లూకా 6
6
ఆరామ్ను ధన్నాబారెమా యేసునా ప్రస్నా
(మత్త 12:1-8; మార్కు 2:23-28)
1ఏక్‍ ఆరామ్‍నా ధన్నేయేసుబి కేతర్‍మా కరి పఢీన్‍ ఛాల్తహూయిన్‍ జౌంగ్రతో, యిన సిష్యుల్‍ కేతర్‍మాను కంకుల్‍నా తోఢీన్‍ మహ్‍ఃళిన్‍ ఖ్హావనిక్లు. 2తేదె పరిసయ్యుల్‍మా థోఢుజణూ దేఖిన్‍, ఆరామ్‍నా ధన్నేధర్మస్త్రమా నాకర్‍నూతే కామ్‍ ష్యాన కరుకరస్‍? యూవనా పూఛావమా.
3యేసు యూవునేతీ ఆమ్‍ బోల్యొ దావీదుబి యిన కేడె ర్హవ్వావళు యూవునా బుక్‍లగ్గామా ఇవ్నే ష్యాత్ కర్యుకీ యోబి పఢ్యాకోయిన్‍నా? 4యో దేవ్ను మందిరంమా జైన్‍, యాజకుడు తప్ప అజు కోన్‍బీ నాఖానుతే దేవ్నూ జోగోమా మ్హేంధీయూ రోటనా పళ్ళీన్‍ ఖైన్‍, యినా కేడె ఛాతే యూవనాబి ధిదోని కరి బోల్యొ. 5యినటేకె అద్మినో ఛియ్యో ఆరామ్ను ధన్నేబి యాజమానిస్‍ కరి బోల్యొ.
హాత్‍ పడిగుతే అద్మి
(మత్త 12:9-14; మార్కు 3:1-6)
6అజేక్‍ ఆరామ్‍నా ధన్నే యో సమాజమందీరంమా జైన్‍ దేవ్‍ వాతే బోలీదేంగ్‍రతో, ఏజ్గా ఖ్హావాత్‍ పఢీగయూ హూయు ఏక్‍ జణో తో. 7షాస్ర్తుల్‍బి, పరీసయ్యల్‍ యేసు ఫర్‍ ఇంజామ్‍ నాక్‍నూ కరి బోలీన్‍, ఆరామ్ను ధన్నే అసేల్‍ కర్‍సేషీకి కరి కావల్‍ కాసీరూతూ.
8కాని యో యూవునే ష్యాత్ సోచుకరతే మాలంకర్లీన్‍, హత్‍పఢిగయుతే అద్మినా తూ వూటీన్‍ అద్మీఅక్కానా ఇఛ్మా హీభర్‍ కరీన్ బోలామా, యో వూటీన్‍ బిర్హయో. 9తేదె యేసు, ఆరామ్ కరనధన్నే అష్యల్ కరనూ న్యాయంకీ క్హరాబ్‍ కరనూ న్యాయం? ఏక్‍ అద్మినా భఛావనూ న్యాయమ్కీ మర్‍క్‍దేవనూ న్యాయం? కరి తూమ్నా పూఛావ్‍మ్గ్రూస్‍ కరి బోల్యొ. 10యేసు యూవనా మణీ ఏక్‍ వఖాత్‍ ఆష్పిష్‍ ఫరీన్‍ దేఖీన్‍, తారు హాత్‍ హఃఢక్‍ కర్కరి బోలామా యో ఇం కరమా యిను హత్‍ అష్యల్ హుయు. హూయిగు.
11తేదె ఏజ్గా ర్హవ్వావళనా గణు కీజ్‍ ఆయిన్‍ యేసునా ష్యాత్ కరీయే కరి ఏక్‍నా ఎక్‍ బొల్లీదూ.
