San Lucas 13
13
Xíniñuꞌu yo ndiko koo ini yo xaꞌa kuꞌva íyo yo
1Mi tiempo ikán ke̱e sava naꞌa kuaꞌan na ndi̱xaa na nuu Jesús. Saa xa̱á na káꞌan na xiꞌin ra, káchi na saa:
―Sava na estado Galilea ndi̱xaa na veꞌe ñuꞌu kaꞌnu ya ndíkaa ñuu Jerusalén xáꞌni na kiti sana na sóko na nuu Ndioxi. Saa ti̱ꞌvi ra gobernador Pilato nda lapa ndi̱xaꞌan nda xa̱ꞌni nda na ikán, ñaa ndikoyo nií na xiꞌin nií kiti ndi̱saka nuu rá ―káchi na ikán xiꞌin Jesús.
2Saa ndi̱kuiin Jesús káꞌan ra xiꞌin na, káchi ra saa:
―¿Ta unkua ndíkani ini ndóꞌo̱? ¿Án ndo̱ꞌo na saa chi ndee ni ka kuachi na ikán nuu ndóꞌo̱, túvi ndo? 3Süvi ya ndaa kua. Nda ni mií ndo ta saa kundoꞌo tu ndóꞌo̱ va ndiꞌi xaꞌa ndo tá tu köo xíin ndo ndiko koo ini ndo xaꞌa kuachi ndo. 4Tá kúu na xaꞌun uni ndi̱xiꞌi tá ndi̱kava torre ya Siloé, ¿án kini ni ka na ikán nuu inka na ndóo ñuu Jerusalén túvi ndo? 5Süvi ya ndaa kua. Nda ni mií ndo, ta saa kundoꞌo ndo ndiꞌi xaꞌa ndo tá tu köo xíin ndo ndiko koo ini ndo xaꞌa kuachi ndo ―káchi Jesús xiꞌin na.
Tuꞌun ndíchi xaꞌa itun köo kúun kuiꞌi ndaꞌa
6Ñaa xa̱á ra ndítuꞌun ra iin tuꞌun ndíchi xiꞌin na, káchi ra saa:
―Saa ndo̱ꞌo iin taa xiꞌin iin itun higo íyo tañu teꞌe uva ra íyo nuu ñuꞌú ra. Ñaa ndi̱xaꞌan ra xíto ra ndaꞌa nu án xa íyo loꞌo kiti higo ndaꞌa nu. Ta nda iin kuiꞌi köo ndi̱niꞌi ra ndaꞌa nu. 7Ta saa ndi̱kaꞌan ra xiꞌin ra ndáa corra ra, káchi ra saa: “Xa uni kuiya kua kíxi i xíto i itun higo yóꞌó ta ni köo mií kuiꞌi kúun ndaꞌa nu. Vaꞌa ka kaꞌnda un nu, ya uun kuiti ndíchi nu ndási nu nuu ñuꞌú i”, káchi ra. 8Saa ndi̱kuiin ra moso ndáa corra ikán káchi ra saa: “Vaꞌa ná ndoo naꞌa nu siin kuiya vitin, ta ndasa vita i ñuꞌú xaꞌa nu tin chikaa i bono xaꞌa nu, 9án sana kana kuiꞌi ndaꞌa nu. Tá tu köo kuiꞌi ndi̱taxi nu, ta saa kaꞌnda i nu”, káchi ra. Soꞌva káchi tuꞌun ndíchi yóꞌó ―káchi Jesús xiꞌin na.
Síndaꞌa Jesús iin ñaꞌa kivi ndíkundee na
10Iin kivi ndíkundee na ke̱e Jesús kuaꞌan ra veꞌe ñuꞌu sinagoga sínaꞌa ra naꞌa. 11Saa ndíkaa iin yá kúꞌvi ini veꞌe ñuꞌu ikán. Xa ndi̱xinu xaꞌun uni kuiya kúu mií yá tachi nduvaꞌa. Ta xa̱a toso ñaꞌa ya, ni köo kúvi ka ndundaku sata yá. 12Tá xi̱ni Jesús yá, ta saa ka̱na ra yá ndi̱kaꞌan ra xiꞌin yá, káchi ra saa:
―Nana, xa ndu̱vaꞌa un xiꞌin kueꞌe ya ndóꞌo un, xa ndi̱saña un ndaꞌa ya ―káchi ra xiꞌin yá.
