San Lucas 8
8
Ná ñaꞌa ná chíndee taꞌan xiꞌin Jesús
1Sindiꞌi ikán ke̱e Jesús kuaꞌan ra iin iin ñuu naꞌnu tin ñuu vali, kuaꞌan ra ndítuꞌun ra xiꞌin na, káꞌan ndoso ra tuꞌun vaꞌa xaꞌa kuꞌva xáꞌnda chiñu Ndioxi. Ta kuaꞌan uxi uvi saa nda ítaꞌan xiꞌin ra. 2Ta saa kuaꞌan ka sava ná ñaꞌa xiꞌin ra. Ta sava ná ndee ni ndo̱ꞌo ná ta si̱ndaꞌa ra ná, ta sava ná ku̱u mií tachi kiti nǎꞌa ta ta̱va ra ri mií ná. Uxa nuu tachi nduvaꞌa ku̱u mií iin yá náni María yá ñuu Magdala, 3inka yá náni Juana, yá síꞌi ra Chuza, ra ndáa chiñu veꞌe chiñu ra rey Herodes. Inka yá náni Susana, ta kuaꞌa ni ka ku ná kuaꞌan xiꞌin Jesús. Ta ná síꞌi ikán chi̱ndee ñaꞌa ná xiꞌin xuꞌun, ta̱xi ná ya ndaꞌa ra ya kuniñuꞌu ra xiꞌin nda ítaꞌan xiꞌin ra.
Tuꞌun ndíchi xaꞌa ra chíꞌi
(Mt. 13:1-15; Mr. 4:1-20)
4Ta ndiꞌi ni kúu ñuu ka̱na koo na, kuaꞌa ni ku na ndi̱kitaꞌan kuaꞌan na koto na Jesús. Saa ndi̱kaꞌan ra tuꞌun ndíchi xiꞌin na ya sínaꞌa ra na, káchi ra saa:
5―Saa ndo̱ꞌo iin ra chíꞌi trigo xa̱á ra xáta yava ra siꞌva trigo. Ta sava ri ndi̱koyo ichí ta ndi̱xañu ndoso na ri, saa xa̱a sàà ta xa̱xi ñaꞌa ri. 6Sava siꞌva ndi̱koyo sata yu̱ú nuu ndóso loꞌo ñuꞌú, ta loꞌo xa̱ꞌnu ya kama ni ndi̱ndichi ya ndi̱ꞌi xaꞌa ya, chi köo kóꞌyo ñuꞌú xaꞌa ya. 7Ta sava kiti siꞌva ndi̱koyo nuu íyo ndikin iñú ta iin káchi ndi̱nduta ya xiꞌin taꞌan ya ta köo ndi̱kuvi kuaꞌnu ya saa chi si̱nduxin ñaꞌa iñú. 8Ta sava siꞌva ndi̱koyo nuu ñuꞌú vaꞌa. Ta xa̱ꞌnu vaꞌa ya kuaꞌa ni nuni ya ka̱na, sava ya ndi̱xiyo nda iin ciento nuni sata ―káchi Jesús xiꞌin na.
Ta saa ndee ni nda̱niꞌi ra tuꞌun ra ta ndi̱kaꞌan ra xiꞌin na, káchi ra saa:
―Unku ndóꞌo̱ íyo soꞌo, ta kuni soꞌo ndo unkua káchi tuꞌun ndíchi yóꞌó ―káchi ra xiꞌin na.
9Saa ndi̱ndakan tuꞌun ñaꞌa nda ítaꞌan xiꞌin ra, káchi nda saa:
―¿Unkua kúni kachi tuꞌun ndíchi ya ndi̱kaꞌan un? ―káchi nda xiꞌin ra.
10Ñaa ndi̱kuiin Jesús ndi̱kaꞌan ra xiꞌin nda, káchi ra saa:
―Ndioxi táxi ra kundaa ini ndo ya sêꞌe ndá kuꞌva xáꞌnda chiñu ra. Ta inka na ta xiꞌin tuꞌun ndíchi káꞌan i xiꞌin na, yakan ni xíto na tin xíni soꞌo na ta ni köo xíin na kundaa ini na ―káchi Jesús xiꞌin nda.
