मर्कुस 4
4
बिया छर्लाहारक काथा
(मति १३:१-९; लुका ८:४-८)
1येसु फेरि गालिल तालक छेओ मानुससब्के सिछ्या देइके थालिकेभइल पाछु, ओनेन्क चारिओर मानुससब्क बड्क भिड जम्मा भइलगुनेइ ओनेन् एक्टा डोङायँ चढिकुन तालक छेओसे चुत्कि ओताहाँ जाइकुन बोसिके भइल। हसे मानुससब चाहिँ तालक छेओ पाखायँ बोस्ल रहत। 2उहइ बेलाके येसुइ उसब्के धेरइ कुरासब काथाकमाटे सिखाइकेभइल। ओनेनेइ उसब्के कहिकेभइल, 3“सुनउ! एक जेना बिया छर्लाहार मानुस बिया छरिके जइल। 4हसे बिया छर्ते जइतेखना केहाउ बिया चाहिँ पइडायँ पोर्ल, र चरइसब आइकुन उसे बिया खाइदेल। 5केहाउ बियाचाहिँ पाथरइ-पाथर भइल जिमिनयँ पोर्ल। उछि धेरइ माटि नइजेभइलगुनेइ उसे छिट्टइ उम्रल, 6तर घाम बेस्के चर्कलगुनेइ टुसासब डाढिहाल्ल, हसे जह्रिइ गइह्र माटि नइजेपाउलगुनेइ, उसे ओइलाइ हाल्ल। 7हसे केहाउ बियाचाहिँ काटो उम्रलाहार जिमिनयँ पोर्ल, उसे काटोसबेइ उम्रल बिरुवासब्के बढिके नइजेदेल, उहइ काटोक सेपेइ कर्तेखना बिरुवासबेइ फोर फोराइके नइजेसक्ल। 8तर केहाउ बिया कने मलिल जिमिनयँ पोर्ल, हसे बियासब उम्रिकुन बहड्तिन जइलपाछु उसे बिरुवासबेइ तिस, साठि र सय गुना फोर फोराल।” 9अन्तिमयँ येसुइ कहिकेभइल, “जोक्र सुन्लाहार कान बाटइ, उहाइ राम्रसे सुनुस्।”
काथाक उदेस्से
(मति १३:१०-१७; लुका ८:९-१०)
10जब मानुससब्क भिड उछिकमाटे जइल, तब ओनेन्क बाह्र जेना चेलासब र केहाउ मानुससबेइ काथाक उदेस्से किति हखइ कइकुन पुछ्ल। 11हसे येसुइ उसब्के कहिकेभइल, “तेउह्रासब्के परमेसोरक राज्जेक गोप्य कुरासब थाहा पाउलाहार बुद्धि देल बाटइ, तर बाहारक मानुससब्केचाहिँ सभइ कुरा काथाकमाटे कहतम्, 12उहइगुनेइ,
“‘उसबेइ चाहिके त चाहाताहात्,
तर नादेखत्,
सुनिके त सुन्ताहात्,
तर पुनु नाबुझत्,
नत्र कने उसबेइ पाप छाड्लारत्,
र उसब्क पाप छेमा भइलाहारइ।’”
बिया छर्लाहार काथाक अर्थ
(मति १३:१८-२३; लुका ८:११-१५)
13उपाछु येसुइ उसब्के कहिकेभइल, “तोहेसब इसे काथाक अर्थ बुझिके नासकउ कने, अरु काथाक अर्थ झन कस्के बुझिके सक्ताहाउ? 14बिया छर्लाहारइ परमेसोरक बचन छर्ताहात्। 15कोलोउ मानुससब पइडायँ पोर्ल बियासब जस्नइ भइताहात्। उसबेइ परमेसोरक बचन त सुन्ताहात्, तर सुन्ल बिथिकइ सइतान आइकुन उसब्क मनसे परमेसोरक बचन आछ्रिकुन लेजिहालित। 16हसे कोलोउ-कोलोउ मानुससब चाहिँ पाथरइ-पाथर भइल जिमिनयँ पोर्ल बिया जस्नइ भइताहात्। उसबेइ परमेसोरक बचन सुन्ल बिथिकइ खुसि भइतिन् मनयँ त लेताहात्, 17तर उसे मानुसयँ बचनक जह्रि भितरसमन घालिके नइजे पाउलगुनेइ, केहाउ दिनसमन मत्रइ बिस्वास कर्ताहात्। जब बिस्वासक कारनेइ दुख वा सतावट आइत, तब उसबेइ बिस्वास ओख्निहिँ छाड्ताहात्। 18कोलोउ मानुससब चाहिँ काटोघारियँ पोर्ल बिया जस्नइ भइताहात्, उसबेइ पुनु परमेसोरक बचन त सुन्ताहात्, 19तर आफ्न जिबनक चिन्ता, धनि भइलाहार इच्छा र अरु कुरासब्क लोभेइ कर्तेखना बचनके बढिके नादेओइ, हसे फोर फोराइके नासकइ। 20तर मलिल जिमिनयँ पोर्ल बियासब चाहिँ यस्न मानुससब हखत, उसबेइ परमेसोरक बचन सुनिकुन मनयँ लेताहात्, हसे तिस, साठि र सय गुना फोर फोराताहात्।”
ठडेउरोयँ बत्ति
(लुका ८:१६-१८)
21येसुइ उसब्के इसे काथा पुनु कहिकेभइल, “किति कोलोउयेइ बत्ति बारिकुन पाथिहेठ या खाटहेठ राख्ताहात् से, किति घर भितर अइलाहार सभइक लागि उजुङ भउस् कइकुन ठडेउरोयँ नाराखत् से? 22लोकाल सभइ कुरासब देखार पोरित, हसे गोप्पे राख्ल सभइ कुरा पुनु छर्लङ्गइ भइत। 23जोक्र सुन्लाहार कान बाटइ, उहाइ राम्रसे सुनुस्!”