యేసు బ్హార అపొస్తుల్నా ఎంచిలేవను
(మత్త 10:1-4; మార్కు 3:13-19)
12యో ధన్నవ్‍మా యేసు ప్రార్థన కరనా టేకె
13వ్హాణుహూవదీన్‍ యో యిన సిష్యుల్‍నా బులైన్ యూవనమా భారజణాన ఏర్పర్‍ఛీన్‍ యూవునా అపోస్తులు కరి నామ్‍ మ్హేందొ 14యూవునే కోన్‍ కతో సీమోన్‍నా యేసు పేతురు కరి నామ్‍ మ్హేంధొ యినో నానో భై అంద్రెయ యాకోబు యోహాను ఫిలిప్పు బర్తొలొమయి 15మత్తయ తోమా అల్ఫయి నో ఛీయ్యో యాకోబు జెలోతె కరి బూలావతే సీమోను 16యాకోబు నో ఛీయ్యో యూదా ఇస్కరియోతు యూదా ఆస్‍ యేసునా ద్రోహాం కర్సేతే
యేసు బోధిన్‍చానుబి స్వస్థకరాను
(మత్త 4:23-25)
17తేదె యేసు సిష్యుల్‍తీ మలీన్‍ ఫాఢ్‍ఫర్‍తు హేట్‍ ఉత్రిఆయిన్‍ మైదాన్‍మా హీబిర్యొతొ యిన సిష్యుల్‍నూ మోటు గుంపుల్‍ బుజు యూదయ దేఖుతూ యోరుషలేమ్‍మతు ధర్యవ్‍నా సేడెనూ తూరు సీదోను ఖాయరే మాతు కేత్రూకీ జణు అద్మీయే ఆయూ 18యేసు బోలాతే వాతే ఖమ్జానా టేకె అజు యూవునూ రోగ్‍నా అసేల్‍ కర్‍లేవనా టేకె అపవిత్రాత్మ ధర్యుహుయు కేత్రుకీ జణు ఆయిన్‍ అసేల్‍ హూయు 19రోగ్‍వాళనా అసేల్‍ కరనూ షక్తి యేసు మతూ భార్‍ ఆయిన్‍ యూవునా అసేల్‍ కరుకరమా యూవునే అక్కు జణు యిన ఛీమ్‍నూ కరి కోషీస్‍ కర్యు
దుఃఖ్‍బీ సంతోషం
(మత్త 5:1-12)
20తేదె యేసు సిష్యుల్‍నా ధేఖీన్‍,
యూవ్నేతి అమ్‍ బోల్యొ గరీబ్‍ హూయుర్హతే తూమే ధన్యుల్,
దేవ్నూ రాజ్యం తూమారు.
21హాంకె భుక్కేతిఛాతె తుమె భాగ్యవంతుల్,
తుమే త్రుప్తి హుస్యు.
హంకే రొంక్రతే తుమే ధన్యుల్,
తేదె తుమే హాక్తూ ర్హాసు.
22అద్మినో ఛియ్యోనా హాఃజే అద్మీయే తూమ్నా ధూషింఛిన్ తూమ్నా దూర్‍ కరీన్ తూమారఫర్‍ ఇంజామ్‍ నాఖిన్ తూమారు నామ్‍ క్హారబ్‍ కరి బోల్యు తేదె తుమె ధన్యుల్ 23యో ధన్నువ్‍మా తూమే సంతోసిమ్ఛో వుజు కుదో సానకతో స్వర్గంమా తుమ్నా ఫాయిదో మల్సె, జమానమాభీ ఆవ్నా పితరుల్‍బి హాఃరూబి ప్రవక్తల్‍తీ అమ్మస్‍ కర్యు
24ఓ ధన్‍దౌలత్‍వాళా, తుమ్నా ష్యాత్
హోను కతో యిన తుమే హాంకెతోడి,
అనుభవించిరాక్యస్ తుమ్నా మిన్హత్‍ ఆవ్సే.
25పేట్‍ భరైహూయా అద్మీయే
తుమ్నా భుక్‍లగ్సే హాంకె ఆహుఃకరతె,
అద్మియే తుమే దుఃఖ్‍పఢ్‍స్యు,
అజు తుమె రోవ్‍స్యు.
26అద్మియే హాఃరు తూమ్నా హఃరాయు తేదె తుమ్నా మిన్హత్‍, యూవునూ పితరూల్‍బి ఇమ్మస్‍ జూఠ ప్రవక్తల్‍నా హఃరాయు.
