San Lucas 11
11
Sínaꞌa Jesús nda ítaꞌan xiꞌin ra ndá kuꞌva kaꞌan nda xiꞌin Ndioxi
(Mt. 6:9-15; 7:7-11)
1Iin kivi ke̱e Jesús kuaꞌan ra kaꞌan ra xiꞌin Ndioxi. Tá si̱ndiꞌi ra ndi̱kaꞌan ra xiꞌin ra, ta ku̱yati iin ra ítaꞌan xiꞌin ra, káchi ra saa:
―Tata, sinaꞌa loꞌo un ndeꞌe ná kaꞌan nde xiꞌin Ndioxi, tá i̱kan ra Juan ra síkuchi naꞌa, si̱naꞌa ra nda ítaꞌan xiꞌin ra ndá kuꞌva kaꞌan nda xiꞌin Ndioxi ―káchi ra xiꞌin Jesús.
2Saa ndi̱kuiin Jesús káꞌan ra:
―Tá káꞌan ndo xiꞌin Ndioxi ta soꞌva kaꞌan ndo xiꞌin ra:
Tata, Iva yo Ndioxi, ra íyo nuu ndivi,
ná xaa toꞌo ni na ivi kivi un.
Ta ná kixi un kaꞌnda chiñu un ñuu ivi yóꞌó.
Tá kúꞌva xáꞌnda chiñu un nuu ndivi saa ná koo ya ikan un ñuu ivi yóꞌó.
3Ta taxi un ñaꞌa ya xíniñuꞌu nde kuxi nde kivi vitin.
4Saa xaa kaꞌnu ini un xaꞌa kuachi nde,
saa chi saa tu ndee va xáa kaꞌnu ini nde xaꞌa kuachi na íkan ya väꞌa xiꞌin nde.
Täxi un ndikava nde ndaꞌa ya väꞌa, chindee un ndeꞌe nuu ya väꞌa, kachi ndo xiꞌin ra ―káchi Jesús xiꞌin nda.
5Ñaa ndi̱kaꞌan ka ra xiꞌin nda, káchi ra saa:
―Iin ndóꞌo̱ tá tu íyo iin migo ndo ná kachi yo, ta saa ná kee ndo kuꞌun ndo veꞌe ra sava ñûu ta kaꞌan ndo xiꞌin ra: “Migo, taxi too loꞌo un uni xita vaꞌa ndaꞌa i. 6Saa chi iin migo i ke̱e xíka ra xaa ra veꞌe i ta köo mií ñaꞌa nuu i taxi i kuxi ra”, ná kachi ndo. 7Ta ná ndikuiin ra migo ndo ikán kaꞌan ra xiꞌin ndo, kachi ra saa: “Këꞌe un yeꞌe chi xa nda̱si kutu va yeꞌe i xa ndi̱kunduꞌu i kíxi i xiꞌin na vali seꞌe i, yakan küvi ndikoo i taxi i ya ndaꞌa un”, ná kachi ra xiꞌin ndo.
8Vani migo ndo ku ra ta saa ni xïin ra ndikoo ra taxi ra ya ndaꞌa ndo. Sundi xaꞌa ya ndinuni loꞌo káꞌan ndo ndíta ndo yeꞌe ra, ta ndikoo saꞌa ra taxi ra ya ndúku ndo nuu ra. 9Yakan kua káꞌan i xiꞌin ndo, nduku ndo ya nuu Ndioxi ta taxi ra ya ndaꞌa ndo. Nduku ndo ya nuu ra ta niꞌi ndo ya nuu ra, kani ndaꞌa ndo yeꞌe ta kuna ra ya nuu ndo. 10Saa chi ndiꞌi na ndúku ndá ka ñaꞌa ta níꞌi na ya, ta na ndúku ndá ka ñaꞌa ta ndítaꞌan na ya. Ta ndiꞌi na káni ndaꞌa yeꞌe ta xúna yeꞌe nuu na.