24येसुइ उसब्के फेरि कहिकेभइल, “जिति सुन्ल बाटउ उसे कुरायँ तोहेसब धियान देओ, किकेकने जोनो पाथिइ भोरिकुन देताहाउ, उहइ पाथिइ भोरिकुन तोहेसब पाउताहाउ। ओत्काइ मत्रइ नइजे कि, तोहेसब उसे कते पुनु धेरइ पाउताहाउ। 25किकेकने जोख्रासे बाटइ, उहाइ अझइ पाइत, तर जोख्रासे नइजे, उक्र भइल चुत्कि पुनु आछ्राइत।”
उम्रलाहार बियाक काथा
26येसुइ फेरि कहिकेभइल, “परमेसोरक राज्जे यस्न हखइ कि, कोलोउ एक जेना मानुसेइ आफ्न बारियँ बिया छरित, 27हसे उसे मानुस रातदिन निन्दाउस् या झुननिन्दाउस्, तइपुनु बिया उम्रिकुन बाढिराख्ल भइत। तर उख्राके इसे कस्के भइत थाहाइ नाभओइ। 28किकेकने माटि आफ्नि नइ बिरुवासब उम्रालाहार काम करित्। पइला कलिल टुसा निस्कित, बिस्तारइ बढ्नेपार बाला लागिकुन पुरइ फोर फोरित। 29जब बालि, पाकित तब उहाइ अरिया लेइकुन जाइत् र काटिके थालित् किकेकने बालि थन्केलाहार बेला आइसक्ल भइत।”
सरसेउ तोरिक काथा
(मति १३:३१-३२,३४; लुका १३:१८-१९)
30येसुइ उसब्के फेरि कहिकेभइल, “परमेसोरक राज्जेके कितिसाङ दाजिके? मोइ इख्राके बुझाइके लागि कोनो काथा कहम्? 31इसे त सन्सारयँ भइल सभइसे नान्हि सरसेउ तोरिक बिया जस्नइ भइत, जोख्राके एक्टा मानुसेइ उसे बियाके बारियँ छरित, 32केहाउ दिन पाछु छर्ल बिया बढिके थालित र अरु सागपात कते बड्क भइत। हसे इहाइ बड्क-बड्क हाङ्गासब घाल्लपाछु आकासक चरइसब आइकुन उक्र छाउहारियँ गुड बानाइकुन बोसित।”
33इसे काथासब ओनेनेइ परमेसोरक बचन बुझिके सकुस् कइकुन मानुससब्के सुनाइकेभइल। 34ओनेनेइ मानुससब्के सिखातेखना काथाकमाटे सिखाते रहत कने आफ्नेन्क चेलासब्के चाहिँ काथाक अर्थ पुनु कइदेते रहत।
येसुइ धुधुहिँ बातासके सान्त पारिकेभइल
(मति ८:२३-२७; लुका ८:२२-२५)
35उहइ दिनक ब्यारपटि येसुइ आफ्नेन्क चेलासब्के कहिकेभइल, “हामे इसे तालक ओपारपटि जाहुँ।” 36उपाछु चेलासबेइ मानुसक भिडके छाडिकुन, जोनो डोङायँ येसु आघुहिँसे बोसिराख्ल रहत, उसब पुनु उछिन् चढिकुन ओनेन्के लेइकुन ओपार जाइके थाल्ल। उछिका अरु मानुससब पुनु अरु डोङायँ चढिकुन ओनेन्सबसाहिन जइल। 37उछिका अन्चक्लइ बड्क धुधुहिँ बातास चलिके थाल्ल, र पानिक छालसबेइ डोङा ठोक्किके थाल्लपाछु, पानि पसिकुन डोङा नइ भरिके लाग्ल। 38येसु चाहिँ डोङाक पाछुपटि मुडयँ सिह्रानि राखिकुन निन्दाल रहत। चेलासबेइ ओनेन्के उठातिन कहल, “गुरुजिउ, हामे त बुडिके लाग्ल, किति पाउके हाम्र चिन्ता नइजे से?”
39जब येसु उठिकुन धुधुहिँ बातास र तालक भेलसब्के कहिकेभइल, “रोकिकुन सान्त भउक्!” तब धुधुहिँ बातास थामिकुन सान्त भइहाल्ल।
40उपाछु येसुइ आफ्नेन्क चेलासब्के कहिकेभइल, “तोहेसब किके डाराताहाउ? अझइ पुनु तेउह्रासब्से बिस्वास नइजे?” 41हसे उसब डारातिन एक-अर्कसाङ कइकेथाल्ल, “इसे मानुस कोनो हबाहाइ? बातास र तालक भेलेइ पुनु इनेन्क आग्या मान्ते रलाहाइ।”
Valgt i Øjeblikket:
मर्कुस 4: DRY
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
© 2024 (Active), Mother Tongue Translators Society and Wycliffe Bible Translators, Inc. All rights reserved.