Jesús ndíkani ra tuꞌun ndíchi xaꞌa ra chíꞌi
(Mt. 13:18-23)
11Ta soꞌva káchi tuꞌun ndíchi yóꞌó:
―Siꞌva ri ndi̱xita yava ikán ku tuꞌun Ndioxi. 12Ta siꞌva ri ndi̱koyo yuꞌu ichí ku na xíni soꞌo tuꞌun Ndioxi, ta vaxi kiti nǎꞌa táva ri tuꞌun Ndioxi nima na ya ná kändixa na tuꞌun ra ya sikaku ra na. 13Ta siꞌva ri ndi̱koyo nuu yu̱ú ku na xíni soꞌo tuꞌun Ndioxi, ta ndíkiꞌin vaꞌa na ya, kúsini ni na xiꞌin ya, sundi täꞌan tiin vaꞌa ya nima na. Ta saa vaxi ya xíto ndoso ñaꞌa, vaxi ya tíxuꞌvi na, ta síndikoo na ichí Ndioxi. 14Ta siꞌva ri ndi̱koyo nuu iñú ku na xíni soꞌo tuꞌun Ndioxi, ta saa loloꞌo vaxi ya síndiꞌi ini na, án ndíꞌi ini na xíka ini na xaꞌa ya kuika, án táa ini na íkan na ya kúsini na, ta köo íkan ka na ya vaꞌa tá íin itun táxi kuiꞌi vaꞌa. 15Ta siꞌva ri ndi̱koyo nuu ñuꞌú vaꞌa ku na kúu mií nima vaꞌa, ndâku ni ini na chívaꞌa na tuꞌun xíni soꞌo na nima na, ta köo ndíko koo ini na ya kuaꞌan na ichí ra, tá íin kuiꞌi vaꞌa ni kána, saa íin na ikán ―káchi Jesús xiꞌin nda ítaꞌan xiꞌin ra.
Tuꞌun ndíchi xaꞌa lámpara
(Mr. 4:21-25)
16Ta saa ndi̱kaꞌan ka Jesús, káchi ra saa:
―Nda iin na ndítuun ñu̱ꞌu̱ ta köo ndi̱kasi na nuu ya xiꞌin yaxin, ni köo chíkaa na ya tixin xi̱to. Sundi chínuu na ya nuu sukun ya síndiyeꞌe ya ndiꞌi ini veꞌe. 17Saa kúndaa ini yo, ndiꞌi ñaꞌa ya íyo sêꞌe vitin ta nduxa ndituvi ndiꞌi ya kuni inka naꞌa. Saa chi tindaa iin kivi ta ndiꞌi na kundaa ini na xaꞌa ya íyo sêꞌe.
18’Ta kuenta ni koo ndo xaꞌa ñaꞌa ya xíni soꞌo ndo. Saa chi íyo naꞌa ta loꞌo ni kúndaa ini na ichí Ndioxi, sundi mií ra ku ra taxi ka ya kundaa ini na. Ta íyo sava na köo xíin kundaa ini xaꞌa ichí ra, ta nda ya loꞌo kúndaa ini na xaꞌa ra, túvi na, kindaa ndiꞌi ra ya ndaꞌa na ―káchi Jesús xiꞌin nda ítaꞌan xiꞌin ra.
Siꞌí Jesús xiꞌin nda ñani ra
(Mt. 12:46-50; Mr. 3:31-35)
19Iin kivi xa̱a siꞌí Jesús xiꞌin nda ñani ra ndúku ñaꞌa na, ta ni küvi tindaa na nuu íin ra, saa chi chútu ndaa naꞌa. 20Saa ndi̱xaꞌan iin ra ndi̱tuꞌun ra xiꞌin Jesús, káchi ra saa:
―Tata, keꞌe yóꞌó íin nana un xiꞌin nda ñani un, ta kúni na kaꞌan na xiꞌin un ―káchi ra.
21Ta saa ndi̱kuiin Jesús, káchi ra saa:
―Siꞌí i xiꞌin ñani i ku ndiꞌi na xíni soꞌo tuꞌun Ndioxi ta xáa súvi na ya káꞌan ya ―káchi ra xiꞌin ra ikán.
Síyaa Jesús tachi íꞌná xiꞌin nduta tikuii
(Mt. 8:23-27; Mr. 4:35-41)
22Saa ku̱u iin kivi ndi̱keta Jesús ini iin barco xiꞌin nda ítaꞌan xiꞌin ra. Ta ndi̱kaꞌan ra xiꞌin nda, káchi ra saa:
―Ná koꞌyo inka ñaꞌñu yuꞌu nduta ñûꞌu ―káchi ra xiꞌin nda.