11’Tá kúu ndóꞌo̱ íyo seꞌe, tá tu ndúku na ñaꞌa nuu ndo kuxi na, ta ¿án táxi ndo yu̱ú ndaꞌa na kaxi na? Saa tu tá tu ndúku na tiaka nuu ndo kuxi na, ta ¿án táxi ndo ko̱ó ndaꞌa na kuxi na? 12Án köo tu tá ndúku na ndivi nuu ndo kaxi na, ta ¿án táxi ndo kiti tisoꞌma ndaꞌa na kaxi na? 13Ndóꞌo̱ vani väꞌa ivi ku ndo, ta köo táxi ndo ñaꞌa väꞌa ndaꞌa seꞌe ndo, ñaꞌa vaꞌa táxi ndo ndaꞌa na. Ta ndisaa ka vi Iva ndo Ndioxi ra íyo nuu ndivi taxi ra ya vaꞌa ndaꞌa ndo, taxi ra Tachi ra ndaꞌa ndo, tá tu ná kaꞌan ndo xiꞌin ra nduku ndo ya nuu ra ―káchi Jesús xiꞌin nda ítaꞌan xiꞌin ra.
Ndee kiti nǎꞌa kúu mií Jesús káchi na xaꞌa ra
(Mt. 12:22-30; Mr. 3:20-27)
14Iin kivi táva Jesús tachi nduvaꞌa ya kúu mií iin ra meꞌme. Saa tá ke̱e soꞌva ya ta ndikun xáa̱ vaꞌa káꞌan ra. Ñaa ndi̱kanda ni ini naꞌa tá xi̱ni na xaá vaꞌa káꞌan ra. 15Sava na xa̱á kánaꞌa na xaꞌa Jesús, káchi na saa:
―Xiꞌin ndee kiti nǎꞌa, kiti náni Beelzebú kiti chee nuu ndiꞌi tachi nduvaꞌa, xiꞌin ndee ri ikán kua ta̱va ra tachi nduvaꞌa ya ndo̱ꞌo ra yóꞌó ―káchi na.
16Saa xa̱á káꞌan inka na xiꞌin Jesús, xíto ndoso ñaꞌa na ya ná ikan ra iin seña kuni na yatuꞌun Ndioxi ya vaxi nuu ndivi. 17Sundi Jesús ta xa ku̱ndaa ndiꞌi ini ra ya ndíkani ini na, ta saa ndi̱kaꞌan ra xiꞌin na, káchi ra saa:
―Tá íyo iin ñuu nuu kánitaꞌan na xiꞌin taꞌan mií na ta küchiñu na koo vaꞌa na. Saa kundoꞌo tu na íyo iin veꞌe nuu káni taꞌan xiꞌin taꞌan mií va na, síndiꞌi xaꞌa taꞌan mií na. 18Ta saa tu kiti nǎꞌa va, kiti náni Satanás, tá ná kani taꞌan ri xiꞌin taꞌan mií ri, taꞌvi taꞌan ri, ta kama ni va ndiꞌi xaꞌa ichí ya xáꞌnda chiñu ri. Yakan süvi ya ndaa kua ndíkani ini ndo xaꞌa i, táva i tachi nduvaꞌa xiꞌin ndee kiti nǎꞌa. 19¿Án kúu mií i ndee kiti nǎꞌa táva i tachi nduvaꞌa, túvi ndo? ¿Ta unku na táxi ndee ndaꞌa na ndíkun sata mií ndo ya táva na tachi nduvaꞌa? Vaxi iin kivi ta na ndíkun sata mií ndo ku na taxi kuachi xaꞌa ndo. 20Ta yeꞌe, xaꞌa ya kúu mií i ndee Ndioxi, yakan vaꞌa táva i tachi nduvaꞌa, ya yóꞌó kua sínaꞌa teꞌe nuu ndo ya xa ti̱ndaa ya xáꞌnda chiñu Ndioxi nuu ndo ―káchi Jesús xiꞌin na.