13Ta saa chi̱nuu ndaꞌa ra sata yá. Tá chi̱nuu soꞌva ra ndaꞌa ra, ñaa ndikun ndu̱ndaku sata yá. Saa xa̱á yá xáa kaꞌnu yá Ndioxi. 14Saa ndi̱saa ni mií ra ndáa chiñu xiꞌin veꞌe ñuꞌu sinagoga ikán. Chi si̱ndaꞌa Jesús yá ñaꞌa ikán kivi ndíkundee na. Ñaa ndi̱kaꞌan ra xiꞌin na, káchi ra saa:
― Íyo iñu kivi ya xaa chiñu yo, yakan köo xíniñuꞌu ndo kixi ndo sindaꞌa ra ndóꞌo̱ kivi ndíkundee yo ―káchi ra xiꞌin na.
15Saa ndi̱kuiin Tata yo Jesús káꞌan ra saa, káchi ra saa:
―Ndóꞌo̱ uvi yuꞌu ku ndo, nda, ni mií ndo ta xáꞌan ndo ndáxin ndo sindiki sana ndo xiꞌin burru sana ndo xíꞌi ri tikuii kivi ndíkundee yo. 16Ta saa íkan i xiꞌin yá yóꞌó, chi seꞌe sikua ra Abraham ku yá ta xa ndi̱xinu xaꞌun uni kuiya kúu mií yá tachi nduvaꞌa. ¿Án chïndee yo yá ndaxin yá kivi ndíkundee yo? ―káchi ra xiꞌin nda.
17Tá ndi̱kaꞌan ra saa ta ku̱kaꞌan ni nuu nda sáa ini xíni ñaꞌa. Sundi ndiꞌi ka naꞌa ta kúsini ni na xiꞌin ra xaꞌa ñaꞌa ya ndee ni vaꞌa íkan ra.
Tuꞌun ndíchi xaꞌa ndikin itun mostaza
(Mt. 13:31-32; Mr. 4:30-32)
18Saa ndi̱kaꞌan ka Jesús xiꞌin na káchi ra saa:
―Ná ndituꞌun i xiꞌin ndo ndá kuꞌva íyo ichí nuu xáꞌnda chiñu Ndioxi, ta ndá ñaꞌa kua vaꞌa kuniñuꞌu yo ya ndikani yo ya. 19Tá íin ndikin itun náni mostaza chíꞌi iin ra taa nuu ñuꞌú ra, saa káa ya. Chi vali ni ndikin ikán tá chíꞌi ra ya nuu ñuꞌú ra, sundi tá ndúta ya ta iin itun naꞌnu ndúu nu. Saa vaxi sàà kíxi ri, síkuaꞌa ri chiꞌyo ri ndaꞌa nu ―káchi Jesús.
Tuꞌun ndíchi xaꞌa uxan iya ya sínañu uxan xita vaꞌa
(Mt. 13:33)
20Saa ndi̱kaꞌan tu ra káchi ra saa:
―Kúni i kaꞌan tuku i inka tuꞌun ndíchi xiꞌin ndo ya sinaꞌa i ndóꞌo̱ kundaa ini ndo ndá kuꞌva káa ichí nuu xáꞌnda chiñu Ndioxi ―káchi ra.
21Saa xa̱á ra káꞌan ra, káchi ra saa:
―Tá káa uxan iya ya sákanuu iin ñaꞌa xiꞌin uxan xita vaꞌa, ndítaꞌvi yá ya ndúu ya uni koꞌndo saa tíseꞌe yá ya. Ta saa káa ichí nuu xáꞌnda chiñu Ndioxi. Vani loꞌo ni uxan iyá táan yá xiꞌin uni koꞌndo naꞌnu ta ndee ni sínañu ñaꞌa ya ―káchi Jesús xiꞌin na.
Táñú ni yéꞌé nuu kiꞌvi na koo na xiꞌin Ndioxi
(Mt. 7:13-14,21-23)
22Tá kuaꞌan Jesús ñuu Jerusalén ta ndiꞌi ni kúu ñuu nuu yáꞌa ra kuaꞌan ra sínaꞌa ra naꞌa ñuu naꞌnu tin ñuu vali. 23Tá kuaꞌan ra ta ndi̱ndakan tuꞌun ñaꞌa iin ra taa káchi ra saa:
―Tata, ¿án loꞌo ni va ku naꞌa na sikaku Ndioxi? ―káchi ra ikán.
