Juan 3
3
Jesús len Nicodemo
1Gzue' tue' bënni gxhi' le Nicodemo, le' nake bënni blou ladj'ke bënni Judea. 2Bënni ni yajyue Jesús chi'dzë'ël, len gudxe le':
—Bënni Useed, nëëzi'tu ki Dios nusë'le'e li' naar kseed'du netu, koma nutunu gak gun yëla wak le ruunu li', nar'la Dios ti zue' len le'.
3Jesús gudxe le':
—Le nak'te rea' li' ki bënni ti gaalje le yubl ka, ti gunn gle'i'de yëla rnabe' kie' Dios.
4Nicodemo bnaab'de le':
—¿Nakxh guune bënni gaalje le yubl kati chi nake bënni guul? ¿Naru gunn waazie le'e'nu xhne'e naar gaalje le yubl?
5Jesús bubi'e kie' diidza:
—Le nak'te rea' li' ki bënni ti gaalje ki nis#3:5 Gaalje ki nis Le ni run lsaki'i ka kie' bënni ludiile nis len ki Bë', ti gunn ne'e lu yëla rnabe' kie' Dios. 6Bënni taalje ki bunach, bunach nak'ke; bënni naalj'ke ki Bë', bë' nak'ke. 7Ti yubaan'du le rea' li': “Yugute' bunach rala laalj'ke le yubl.” 8Ka bë' rluub ga rna ki, len zala ryëën'du ley, ti nëëz'du gaxh za' len ti nëëz'du gaxh ziaj, lekz'ka' nak kieke yugute'ke bënni taalje ki Bë'.
9Nicodemo bnaab'de le' yubl:
—¿Nakxh'kz gak le ni?
10Jesús bubi'e kie' diidza:
—¿Li' naku bënni rseed'de Israel, ati ti nëëz'du le ni? 11Le nak'te rea' li' ki nëëzi'tu bixh diidza'a rui'tu ati rdujxaka'lau'tu le nale'i'tu; san lbi'ili ti rajle'li le rnátu. 12Xhki ti rajle'li kati rui'leena lbi'ili diidza ki le rak ki yëdz'lyu, ¿Nakxh gunn tzajle'li xhki rui'leena lbi'ili diidza ki le rak yewayuba?
13»Nutunu rbeeni yewayuba tuuze bënni'a ze'e yewayuba; Le' Xi'ine Bënni. 14Ati ka beene Moisés blise'ba bel' lu yu biidx, lekz'ka' run bayuudx luchise Le' Xi'ine Bënni 15Naar yugute'ke bënni layajle'ke le' lazi'ke yëla naban tzalzu.
Yëla nadxi'i kie' Dios ki yëdz'lyu
16»Dios bdxi'i'tzki'de yëdz'lyu lena'a psë'le'e Xi'ine lazdui naar yugute'ke bënni layajle'ke Le' ti lanitie' san lape yëla naban tzalzu. 17Koma Dios ti psë'le'e Xi'ine ki guspaage'e xhgia' yëdz'lyu, psë'le'e le' naar nia'a kie' usle' yëdz'lyu
18»Bënni rajle'e len Xi'ine Dios, ti nabaage'e xhgia'; san bënni ti rajle'e, chik'z nabaage'e xhgia', koma ti rajle'e len Xi'ine lazdui kie' Dios. 19Bënni ti tayajle'ke chi nabaaga'ke xhgia', le tuune le ku nak koma kati yëla yeni biid yëdz'lyu ni guladxi'ir'de yëla chul ka yeni ni. 20Yugute'ke bënni tuune le ku nak dxia'a ti tadaan'de yëla yeni, len ti tabiige'e ga'la ga zua naar ti glui' lau'i le tuune. 21San bënni nakua'ke lu yëla li, tabiiga'ke ga zua yëla yeni naar glui' lau'i ki yugute' le tuune nak ka'teez ryaazlaadxe'e Dios.»
Juan bënni rkiile nis bunach yubl rue'e diidza kie' Jesús
22Gdëëd le ni, Jesús dzaage bënni useed kie' yajake gia'a yeego ki Judea, ni' bga'an'leene leke tukiile nis bunach. 23Lekz'ka' Juan rkiile nis bunach yëdz Enón ga'la yëdz Salim koma ni' rë'tzka nis; ati bunach raja'ke len tudiile nis. 24Yugute' le ni glak kati ti tagui'i'de liidx'gia Juan.
25Ati la'ke bënni useed kie' Juan gulazulau'e tadil'e diidza len tue' bënni Judea ki le naleeb'kde tuune kati tupa'a kuin'ke, 26len yajëëdx'ke Juan:
—Bënni Useed, bënni'a dzaage li kati zu' tzala'a yeego Jordán, len yajxaka'lau'u kie', na'a rkiile nis bunach ati bënni zian zjak'leene le'.
27Juan gudxe leke:
—Nutunu bënni de bi de kie' xhki Dios ti rnëëdzje ley. 28Byëëni'kz'li lbi'ili gnia' ki neda ti naka Le' Cristo, nak'za tue' bënni nusë'la'ke lau'e. 29Kati nu bënni rtzag'ne'e, bënni'a rdzaage le dxia'a rudziij'de ryëën'de chi'e, koma rtzag'ne'e len nguul'a nadxi'i'de. Lekz'ka' rak kia' neda na'a yëla rudziiji kia' xhën'te nak, 30Le' uyaj'leen'tekze gak're blou len neda wechi'la.
Bënni ze'e yewayuba
31»Bënni ze'e yewayuba nuxua'lau're ka yugute'ke bënni. Bënni nake ki yëdz'lyu ki yëdz'lyu nake len rue'e diidza le rak ki yëdz'lyu ni. San bënni ze'e ki yewayuba nuxua'lau're ka yugute'ke bënni, 32len rdujxaka'lau'e le chi ble'i'de len chi byëën'de; ati nutunu rsi' lea rdujxaka'lau'e'a. 33San xhki nu bënni si'e diidza ni, re'e'ni gna ki le rne' Dios nak li; 34koma bënni'a Dios nusë'le'e, rue'e xhtiidze'e Dios, koma Dios ti rdxie'gbe'i ki Bë' La'ay kie' tzka rnëëdzje. 35Xuuze nadxi'i'de Xi'ine len yugute' nudëëde lu ne'e. 36Bënni rajle'e Xi'ine Dios de kie' yëla naban tzalzu; san bënni ti re'en'de tzajle'e Xi'ine Dios ti ga'ta kie' yëla naban'a, le si'e nak yëla rsaka'zi' xhën'te kie' Dios.
Valgt i Øjeblikket:
Juan 3: PZD
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© Sociedad Biblica de México AC
