San Marcos 9
9
1Saa ndi̱kaꞌan ka Jesús xiꞌin na, káchi ra saa:
―Ya ndaa ndixa káꞌan i xiꞌin ndo, sava ndóꞌo̱ ndóo yóꞌó vitin ta küvi yachi ndo, kuni ndo nuu xáꞌnda chiñu Ndioxi xiꞌin ndee ra ya ndee ni ―káchi Jesús xiꞌin na.
Ndi̱nama Jesús ndu̱yéꞌe taxan ra
(Mt. 17:1-13; Lc. 9:28-36)
2Ndi̱yaꞌa iñu kivi, ta saa ke̱e ra Pedro xiꞌin ra Jacobo tin ra Juan kuaꞌan nda xiꞌin Jesús iin iku sukun ni. Ta ikán xi̱ni nda ndi̱nama nuu ra, ndu̱yeꞌe taxan ra. 3Toto ra ta ndakua yaa taxan ndu̱u ya, iin yaa sami ya, nda iin toto ni kuaꞌa ni ichí ná ndikata na ya, ta köo na kúchiñu ndasa yaa ni ya, tá kuꞌva yaa toto ra. 4Saa xi̱ni nda ndi̱tuvi ra Elías xiꞌin ra Moisés, káꞌan nda xiꞌin Jesús. 5Ñaa ndi̱kaꞌan ra Pedro xiꞌin Jesús, káchi ra saa:
―Tata Maestro, vaꞌa ni ku̱u ndóo nde xiꞌin un, ta sikuaꞌa nde uni veꞌe itun vixin vali, iin ya koo yóꞌo̱, ta iin ya koo ra Elías, inka ya koo ra Moisés ―káchi ra xiꞌin Jesús.
6Ndi̱kaꞌan ra saa xiꞌin Jesús chi ndi̱ndiꞌvi ni nda, xaꞌa ya ikán kua ni köo ndi̱kundaa ini ra unkua kaꞌan ra xiꞌin ra. 7Káꞌan ra saa, ñaa nu̱u viko iin ndi̱kasi yaa ñaꞌa ya. Ta tañu viko ikán xi̱ni soꞌo nda tachi Ndioxi, káchi ya saa:
―Ra yóꞌó ku Seꞌe mani i, ra kúꞌvi ni ini i xíni i. Vaꞌa kuni soꞌo ndo ya káꞌan ra ―káchi Ndioxi xiꞌin nda.
8Ñaa si̱kuꞌun nuu nda ndi̱koto nda ndiꞌi kúu ñaꞌñu, ta nda iin ka naꞌa köo ndi̱xini nda íyo xiꞌin Jesús, siindaa mií ra xi̱ni nda.
9Tá ndi̱ko koo nda vaxi nuu nda iku ikán, ta saa ndi̱kaꞌan Jesús xiꞌin nda, ya ná käꞌan nda xiꞌin nda iin naꞌa xaꞌa ya xi̱ni nda. Nda ná nditaku mií Taa ra xa̱a ñuu ivi yóꞌó saa kua ndituꞌun nda xaꞌa ya xi̱ni nda.
10Xaꞌa ya ikán kua köo ndi̱tuꞌun nda xiꞌin nda iin naꞌa, sundi ndákan tuꞌun taꞌan mií nda chi köo ndi̱kundaa ini nda xaꞌa ya ndi̱kaꞌan ra ya nditaku ra tañu na ndíi. 11Saa ndi̱ndakan tuꞌun nda ra, káchi nda saa:
―¿Tata, ndachu kua káꞌan nda maestro, nda sínaꞌa ley Ndioxi, ya xiꞌna ra Elías ku ra ndiko koo kixi, saa kixi Taa ra sikaku na ñuu ivi? ―káchi nda xiꞌin ra.
12Saa ndi̱kuiin ra káꞌan ra xiꞌin nda:
―Ya ndaa kua xiꞌna ra Elías ku ra ndiko koo kixi, ta ra ikán ku ra ndasa vií ndiꞌi ñaꞌa. ¿Ta ndachu kua káꞌan tu tuꞌun Ndioxi xaꞌa Taa ra xa̱a ñuu ivi yóꞌó, ya ndoꞌo ni ra ta kundasi nuu ñaꞌa na, káchi ya? 13Ta ná kaꞌan i xiꞌin ndo, ra Elías ta xa ki̱xi ra, ta i̱kan na ya kúni mií na xiꞌin ra, tá káꞌan tuꞌun Ndioxi xaꞌa ra, saa íyo ya i̱kan na xiꞌin ra ―káchi Jesús xiꞌin nda.
