Tegagia 8
8
Uwoi lolowi tempae
8:1-22
11 Ondae Ue Ala rumambeo i Noho, luwuno kondehora mo'ila ka luwuno pinotuwu anu meronga saru onae a laro bangka atuu, ka i'amba Ondae Ue Ala weweuo angi mepuuri i wawontolino, ranta ka itempae uwoi atuu. 2Luwuno mata uwoi a ondaloano tolino, saru luwuno pentangoa i langi tinondo, ka usa marombo inso i langi pinokompenaa-naa, 3ka uwoi atuu kotempa-tempaeno i wawontolino. Kanatuumo ipetii uwoi atuu umarino asa etu ka lima pulu oleo. 4A wula ko'opitu, oleo kohopulu ka opitu wula atuu, terareomo bangka atuu i mentorukuno Arara. 5Uwoi atuu komaku-makurano hawe wula anu kohopulu. A wula kohopulu, tanggala asa wula atuu, tengkitaomo luwuno punsuno torukuno.
6Mansano laloomo pato pulu oleo, i Noho umungkahio pentangoano bangka anu wineweuno. 7Ka i'amba motolao asa manu-manu paa-paa; ka manu-manu atuu menee lumako ka ipekule, ranta uwoi atuu gagi motu'i inso i wawontolino. 8Ka i'amba motolao asa manu-manu marapatii, ta kumitao ba makuraomo uwoi i wawontolino. 9Sine, manu-manu marapatii atuu nahi pohawe pomuaano ka onae wali mepokule ndi Noho a laro bangka atuu, hangano i asa wawontolino da hinao uwoi. I Noho tumandeo kaeno rumakoo manu-manu atuu ka iwawao mewinso a laro bangka. 10Isikorio opitu oleo mbo'u, ka i'amba wali motolao manu-manu marapatii atuu inso a bangka. 11Tamo ngkiniwia manu-manu marapatii atuu mekule ndi Noho saru asa tangke lewe saitu mololowulu a tungkuno, onaemo ka ito'orio i Noho, nine uwoi atuu makuraomo i wawontolino. 12Mansano mesikori opitu oleo mbo'u, ipotolao manu-manu marapati atuu, sine manu-manu atuu nahi pekule mbo'u ndi onae. 13A nta'u konomo etu ka aasa, wula ko'aasa, a ntanggala aasa wula atuu, uwoi atuu motu'iomo inso i wawontolino. Ka i'amba i Noho umungkahio ulono bangka atuu, ka mengkita limbu-limbu, mengkaa wawontolino mompu'uomo motu'i. 14A wula ko'orua, a oleo korua pulu ka opitu wula atuu, tolino motu'iomo.
15Mepau Iramo Ue Ala ndi Noho, 16”Peluarakomo inso a bangka, omue saru beinemu, luwuno anamu ka beinedo anamu, 17luwuno kondehora anu meronga saru omue, luwuno anu tuwu: manu-manu, pinotuwu ka luwuno kondehora anu melele i tolino. Tena iramo ka dompeluarako meronga saru omue, ka dompenggowo luwuno atuu i tolino, saru mpo'ule ka ntetiangi hadio i tolino.” 18Ka i'amba meluarakoomo i Noho saru luwuno anano, beineno ka beinedo anano. 19Luwuno kondehora mo'ila, luwuno kondehora melele ka luwuno manu-manu, luwuno anu melelu i tolino, singge montonda rupano, mpeluarako mbo'u inso a bangka atuu. 20Ka i'amba i Noho mowangu meda pontunua pesomba ndi Ondae i Ue. I'alao ba opia kondehora inso a luwuno pinotuwu anu nahina tataano, ka inso mbo'u a luwuno manu-manu anu nahina tataano ka ipesombaakono pesomba tinunu a wawo meda pontunua pesomba atuu. 21Tempono Dowooo i Ue lahono anu mompokomawongko atuu, Mepau Iramo i Ue i laro aroa-Do, ”Nahi Aku tumotonaao mbo'u tolino andio hangano mia, maupo tinoono aroano mosa'o mompu'u ikodei, ka nahi Aku mepate ira mbo'u luwuno anu tuwu, kana anu Kuweweuomo. 22Tewala da hinao tolino, nahi ta menaa-naa tempo morawo inii ka sumowi, tempo morini, ka mokula, tempo motu'i-tu'i ka usa, meene ka wongi.”
Valgt i Øjeblikket:
Tegagia 8: XMZ
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
LAI 2021