Saa ndi̱kuiin Jesús káꞌan ra:
24―Xaꞌa ni ndo ndee ya kiꞌvi ndo yéꞌé ya táñú ni ya kuaꞌan nuu íyo Ndioxi, chi kuaꞌa ni naꞌa kúni kiꞌvi ta küchiñu na kiꞌvi na. 25Kiꞌvi ndo tá núna yéꞌé ra vitin, saa chi vaxi kivi ta ndikundichi mií ra xíin veꞌe ikán ndikasi ra ya. Ta saa ndinuni kuaku ndaꞌvi ndo kundita ndo yéꞌé ra kaꞌan ndo xiꞌin ra: “Tata, kuna yéꞌé nuu nde”, kachi ndo xiꞌin ra. Ñaa kaꞌan ra xiꞌin ndo, kachi ra saa: “Köo xíni i mií chí ke̱e ndo”, kachi ra xiꞌin ndo. 26Saa xáa ndo kaꞌan ndo xiꞌin ra: “Tata, xíni va nde yóꞌo̱, xi̱xi nde xiꞌin un, saa ndi̱xaa un ñuu nde si̱naꞌa un ndeꞌe”, kachi ndo xiꞌin ra. 27Ta saa ndikuiin ra kaꞌan ra xiꞌin ndo: “Xa ndi̱kaꞌan i xiꞌin ndo köo xíni i mií chí ke̱e ndo. Kuátaꞌa ndo yéꞌé i chi süvi ndóꞌo̱ vaꞌa ku ndo”, kachi ra xiꞌin ndo. 28Ta kuaku ni ndo ndakua kaxi nuꞌu ndo, chi kuni ndo ra Abraham xiꞌin ra Isaac tin ra Jacob xiꞌin ndiꞌi nda ndi̱kaꞌan ndoso tuꞌun yuꞌu Ndioxi xinaꞌa. Kuni ndo nda íyo nda xiꞌin Ndioxi nuu xáꞌnda chiñu ra, ta ndóꞌo̱ küchiñu ka ndo kiꞌvi ndo. 29Ta kixi ndiꞌi naꞌa ndiꞌi ni kúu ñaꞌñu, kumi saa tutun ñuu ivi kixi na ndikundoo na kuxi na nuu mesa nuu xáꞌnda chiñu Ndioxi. 30Ta kiꞌin ndo kuenta chi kuaꞌa ni na sindiꞌi nduu na núnuu, ta na núnuu nduu na kundikun nda sindiꞌi ―káchi Jesús xiꞌin na.
Xáku Jesús xaꞌa na ñuu Jerusalén
(Mt. 23:37-39)
31Saa ku̱u mi kivi ikán ta ndi̱xaa tu sava nda fariseo va káꞌan nda xiꞌin Jesús, káchi nda saa:
―Vaꞌa ka kee un kuꞌun un inka ñuu, köo ka un yóꞌó chi ra rey Herodes ta kúni ra kaꞌni ra yóꞌo̱ ―káchi nda xiꞌin ra.
32Saa ndi̱kuiin Jesús káꞌan ra:
―Kuáꞌan ndo kaꞌan ndo xiꞌin ikuii ñaa. Soꞌva káꞌan i kachi ndo xiꞌin ra: “Kivi vitin xiꞌin kivi taan kaka i sindaꞌa i na kúu mi tachi nduvaꞌa xiꞌin na kúꞌvi, ta kivi uni sindiꞌi i ikan i chiñu i”. 33Sundi vitin xiꞌin taan tin isa xíniñuꞌu i kaka i xaa chiñu i, ta saa xaa i ñuu Jerusalén. Chi väꞌa kéta ya kaꞌni na iin ra káꞌan ndoso tuꞌun yuꞌu Ndioxi inka ñuu ―káchi Jesús xiꞌin nda fariseo.
34Saa xa̱á ra káꞌan ra:
―¡Ndóꞌo̱ na ñuu Jerusalén!, ndóꞌo̱ ku ndo xáꞌni nda káꞌan ndoso tuꞌun yuꞌu Ndioxi, ta kóꞌni ndo yu̱ú sata nda tíꞌvi Ndioxi vaxi chindee ndóꞌo̱. Kuaꞌa ni ichí ku̱ni i sikitaꞌan i ndóꞌo̱, tá íkan nduxi tiatan xiꞌin seꞌe vali ri, síkitaꞌan ri na tixin ri, ta köo ndi̱xiin ndo. 35Yakan vitin ta sindikoo ndaꞌa Ndioxi veꞌe ndo. Ta ndóꞌo̱ küni xiꞌin nuu ka ndo yeꞌe, tá tu kuni ndo yeꞌe ta nda ná kaꞌan ndo: “Ná taxi Ndioxi ya vaꞌa ndaꞌa ra xáa chiñu nuu ra”, kachi ndo. Nda kivi ikán ku nuu kuni ndo yeꞌe ―káchi Jesús xiꞌin na ñuu Jerusalén.
Valgt i Øjeblikket:
San Lucas 13: xta
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Active: ©Wycliffe Bible Translators, Inc. All rights reserved.