Saa ndi̱kiꞌin nda kuaꞌan nda. 23Tá kuaꞌan nda nuu nduta ñûꞌu ikán, ta ndi̱naa ini Jesús ndi̱kixi ra. Ñaa xaá ndinuni loꞌo xíka tachi, ta saa kuaꞌan chútu ndaa tikuii ini nu kúni ndikava nu kaꞌa tikuii ikán. 24Ta saa si̱ndikoo nda Jesús, ndi̱kaꞌan nda xiꞌin ra, káchi nda saa:
―¡Tata Maestro, Tata Maestro! ¡Ndikaxin ini un koto ka kuvi yo! ―káchi nda xiꞌin ra.
Saa ndi̱koo Jesús ndi̱kaꞌan ra xiꞌin tachi tin nduta tikuii. Ñaa si̱yaa tachi tin si̱yaa tu tikuii va. Iin yayaa ku̱u. 25Sindiꞌi ndi̱kaꞌan ra xiꞌin nda, káchi ra saa:
―¿Ndachu köo ndáa ini ndo Ndioxi ya sikaku ra yoo? ―káchi ra xiꞌin nda.
Ta saa ndi̱kanda ini nda íꞌvi ka vi nda ndóo nda, ñaa ndi̱ndakan tuꞌun taꞌan nda, káchi nda saa:
―¿Unku ra yóꞌó kua yakan vaꞌa xíni soꞌo tachi tin xíni soꞌo tu tikuii va tuꞌun káꞌan ra? ―káchi nda xiꞌin taꞌan nda.
Ra ñuu Gadara ra kúu mií tachi kiti nǎꞌa
(Mt. 8:28-34; Mr. 5:1-20)
26Saa ndi̱xaa nda xiꞌin barco inka ñaꞌñu yuꞌu nduta ñûꞌu ñuu Gadara ya xíto ndaa nuu ñuu Galilea. 27Saa ke̱ta Jesús ini nu, ñaa ndi̱taꞌan ra iin ra kúu mií tachi nduvaꞌa, tachi kiti nǎꞌa. Ta xa naꞌa ni kúu mií ra tachi nduvaꞌa xíka chala ra, ni köo tikoto ndíxi ra, ta ni köo íyo ra veꞌe, nina kava nuu ndúxin ndìì ndi̱xiyo ra. 28Ñaa tá xi̱ni ra Jesús ta ndi̱xaa ra si̱kusiti ra nuu ra, ndi̱ndaꞌi koꞌo ra, káchi ra saa:
―Tata, ¿unkua kúni un ikan un xiꞌin i? Chi yóꞌo̱ ku Jesús, Seꞌe Ndioxi ra kaꞌnu nuu i. Xáku ndaꞌvi ni i nuu un xäa nduvaꞌa un xiꞌin i ―káchi ra xiꞌin Jesús.
29Saa ndi̱kaꞌan ra ikán, chi Jesús ta xáꞌnda ra chiñu nuu tachi nduvaꞌa ya kee ya kuꞌun ya, chi xa naꞌa ni ichí níꞌi ñaꞌa ya. Ta ka̱tun na ra xiꞌin cadena ta nda iin ya köo ndi̱kan ya xiꞌin ra. Saa chi mií tachi nduvaꞌa ku ya ta̱xi ndee ndaꞌa ra xáꞌnda ra cadena ya kátun ñaꞌa na, ta kuaꞌa ni ichí ndi̱saña ra. Sava ichí xáa nduxa ya xiꞌin ra kuaꞌan ra xiꞌin ya iku yuyu. 30Ta saa ndi̱ndakan tuꞌun Jesús ra, káchi ra saa:
―¿Unkua náni un? ―káchi ra xiꞌin ra.
Saa ndi̱kuiin ra, káꞌan ra:
―Legión náni nde ―káchi ra.
Chi tuꞌun legión kúni kachi ya: kuaꞌa ni, saa chi ndixa ni kuaꞌa ku tachi nduvaꞌa tíin ñaꞌa.
31Ta saa xáku ndaꞌvi ya nuu Jesús, káchi ya saa:
―Täva un ndeꞌe kuꞌun nde yavi kaꞌnu ya köo íyo kaꞌa nuu tixuꞌvi ni nde ―káchi ya xiꞌin ra.
32Ta yati ñúꞌu iin tiꞌvi kini xíxi ri iin xiki. Saa xa̱ku ndaꞌvi tachi nduvaꞌa nuu Jesús ya taxi ra kuꞌun ya kiꞌvi ya ini kiti kini ikán. Saa ta̱xi ra ichí ndaꞌa ya kuaꞌan ya.
