San Marcos 13
13
Káꞌan Jesús ya ndiꞌi xaꞌa veꞌe ñuꞌu kaꞌnu ñuu Jerusalén
(Mt. 24:1-2; Lc. 21:5-6)
1Saa tá ke̱ta Jesús veꞌe ñuꞌu kaꞌnu ikán kuaꞌan ra, ta saa ndi̱kaꞌan iin ra ítaꞌan xiꞌin ra, káchi ra saa:
―Tata Maestro, ¡koto un toon, naꞌnu ka vi yu̱ú ñúꞌun xaꞌa veꞌe yóꞌó, ta luvi ka vi náꞌa ya! ―káchi ra xiꞌin Jesús.
2Ñaa ndi̱kuiin Jesús káꞌan ra:
―¿Án luvi ni ndi̱kuaꞌa ya túvi un? Sundi vaxi kivi ta nda iin ka yu̱ú köo sata inka yu̱ú chi ndiꞌi xaꞌa ya tani ndiꞌi ya ―káchi Jesús xiꞌin ra ítaꞌan xiꞌin ra.
Ya kuu tá xa yati ndiꞌi xaꞌa ñuu ivi
(Mt. 24:3-28; Lc. 21:7-24; 17:22-24)
3Saa ndi̱kiꞌin nda kuaꞌan nda chí xiki itun Olivo, ya xíto ndaa veꞌe ñuꞌu kaꞌnu. Tá ndi̱xaa nda ikán saa ndi̱kunduꞌu koo Jesús. Ñaa ndi̱kaꞌan ra Pedro xiꞌin ra Jacobo tin ra Juan xiꞌin ra Andrés, ndi̱ndakan tuꞌun siin nda ra, káchi nda saa:
4―Tata, kaꞌan xiꞌin nde, ¿maa kua kuu saa, ta ndá seña kua koo tá xa ku̱yati ndiꞌi xaꞌa veꞌe ñuꞌu kaꞌnu? ―káchi nda xiꞌin ra.
5Saa ndi̱kuiin ra, káꞌan ra xiꞌin nda:
―Kuenta ni koo ndo, täxi ndo sindaꞌvi ndá ka naꞌa ndóꞌo̱. 6Saa chi kuaꞌa ni taa kixi, ta ndikiꞌin nda nuu i sindaꞌvi nda ndóꞌo̱, kaꞌan nda xiꞌin ndo: “Yeꞌe ku Cristo, taa ra ti̱ꞌvi Ndioxi vaxi sikaku na ñuu ivi”, kachi nda xiꞌin ndo. Ta kuaꞌa ni naꞌa sindaꞌvi nda.
7’Saa tá xa̱á xíni soꞌo ndo íyo kuachi ñuu yati án ñuu xika, ta ku ïꞌvi ndo. Saa chi nduxa saa xíniñuꞌu kuu, sundi süvi ya xa ndiꞌi xaꞌa ku ñuu ivi. 8Kivi ya vaxi ta ndikuita na ñuu naꞌnu kani taꞌan na xiꞌin inka na ñuu naꞌnu, saa ñuu nuu xáꞌnda chiñu nda rey ndikuita na kani taꞌan na xiꞌin inka ñuu nuu xáꞌnda chiñu inka nda rey. Ta kuaꞌa ni ñuu taan, saa koo tama, ta kani taꞌan ni naꞌa xiꞌin taꞌan na. Ta ndiꞌi tindoꞌo yóꞌó ya ndee ni tíxuꞌvi na ta ya sikan xa̱á va kua.