Jesús síndaꞌa ra iin ra loꞌo kúu mií tachi nduvaꞌa
(Mt. 17:14-21; Lc. 9:37-43)
14Saa tá ndi̱ko koo Jesús ndi̱xaa ra nuu ndóo ndiꞌi ka nda ítaꞌan xiꞌin ra, ta iin ndi̱katin naꞌa sata nda, saa ndóo tu sava nda maestro va, ta káni taꞌan nda xiꞌin tuꞌun xiꞌin nda ítaꞌan xiꞌin ra. 15Ñaa tá xi̱ni ndiꞌi na ikán ndi̱xaa Jesús, ta iin ndi̱kanda ini na, saa ka̱na koo na xínu na ndi̱xaa na chi̱ndee ñaꞌa na. 16Saa ndi̱kaꞌan ra xiꞌin nda, káchi ra saa:
―¿Unkua kánitaꞌan ni ndo xaꞌa? ―káchi ra xiꞌin nda.
17Saa ndi̱kuiin iin ra ndíkaa tañu na ikán káꞌan ra:
―Tata Maestro, yóꞌó ndáka loꞌo i seꞌe i xa̱a xiꞌin i nuu un. Ki̱ꞌin tachi nduvaꞌa ra ta ki̱ndoo meꞌme ra i̱kan ya. 18Nda mií nuu íin ra, ta xáa ya tíin ñaꞌa ya, kíꞌin ya ra síkana ya nuu ñuꞌú, ta táva ya chiñu yuꞌu ra, ta síkaꞌi ya nuꞌu ra, ñaa iin ndúu itun ra íkan ya. Xa ndi̱kaꞌan i xiꞌin nda ítaꞌan xiꞌin un ya tava nda ya, ta köo ndi̱kuchiñu nda ―káchi ra xiꞌin Jesús.
19Saa ndi̱kuiin ra, káꞌan ra xiꞌin nda:
―¿Ndachu tuun ni nima ndo köo kándixa ndo? ¿Án nda iin ya köo kúchiñu ndo ikán mií ndo? ¿Án ndiꞌi saa ichí koo i xiꞌin ndo káꞌan ndo? Taxi ndo ra loꞌo ñaa ná kixi ra chichoꞌo ―káchi ra xiꞌin nda.
20Saa ndi̱kundaka nda ra kuaꞌan ra nuu Jesús. Tá xi̱ni mií tachi nduvaꞌa ikán Jesús, ñaa xa̱ꞌni too tuku ñaꞌa ya, ndi̱kava ra kuaꞌan ra nuu ñuꞌú, ndakua iin ndíkutuvi mií ra, ta kée chiñu yuꞌu ra índuꞌu ra. 21Saa ndi̱ndakan tuꞌun Jesús iva ra loꞌo ikán, káchi ra saa:
―¿Maa vi kua xa̱á ndóꞌo ra saa? ―káchi ra xiꞌin ra.
Saa ndi̱kuiin iva ra káꞌan ra:
―Tá loꞌo vi ra xa̱á ndóꞌo ra saa. 22Kuaꞌa ka vi ichí chíkaa ñaꞌa ya nuu ñu̱ꞌu̱ xiꞌin ini tikuii ya kaꞌni ñaꞌa ya. Yakan kua káꞌan i xiꞌin un, án kuchiñu ikán loꞌo un ya mani sindaꞌa un ra, kundaꞌvi ini un kuni un ndeꞌe, chindee loꞌo un ndeꞌe, ndaꞌvi nde ―káchi ra xiꞌin Jesús.
23Saa ndi̱kaꞌan Jesús xiꞌin ra, káchi ra saa:
―¿Ndachu káꞌan un án kuchiñu i? ¿Án kuchiñu un kandixa un Ndioxi? Ndiꞌi va ya kuchiñu ikan Ndioxi xiꞌin na kándixa ñaꞌa ―káchi Jesús xiꞌin ra.
24Saa iin ndi̱ndaꞌi koꞌo mií iva ra loꞌo ikán káꞌan ra:
―Kándixa va i, tata, ta chindee ka un yeꞌe ná kandixa ka i ―káchi ra.
25Ñaa xi̱ni Jesús xa̱á ndíkutu kuaꞌa ka naꞌa, saa ndi̱ndaꞌi ra nuu tachi nduvaꞌa ikán, káchi ra saa:
―Yóꞌo̱ tachi nduvaꞌa xa̱a soꞌo ra yóꞌó tin xa̱a meꞌme un ra, yeꞌe xáꞌnda chiñu nuu un, keta kuaꞌan un, ta saña un ra loꞌo yóꞌó, ndïko koo ka un tiin ñaꞌa un ―káchi ra xiꞌin ya.