వైరియేను బారెమా ఫ్యార్
(మత్త 5:38-48; 7:12)
27మారీ వాతే ఖంజుకరతే తూమ్నా మే ష్యాత్ బోలుకరూస్‍కతో తూమారు వైరేవ్‍నా ఫ్యార్ కరొ తూమ్నా ధూషించవాళానా అచ్చు కరొ
28తమ్నా షభర్‍ దేవవాళనా దీవింఛొ బాధపెట్టతే యూవ్నా హాఃజె తూమే ప్రార్థన కరొ
29ఏక్‍ గాల్ఫర్ మారవాళనా బెంమ్మనూ గాల్‍ఫర్‍బి మార్‍కరీ బోలొ తారు ఉఫర్లు టూవల్‍ పళ్ళిజావళాన తారఖ్హూఢతు పళ్ళీనాజానుతిమ్‍ ఆడునకోబోల్‍స్యు 30మాంగతే ప్రతేక్‍నా ధేవో తార కన్‍తూ ష్యాత్‍భీ లీన్‍ గయూతే అద్మీకన్‍తూ అజూపాసూ యో రాఛూ నకో మమ్గో
31ఫార్లు తూన ష్యాత్ కర్నూకరి సోచస్కి తుమేబి యూవనా ఇమ్మాస్‍ కరొ.
32తూమ్నా తుమ్న ఫ్యార్ కరవాలనస్ ఫ్యార్ కర్యతొ ఇన్మా ఫైదో ష్యాత్? పాపుల్‍బి యూవనా ఫ్యార్ కరవళానస్‍ ఫ్యార్ కరస్ కాహేనా 33తూమ్నా అషల్ కరవళానస్‍ తూమె అషల్ కర్యతో ఇన్మా ఫైదో ష్యాత్ పాపుల్‍బి ఇమ్మస్‍ కరస్ కాహేనా
34కీనాబి వూధర్‍ దీధాతో యూవునే పాచూ ఫరీన్‍ దీనాసే కరి ఆహ్‍ఃకర్యతో ఇన్మా ఫైదో ష్యాత్ పాపుల్‍బి ఇవ్నే దిదొతే వూధర్‍ అక్కు పాచు ఫరీన్‍ దీసేకరీనస్‍ దేస్‍ కాహేనా
35తూమే కీమ్నా వైరేవ్‍నా టేకెబి నీరాహ్‍ః నాహూనూతిమ్ తుమారు వైరేవ్‍నా ఫ్యార్ కరో అషల్ కరో వూధర్‍ దేవో తేదె తూమ్నా ఫైదోమళ్‍సే సర్వోన్నత్‍ దేవ్నూ ఛీయ్యో హూయిరసు యో కరాబ్‍ అద్మీనాబీ కృతజ్ఞత కోయిన్తే అద్మీయేనాబి అషల్ కరవాళో హూయిరోస్
అలాద్వనా న్యావ్ బోలాను
(మత్త 7:1-5)
36యినటేకె తూమార భా కనికర్‍ హుయిన్‍ కీమ్‍ ఛాకీ తూమేభి కనికర్‍హుయిన్‍ ర్హవో
37న్యావ్నా నొకొతీర్చొ, తెదె దేవ్‍ తుమారబారెమా న్యావ్ కర్సేకొయిని కీనాఫర్‍భి ఇంజామ్‍ నకో నాకో తేదె తూమారఫర్‍బి దేవ్‍ ఇంజామ్‍ నాక్‍స్యే కోయిని తూమే మాప్‍ కరో తేదె దేవ్‍ తూమారు తప్పుల్‍బీ ఇమ్మస్‍ మాప్‍ హూస్యే
38తూమే ధ్వేవొ తేదె తూమ్‍నాబి దేవావ్‍సే దాభీన్ గీఛ్‍ కరీన్ భరైన్‍ హేట్‍ పడయేత్రు తూమార ఖోళమా నాక్‍సే తూమే కీనేతీ మోజీన్ దేంక్రస్‍కి దేవ్బి యోస్‍ మోజీన్ తూమ్నా దేవావ్‍స్యే
39అజు యేసు ఏక్‍ ఉపమాన్‍ బోలో ఏక్‍ ఖాణో అద్మి అజేక్‍ ఖాణోన వాట్‍ వత్తాల్‍సేనా ఇంకర్యతో భే జణబి ఖ్హాఢమా పఢ్‍సే కాహేనా 40ఏక్‍ సిష్యుడ్ ఇను గురువుతీబి మోటొ కాహే పన్కి యిను సిక్చ అక్కు పూర్తి హూవదీన్‍ తేదె యినేతి భరోభర్‍హూసే