33Ta saa ke̱e ndiꞌi tachi nduvaꞌa ikán kuaꞌan ya ndi̱kee ya ini kiti kini ikán, saa xi̱nu ni ri, ñaa ndi̱koyo ndiꞌi ri ndika iku ikán ndi̱kee ri ini tikuii, saa ndi̱xiꞌi ndiꞌi ri.
34Saa xi̱ni na ndáa kini ikán unkua ndo̱ꞌo ri, ta ñaa ke̱e na xínu na kuaꞌan na ndítuꞌun na xiꞌin na ndóo ñuu tin na ndóo iku. 35Ta ke̱e na ñuu xínu na kuaꞌan na koto na ya ndo̱ꞌo kini xiꞌin ra kúu mií tachi nduvaꞌa ikán. Tá ndi̱xaa na xi̱ni na xa ndu̱vaꞌa ra, xa ndi̱kaxin teꞌe ini ra ndi̱kundixi ra tikoto ra íyo koo ra xaꞌa Jesús. Ta saa ndi̱ndiꞌvi ni na. 36Ta na xi̱ni ya ndo̱ꞌo ra ikán ndítuꞌun na xiꞌin inka na vaxi, unkua ku̱u ndu̱vaꞌa ra. 37Ta ndiꞌi na ñuu Gadara xiꞌin inka ka na ñuu vali ya ítaꞌan yati xiꞌin ya, ndi̱xikan na ya mani nuu Jesús ya ná keta ra ñuu na kuꞌun ra chi yáꞌa ni íꞌvi na.
Ta saa ndi̱kiꞌvi Jesús ini tun barco xiꞌin nda ítaꞌan xiꞌin ra ndi̱kiꞌin nda kuaꞌan nda.
38Saa ku̱ni ra ku̱u mií tachi ndu̱vaꞌa ikán kuꞌun ra xiꞌin Jesús, ñaa ndi̱kaꞌan ra xiꞌin Jesús, káchi ra saa:
―Tata, taxi un ná kuꞌun i xiꞌin un ―káchi ra xiꞌin ra.
Ta ndi̱kaꞌan Jesús xiꞌin ra, káchi ra saa:
39―Ndiko koo kuanuꞌu veꞌe un ndituꞌun un xiꞌin na taꞌan un unkua i̱kan Ndioxi xiꞌin un ―káchi ra xiꞌin ra.
Ta saa ke̱e ra ikán kuanuꞌu ra, ndítuꞌun ra xiꞌin ndiꞌi na veꞌe ra tin na ñuu ra unkua i̱kan Jesús xiꞌin ra.
Síndaꞌa Jesús yá loꞌo seꞌe ra Jairo xiꞌin inka yá ñaꞌa yá ti̱in ndaa tikoto ra
(Mt. 9:18-26; Mr. 5:21-43)
40Tá ndi̱ko koo Jesús xiꞌin barco ndi̱xaa ra nda yuꞌu nduta ñûꞌu nuu ke̱e ra tá kuaꞌan ra. Ta chútu ndaa naꞌa ndóo na ndátu na ra, ta vaꞌa ni ndi̱kiꞌin ñaꞌa na. 41Saa ndi̱xa̱a iin ra náni Jairo nuu Jesús, ta ra Jairo ku iin ra xáꞌnda chiñu nuu na veꞌe ñuꞌu sinagoga mií ñuu ikán. Ta ndi̱xaa ra si̱kusiti ra nuu Jesús, xáku ndaꞌvi ra nuu ra ya kuꞌun ra xiꞌin ra veꞌe ra. 42Chi íyo iindaa mituꞌun seꞌe ra, ta kúu mií yá iin kuꞌva uxi uvi kuiya yá. Ta ndee ni ndóꞌo yá, xa yati kuvi yá.
Ñaa ke̱e Jesús kuaꞌan ra xiꞌin ra veꞌe ra. Tá kuaꞌan ra ichí, ta iin taꞌnda chee naꞌa kuaꞌan xiꞌin ra, iin chíndaꞌa taꞌan mií na kuaꞌan na. 43Tañu na kuaꞌan xiꞌin ra ikán, kuaꞌan iin yá ñaꞌa ndee ni ndóꞌo yá xa ndi̱xinu uxi uvi kuiya xíta ni̱í yá, ta xa kuaꞌa ka vi ichí ndi̱xaꞌan yá nuu na xáa tatan, ta nda iin na köo ndi̱kuchiñu sindaꞌa ñaꞌa, saa ndi̱ꞌi xuꞌun yá. 44Ñaa ndi̱xaa yá sata Jesús ti̱in ndaa yá yuꞌu tikoto ra. Saa ndikun si̱yaa ni̱í xiꞌin yá. 45Ta ndi̱kaꞌan Jesús, káchi ra saa:
―¿Unku na ti̱in ndaa yeꞌe ra? ―káchi ra.