26Saa iin ndi̱ndaꞌi koꞌo ya, ñaa xa̱ꞌni toꞌo tuku ñaꞌa ya, nda tá káa ra ndi̱xiꞌi saa ndu̱u ra, saa si̱ndoo ñaꞌa ya, ta ke̱e ya kuaꞌan ya. Ta kuaꞌa ka vi na káꞌan xaꞌa ra: ndi̱xiꞌi vaꞌa ra, káchi na. 27Saa ti̱in Jesús ndaꞌa ra ta ndaniꞌi ñaꞌa ra, ñaa ndi̱kundichi ra.
28Sindiꞌi saa ndi̱kiꞌvi Jesús ini veꞌe xiꞌin nda ítaꞌan xiꞌin ra, saa ndi̱ndakan tuꞌun sěꞌe ñaꞌa nda, káchi nda saa:
―¿Ndachu köo ndi̱kuchiñu ndeꞌe tava nde tachi nduvaꞌa ikán? ―káchi nda xiꞌin ra.
29Saa ndi̱kaꞌan ra xiꞌin nda, káchi ra saa:
―Taꞌan tachi nduvaꞌa kúu mií ra loꞌo ikán, ta xíniñuꞌu ni ndo kaꞌan ndo xiꞌin Ndioxi tin kuxi suꞌun ndo saa kuchiñu ndo tava ndo ya ―káchi ra xiꞌin nda.
Ichí uvi káꞌan tuku Jesús ndá kuꞌva ndoꞌo ra kuvi ra
(Mt. 17:22-23; Lc. 9:43-45)
30Saa tá ke̱e nda ñaꞌñu ikán kuaꞌan nda, ta ndi̱yaꞌa nda chí Galilea, ta köo ndi̱xiin Jesús ya kundaa ini naꞌa mií chí kuaꞌan ra. 31Saa chi sínaꞌa ra nda ítaꞌan xiꞌin, káchi ra saa xiꞌin nda:
―Yeꞌe ku Taa ra xa̱a ñuu ivi yóꞌó, vaxi kivi ta nditaxi iin ra yeꞌe ndaꞌa na chiñu, ta na ikán ka̱ꞌni na yeꞌe, sundi tixin kivi uni ta nditaku tuku i ―káchi ra xiꞌin nda.
32Ta ni köo ndi̱kundaa ini nda xaꞌa ya káꞌan ra xiꞌin nda, ta saa köo ndi̱ndakan tuꞌun nda ra chi íꞌvi nda ndakan tuꞌun nda unkua kúni kachi ya ndi̱kaꞌan ra xiꞌin nda.
¿Unku na ndíkun sata Jesús ku na chee ka nuu ndiꞌi na?
(Mt. 18:1-5; Lc. 9:46-48)
33Saa ndi̱xaa nda ñuu Capernaum. Tá ndi̱xaa nda veꞌe, saa ndi̱kaꞌan Jesús xiꞌin nda:
―¿Unkua kánitaꞌan ndo xaꞌa tá vaxi yo ichí? ―káchi ra xiꞌin nda.
34Saa iin ku̱taxin yuꞌu nda, nda iin nda köo ndi̱kuiin, chi tá kuaꞌan nda ichí ta kánitaꞌan taꞌan nda xiꞌin taꞌan nda, unku nda ku nda chee ka nuu ndiꞌi nda, káchi nda xiꞌin taꞌan nda. 35Saa ndi̱kunduꞌu Jesús ñaa ka̱na ra uxi uvi saa nda, ta ndi̱kaꞌan ra xiꞌin nda, káchi ra saa:
―Tá ndá na kúni kuu mií chiñu ndee, ta xíniñuꞌu kundikun na nda kaꞌa, saa xíniñuꞌu na koo na moso nuu ndiꞌi ka naꞌa ―káchi Jesús xiꞌin nda.
36Sindiꞌi saa ki̱ꞌin ra iin ya taa loꞌo ka̱ndichi ra nuu nda, saa ndi̱kunumi ndaa ra ya, ñaa xa̱á ra káꞌan ra xiꞌin nda, káchi ra saa:
37―Naꞌa, na ndíkiꞌin vií na vali taꞌan ra loꞌo yóꞌó xaꞌa ya kándixa na yeꞌe, ta yeꞌe kúu i ndíkiꞌin na, ta na ndíkiꞌin yeꞌe, ta süvi iindaa yeꞌe ku i ndíkiꞌin na, ndíkiꞌin tu na Ndioxi ra ti̱ꞌvi yeꞌe vaxi i ñuu ivi yóꞌó va ―káchi ra xiꞌin nda.
Na köo sáa ini xíni yoo, na ikán ku na kuaꞌan ndee yo
(Mt. 10:42; Lc. 9:49-50)
38Saa ndi̱kaꞌan ra Juan, ra ítaꞌan xiꞌin Jesús xiꞌin ra, káchi ra saa:
―Tata Maestro, xi̱ni nde iin ra táva ra tachi nduvaꞌa xiꞌin kivi un, ta xa̱ꞌnda chiñu nde nuu ra ya ná küniñuꞌu ka ra kivi un, chi süvi ra ítaꞌan xiꞌin yo ku ra, káchi nde xiꞌin ra ―káchi ra ikán xiꞌin Jesús.
