Yohaannisi 15
15
Yesuusi quduppatta qoyra wayneeta a dukaata
1Yesuusi ikide, “Quduppatta a qoyra wayneeta a dukaata ana. Qotampayta nefo aappinno. 2Taama ana qara co ka dalta dalli in kinnin piisa Aappinno alle'e murri ka alle' kanni. Ka taama delta dallo akka dalta kutta' delo'e, qara tamini ka harminni. 3Ishina amma qaalese xayyo an ishina' lelenne, amma jureeta a' qaptan. 4Anan kallaada, anti in ishinan kallaadaay. Taama oton quduppatta qoyra wayneeta qara'e in qapanniniiyyi, isi pattan akkima delta dela ettaninni in kinnin mina'e, ishina' nefoow oton ananne a kallaanni a kinniniiyyi, dalta dala a ettanissan.
5“Anti an quduppatta qoyra wayneeta, ishina' nefo a taammaayyo. Nama anan kallaanno, anti ka ishin kallaanno, delta kutta'e dalli; maana malla, ana maliiyyi we takkan nefo kodeeta a ettanissaneey. 6Nama anan kallaanni in kinnin, a taama mina'e lakopa katama ka koka, taamma asse paha apittoppopa kataman ka kupadan. 7Katin ananne kallaannittan, qaaletiyyo ka ishin kara kinnaannittaayye, wa' heentane oto' qinsannittan, i''akkattan. 8Oto' dalta kutta dallittaneeyye, Aappinno sedenne ulfeessama, ishina ka akka tamaarewwaayyo kodditen akkissan. 9Akkima Waaqa Aappa ana jaalade anti asseewen ishin jaalade; semmalla jaalalaayyon kallaada. 10Anti akkan ajaja Aappinno kode ka jaalalaadin kallaanno mina'e, ishina'ew oton ajajiyyo' koonittaneeyye, jaalalaayyonne' kallaattan. 11Waan malla sede ishina' haasawade, akkan ishinan xasoodo, xasoottaayshin ka immakaado malla. 12Ajajiyyo nefo, akkan anti ishin jaalade mina'e akka ishina oli jaalattan. #Yoha 13:34; 15:17; Yoha 1ta 3:23; Yoha 2ta 5 13Nama moottadaadi a jaalanna malla toota isi dassata, qaropa jaalala in qapo. 14Ishina'ew oton wa an anti ishin ajajna'e koonittaneeyye, a moottadaayyo an jaalanna. 15Orxayta wa poqallaadi koona qoota in upnin malla, arepa desa orxayaayyo ishina an kido. Ma xoori, qootan waan Aappinno qara dakaye piisa ishina upnayshe malla, moottadaayyo an jaalanna'en ishina' kide. 16Ana ishin reexade diisheey, ishina ana a reexanne. Anti ka akka antan ka delta kutta' deltan, deltaayshin ka a kallaannitto koddito'e ishin shuumade. Semmalla wa maxxiyyon qinsannittane piisa Waaqa Aappa i'ishina' daasha. 17Akka oli jaalattane'e ajajiyyo toy sede.”
Qoota needduma piitati desa
18Kammaddesa Yesuusi ikide, “Oto piita ishin needdannittooyye, akka ishin turan ana needdatte upnaada. 19Katin ishinan a piita kiiteeyye, piita wa xaadi kodde jaalanni heente, ma xoori, qoota a piita a koddinin anti ka piitoppa ishin reexade malla, piita ishin needdanni. 20Isase an ishina' kide, ‘Orxayta poqallaadi qara in qapo’ matte oorsada. Oto pora ana daaneneeyye, ishin kuli asseew pora daanan; oton qaaletiyyo' tooytaadeneeyye, asseew qaaletaayshin kuli tooytaadan. #Maati 10:24; Luqa 6:40; Yoha 13:16 21Qoota a ana erke in upnin malla, ana minanne se piisa ishin qara' kooni. 22Katin ana in deenin ka ishootta'en lellin kiiteeyye, juppoota ishootta qara' koddini in heenne. Amma xoori juppootaaysho wa ishin marmadane in qapan. 23Nama ana needdanno Aappinno kuli needdanni. 24Katin ana koda apari nama pila in kooninin ishoottoppa an koonin kiiteyye, helani juppoota ishootta qara' koddini in heenne. Amma xoori, a se piisa akken kammaayye ana isho Aappinno kuli needdaden. 25Sede nefo wa malla asse koddite qaaletase seeraaysho oppa' taafamte ka kiinitto, ‘Patta'e ana needdaden’ akka dikkatto malla. #mas 35:19; 69:4 26Ma xoori xasa oorissampaytase Waaqa Aappa kara sookno, anti ka Waaqa Aappa kapa ishina' erko, Hapurase a dukaata, oto de'oyye, qootiyyo desa maakkuma. 27Ishina'ew, qoota' paayyote paayyiten ka ana olli kinnaatten malla, immaakkummittaneew.”
Valgt i Øjeblikket:
Yohaannisi 15: MaQu
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
