Š. Matéu 5
5
Krie V.
1Pâr prana gjindet, u‐ngjit te malji, e po tše u‐ulj atié, ju‐kjásetin δišípuljit e tîje,
2E χapur buzen e tîje, i mesóje tue θẽn:
3Ljumte te némurit te špirti: se e tíria ešt rregjería e kjíelvet.
4Ljumte te bútete: se atá kân te trašigonjen jeten.
5Ljumt’ atá tše kjânjen: se atá kân te kên pušîm.
6Ljumt’ atá tše kân û, e tše kân et ljíkjie: se atá kân te jên te ndẽndur.
7Ljumte ljipisiáret: se atá kan jên te ljipisur.
8Ljumte te pastrúarit zémrie: se atá kân te šoχen Tẽnzôn.
9Ljumt’ atá tše vẽ̂n pakjen: se atá kan θerriten bilje Tinzoti.
10Ljumt’ atá tše jân nkuδirtur per te dréiten: se e tíria ešt rregjería e kjíelvet.
11Ljumte jini kûr te ju šanjen, e te ju perzên, e te ju θôn kunder gjiθ te ljigat, tue θẽn te rreme per pajet time:
12Χarepsi, e χezoni, pse rroga júaje ešt e maδe nder kjíel: se keštú perzûn profetrat, tše kjên pâr juše.
13Ju jini kripa δéut. E nde kripa u‐škatarrofte, me ke kat dertonet? Ajó se veljén per mê gjê, mosse te štiχet jašt, e te jêt e škeljur ka njérezit.
14Ju jini drita e jétese. Nẽng mund fšeχet nje χôr e vẽn mbi nje malje.
15Né δézenjen χiljnarin, e e vẽ̂n perpoše menzes, po mbi pizulin, e bẽn drit gjiθve te špia.
16Keštú lampariste drita júaje perpara njérezvet: se te šoχen te mirat bẽnat túaje, e te χjezónjen Taten têje, tše ešt nder kjíelet.
17Mos ju dukte se ú erδa te škatarróija ljedžen, o profetrat: nẽng erδa ti škatarróija, po ti beja.
18Se per vertét ju θom; njera te škônje kjíela e δeu, nje jota vet, o nje pikez nẽng ljipset ka ljedža, njera te kjofšin gjiθ šurbiset.
19Per kte aí tše sgjiθte nje nde kto ljedža mê te vógeljat, e te mesônje keštú njérezit, mé i vógelji kat θerritet te rregjería e kjíelvet: aí prana tše beft e mesófte, kî i maθ kat θerritet te rregjería e kjíelvet.
20Pse ju θom, se nde mos mburóft e dréita júaje mê se e Skríbravet e e Farisérevet, nẽng χini te rregjería e kjíelvet.
21Gjégjetit se kje θẽn piékjevet: Mos vraš: aí prana tše vrafte, kat jêt nen kúrtien.
22Pra ú ju θom: se nganjé, tše kâ kjerratî me vlân e tîje per faregjê, kat jêt nen kúrtien. Aí prana tše θefte vláut tîje, raká: kat jêt nen kuventin. Aí prana tše i θefte, i lavur: kat jêt nd’ avsit ziárrit.
23Nde ti poka síelše rrigalin tẽnte mbi autarin, e atié u‐kuitofše se vlau it kâ gjagjê me tîj:
24Lje atié rrigalin tẽnte perpara autarit, e ets perpara e u‐mbjiθ me vláun tẽnte: e aχíerna arδur jipe rrigalin tẽnte.
25Kjofš i mîr me armikun tẽnte mbiátu per sa jê mb’ ûδe me té: te mos te te kjélenje armiku te júδetši, e júδetši te te vêr te dúart e šerbetúarit: e te jêš i štẽn nde filjakjî.
26Per vertét te θom, nẽng delje atéi, njera te pagúaš te ljurtmin turrés.
27Gjégjetit se kje θẽn piékjevet: Mos befše mekát me grúan e te tiérve.
28Ú pra ju θom: Se nganjé, tše rúan grúan per te diserônje, aχíera beri mekaten te zémera tîje.
29Nde prana siu it i diáθt te jep skandal, ndzire, e štire ka ti: pse bẽn mê per tîj te biret nje piés e kurmit tẽnte, se gjiθ kurmi it te štiχet nde pist.
30E nde dora jote e diáθte te jep skandal, prite, e štire ka ti: pse bẽn mê per tîj te biret nje piés e kurmit tẽnte, se gjiθ kurmi it te štiχet nde pist.
31Kje θẽn eδé: Aí tše ljerefte šokjen e tîje, je ti jâp škrúamen e te ljeríerit.
32Ú pra ju θom: Se kuš ljerefte šokjen e tîje, mosse per te turperúarit, bẽn e turperonet: e aí tš’ u‐martofte me te ndáituren, e bẽn mekaten.
33Papâ gjégjetit se kje θẽn piékjevet: Mos márreše bên rrê: e príerše Tinzoti bêt tẽnte.
34Ú pra ju θom, te mos mírreni bê fare, jo mbi kjíelen, se ešt θroni Tinzoti:
35Jo mbi δéun, se ešt kumbimi i kẽ́mbevet tîje: jo mbi Džerusalemin, se ešt χora e te maδit rregje:
36Jo mbi kríet tẽnte te beš bê, se ẽng mund beš nje kjime te bârδe, o te zêze.
37Kjofte prana te foljet tâje, eχ, eχ: jo, jo: mê šûm se kto fiâlje, vién ka te ljikte.
38Gjégjetit se kje θẽn: Sî per sî, δẽmb per δẽmb.
39Ú pra ju θom, te mos rrini te zên me te ljigun: po kušdó te piáste nje mbalambérse mbi fakjen e diaθte tẽnde, priri atîje eδé jatren.
40E atîje, tše do te te kjélenje mbe kurt, e te te mârr gunen tẽnde, ljei atîje eδé mantiéljin.
41E kuš te dzarriste per nje mîlje passe, ets me té eδé per njeter di.
42Atîje tše te ljipen, jipi: e até tše do χua ka ti, mos e perzefše.
43Gjégjetit se kje θẽn: Dúaš mîr gjitonin tẽnte, e dúaš ljik armikun tẽnte.
44Ú pra ju θom: Dúani mîr armíkjete tâje, bekoni atá, tše ju malkonjen, bẽni mîr atire, tše se mund ju šoχen: e parkaljéseni per atá, tše ju bẽnjen ljik e ju perzên:
45Se te jini bilje Tátese têje, tše ešt nder kjíelet: se aí bẽn e ljeχet díeli tîje mbi te ljikjet e te miret: e bẽn e bie šî mbi te dréitit e te štrẽ́mburit.
46Pse nde ju dafšit mîr atá, tše ju dúan mîr, tše rrôg mund kini? nẽng bẽnjen kte eδé gabeljotrat?
47E nde ju fálješit vlézerit tâje vet, tše bẽni ju mê šûm? nẽng bẽnjen keštú eδé džentíljete?
48Andái kin jini ju gjiθ te mîr, si gjiθ i mîr ešt eδé Tata îje i kjíeles.
Valgt i Øjeblikket:
Š. Matéu 5: AAE1869
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Përktheu nga greqishtja 1869.