Luk 24
24
Ana Jisos nyahme go elkv
(Mat 28:1-10; Mak 16:1-8; Jon 20:1-10)
1Ngbokambang efung go erahde, efungfu atv atv, bo kehm rodo anyane nya bo toobo no, tahm a nya go elahm. 2Eji bo rehnge go, bo kehm song nyehn eltal nio ma bannge go nnyo elahm, noongo go nkpe. 3Owo bo kehm maade yel, jol ekv ji Ntul a Jisos bo nyehnem.
4Eji bo yim o, ma bil bo amahr, bo kehm soro nyehn ane abal yim kohlo bo, ba kake nsol nyi jo nyane. 5Eji anebkal bao jo fahl, fere kohk asamahr go ndi, ane bao na abal kehm soro kehme elbungu a bo re, “Jen ji wahng ń kpꞌsebe nne a mbir mbir go ellong akvne? 6Ana á limm. Yebnyahme. Buumen ana á tong-n no ngare nyi á kpeke li go Galili re, 7‘Mmon no nne, bo bahk-e yake, kak abi ane go ebo, bo kum-e go ekros, lꞌkang nfung era, á nyahme go elkv.’ ”#24:7 Mat 17:22-23
8Owo anebkal bao kehm soro buumu alum enye, 9kehm lohngo go elahm feere, song tooro nsol nyio tong abatꞌtoono ebe, ewubu a nne awohng, fere tob tong erik ane bako fvfo. 10Anebkal ba tongo abatiingetib nsol nyia jolo Meri ji lohng go Magdala, Joanna, Meri nnyehn Jems, a anebkal bako ba tob jol a bo fvfo.#24:10 Luk 8:2-3
11Abatiingetib, alum nya anebkal bao tongo bo jolo bo ana emongo. Bo taamem tv bo.
12Pita kehm tahme, be song rehng go elahm, kehm song reme fahng, nyehn akpowo nya nya nong no. Owo á kehm feere kehnge, fere jo tir bade ji ma lim.
Ana abatꞌtoono Jisos na abal jo tahm go Emmaus
(Mak 16:12-13)
13Efung bꞌnehm ona ane abal ba woomo go bo ellong lohngo jo tahm go ejahbe ji bo kpo lung re Emmaus ji jolo ejum mmal esehma, a lꞌtahm go Jeusalem. 14Bo jo tubu eka atemtem bada nsol nyia kpee nyi ma lim.
15Eji bo kpi mbungu mbungu atemtem, fere jo tiiri, yefono Jisos kehm lohngo ba kpiri bo, jo jen a bo. 16Ngare nyio amahr ebo ka lennge, owo bo ki-e liingi. 17Á kehm bahbe bo re, “Jen ji ń kpꞌbungu tong atemtem, eji ń kpꞌjene asongo ndon ndon?”
18Owo nne awohng no bo jo lung-e re Kleopas kehm-e faange re, “Anv, wo ntahngtahng wo ga li njenne nyi li go Jerusalema, nyi kil kahne nsol nyi ma lim a afung nyaa?”
19Á kehm bahbe bo re, “Nsol anyi?”
Owo bo kehm-e faange re, “Nsol nyi ma lim Jisos ji Nasaret,” ji jolo nnyehnamahr no jo bung alum nya kpi nsahm, fere jo lim agburu akpokosi go esamahr Esowo, a esamahr bi ane kpee.#24:19 Mat 21:11 20Atubesi abalimajom ebahre, a atubesi ebahre ba yak-e no ka re bo kimi elam ji bo bahk-e wulu. Owo bo kehm-e kumu go ekros. 21Wahr jo kunu ekpu re, ye wo bahke fake Israel yake.#24:21 Elt 1:6 Gana yebkpo! Lela nfung era nyi a, nyi nsol nyia limi no.
22“Fvfo, ji ma-r kpe kpꞌkpo esi, anebkal bandiki ba wob go egahre ellong fungu efungfu atv atv, je go elahm,#24:22 Luk 24:1-10 23ekv eje bo nyehnem. Bo kehm feere ba, ba bung re, bobnyehn nkpokosi ejum, eji bo nyehne enjel nyi tongo bo re, á noa go elkpin. 24Egom jindiki ji woomo go egahre ellong kehm jeke go elahm, lohko song nyehn jang jang ana anebkal bao bungu no, sehngem yefono wo bo ki-e nyehn.”#24:24 Jon 20:3-10
25Owo Jisos kehm tongo bo re, “Wahn agboolo ane baa, jen ji wahnge kpo riid-n go eltaame ejum ajehng ajehng ji anyehnamahr nyono no? 26Tiki li re, Mesaya gbo mbang nyehn erem bia kpee, kehm yele go ege ellub.”
