò adègomo d́ō, Cò d́ò lōwa, “Htĭge gô̆ age htè abēphage ane nu, gā lamulaphakò̆, kîd́ò̆ u ḿî̆dîḿî ńò hi gô̆ awa htè abēphage ane nu, gò̄ dò sò̆hto òhmekò̆ ńò. 26Kîd́ò̆ Mod́èlî gā hna hèhta Mod́èlî d́ō, ze bēphagè ze ne; mègōnu zi htĭ ze ge gò̄ sò̆hto ò hmebò̄ cadè̄? 27Kîd́ò̆ Jā hna hèhta dèhnè tòcò Bilzabŭba acô̆thèlè̆ abu d́ō, thĭ pho tòcò hna hèhta d́ò̆ cè bò̄bwè acô̆thèlè̆ abu bwè? Mègōnu zi gî̄ ḿîkò̆ acirrathĭ tòcò. 28Barasă agî̄ ḿî ma Ja hna hèhta dèhnè tòcò kî Kib́ĭcè Aspirito acô̆thèlè̆ d́ō, agī ḿî tèpwè Kib́ĭcè Ahtĭage dohtî htŏ thĭ.

29“Ḿî̆dîḿî ńò bija gō docŏglo ŭsu bija akhob́ăădo dèbwè ńò d́ō, bija gē lenī zi hibu kî zî gî̄ phîăwū za lōwa adèhtò̆dèla cadè̄? Kîd́ò̆ b́ĕnu bija gō cŏglo hwă cè khaĺè ca kā ăwūkò̆ zi hi za phă.

30“Bija htè atò òkô Ja kă ńò dèbwè, htakhokă Jè; kîd́ò̆ htè bija adu htugekô Ja kă ńò dèbwè, bāphrubāprî̆. 31Mègōnu d́ō Jò d́ò thĭ, dè gā b́ăplèkò̆ bija zè dèkhòwè kî dèd́òkè̆d́òô Kib́ĭcè gŏ amo, barasă dè d́ŏ ahtad́ĕd́ò Spirito Tcahtĭ adèkhòwè nu, dè kā ta b́ăplèkò̆ ńò. 32Kîd́ò̆ bija arră ad́òkè̆d́òô Bija Apho dèbwè nu, dè kā b́ăplèkò̆ cè, barasă bija htè agò̄ d́òkè̆d́òô Spirito Tcahtĭ dèbwè nu, dè kā ta b́ăplèkò̆ cè d́ŏ khŏnujo ńò kîd́ò̆ d́ŏ alekă ńò ńò.

Tho kî Athè

(Lŭka 6.43-45)

33“Ḿîbò̄ tho awî, kî athè gī wîkò̆, ḿî tho adî wî ńò nu athè kô ô̆kò̆; bija thîhè̆ thomu kî athè lò. 34Ŏ galapumo akhwĭ tòcò, thĭ kî̆kkè d́ō thĭ dèjî̄b́è gī wî za d́ò̆ cadè̄? Manè̄ kò̄ d́òdo dō, dèòpĕhta ka thabu adĕ gō lòmò d́òhta kô. 35Bija awî dèbwè phî̆hta dè awî tòcò d́ŏ zè dèzwî̄dèè agòlò bu nu, kîd́ò̆ bija adî wî ńò dèbwè phî̆hta dè adî wî ńò d́ŏ zè dèkî̆kkèmèhlò̆ agòlò bu nu.

36“Ḿî Jò d́ò̆sa thĭ, dèjî̄b́è ahnahnă htè bija d́òhta hwă nu, gŏ ahmô̆ anikhĭ, bija kè̄ b́è d́è̆kò̆ awîakè̆, b́ĕ dècirra amuni nu. 37Manè̄ kòd́òdo dō, nè kè̄ b́è dè lè̄dî̄lè̄hmai nè kî nè dèjî̄b́è; kî nè kè̄ b́è dècirra i nè kî nè dèjî̄b́è lò.”

Zŏnah Ahô̆agèlè

(Mărko 8.11,12; Lŭka 11.29-32)

38B́ĕnu Skrĭbāpho kî Pharizè̆pho tòcò cò d́ògegè cè alī gōjo, “Sara, wa thaè tcahtî nè mè dèbòdèba dèdè̆.”