21Saa ndi̱kaꞌan ka ra xiꞌin na, káchi ra saa:
―Kiti nǎꞌa, kiti kánuu nuu ndiꞌi tachi nduvaꞌa tá káa iin taa ra ndee ni, saa káa ri. Chi iin taa ra ndee ni ta ndáa ni ra veꞌe ra ya ná kïꞌvi na veꞌe ra. 22Sundi tá ná kixi inka ra ndee vaꞌa ka nuu ra ikán, ta kindaa ndiꞌi ra ñaꞌa ra ndaꞌa ra ya ndáa ni ini ra, ta nditaꞌvi ra ya xiꞌin nda taꞌan ra. Saa yeꞌe, tá káa taa ra ndee vaꞌa ikán saa káa i, chi ndee ni ka yeꞌe nuu kiti nǎꞌa. Xa̱a i ñuu ivi yóꞌó kándaa ndiꞌi i ñaꞌa ndaꞌa ri ―káchi Jesús xiꞌin na.
23Ñaa ndi̱kaꞌan ka ra xiꞌin na, káchi ra saa:
―Ndá na köo xíin kuꞌun ndee i ta na íyo kuachi xiꞌin i ku na. Saa na xïin sikee xiꞌin i, ta na síndiꞌi xaꞌa chiñu va i ku na ―káchi Jesús.
Tachi nduvaꞌa ya ndíko koo tuku nuu ke̱e ya
(Mt. 12:43-45)
24Saa ndi̱kaꞌan ka Jesús, káchi ra saa:
―Ná ndituꞌun i xiꞌin ndo unkua ndóꞌo naꞌa na kúu mií tachi nduvaꞌa, ta unkua íkan ya xiꞌin na kivi síndoo ñaꞌa ya. Tá kivi kéta ya köo ka ya íyo xiꞌin na, ta saa xáa ya xíka nuu mií ya nuu köo nda iin naꞌa. Xíka ya ndúku ya nuu ndikundee ya. Ta köo ndítaꞌan ya nuu ndikundee ya, saa káꞌan ya: “Vaꞌa ka ná ndiko koo yo kuꞌun yo ini naꞌa nuu ke̱e yo”, káchi ya. 25Ñaa ndíko koo tuku ya xáa ya nuu ke̱e ya. Ta saa xíto ya íyo ndii ini na, tá káa ini veꞌe nuu tíꞌvi saa káa ini na. 26Ñaa kuaꞌan ya ndúku ya uxa ka nuu tachi nduvaꞌa ya kini vaꞌa ka. Saa kuakiꞌvi ndiꞌi ya íyo ya xiꞌin na. Ta saa kua ndixa ni ka tíxuꞌvi na íkan ya, saa chi ya núnu̱ú ta iindaa va ku ya ndi̱xiyo xiꞌin na ta sindiꞌi kuaꞌa ni kua yakan tíxuꞌvi ni na íkan ya ―káchi Jesús.
Na ndixa vaꞌa ni kée
27Saa ku̱u tá si̱ndiꞌi Jesús ndi̱kaꞌan ra ta iin ñaꞌa yá xi̱ni soꞌo tuꞌun ndi̱kaꞌan ra, ke̱ta yá tañu ndiꞌi na ndóo ikán, xa̱á yá káꞌan yá xiꞌin ra káchi yá saa:
―¡Vaꞌa ni kée nana un yá si̱kaku yóꞌo̱, saa si̱kuaꞌnu yá yóꞌo̱! ―káchi yá ikán xiꞌin ra.
28Ta saa ndi̱kuiin ra káchi ra saa:
―Süvi saa íyo ya. Vaꞌa ni ka kée na xíni soꞌo tuꞌun Ndioxi ta xáa súvi na ya káꞌan ya ―káchi ra xiꞌin yá.