39Saa ndi̱kuiin Jesús, káꞌan ra xiꞌin ra:
―Käsi ndo nuu na íkan saa, chi ndiꞌi na xíniñuꞌu kivi i ya íkan na yatuꞌun, ta küvi kanaꞌa na xaꞌa i. 40Chi ndiꞌi na köo sáa ini xíni yoo, na ñaa ku na kuaꞌan ndee yo. 41Ndá ka naꞌa ná siniꞌi iin vaso loꞌo tikuii nuu ndo tixin kivi i xaꞌa ya ndíkun ndo yeꞌe ra kúu Cristo, ta niꞌi na ya vaꞌa nuu Ndioxi xaꞌa ya íkan na saa xiꞌin ndo ―káchi ra xiꞌin nda.
Kuenta ni koo ndo chi ìyo ni koyo ndo nuu kuachi
(Mt. 18:6-9; Lc. 17:1-2)
42Saa ndi̱kaꞌan ka Jesús, káchi ra saa:
―Tá kúu na síkoyo na vali na sikan xáa kándixa yeꞌe, kuaꞌan na nuu kuachi. Ta vaꞌa ka án yachi ka ndi̱katun na yoso itun molino sukun na ikán, ta kiꞌin ñaꞌa na sikana na ini nduta ñûꞌu, ya ná ïkan na saa, ndikuu ―káchi Jesús.
43Saa ndi̱kaꞌan ka ra xiꞌin nda káchi ra saa:
―Saa tu ndóꞌo̱ va, tá tu ndaꞌa ndo kua xáa kíꞌvi xiꞌin ndo, ya íkan ndo ya väꞌa, ta vaꞌa ka kaꞌnda ndo ya chi vaꞌa ka koo ndo kutaku ndo xiꞌin Ndioxi tá tu íyo iindaa ndaꞌa ndo, süvi ka vi ya íyo uvi saa ya, ta kuꞌun ndo ndaya nuu köo ndáꞌva ñu̱ꞌu̱, 44chi ni kiti tikuxi ta köo xíꞌi ri, ni ñu̱ꞌu̱ ta köo ndáꞌva ya ndaya ikán. 45Tá tu xaꞌa ndo kua íkan saa xiꞌin ndo, ta vaꞌa ka kaꞌnda ndo ya, chi vaꞌa ka koo ndo kutaku ndo xiꞌin Ndioxi tá tu kúmani iin xaꞌa ndo, süvi ka vi ya íyo uvi saa ya ta kuꞌun ndo ndaya xiꞌin ya. 46Chi ni kiti tikuxi ta köo xíꞌi ri, ni ñu̱ꞌu̱ ta köo ndáꞌva ya ndaya ikán. 47Tá tu nduchi nuu va tu ndo kua xáa kíꞌvi xiꞌin ndo ya íkan ndo ya väꞌa, ta vaꞌa ka tava ndo ri nuu ndo, chi vaꞌa ka koo ndo kutaku ndo xiꞌin Ndioxi nuu xáꞌnda chiñu ra. Süvi ka vi ya íyo uvi saa nduchi nuu ndo, ta kuꞌun ndo ndaya nuu köo ndáꞌva ñu̱ꞌu̱. 48Chi ni kiti tikuxi ta köo xíꞌi ri, ta ni ñu̱ꞌu̱ ta köo ndáꞌva ya ndaya íkan.
49’Tá kuꞌva íkan i̱í xiꞌin ñaꞌa án tá kuꞌva íkan ñu̱ꞌu̱ xiꞌin ñaꞌa, ndása vaꞌa ñaꞌa ya, saa tu naꞌa na kúni kuꞌun ichí Ndioxi vaꞌa ka xíniñuꞌu na koo tuꞌva na tixuꞌvi loꞌo na vitin, ta saa nduu na ivi na vaꞌa nuu ra. 50Ya vaꞌa ku i̱ín, chi ndása yasin ya ñaꞌa xíxi yo. Sundi tá ndíꞌi ya uꞌva ya, ta küchiñu ka nduu uꞌva tuku ya, yakan ndóꞌo̱ ta xíniñuꞌu ndo kuu ndo ivi na vaꞌa, taꞌan i̱ín ya vaꞌa. Ta xíniñuꞌu ikan ndo ya vaꞌa xiꞌin naꞌa, ta vívií koo ndo xiꞌin ndiꞌi na taꞌan ndo ―káchi Jesús.
Valgt i Øjeblikket:
San Marcos 9: xta
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
Active: ©Wycliffe Bible Translators, Inc. All rights reserved.