39Cò d́òge lōwa tòcò, “Bija akî̆kkè kî ab́icèklèhtò tò ò ńò dôzô da dèbòdèba dèdè̆. Ḿî Prò̆fèt Zŏnah adèbòdèba gā hwă, dè kè tè d́è̆lî̄kò̆ cè dèbòdèba alewe dimĭ ńò. 40Manè̄ kò̄ d́òdo dō, acab́ô̆ Zŏnah ògè dādo aphŭbu thŏni kî thŏnè nu, Bija Apho kò òkò̆ halè̄ thŏni kî thŏnè abu bu. 41B́ĕ dècirra amuni nu, Nĭnevepho tòcò gè wè̄hto cirrakò̆ bija ajo dôzô; manè̄ kò̄ d́òdo dō, cè tòcò thîhè̆b́è Zŏnah adèd́ò̆htô kîd́ò̆ za khahlô̆gè zè dèkhòwè. Kîd́ò̆ tcabò̄, adolĭ Zŏnah dèbwè ògè b́ĕjo. 42B́ĕ dècirra amuni nu, Sheba Asaphramo gè wè̄hto cirrakò̆ bija ajo dôzô, manè̄ kò̄ d́òdo dō, Cò ò d́ŏ lākho akŭdu nu ze le sòkhĕńe Sòlòmòn adèthîhè̆. Kîd́ò̆ tcabò̄, adolĭ Sòlòmòn dèbwè ògè b́ĕjo.

Spirito Tcahtĭ Acîpô Adègeb́a Alekă

(Lŭka 11.24-26)

43“B́ĕ spirito acîpô tod́ŏ hèhta hwă bija dèbwè ahîklè̆ nu, ahè dîwî̄dewe d́ŏ dèhwĕdèkra alle nu, awāhlè adèsò̆dūsòd́è̆ alleaklè, ḿî adè kèhtîgè dală ńò. 44Anu tapla ad́òlage ane, ‘Je gē geb́a je lekă d́ŏ ji hi nu,’ kî gegè kî atcahtî dè ale òhlòthô̆, aòwhib́ăwāb́ă èzènègè. 45Mèhwă d́ō, ale jogè spirito acîpô azî̄ d́olĭ cè thăthôtod́ŏ kî ògè b́ĕnu. Bija anu dèbwè azî̄ d́olĭ kî aŭsu nu. Gōnu akhò̆pha dè gī phî̆htanikò̆ bija ajo dôzô nu.”

Jezŭ Amo kî Cè thè̆buthè̆we tòcò

(Mărko 3.31-35; Lŭka 8.19-21)

46B́ĕ Jezŭ jî̄b́èhtî phătha bija aboahò nu, tcabò̄, Zo mo kî Cè thè̆buwe tòcò sò̆hto ò akhlŏ, ca thaè jî̄b́èhtî lōwa. 47Kîd́ò̆ bija dèbwè d́ò Cè, “Tcabò̄, No mo kî Nè thè̆buwe tòcò sò̆hto ò akhlŏ ca thaè tcahtî Nè.”

48Ḿî Cò d́òge ad́ò̆sa Cè dèbwè gōjo, “Bò̄bwè ḿî Jo mo, bò̄bwè tòcò ḿî Jè thè̆buwe bwè?” 49Kîd́ò̆ Zô jô̄wè̄ Cu cukhò Zo bōhmubicè ò kî Cò d́ò, “Tcabò̄, Jo mo kî Jè thè̆buwe tòcò jo. 50Manè̄ kò̄ d́òdo dō, gajă bija amè Ja Pa aò Mò̄kho dèbwè adèthaèni tòcò nu, zi ḿî lŏ Ju bu Jè cè kî Jo mo lò,” Cò d́ògè d́o.

Valgt i Øjeblikket:

Mattĕo 12: GRNT21

Markering

Del

Kopiér

Vil du have dine markeringer gemt på tværs af alle dine enheder? Tilmeld dig eller log ind

Geba Roman New Testament © Bible Society of Myanmar, 2021.

Læs mere om Geba Roman New Testament