27Owo Jisos kehm lennge adi nwer Esowo kpee nya bungu bada ne tong bo, bomo go awer nya Moses, a awer nya anyehnamahr kpee.#24:27 Jon 1:45
28Bo kehm kabbe ejahbe ji bo fi no. Jo jolo are Jisos yahke sehng asongo. 29Bo kehm-e gboongo re, “Ba kang a nahre, tibre elgung ebba, gana ejannge ebkehme elgboko.”
Owo á kehm song yel ekpꞌkpa re á song kang goji bo. 30Eji á ji ekpꞌkuru, jo li nsol a bo, owo á kehm rodo ebred, kak Esowo saam, bakke, ka bo.#24:30 Luk 22:19 31Owo amahr ebo kehm soro lennge, bo kehm-e soro liingi. Á kehm soro lamme.
32Owo bo kehm kehme elbungu, jo tong atemtem re, “Ano wo wahnge alum enye jo yall-r, eji á jo bung a nahre go mbang, fere jo lennge nwer Esowo tong-r.”
33Owo bo kehm soro mehl tvtv, feere go Jeusalem, ba nyehn abatꞌtoono Jisos, ewubu a nne awohng ma ba kono edi ajehng, a ane ba tob jol a bo o fvfo, 34ba jo bung re, “Ntul a Jisos eblohko nyahme go etingitingi. Saimon m-e nyehn.”#24:34 1 Kor 15:5
35Owo ane abal bao kehm tob tooro ana ji limi go mbang tong bo, ana bo liing-e no ngare nyi á bakke ebred.
Ana Jisos ba kpiri abatꞌtoono ebe
(Mat 28:16-20; Mak 16:14-18; Jon 20:19-23; Elt 1:6-8)
36Eji bo kpi mbungu mbungu, yefono Jisos kehm soro ba lohng go bo elka, kehm bungu tong bo re, “Elkoono jol a nahne!”
37Kehm mennge bo, bo kehm kehme elfahle, fere jo tir re, etohko ji bo kpꞌnyehne a.#24:37 Mat 14:26
38Owo á kehm bahbe bo re, “Jen ji wahnge eko ma-n tan ana? Jen ji wahnge ń kpꞌfaabe go egahna ntim? 39Nyehnen abo enyame, wahn nyehn akpade enyame fvfo, eji ń lꞌkahn re mefono antahng wo. Dam-m wahn, wahn nyehn. Tibre etohko, ngubjing kpimm, ana ḿ ma-m nyehn, n kpi no.”#24:39 1 Jon 1:1
40Á bungu kan ano mal, á kehm tibi bo abo enye, a akpade akpade. 41Eji bo kala tiki taame tib go eyebatahng ji bo bele no, a esi ji jo kpo bo, owo Jisos kehm bahbe bo re, “Anv, ń kpꞌkpi ejum ajehng ajehng a, ji ellehka?”
42Bo kehm-e kake ekv nsahre ji bo ma lam. 43Owo á kehm taare li go bo esamahr. 44Á kehm tongo bo re, “Alum enyame nya ana, nya n jo bung a nahne ngare nyi n kpeke li a nahne re, Ejum ajehng ajehng ji bo nyono bada name go atahm nya Moses, fere nyon go awer nya abanyehnamahr, a nwer a Saams bahke lohko jol go etingitingi.”#24:44 Luk 24:27
45Owo á kehm lennge ntim ebo, eji bo lꞌkahn nwer Esowo, 46fere tong bo re, “Ana wo bo nyono re, Mesaya bahke nyehne erem, lꞌkang nfung era, á nyahme go elkv, 47bo fere tiingi ane kpee ba li go njini etib bi egbokondon, a bi eltahmeka go abiafem. Go Jeusalem wo, bo bahke bomo etib bio go eltiingi go ege a mbing. 48Wahn ba li atianse go nsol nyia. 49M bahke tumu ji nsoo nyame no tv-n.#24:49 Jon 15:26; Elt 1:4-5; 2:1-4 Jolen ejahbe jia a, tete nsahm nyi bahke lohngo go ero, lohng ba tob-n.”
Ana Jisos tahme go ejahbetul Esowo
(Mak 16:19-20; Elt 1:9-11)
50Owo á kehm rodo bo, tahm abo song rehng go Betani. Owo á kehm tabe abo enye wahre, fuulu bo.
51Eji á jo fuulu bo, á kehm soro tahm bo sa. Nsahm nyi Esowo rod-e tahm a ne go ejahbetul Esowo.
52Bo kehm feere go Jeusalem, a egburu eyebatahng. 53Bo jo jolo go etahk Esowo ngare anyehng anyehng, jo tehk Esowo, fere jo kak-e saam.
Valgt i Øjeblikket:
Luk 24: EKA-011
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
©️2024 Luke Initiative for Scripture Translation