Mateo 10
10
O Jesus ikkarel desudui disipulura
(Mk 3.13-19; Lk 6.12-16)
1Ondaka o Jesus ikkarda pe desuduie disipulonen, ta dia len o gazdaripe te traden e bilache duonen ta i te sastaren suako nasualipe ta suako duk.
2E anava katar e desudui disipulura si gala: O purvo o Simon, kai ikkarenale o Pedro, ta leko pplal o Andres; o Santiago ta leko pplal o Juan cahurre e Zebedeoke ta leko pplal o Juan; 3O Felipe, o Bartolome o Tomas ta o Mateo o publikano, o Santiago chaurro e Alfeoko ta o Tadeo. 4O Simon o kananita ta o Judas iskariote, gua kai ppukada e Jesuse.
O rado katar e desudui
(Mk 6.7-13; Lk 9.1-6)
5Gale desuduien bichalda o Jesus ta sikada len, ta ppenda lenge:#Lk 10.4-11. Po drom golengo kai inai judiura na llan; ando foro katar e Samaria na den; 6mai sukar llan mai anglal kai e bakre jasarde katar o foro e Israeleko.#cf. Jer 50.6; Mt 15.24. 7Ta kana ka llan ppenen lenge gia: E charoina e milosoki avili pase. 8Sastaren e nasualen ta i e llenen kai si pe lende e lepra, llungaven e mulen traden avri e llavolonen; so lien llabe den le i tumen llabe.
9Na inllaren sunakai ni rup ni jarkuma ande tumaro chemeri. 10Ni galavo e dromeke, ta ni premena ni minie, ni rovli soke gua kai radil morabi te pochinen leke.#1 Ko 9.14; 1 Ti 5.18.
11A kana ka den ande varesavo foro o forichi puchen ko si lacho ande gua foro ta achen ande leko cher lligo ni ka llantar kotar. 12Kana ka den ando cher ppenen gia: e pas te avel tumenchar. 13A e llene katar gua cher te si lache, tumari pas ka avel upral pe gua cher; a te na avena lache, tumari pas ka irilpe tumende. 14A te na avile tumenchar pachivale, ta te na mangle ni te asunen tumen, liken katar gua cher o katar gua foro ta chinosaren o prajo katar tumare minie. 15Chachimaia ppenau tumenge kai ando llive katar e kris e duk kai ka delpe gole foroke ka avel mai bari neko e llenenge katar e ppuv katar e Sodoma ta katar e Gomorra.
Sargo bakren maskar e ruv
16Me bichalau tumen sargo bakre maskar e ruva. Goleke morabi te aven bizai sargo e sapa ta proste sargo e gulubura. 17Arakken tumen katar e manusa, soke ka ttoven tumen ande krisa ta ka inllaren tumen ande kkanllira e judionenge ta ka chalaven tumen e bichoia.#Lk 12.11-12; cf. Apost 4.1-8. 18Ta cheres ma i ka ttoven tumen angla e sudura ta angla e kraliura te sai ppenen e orba e chachi mandar te sai asunen von ta i gola kai inai judiura. 19Kana ka inllaren tumen angla e kris, na brigin tumen sar o so ka den orba, soke kana ka avel o vreme o Del ka del tumen e alava te den orba. 20Soke ni ka den orba tumen; o Duo tumare Dadeko ka del tumen e alava te den orba.
21E pplal ka den ando meripe isto pe pplalen, ta e dada pe chaven; ta e chave ka murzin pe pe dada ta ka mundaren len.#Mk 13.12; Lk 21.16. 22Sa o sueto ka murzil pe tumende pala mo anau; a gua kai llala zoriaia llik kai o son, ka avel braduime.#Mt 24.9,13. 23Kana e llene katar iek foro ka llan pala tumende te maren tumen, nasen ande aver foro. Chachimaia ppenau tumenge, kai kana ka avel o Chavo e manuseko tumen ni ka resen te ppiren sa e forura katar o Israel.
24Gua kai sikol inai mai but neko po kovachi ta ni o esluga inai mai but neko po gazda.#Lk 6.40; Jn 13.16; 15.20. 25Dosta goleke kai sikol te avel sargo po kovachi ta o esluga te avel sargo po gazda. A o dad gole familiako te ikkaren le Beelzebu, so mai but ka ppenen katar e llene kai zivin ande leko cher.
Katar morabi te dara
(Lk 12.2-7)
26Goleke tumen na daran katar e llene, soke sogo si gurudino ka sikadol, ta sa so cherdol po chorial ka llangliolpe. 27So me ppenau tumenge ando truñariko, ppenenle tumen ollivesea, ta so me ppenau tumenge po chorial urkisarenle upral pe chera. 28Na daran katar gola kai mundaren e esnaga a nasti mundaren e duo; katar morabi te daran si katar gua kai sai mundarel e duo ta i e esnaga ando tufano.
29¿Ni bichindon dui chirikliorra pe iek tolarichi? A ni iek lendar ni perel pe ppuv te na avela e volia tumare Dadeki. 30A e bal tumare soreke si llinde e Devletar iek po iek. 31Goleke na daran: tumen mai mol tumen neko but chirikliorra.
Ppen angla e manus kai pinllare e Jesuse
(Lk 12.8-9)
32A vareko te ppenela kai pinllarel man angla e manusa, i me ka ppenau kai pinllarau le angla mo Dad kai si ando miloso; 33a vareko te ppenela kai ni pinllarel man angla e manusa, i me ka ppenau kai ni pinllarau le angla mo Dad kai si ando miloso.#Mk 8.38; 2 Ti 2.12.
E joli maskar o porodo
(Lk 12.51-53; 14.26-27)
34Na mislin tumen kai avilem te anau e pas ando sueto; ni avilem te anau pas, avilem te anau o jarni. 35Soke avilem te ttovau ande joli e manuse pe dadea, a e chorri te avel ande joli pe daia, ta e bori te avel ande joli pe sasuiaia;#Miq 7.6. 36goleke, e manuseke dusmanura ka aven isto leki familia.
37Ko volil pe dade o pe da mai but neko man inai lacho mange; kogo volil pe chaurre o pe chorra mai but neko man, inai lacho mange; 38ta ko ni lel po krusto ta te llal pala ma, inai lacho mange. #Mt 16.24-25; Mk 8.34-35; Lk 9.23-24; Jn 12.24-25. 39O lleno kai mangela te braduil po zivoto ka jasarel le, a o lleno kai jasarela po zivoto pala ma, ka braduil le.
O chari ando miloso
(Mk 9.41)
40Ko lel tumen, lel man; ta ko lel man, lel gole kai bichalda man.#Mk 9.37; Lk 10.16; Jn 13.20; cf. Jn 14.9. 41Ko lel iekke porauko, soke si porauko ka dobil so dobil iek porauko; a ko lel iekke chache soke si chacho, ka dobil so dobil iek lleno chacho. 42A vareko te del iek taso pai silalo iekke minone katar gala, samo soke vou si mo disipulo chachimaia ppenau tumenge kai ko dela gua taso pai ni ka jasarel so si te dobil.
Valgt i Øjeblikket:
Mateo 10: ROM07
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Nuevo Testamento en Romané © Sociedad Bíblica Chilena, 2007.