San Mateo 19
19
Sínaꞌa Jesús ya küvi sindoo taꞌan naꞌa na xa ti̱ndaꞌa
(Mr. 10:1-12; Lc. 16:18)
1Tá si̱ndiꞌi Jesús ndi̱kaꞌan ra tuꞌun ikán, saa ke̱e ra estado Galilea, ta ndi̱kiꞌin ra kuaꞌan ra estado Judea inka ñaꞌñu yuꞌu ita Jordán. 2Ta kuaꞌa ni naꞌa ndi̱kundikun kuaꞌan sata ra, ta ikán si̱ndaꞌa ra ndiꞌi na kúꞌvi. 3Saa ndi̱xaa sava nda fariseo xíto ndoso nda ra, káchi nda saa:
―¿Tata, án vaꞌa kaꞌnda iin taa tutu xiꞌin yá síꞌi ra xaꞌa ndá ka kuachi vali soꞌva? ―káchi nda xiꞌin ra.
4Saa ndi̱kuiin Jesús káchi ra saa:
―¿Án täꞌan kaꞌvi ndo unkua káꞌan tuꞌun Ndioxi tá kivi si̱kuaꞌa ra ñuu ivi yóꞌó? Chi kivi tá “si̱kuaꞌa Ndioxi ñuu ivi yóꞌó, ta si̱kuaꞌa ra iin taa xiꞌin iin ñaꞌa”. 5Yakan ndi̱kaꞌan Ndioxi káchi ra saa: “Xaꞌa ya yóꞌó kua xíniñuꞌu taa sindikoo ra iva ra xiꞌin siꞌí ra, ta tindaꞌa ra xiꞌin yá síꞌi ra, ta uvi saa na ikán nduu na iin yuꞌu xiꞌin taꞌan na”, káchi tuꞌun Ndioxi. 6Süvi uvi ka ku na, saa chi iin yuꞌu ndu̱u na nuu Ndioxi. Ta na si̱kutaꞌan Ndioxi, nda iin naꞌa küvi taꞌvi na, chi Ndioxi ku ra chi̱taꞌan na ―káchi Jesús xiꞌin nda fariseo.
7Saa ndi̱kaꞌan tuku nda xiꞌin ra, káchi nda saa:
―Tá tu saa íyo ya, ta ¿ndachu ndi̱kaꞌan Ndioxi xiꞌin ra Moisés ya ta̱a ra ya vaꞌa sindikoo nda taa yá síꞌi nda, kaꞌnda nda tutu xiꞌin ná? ―káchi nda fariseo xiꞌin ra.
8Saa ndi̱kuiin Jesús, káchi ra saa:
―Xaꞌa ya tuun ni nima ndo kua ta̱xi Ndioxi ichí ndaꞌa ra Moisés ta̱a ra ya vaꞌa sindikoo nda taa ná síꞌi nda. Sundi tá núnu̱ú ta süvi saa ndi̱xiyo ya. 9Ta yeꞌe káꞌan i xiꞌin ndo, tá iin ñaꞌa yá íyo ií köo ndíkiꞌvi yá xiꞌin inka taa, ta köo xíniñuꞌu ií yá kaꞌnda ra tutu xiꞌin yá. Tá iin taa xáꞌnda ra tutu xiꞌin yá síꞌi ra, ta tíndaꞌa tuku ra, ta kuakiꞌvi ra kuachi xiꞌin yá síꞌi ra yá uvi nuu Ndioxi. Saa taa ra tíndaꞌa xiꞌin yá ndi̱ndoo xa̱a ií, kuakiꞌvi ra kuachi xiꞌin yá saa chi nuu Ndioxi ta yá síꞌi taa ra núnu̱ú ku yá ―káchi Jesús xiꞌin nda fariseo.
10Saa ndi̱kaꞌan nda ítaꞌan xiꞌin ra, káchi nda saa:
―Tá tu saa íyo ya, küvi sindoo taa yá síꞌi ra, ta vaꞌa ka kua ná tïndaꞌa va na ―káchi nda.