Na köo xíin kandixa Jesús ndúku na yatuꞌun nuu ra
(Mt. 12:38-42; Mr. 8:12)
29Saa kúu ta kuaꞌa ni naꞌa ndíkitaꞌan xáa na nuu Jesús: Ta saa xa̱á ra káꞌan ra xiꞌin na, káchi ra saa:
―¡Ndikuu ni ini na ndóo ñuu ivi tiempo vitin! Chi ndúku na seña nuu i ya kúni na koto ndoso na yeꞌe. Sundi nda iin ya sïnaꞌa i nuu na, ndá taꞌan ya ndo̱ꞌo ra Jonás xinaꞌa va kuni na. 30Chi ra Jonás ra ndi̱kaꞌan tuꞌun yuꞌu Ndioxi xinaꞌa, ku̱u ra iin seña nuu na väꞌa xi̱ndoo ñuu Nínive, saa kua kundoꞌo yeꞌe ra kúu Taa ra xa̱a ñuu ivi yóꞌó. 31Kivi sindiꞌi tá ná xaa nani Ndioxi kuachi xiꞌin na ñuu ivi yóꞌó, ta ndikuita yá reina yá ke̱e chí sur taxi yá kuachi xaꞌa na ndóo tiempo vitin, chi tá xi̱ni soꞌo yá tuꞌun xaꞌa ya ndíchi ni kúu mií ra rey Salomón ta yáꞌa ni kâni ke̱e yá ndi̱xaꞌan ya xi̱ni soꞌo yá ya ndi̱kaꞌan ra, ta yeꞌe xa̱a íin xiꞌin ndo vitin ta yáꞌa ni ka kaꞌnu yeꞌe nuu ra rey Salomón. 32Saa ikan tu na ñuu Nínive va xiꞌin ndo, ndíkuita na taxi na kuachi xaꞌa ndo, chi tá xi̱ni soꞌo na ya ndi̱kaꞌan ndoso ra Jonás xiꞌin na, ta ndi̱ko koo ini na xaꞌa kuachi na nuu Ndioxi, ta ná kundaa ini ndo chi kaꞌnu ni ka yeꞌe xa̱a íin xiꞌin ndo vitin nuu ra Jonás ikán ―káchi Jesús xiꞌin na.
Tá káa ñu̱ꞌu̱ yéꞌe̱ saa íyo nduchi nuu ndo
(Mt. 5:15; 6:22-23)
33Saa ndi̱kaꞌan ka Jesús xiꞌin na, káchi ra saa:
―Nda iin na ndíkaꞌmi ñu̱ꞌu̱ ta köo chíkaa sêꞌe na ya, ni köo ndíkasi na nuu ya xiꞌin yaxin, sundi chínuu sukun na ya, ya ná sindiyeꞌe ya nuu ndiꞌi na kuakiꞌvi ini veꞌe. 34Tá káa ñu̱ꞌu̱ túun yo saa íin nduchi nuu yo, chi nduchi nuu yo kua síndiyeꞌe ndiꞌi ikin kuñu yo. Tá íyo vaꞌa nduchi nuu yo, ta saa íyo vaꞌa ndiꞌi ikin kuñu yo. Tá káa ya yéꞌe̱ saa káa ndiꞌi ya, sundi tá tu väꞌa nduchi nuu un, ta tá káa nuu naá, saa íin ndiꞌi ikin kuñu un. 35Xaꞌa ya ñaa kua xaa kuenta vaꞌa un xiꞌin mií un, koto ndoso un mií un án ndixa kua xíka un nuu yéꞌe̱ süvi ka vi ya kaka un nuu naá. 36Saa chi tá tu xíka un nuu yéꞌe̱ ta yéꞌe̱ ndiꞌi ni kúu ikin kuñu un köo ka ya naá ini un. Tá káa ñu̱ꞌu̱ túun na ta iin síndiyeꞌe ndaa ndiꞌi ya ini veꞌe saa káa ini un ―káchi xiꞌin na.
