San Marcos 8
8
Táxi Jesús xíxi kumi mil na ivi
(Mt. 15:32-39)
1Saa ku̱u tuku inka ichí, kuaꞌa ka vi ku naꞌa ndi̱kitaꞌan nuu Jesús, ta köo mií ñaꞌa kuxi na. Saa ka̱na ra nda ítaꞌan xiꞌin ra, káꞌan ra xiꞌin nda, káchi ra saa:
2―Kúndaꞌvi ni ini i xíni i na yóꞌó, chi xa ndi̱xinu uni ví kivi ndóo na xiꞌin i, ta köo ñaꞌa kuxi na. 3Tá tu saa ná koo na tiꞌvi i na nuꞌu na, ta ìyo ni kuvi ndiuu na ichí, chi sava na ta kani ni ke̱e na ―káchi ra xiꞌin nda.
4Saa ndi̱kuiin nda, káchi nda saa:
―Ni yóo ta, ¿unkua ikan yo taxi yo kuxi na? Kuaꞌa ni ku na ta ni naꞌa köo íyo yóꞌó nduku yo ñaꞌa nuu na ―káchi nda xiꞌin ra.
5Saa ndi̱kaꞌan ra xiꞌin nda, káchi ra saa:
―¿Ta ndisaa ku xita vaꞌa ndíso ndo? ―káchi ra xiꞌin nda.
Saa ndi̱kuiin nda káꞌan nda:
―Uxa va ku ya ―káchi nda.
6Saa xa̱ꞌnda ra chiñu nuu nda ya ná kaꞌan nda xiꞌin na ndikundoo na nuu ñuꞌú. Ñaa ti̱in ra uxa xita vaꞌa ikán ta ta̱xi ra tixaꞌvi ndaꞌa Ndioxi, saa ta̱ꞌvi ra ya ta̱xi ra ndaꞌa nda ítaꞌan xiꞌin ra. Ta nda ikán ndi̱taꞌvi ya xiꞌin ndiꞌi naꞌa. 7Saa ndíso tu nda uvi ndaa tiaka vali va, ta ta̱xi nda ri ndaꞌa Jesús, ta ta̱xi tu ra tixaꞌvi ndaꞌa Ndioxi xaꞌa ri ikán va, ta saa ta̱xi tu ra ri ikán va ndaꞌa nda ítaꞌan xiꞌin ra ndi̱taꞌvi nda ri xiꞌin na. 8Xi̱xi ndiꞌi na ndakua ndi̱xaa ini na, ta chu̱tu ka uxa tika xiꞌin ya ndi̱ndoo yuꞌu na. 9Ndiꞌi na xi̱xi ta kúu na iin kuꞌva kumi mil. Tá ndi̱ꞌi xi̱xi na saa nda̱i ra na ku̱anuꞌu na. 10Ta ñaa nda̱a ra sata tun barco xiꞌin nda ítaꞌan xiꞌin ra, ndi̱xaa nda chí iin ñaꞌñu nuu ndíkaa ñuꞌú Dalmanuta.
Nda fariseo ndúku nda yatuꞌun Ndioxi nuu Jesús
(Mt. 16:1-4; Lc. 12:54-56)
11Saa ndi̱xaa sava nda fariseo ta xa̱á nda kéꞌe nda Jesús, xíto ndoso ñaꞌa nda, káꞌan nda xiꞌin ra ya ná ikan ra yatuꞌun Ndioxi nuu nda, saa kundaa ini nda tá tu ndixa nuu Ndioxi ke̱e ra. 12Saa iin ndendee ndi̱kakan ini ra ya ndi̱ndiꞌi ini ra, ta xa̱á ra káꞌan ra xiꞌin nda, káchi ra saa:
―Ndachu ndúku ndo yatuꞌun nuu i, ta vitin ta nda iin ya ïkan i kuni ndo ―káchi ra xiꞌin nda.
13Saa si̱ndoo ñaꞌa ra, ta nda̱a tuku ra sata itun barco xiꞌin nda ítaꞌan xiꞌin ra, ndi̱kiꞌin nda kuaꞌan nda inka ñaꞌñu yuꞌu nduta ñûꞌu.
Ndítuꞌun Jesús xaꞌa ya väꞌa sínaꞌa nda fariseo
(Mt. 16:5-12)
14Saa ku̱u ndi̱ndoso ini nda ítaꞌan xiꞌin Jesús kundiso nda ñaꞌa kuꞌun xiꞌin nda kuxi nda, iindaa ku xita vaꞌa níꞌi nda kuaꞌan xiꞌin nda sata itun barco. 15Saa ndi̱kaꞌan Jesús xiꞌin nda:
―Koto ndo, kuenta ni koo ndo xiꞌin uxan iya nda fariseo, saa tu uxan iya ra Herodes va ―káchi ra xiꞌin nda.
