Yohaannisi 16
16
1Kamma' desa Yesuusi ikide, “Tin waan malla sede piisa ishina' lele, akka amanteetaayshin in yaaqyaaqinin malla. 2Tikkasene a qinseeta a orra Yihuta kela ishin sookshan ka ishin kamma daanan. Laadi eta a oppaayye orra ishin lenno piisa, a Waaqa koda koono pahanaatto de'a. 3Wa malla sede kodane nefo, qoota Waaqa Aappa isho ana in upnin malla. 4Waan malla sede ishina' lella' xoori, oto Etosen kaytooyye, waan ishina' lele akka matte oorsattan malla.
Koda a Hapura Qulqulloota
Kamma' desa Yesuusi ikide, waan malla se turan sede piisa, ishina an lellini, qootan ishin olli co malla.” 5Amma xoori isase ana erke kapopan anni; umma ishin oppaayye nama ana kaassado ka kido ‘Ayshopa anni?’ in co. 6a koddito ma, qootan sede piisa ishina' lele malla, karittaayshin nyarrahatanne immakaade. 7Anti xoori, dukaatannen ishina' kiini, antiyyo ishina' wayyi. Oton anti an anniniiyyi xasa oorissampaytase ishin kapopa in de'o. Oton xoori in aanaayye, ishan ishina' erka. 8Isha oto de'ooyye, qoota juppoota ka a hanqeelluma isho a firteetati desa orra piita' laka sooksha. 9Sede a qoota juppootati desa, ishootta laka' sooksho, qoota ana amanni in kinnin malla. 10Sede a qoota hanqeellumaati desa, ishootta laka' sookshoow; qootan anti Waaqa Aappa kapopa anno, arepa desa ishina ka ana a akkinini malla. 11Sede a qoota firteetati desa ishootta laka' sookshoow, qoota piddampayta piisseti qara' faratamte malla.
12“Waan ishina' lela lekayaan qapa ma, amma xoori ishin qara'e ulsaadan. 13Hapurase a dukaata oto de'ooyye, qinda dukaata piisa opa ishinan aana. Isha wa dakaye diisheey, qoota wa mattaadi' haasawanni in kinnin malla. Isha wa itturopa kodda'e ishina' lela. 14Qoota wa xayyo kodde' qeedo ka turaayye ishina' lelo malla, isha ana ulfeessini. 15Wa a Waaqa Aappa kodde piisa, xayyoow, semmallan ishina' kide, ‘Wa xayyo kodde'e qeeda ka turaayye ishina' lela.’”
Nyarrahataayshin akka xasopa pursamo
16Kamma' desa Yesuusi ikide, “Eta shakkaya kammaayye ana a akkitan; eta shakkaya kammaayyeew i'ana akkitan.”
17Tamaarewwasene' xaadi oppaayye, demo ka olli' kidene, “Sede a ino' kiino, ‘eta shakkaya kammaayye ana a akkitan ka eta shakkaya kammaayyeew i'ana akkitan.’ Ka kiinoowwe, ‘Waaqa Aappa kapopan aana,’ maana kideeta?” 18Ka oppa'ew o'ooren ka oli kakaassaden ka kidene ‘Ka kuli sede a kiino ‘Eta shakkaya kamma’ maana? Wa haasawanna ino an upno.”
19Yesuusi ka akkima qootoseti desa isha kaassatta faden upnaade ka ishootta' kide, “Hela sede a oli kakaassannittan qootan ishina' kide, ‘eta shakkaya kammaayye ana a akkitan ka eta shakkaya kammaayyeew i'ana akkitan malla?’ 20Anti dukaatannen ishina' kiini, ishina ippooytan ka ulluptan, piita xoori ixasootta; ishina inynyarrahatan, ma nyarrahataayshin xasopa pursamta. 21Iskatteeta oto xaaynittooyye, qoota kuyyaataadi a yatatta kayte malla, inyarrahani. Oto xaayto kammaayye xoori, qoota inna piita qara' deladen malla, xasoottaadi qaran xaate'e surumtaadi matte oorsanni in kitto. 22Asseew ishina amma inynyarrahanittan, ma xoori anti lammatta'en ishin akka, karittaayshin ka xasooda; umma nama xasoottaayshin ishin qara qeedo in co. 23Awwsetiiyyi, we takkan nefo ana qaraayye a' qinsattan. Anti dukaatannen ishina' kiini, kati maxxiyyon Waaqa Aappa qinsannittaneeyye, we piisa ishina' daasha. 24Haka ammati we takkan nefo maxxiyyon a qinsanne, qinsada i'ishina' daasamtaay, xasoottaayshin ka immakkoota koddaay.
25“Haka ammati'i, pahanaannen ishina' lele; arepa desa eta an oppaayye pahanaan ishina an haasawannini de'a; ma xoori qoota Waaqa Aappaati desa we' piisan la'aysha ka ishina' lela. 26Kuyyaasetiiyyi ishina maxxiyyonne qinsattan, umma anti an ishina an kido ‘Waaqa Aappaapan’ ishina' qinsada. 27Maana malla Waaqa Aappa isha mattaadi ishin jaalanni; Waaqa Aappa wa malla ishin jaalanna nefo, qoota ana jaalannittan ka akkiman Waaqa kapa de'e amanten malla. 28Anti Waaqa Aappa kapaayyen sooke ka piisse qaropa de'e, amma piisse in diishaaw ka Waaqa Aappa kapopa aana.”
29Tamaarewwaadi ka kidene, “Tin amma oori pahanaanne a haasawanne ma, i''la'asse ka haasawatte. 30Atti akkima we' piisa upto, nama takka' nefo ka ke qara kaassuma kaassatta isha parpaaccisni in kinnin, amman upnaanne. Semmalla akka' Waaqa kapa deete in amanninna.”
31Yesuusi ka ishootta' oorshe ka kide, “Amma i'amantene? 32A koddito ma saateta a oppaayye mattaayshina takka takka pastan ka ana patta xawwi' diissane de'a. Saatese nefo amma ikayte. Ma xoori, qoota Waaqa Aappa ana olli co malla anti xawwaati an co. 33Waan malla sede ishina' lele, akka anan caattan ka nakayta qapnaattan malla. Haka' piita qara kittaneti'i rakkoota ishin qaraayye ca; ma xoori in fuuran, anti in piita puteey.”
Valgt i Øjeblikket:
Yohaannisi 16: MaQu
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