Táxi Jesús kuachi xaꞌa nda fariseo xiꞌin nda sínaꞌa ya ta̱a ra Moisés
(Mt. 23:1-36; Mr. 12:38-40; Lc. 20:45-47)
37Tá si̱ndiꞌi Jesús ndi̱kaꞌan ra, ta ke̱ta iin ra fariseo ndi̱kaꞌan ra xiꞌin ra ya kuꞌun ra xiꞌin ra veꞌe ra kuxi ra. Ta saa ke̱e Jesús kuaꞌan ra xiꞌin ra, ndi̱xaa ra ndi̱kunduꞌu koo ra yuꞌu mesa veꞌe ra fariseo ikán. 38Ñaa xi̱ni ra fariseo ikán ya köo ndi̱kata Jesús ndaꞌa ra kuxi ra, tá kuꞌva íyo ya si̱ndoo xii na xinaꞌa. Ta saa ndi̱kanda ini ra xíto ra nuu Jesús. 39Saa ndi̱kaꞌan Jesús xiꞌin ra, káchi ra saa:
―Ndóꞌo̱ fariseo, tá íin koꞌo xiꞌin vaso ya ndíkata ndo sata, saa íin ndo, chi sata va ndo vaꞌa ni náꞌa, sundi ini ndo ta iin chútu ndaa ya kuiꞌna xiꞌin ya väꞌa. 40¡Ndachu kíꞌvi ni ndo! ¿Án su Ndioxi ku ra si̱kuaꞌa nima yo saa si̱kuaꞌa tu ra sata va yo? 41Saa ndóꞌo̱, tá chíndee ndo na ndaꞌvi ta ndinuꞌu ini ndo taxi ndo ñaꞌa ndo ndaꞌa na. Ta saa kua kindoo vaꞌa ndo nuu Ndioxi.
42Sundi ndaꞌvi ni ndóꞌo̱ fariseo, Saa chi ni táꞌvi taꞌan ndo tá uxi uxi koꞌndo iva vali chíꞌi ndo, ta táva ndo iin koꞌndo tañu iin iin ya táxi ndo ndaꞌa Ndioxi. Ni vaꞌa ni ndítaxi ndo ya ndaꞌa Ndioxi. Sundi köo íkan ndo ya ndaa ta ni köo kúꞌvi ini ndo xíni ndo Ndioxi. Ya yóꞌó ka kua ndee ni xíniñuꞌu ndo xaa súvi ndo, ni táxi va ndo ñaꞌa ndo ndaꞌa Ndioxi.
43’¡Ndaꞌvi ni ndóꞌo̱ fariseo, chi vaxi kivi ta ndoꞌo ni ndo! Saa chi tá kuaꞌan ndo veꞌe ñuꞌu sinagoga ta nina tai nuu ndóo na kúu mií chiñu ndee kútoo ndo kundoo ndo. Saa tu tá xíka ndo kuaꞌan ndo ichí va, kúni ndo ná xaa toꞌo ndiꞌi naꞌa ndóꞌo̱.
44’¡Ndaꞌvi ni ndóꞌo̱ sínaꞌa ley ya ta̱a ra Moisés xiꞌin ndóꞌo̱ fariseo, ndóꞌo̱ uvi yuꞌu ku ndo!, chi tá káa nuu ndúxin ndìì, saa íin ndo, chi köo náꞌa sata ya yáꞌa naꞌa xáñu na sata ya, sundi chí ini ya maa ta kini ni káa, táꞌi kuñu ini ya ―káchi Jesús xiꞌin nda fariseo.
45Ta saa ndi̱kuiin iin ra maestro ra sínaꞌa ley ya ta̱a ra Moisés, káchi ra saa:
―Tata Maestro, nda ndeꞌe kánaꞌa un xaꞌa xiꞌin tuꞌun ya káꞌan un xiꞌin nda fariseo yóꞌó ―káchi ra.
46Saa ndi̱kuiin Jesús, káꞌan ra:
―Saa íin tu ndóꞌo̱ maestro, ndóꞌo̱ sínaꞌa ley ya ta̱a ra Moisés va. ¡Ndoꞌo ni tu ndóꞌo̱ va! Saa chi sínaꞌa ndo naꞌa ya ná xaa nduvi ndiꞌi na ley Ndioxi. Tá íkan iin taa ra síkuiso vee ni naꞌa, ta nda loꞌo köo chíndee taꞌan ra xiꞌin na, saa íkan ndo ―káchi Jesús xiꞌin ra maestro ikán.