16Saa xa̱á nda káꞌan nda xiꞌin taꞌan mií nda, káchi nda saa:
―Án sana saa káꞌan ra, chi köo xita vaꞌa ndíso yo vaxi xiꞌin yo ―káchi nda xiꞌin taꞌan nda.
17Saa xi̱ni Jesús ya káꞌan nda, ta ndi̱kaꞌan ra xiꞌin nda, káchi ra saa:
―¿Ndachu káꞌan ndo köo xita vaꞌa ndíso ndo? ¿Án täꞌan vi kundaa ini ndo? ¿Án íyo tuun yaa va nima ndo kua? 18Íyo nduchi nuu ndo, ta köo xíto ndo, íyo soꞌo ndo ta köo xíni soꞌo ndo. ¿Án köo ñúꞌu ini ndo ya i̱kan i? 19Tá kivi ta̱ꞌvi i uꞌun xita vaꞌa xi̱xi uꞌun mil taa ¿ta ndisaa ka tika si̱kutu ndo xiꞌin ya ndi̱ndoo yuꞌu na? ―káchi ra xiꞌin nda.
Saa ndi̱kuiin nda káꞌan nda:
―Uxi uvi ku nu si̱kutu nde xiꞌin ya ―káchi nda.
20―¿Ta ndisaa tika si̱kutu ndo xiꞌin xita vaꞌa, tá ta̱ꞌvi i ya xi̱xi kumi mil na? ―káchi ra xiꞌin nda.
Saa ndi̱kuiin nda, káꞌan nda:
―Uxa ku nu chu̱tu ya xiꞌin ―káchi nda.
21¿Án saa ni täꞌan ku̱ndaa vi ini ndo ya íkan i? ―káchi ra xiꞌin nda.
Síndaꞌa Jesús iin ra kuáa̱ ñuu Betsaida
22Saa tá ndi̱xaa Jesús ñuu Betsaida, ta ndáka na iin ra kuáa̱ ndi̱xaa xiꞌin na nuu ra. Ta saa xáku ndaꞌvi na nuu Jesús ya ná tiin ndaa loꞌo ñaꞌa ra ta nduvaꞌa ra. 23Ñaa ti̱in Jesús ndaꞌa ra, ta ndi̱kiꞌin ñaꞌa ra kuaꞌan xiꞌin ra nuu ñuu. Ikán ndi̱yakun ra sii ra sata nduchi nuu ra ikán, saa chi̱nuu ndaꞌa ra sata ra, ta ndi̱kaꞌan ra xiꞌin ra án xa vaꞌa loꞌo xíto ra. 24Saa xa̱á vaꞌa loꞌo xíto ra, ñaa xa̱á ra káꞌan ra:
―Xíto i xíka na ivi, tá íin itun saa íin na kánda na xíka na ―káchi ra.
25Ñaa chi̱nuu tuku Jesús ndaꞌa ra sata nduchi nuu ra ikán. Ta saa ku nuu ndi̱xuna vaꞌa nuu ra, ñaa ndu̱vaꞌa nuu ra xa̱á túvi vaꞌa nuu ra, vaꞌa xíto ra nuu xíka ni. 26Saa ti̱ꞌvi Jesús ra kuanuꞌu ra veꞌe ra, ta ndi̱kaꞌan ra xiꞌin ra, káchi ra saa:
―Kïꞌvi un ñuu, ta nda iin na käꞌan un xiꞌin ndá kuꞌva ndu̱vaꞌa un ―káchi ra xiꞌin ra.
Ndíkuiin ra Pedro káꞌan ra xaꞌa Jesús ya ti̱ꞌvi Ndioxi ra vaxi ra ñuu ivi
(Mt. 16:13-20; Lc. 9:18-21)
27Saa ke̱e Jesús xiꞌin nda ítaꞌan xiꞌin ra kuaꞌan nda ñuu vali ya ndóꞌni ñuu Cesarea ya Filipo. Tá kuaꞌan nda ichí saa ndi̱ndakan tuꞌun Jesús nda, káchi ra saa:
―¿Unku yeꞌe káchi naꞌa xaꞌa i? ―káchi ra xiꞌin nda.
28Saa ndi̱kuiin nda káꞌan nda:
―Sava na káꞌan, ra Juan, ra si̱kuchi naꞌa ku un, káchi na. Ta sava tu na káꞌan, ra Elías ra ndi̱kaꞌan ndoso tuꞌun yuꞌu Ndioxi ku un, káchi na xaꞌa un. Ta inka tuku na káꞌan, va sana ndá inka ra ndi̱kaꞌan ndoso tuꞌun yuꞌu Ndioxi xinaꞌa ku ra ndi̱taku, káchi na xaꞌa un ―káchi nda xiꞌin ra.