Ta ndi̱kuiin ndiꞌi na káꞌan na:
―Süvi yeꞌe ndi̱tiin ndaa yóꞌo̱ ―káchi ndiꞌi nda.
Saa ndi̱kaꞌan ra Pedro xiꞌin nda ítaꞌan xiꞌin ra, káchi nda saa:
―Tata Maestro, köo naꞌa ndi̱tiin ndaa yóꞌo̱, chútu ndaa naꞌa, ta ndiꞌi kúu ñaꞌñu chíndaꞌa ndaa na yóꞌo̱ ―káchi nda xiꞌin ra.
46Ñaa ndi̱kuiin Jesús káꞌan ra:
―Üꞌun, iin naꞌa ti̱in ndaa yeꞌe, chi ku̱ndaa ini i ke̱e ndee i si̱ndaꞌa i iin na ―káchi ra.
47Ta saa ku̱ndaa ini yá ñaꞌa ikán ta köo ndi̱kuvi ka tiseꞌe yá, ñaa xa̱á yá íꞌvi ka vi yá ndakua kísia yá xa̱a yá si̱kusiti yá nuu Jesús. Nuu ndiꞌi na saa ndi̱tuꞌun yá ndá xaꞌa kua ti̱in ndaa yá tikoto ra, chi tá ti̱in ndaa soꞌva yá tikoto ra ta ndikun ndu̱vaꞌa yá. 48Ta saa ndi̱kaꞌan Jesús xiꞌin yá, káchi ra saa:
―Siꞌi, ndu̱vaꞌa un chi ndáa ni ini un xíni un yeꞌe. Ta vitin kuanuꞌu ta kündiꞌi ka ini un ―káchi ra xiꞌin yá.
49Káꞌan ka Jesús, saa xa̱a inka ra ke̱e veꞌe ra Jairo, káꞌan ra xiꞌin ra Jairo, káchi ra saa:
―Xa ndi̱xiꞌi va seꞌe un, köo xíniñuꞌu ka un sikutu un ini Tata Maestro ñaa ―káchi ra xiꞌin ra.
50Ta saa xi̱ni soꞌo Jesús, ñaa ndi̱kaꞌan ra xiꞌin ra Jairo, káchi ra saa:
―Käka ini un. Tá tu ndáa ini un Ndioxi ta nduvaꞌa va seꞌe un ―káchi ra xiꞌin ra.
51Saa ke̱e Jesús ndi̱xaa ra veꞌe ra Jairo, ta köo ndi̱taxi ra kiꞌvi ndiꞌi naꞌa xiꞌin ra cuarto nuu kánduꞌu yá loꞌo ikán. Ndisaa siꞌí yá tin iva yá xiꞌin ra Pedro, xiꞌin inka ra Juan, inka ra Jacobo, nda ítaꞌan xiꞌin ra, ndisaa na ikán ku na ndi̱kee xiꞌin ra. 52Ta ndóo inka naꞌa xáku ka vi na xaꞌa yá. Saa ndi̱kaꞌan Jesús xiꞌin na, káchi ra saa:
―Kuäku ndo chi köo ndi̱xiꞌi vi yá, yá kíxi va ku yá ―káchi ra xiꞌin na.
53Ñaa ku̱siki ndaa na ra, ndi̱xaku ndaa ñaꞌa na, chi xíni na xa ndi̱xiꞌi vaꞌa yá. 54Ta saa ndi̱kiꞌvi Jesús ini cuarto nuu kánduꞌu yá, ti̱in ra ndaꞌa yá, ndi̱kaꞌan ra xiꞌin yá, káchi ra saa:
―Yá loꞌo, kuándikoo ―káchi ra xiꞌin yá.
55Saa ndi̱taku yá ndi̱koo yá. Ta ndi̱kaꞌan ra xiꞌin iva siꞌí yá: ya ná taxi na kuxi yá.
56Ñaa iin ndi̱kanda ni ini na ndóo na, saa ndi̱kaꞌan ra xiꞌin na ya ná ndïtuꞌun na xiꞌin nda iin naꞌa.
Valgt i Øjeblikket:
San Lucas 8: xta
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Active: ©Wycliffe Bible Translators, Inc. All rights reserved.