11Saa ndi̱kuiin Jesús, káchi ra saa:
―Süvi ndiꞌi naꞌa kúchiñu koo saa. Ndisaa na ta̱xi Ndioxi tïndaꞌa na, na ikán ku na köo tíndaꞌa. 12Íyo sava nda taa ta köo tíndaꞌa nda saa chi xa saa ndi̱niꞌi taꞌvi nda tá ka̱ku nda, íyo tuku nda köo tíndaꞌa nda saa chi ndi̱taꞌnda nda i̱kan naꞌa. Ta íyo tuku sava nda xa saa chi̱kaa ini nda tïndaꞌa nda, saa chi kúni nda xaa chiñu nda nuu Ndioxi. Ndiꞌi taa nda kíꞌin kuenta kuchiñu nda koo nda saa, ta vaꞌa ná koo nda saa ―káchi Jesús.
Chínuu ndaꞌa Jesús xiní na vali
(Mr. 10:13-16; Lc. 18:15-17)
13Saa ndi̱xaa naꞌa xiꞌin na vali nuu Jesús, ya chinuu ndaꞌa ra xiní na kaꞌan ra xaꞌa na xiꞌin Ndioxi. Ta ndi̱ndaꞌi nda ítaꞌan xiꞌin ra xiꞌin na ikán.
14Saa ndi̱kaꞌan Jesús, káchi ra saa:
―Taxi ndo ná kixi na vali nuu i, ta käsi ndo nuu na, chi na ndíkun ichí nuu xáꞌnda chiñu Ndioxi, ta tá íin na vali yóꞌó saa íin na ―káchi ra.
15Saa chi̱nuu ndaꞌa ra xiní iin iin na vali ikán chi̱kaa ra ya vaꞌa na, ta saa ke̱e ra kuaꞌan ra inka ñaꞌñu.
Taa ra kuika ni
(Mr. 10:17-31; Lc. 18:18-30)
16Saa ndi̱xaa iin ra kuâán loꞌo nuu Jesús, káꞌan ra xiꞌin ra, káchi ra saa:
―Tata Maestro, taa ra vaꞌa ni ku un, ta kaꞌan loꞌo un xiꞌin i ¿unkua xíniñuꞌu i ikan i ya kuchiñu i kutaku i xiꞌin Ndioxi ndiꞌi saa kivi ya vaxi? ―káchi ra xiꞌin Jesús.
17Saa ndi̱kuiin Jesús, káchi ra saa:
―¿Ndachu káꞌan un kúu i iin taa ra vaꞌa ni? Saa chi köo naꞌa na vaꞌa ni, iindaa mituꞌun mií Ndioxi ku ra vaꞌa ni. Tá tu kúni un kutaku un xiꞌin ra ndiꞌi saa kivi ya vaxi, ta xíniñuꞌu un xaa súvi un ley Ndioxi ―káchi Jesús xiꞌin ra.
18Saa ndi̱kaꞌan ra kuâán loꞌo ikán, káchi ra saa:
―Tata, ndá ley kua xíniñuꞌu i xaa súvi i? ―káchi ra.
Saa ndi̱kuiin Jesús, káchi ra saa:
―Käꞌni un naꞌa, ta ni kïꞌvi un xiꞌin ñaꞌa, ni xäa kuiꞌna un ñaꞌa naꞌa, ni käꞌan vata un xaꞌa inka na. 19Saa xaa toꞌo un iva un xiꞌin siꞌí un, ta kuꞌvi ini un kuni un inka naꞌa tá kuꞌva kúꞌvi ini un xíni un mií un ―káchi Jesús xiꞌin ra.
20Saa ndi̱kuiin ra ndi̱kaꞌan ra xiꞌin Jesús, káchi ra saa:
―Tata, nda tá loꞌo vi i xáa súvi i ndiꞌi ley ñaa. Ta ¿án íyo ka inka chiñu kúmani xaa súvi i? ―káchi ra.