29Saa ndi̱ndakan tuꞌun ñaꞌa ra, káchi ra saa:
―Ta ndóꞌo̱, ¿unku i káchi ndo? ―káchi ra xiꞌin nda.
Saa ndi̱kuiin ra Pedro káꞌan ra:
―Tata, yóꞌo̱ ku ra ku Cristo ra ke̱e nuu Ndioxi, ta vaxi un sikaku un na ñuu ivi yóꞌó ―káchi ra xiꞌin ra.
30Saa ndi̱kaꞌan ra xiꞌin nda ya ná käꞌan nda xiꞌin nda iin naꞌa xaꞌa ya yóꞌó.
Ndítuꞌun Jesús ndá kuꞌva ndoꞌo ra kuvi ra
(Mt. 16:21-28; Lc. 9:22-27)
31Saa ku̱u xa̱á Jesús káꞌan ra xiꞌin nda ítaꞌan xiꞌin ra, káchi ra saa:
―Yeꞌe ku ra xa̱a ñuu ivi yóꞌó ta ndoꞌo ni i, saa kundasi nuu na xikuaꞌa ñuu yo Israel kuni na yeꞌe, xiꞌin nda naꞌnu nuu nda sutu xiꞌin nda maestro nda sínaꞌa ley ya ta̱a ra Moisés xinaꞌa ―káchi ra.
Ndítuꞌun ra xiꞌin nda ítaꞌan xiꞌin ra ya xaa nduvaꞌa ni na chiñu xiꞌin ra kaꞌni ñaꞌa na, sundi kivi uni nditaku ra, káchi ra xiꞌin nda. 32Teꞌe ni ndi̱kaꞌan ra xiꞌin nda ya kuvi ra, xaꞌa ya ikán kua ta̱va siin ñaꞌa ra Pedro, ta ndi̱ndaꞌi ra xiꞌin ra, ya küvi ra, káchi ra xiꞌin ra. 33Saa ndi̱ko koo Jesús ta ndi̱koto ra nuu ndiꞌi nda ítaꞌan xiꞌin ra. Nuu ndiꞌi nda ikán ndi̱ndaꞌi ra xiꞌin ra Pedro, káchi ra saa:
―¡Timiaꞌan, kuataꞌa nuu i! Chi yóꞌo̱ ta köo ndíkani ini un tá kuꞌva ndíkani ini Ndioxi, tá kuꞌva ndíkani ini na ivi yóꞌó va ndíkani ini un ―káchi Jesús xiꞌin ra.
34Sindiꞌi saa ka̱na Jesús nda ítaꞌan xiꞌin ra xiꞌin ka naꞌa ikán, saa ndi̱kaꞌan ra xiꞌin na, káchi ra saa:
―Tá ndá ndóꞌo̱ kúni kundikun yeꞌe ta ïkan ka ndo ndisaa ya kúni mií ndo, xaꞌa ndee ini ndo ndoꞌo ndo xaꞌa i ta kundikun ndo kixi ndo sata i.#8:34 Tuꞌun ya kusoko na cruzin kua kúni kachi: Xíniñuꞌu na koo ndúvi na ya tixuꞌvi na xaꞌa ya ndíkun na Jesús. 35Saa chi ndiꞌi na kúni sikaku mií, ta küchiñu na sikaku na mií na, ndiꞌi xaꞌa va na. Sundi na xíꞌi xaꞌa ya vaxi na sata i xiꞌin xaꞌa tuꞌun vaꞌa xaꞌa Ndioxi, ta küvi na chi vaxi na sata i ya sikaku i na. 36Ni köo ndáa yaꞌvi vi ya tá tu ndee ni kúu mií na ndiꞌi ni kúu ñaꞌa ya íyo ñuu ivi yóꞌó, chi síndiꞌi xaꞌa va na ya vaꞌa na. 37Saa chi nda iin na ta küchiñu na chaꞌvi na ya sikaku na ya vaꞌa na. 38Saa tu na ndíkuáa yeꞌe va, tá tu ndíkuáa na tuꞌun i nuu na ñuu ivi kuachi yóꞌó, ta saa ndikuaa tu yeꞌe, ra xa̱a ñuu ivi yóꞌó va na. Chi tá ná ndiko koo i, ta iin yeyeꞌe koo i kixi i xiꞌin ya yeꞌe Iva i Ndioxi tin na tatun ra ―káchi Jesús xiꞌin na.
Valgt i Øjeblikket:
San Marcos 8: xta
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Active: ©Wycliffe Bible Translators, Inc. All rights reserved.