47Ta saa ndi̱kaꞌan ka ra xiꞌin nda, káchi ra saa:
―¡Ndaꞌvi ni ndóꞌo̱ sínaꞌa ley Ndioxi, chi iin kivi ndoꞌo ni ndo! Chi ndása luvi ni ndo nuu ndi̱nduxin nda ndi̱kaꞌan ndoso tuꞌun yuꞌu Ndioxi xinaꞌa, nda xa̱ꞌni xii sikua ndo. 48Xiꞌin ya íkan ndo ñaa sínaꞌa ndo mií ndo iin yuꞌu ku ndo xiꞌin xii sikua ndo, chi na ikán ku na xa̱ꞌni nda ndi̱kaꞌan ndoso tuꞌun yuꞌu Ndioxi xinaꞌa, ta vitin ndása vaꞌa ndo nuu ndi̱nduxin nda. 49Yakan kua ndi̱kaꞌan Ndioxi tuꞌun ndíchi xaꞌa ndo, káchi ra saa: “Tiꞌvi i nda káꞌan ndoso tuꞌun yuꞌu i kuꞌun nda kaꞌan ndoso nda tuꞌun i xiꞌin na Israel. Tiꞌvi i nda ndi̱kaxin i xíka chiñu nuu i kuꞌun nda ndituꞌun nda xiꞌin na, ta sava nda kaꞌni ñaꞌa na, inka nda xaa nduvaꞌa ni na xiꞌin nda”, káchi Ndioxi xaꞌa ndo. 50Xaꞌa ya ñaa kua taxi Ndioxi kuachi xaꞌa ndo nduku ra cuenta nuu ndo xaꞌa ndiꞌi nda ndi̱kaꞌan ndoso tuꞌun yuꞌu ra, nda xa̱ꞌni xii sikua ndo nda kivi xi̱koo ñuu ivi yóꞌó. 51Ta nda xaꞌa ra Abel, ra vaꞌa ra ndi̱xiꞌi i̱kan ñani ra, xiꞌin inka ra Zacarías, ra ndi̱kaꞌan ndoso tuꞌun yuꞌu Ndioxi xinaꞌa, ra xa̱ꞌni xii sikua ndo maꞌñu cuarto i̱í xiꞌin nuu xáꞌni na kiti nuu Ndioxi. Ikán ku nuu xa̱ꞌni xii sikua ndo ra. Ta nduku Ndioxi cuenta nuu ndo xaꞌa ra ikán xiꞌin ndiꞌi ka nda ndi̱kaꞌan ndoso tuꞌun yuꞌu ra, saa chi ndóꞌo̱, tá ndi̱xiyo xii sikua ndo, saa íin ndo.
52’Ta ¡ndaꞌvi ni ndóꞌo̱ sínaꞌa ya ta̱a ra Moisés! Chi ndoꞌo ni ndo iin kivi ikan Ndioxi, saa chi tá íkan iin ra tíseꞌe llave saa íkan ndo, köo sínaꞌa teꞌe ndo tuꞌun Ndioxi nuu naꞌa na kúni kuꞌun ichí ra, ta ni mií ndo kuäꞌan ichí ra ―káchi Jesús xiꞌin nda sínaꞌa ley Ndioxi.
53Ta saa ke̱ta ra kuaꞌan ra, ñaa ndi̱saa ni nda fariseo xiꞌin nda maestro nda sínaꞌa ya ta̱a ra Moisés, ñaa xa̱á nda kéꞌe ka nda ra, 54ya kúni nda kaꞌan ra ndá ka tuꞌun väꞌa, ta saa kuchiñu nda taxi nda kuachi xaꞌa ra nuu na chiñu.
Valgt i Øjeblikket:
San Lucas 11: xta
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Active: ©Wycliffe Bible Translators, Inc. All rights reserved.