9’Ta kuenta ni koo ndo xiꞌin mií ndo, saa chi taxi na kuachi xaꞌa ndo ndaꞌa na chiñu, saa xaa nduvaꞌa ni na xiꞌin ndo veꞌe ñuꞌu sinagoga. Saa kundaka na ndóꞌo̱ kuꞌun ndo nuu na chiñu án nuu nda rey, ta xaꞌa yeꞌe kua kundoꞌo ndo saa. Tá ndi̱xaa ndo nuu na chiñu ikán, ta saa kaꞌan ndo xaꞌa i xiꞌin na. 10Chi ndiꞌi ni kúu na ñuu ivi xíniñuꞌu kundaa ini xaꞌa tuꞌun vaꞌa xaꞌa i, saa kua ndiꞌi xaꞌa ñuu ivi yóꞌó. 11Tá ti̱in na ndóꞌo̱ ndi̱xaa ndo nuu na chiñu ta kündiꞌi ini ndo xaꞌa tuꞌun ya kaꞌan ndo xiꞌin na, ni ndïkani ini ndo xaꞌa ya. Tá ndi̱xaa ndo nuu na, ta unku mií tuꞌun chi̱nuu Ndioxi yuꞌu ndo, ta ya ikán kaꞌan ndo xiꞌin na, saa chi süvi mií ndo ku ndo kaꞌan, Tachi I̱í mií Ndioxi ya íyo xiꞌin ndo kua kaꞌan xiꞌin na. 12Nda ni ñani ndo ta taxi nda ndóꞌo̱ kaꞌni na ndóꞌo̱, ta nda taa taxi nda kaꞌni na seꞌe nda, saa seꞌe na taxi na kuachi xaꞌa iva siꞌí na ya kaꞌni ñaꞌa na. 13Ndiꞌi ni kúu na kundasi nuu na kuni na ndóꞌo̱ xaꞌa ya ndíkun ndo yeꞌe. Ta ndiꞌi ndo köo síndoo ndo ichí i, ndíkun vaꞌa ndo ya nda nuu sindiꞌi ya tixuꞌvi ndo ñuu ivi yóꞌó. Saa sikaku Ndioxi ndóꞌo̱ kutaku ndo ndiꞌi saa kivi ya vaxi.
14’Ta ndóꞌo̱ tá xi̱ni ndo ya väꞌa, ya kini ya síndiꞌi xaꞌa ya i̱í, taꞌan ñaꞌa ya ndi̱kaꞌan ra Daniel xaꞌa, ra ndi̱kaꞌan ndoso tuꞌun yuꞌu Ndioxi, tá xi̱ni ndo ya ikán íyo ya ini veꞌe ñuꞌu kaꞌnu nuu köo xíniñuꞌu ya koo ya, ta vaꞌa ka kana koo ndóꞌo̱ ndóo estado Judea yóꞌó, kee ndo kunu ndo kuꞌun ndo iku, (ta ndóꞌo̱ káꞌvi ya yóꞌó ta ná kundaa ini ndo xiꞌin ya káꞌvi ndo). 15Ta na ndóo xiní veꞌe, ta ná kïꞌvi na ini veꞌe ndikuiso na ñaꞌa na. 16Tá kúu na ñúꞌu iku, ta ná ndïko koo ka na veꞌe na ya ndikiꞌin na chilo na. 17Ta ndaꞌvi ni ná ñaꞌa ná ñúꞌu seꞌe, saa tu ná sikan ka̱ku seꞌe lee ná chíchin seꞌe, ndoꞌo ni ná kivi tá ná kuu saa. 18Kaꞌan ni ndo xiꞌin Ndioxi ná kïxi tindoꞌo yóꞌó tá tiempo vixin, 19saa chi tá ná kuu saa, ta ndixa ni ka ndoꞌo na, nda iin kivi köo kúu saa, nda nani xi̱koo xaꞌa ñuu ivi i̱kan Ndioxi, ta köo na ndóꞌo ni tá kuꞌva ndoꞌo na kivi ikán, saa chi kivi ikán ta ndee ni ka ìyo ndoꞌo na. 20Xaꞌa ya kúꞌvi ini Ndioxi xíni ra na ndi̱kaxin ra, xaꞌa ya ikán kua chi̱tuni ra loꞌo kivi tixuꞌvi na ñuu ivi yóꞌó. Tá tu köo ndi̱kan ra saa, ta nda iin naꞌa küchiñu kaku ndikuu.
21’Tá ndá na káꞌan xiꞌin ndo: “Koto ndo, yóꞌó íin ra ti̱ꞌvi Ndioxi vaxi sikaku yoo”, án ‘‘Koto ndo, kaa íin ra vaxi sikaku yoo’’, káchi na xiꞌin ndo, ta kändixa ndo na. 22Saa chi kuaꞌa ni nda taa vata kixi, kaꞌan nda, nda ikán ku nda ti̱ꞌvi Ndioxi sikaku na ñuu ivi yoꞌo, án nda ikán ku profeta nda vaxi kaꞌan ndoso tuꞌun yuꞌu ra, kachi nda. Ta kuaꞌa ni yatuꞌun ikan nda, saa ikan nda ya ndíchi ni nuu na ya sindaꞌvi nda na, nda sava na ndi̱kaxin Ndioxi kuni nda sindaꞌvi nda. 23Yakan kuenta ni koo ndo. Xaꞌa ya ñaa kua xa káꞌan kuee i xiꞌin ndo vitin yachi ka tá täꞌan kuu saa ―káchi Jesús xiꞌin nda ítaꞌan xiꞌin ra.