41తూ తారు ఢోళమ ఛాతె పెల్కునా నాధేక్‍నూ తిమ్తారు భైని ఢోళమానూ ధరాసు నల్సు నాకీమ్‍ దేఖుకరాస్ యిన ఢోలామాను పెల్కు గల్లీన్ 42తారు భై ని డోళమా ధరాసు పెల్కు కాఢ్‍కరి కిమ్బోలూ కరస్ ఓ కపటి అద్మి అగాఢి తార డోళమనూ పెల్కునా కళ్ళా తేదె తారొ భైని డోళమనూ పెల్కునా కన్నాకనా తున తేటగా దెఖ్కావ్సె
ఝాడు బుజు ఇను పండా
(మత్త 7:16-20; 12:33-35)
43ఖయు అఛ్చు ఝాఢనా కామే అవకోయిన్తే పంఢా వుటకోయిని కామేఅవకోయిన్తే ఝాఢనా అష్యల్ పంఢా పుట్సెకోకొయిని. 44ఖయూబి ఝాఢ యిను పంఢతీస్‍ ఫళానూ ఝాఢు కరి మాలంహూవస్ కాఠనూ ఝాఢమతూ గుల్లర్‍నా పంఢ కోరిమ్తి నూ ఝాఢనా ద్రాక్చనాపంఢా తోడియేకోయిని 45అష్యల్ అద్మీయేనూ దిల్‍మా అచ్చు గుణ్‍ భరైరస్ యినటేకె యినమాతూ అష్యల్ వాతె అష్యల్ వాతె భాధర్‍ ఆవస్ ఖరాబ్‍ అద్మీయేనూ దీల్‍మా ఖరాబ్‍ గుణ్‍ భరైరస్ యినటేకె ఇన్మాతూ కరాబస్‍ భాధర్‍ ఆవస్ దీల్‍మా సాత్‍ ఛాకీ యోస్‍ వాత్‍ మోఢాతీ బోలాస్
బేజాణ ఘేర్‍ భాందావాలు
(మత్త 7:24-27)
46మే బోలుతిమ్ నాకరీన్ ప్రభువా ప్రభువా కరి మన ష్యాన బులావస్ 47మారకనా ఆయిన్‍ మారీ వాతె హఃమ్జిన్‌ యిన భరోభ్బర్‍ ఛాలవళు ప్రతీ ఏక్‍ జణు కీనిన్‍తర రసేకతో తూమ్నా బోలుస్ 48యో ఘర్‍ భాంద్నూకరీ అసేల్‍నితర ఖ్హాఢకొమ్ధీన్ భంఢనాఉఫర్‍ బేస్‍ నాకీన్‍ భాంధూహూయు అద్మీని జోన్‍నూ కరి బోలాజై కేవోడో మోటొ వాయిరో పాణీను తుఫాన్‍ ఆయిన్‍ యో ఘర్‍నా మారీతోబి యోఘర్‍నా జరభి హల్‍సేకోయిని. సానకతో యో ఘట్‍ భాందాయిరుస్
49మారు వాతె హమ్జీన్ ఇంనితరా కరకొయింతె అద్ముయే యూవ్నూ ఘర్‍ హఃఢకొన్‍ధీన్‍ బేస్‍మట్టం నాక్యూ కోయినితిమ్ ఖాళీ జమీన్‍ఫర్‍ ఘర్‍ భాంధీహూయు అద్మీను జోన్‍నూ కరి బోలాజై పాణీను తుఫాన్‍ అయిన్‍ యో ఘర్‍నా మారామ యో ఘర్‍ పుటీపడ్యు జైన్‍ నాసానం హుయిజాస్
Valgt i Øjeblikket:
లూకా 6: NTVII24
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
The New Testament in Vagiri Language © The Word for the World International and Vagiri Nawa Jivan Kristi Madadi Telangana, India. 2024