21Saa ndi̱kuiin Jesús, káꞌan ra:
―Tá tu kúni un koo un iin taa ra vaꞌa ni, kuáꞌan xiko ndiꞌi ñaꞌa ya kúu mií un, saa siniꞌi un xuꞌun nuu na ndaꞌvi. Saa kua ndukuika ni un xiꞌin Ndioxi nuu ndivi. Tá ndiꞌi i̱kan un saa, ta saa kixi un kundikun un yeꞌe ―káchi Jesús xiꞌin ra.
22Saa tá xi̱ni soꞌo ra tuꞌun ndi̱kaꞌan Jesús xiꞌin ra, ta ndi̱kava ni ini ra kuaꞌan ra, saa chi kuika ni ra.
23Saa ndi̱kaꞌan Jesús xiꞌin nda ítaꞌan xiꞌin ra, káchi ra saa:
―Ya ndaa káꞌan i xiꞌin ndo, na kuika ta uꞌvi ni saa kiꞌvi na ikán ichí nuu xáꞌnda chiñu Ndioxi. 24Ta ná kaꞌan ka i xiꞌin ndo: Tá ya kúvi kua ta án sana vaꞌa ka kiꞌvi iin kiti camello chee ni ta yaꞌa ri yavi loꞌo kaꞌa iin tiku, ta saa na kuika uꞌvi ni ka saa kiꞌvi na ikán ichí nuu xáꞌnda chiñu Ndioxi ―káchi Jesús xiꞌin na.
25Saa xi̱ni soꞌo nda ítaꞌan xiꞌin Jesús tuꞌun ndi̱kaꞌan ra, ta ndi̱kanda ni ini nda, saa ndi̱ndakan tuꞌun taꞌan nda, káchi nda saa:
―Tá tu uꞌvi ni saa kiꞌvi na kuika ichí Ndioxi, ta ¿unku na kuchiñu kiꞌvi ichí Ndioxi kundoo na xiꞌin ra, tá tu saa? ―káchi nda.
26Saa ndi̱koto Jesús nuu nda, ta ndi̱kaꞌan ra xiꞌin nda, káchi ra saa:
―Ñaꞌa ya uꞌvi ni nuu na ñuu ivi yóꞌó, ta nda loꞌo köo uꞌvi ya nuu Ndioxi ―káchi Jesús.
27Saa ndi̱kaꞌan ra Pedro xiꞌin Jesús, káchi ra:
―Tata, ta ndeꞌe, ¿unkua niꞌi nde? Chi si̱ndoo ndiꞌi nde ñaꞌa ya kúu mií nde, ta vaxi nde ndíkun nde yóꞌo̱ ―káchi ra xiꞌin Jesús.
28Saa ndi̱kaꞌan Jesús xiꞌin nda, káchi ra:
―Ya ndaa káꞌan i xiꞌin ndo, tá ná tindaa kivi ya nduxaa ñuu ivi yóꞌó, ta yeꞌe, Taa ra xa̱a ñuu ivi yóꞌó, ta koo i nuu tai toꞌo, itun luvi ni, ikán koo i kaꞌnda chiñu i. Ta ndóꞌo̱ ndíkun yeꞌe, uxi uvi saa ndo koo nuu iin iin tai toꞌo xaa nani ndo kuachi xiꞌin uxi uvi saa tiꞌvi na Israel. 29Ta ndiꞌi na síndikoo veꞌe na, án ñani na, án kuꞌva na, án iva siꞌí na, án yá síꞌi na, án seꞌe na, án ñuꞌú na, xaꞌa ya ndíkun na yeꞌe. Ta na yóꞌó ta kuaꞌa ni ya vaꞌa niꞌi na nuu Ndioxi. Nda iin ciento ka ya vaꞌa niꞌi na sata iin iin ñaꞌa ya si̱ndoo na. Ta saa niꞌi na koo na xiꞌin Ndioxi ndiꞌi saa kivi ya vaxi. 30Ta kuaꞌa ni na ínuu vitin nduu na, na sindiꞌi. Ta na ndíkun nduu na, na núnu̱ú ―káchi Jesús xiꞌin na.
Valgt i Øjeblikket:
San Mateo 19: xta
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Active: ©Wycliffe Bible Translators, Inc. All rights reserved.