Soꞌva koo tá ná ndiko koo Taa ra xa̱a ñuu ivi yóꞌó
(Mt. 24:29-35,42-44; Lc. 21:25-36)
24Saa ndi̱kaꞌan ka ra xiꞌin nda, káchi ra saa:
―Kivi tá ná yaꞌa ndiꞌi tindoꞌo ya ndee ni kuu, ta saa ndunaá nuu ñu̱ꞌu, ta ni kiti yoo ndüyeꞌe ka ri. 25Saa koyo kimi kiti ndóso nuu ndivi, ta saa ndiꞌi ñaꞌa ya kúu mií ndee nuu ndivi ta iin ndikanda ndiꞌi ya. 26Tá ndiꞌi ikán, saa kuni ndiꞌi na ivi yeꞌe, ra Taa ra xa̱a ñuu ivi yóꞌó, kuni na kixi i xiꞌin viko, ta ndee ni ndee koo i kixi i, iin ndiyeꞌe ndaa ndiꞌi, chi kixi ndiꞌi ndee i xiꞌin i. 27Ta yeꞌe tiꞌvi i na tatun ya kuꞌun na ndikaya na ndiꞌi naꞌa, na ndi̱kaxin i ndíkun yeꞌe, kuꞌun na xaꞌa ndiꞌi ni kúu ñuu ivi yóꞌó ndikaya na naꞌa kixi na nuu i.
28’Ta ndóꞌo̱ ndikiꞌin xiní ndo xiꞌin tuꞌun ndíchi ya káꞌan xaꞌa itun higo: Tá vaxi nana iku ndaꞌa nu, ta saa kíꞌin ndo kuenta xa yati ni ti̱ndaa kivi ya kuun savi. 29Yakan saa ndóꞌo̱ tá xi̱ni ndo xa̱á kúu ndiꞌi ya káꞌan i xaꞌa xiꞌin ndo, ta saa kundaa ini ndo ya xa ku̱yati ni ndiko koo i kixi i. 30Ya ndaa káꞌan i xiꞌin ndo, naꞌa na kuni seña yóꞌó ta kutaku na nda ná xinu ndiꞌi ya ndi̱tuꞌun i xaꞌa xiꞌin ndo. 31Chi vaxi kivi ta ndiꞌi xaꞌa ndivi xiꞌin ñuꞌú, sundi tuꞌun i ta nda iin ya ndïꞌi xaꞌa ―káchi Jesús.
32Ta saa ndi̱kaꞌan ka ra, káchi ra saa:
―Ta mií kivi xiꞌin hora ya ndiko koo i ñuu ivi yóꞌó, ta nda iin na köo xíni maa kua kuu saa, ni na tatun íyo nuu ndivi köo xíni, ni yeꞌe Taa ra xa̱a ñuu ivi yóꞌó köo xíni i, iindaa mituꞌun mií Iva yo Ndioxi ku ra xíni maa kua kuu saa.
33’Yakan kua káꞌan i xiꞌin ndo, kuenta ni koo ndo ta koo tuꞌva ndo, kaꞌan ni ndo xiꞌin Ndioxi, saa chi köo xíni ndo maa kua tindaa hora ya ndiko koo i. 34Tá íkan iin taa ra ke̱ta kuaꞌan kani inka ñuu saa íkan i xiꞌin ndo. Ra ikán ta káꞌan ra xiꞌin moso ya ná kundaa vaꞌa na veꞌe ra. Táxi ndiꞌi ra chiñu ndaꞌa iin iin na xáa chiñu nuu ra, saa xa̱ꞌnda ra chiñu nuu ra ndáa yeꞌe ra ya ná küsun ra, ná kundito ni ra. 35Yakan saa ndóꞌo̱, koo tuꞌva ndo saa chi köo xíni ndo maa kua ndiko koo i, án xa sikan kuaꞌan kuáa̱, án köo sava ñuu, án sana tá xa kána cheꞌle án sana tu tá xa kuaꞌan túvi va ndiko koo i. 36Kuenta ni koo ndo süvi ka vi ya iin sana ini ndo ndiko koo i, ta nditaꞌan i ndóꞌo̱, ndóo ndo kíxi ndo. 37Ya káꞌan i xiꞌin ndóꞌo̱ ta xiꞌin ndiꞌi naꞌa káꞌan i: “¡Küsun ndo, kundito ndo!” ―káchi ra xiꞌin nda ítaꞌan xiꞌin ra.
Valgt i Øjeblikket:
San Marcos 13: xta
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Active: ©Wycliffe Bible Translators, Inc. All rights reserved.