MRK - NUMANA 1
1
Yɔɔna ne su aneshir ne na ankɔŋ aŋyak
1Waŋa ayi lɛ didik netu ayi Yesɔ Kristi, Izu Arik.
2Icɛr yi Ishaya ne bla ne lɛ kɛ Arik tedi:
<<M tei shar ine shar amuŋ te abɛ lii zhin ti,
Iwaŋ ndi atei na ankɔŋ aŋyak zhin>>
3<<Ikɔr nuŋ izhɔ rɛ ahwaŋ,
<Na zhin ankɔŋ nyak zhin Ŋgɔŋ,
Nab zhin ankɔŋɔ nyak anenen.>>>
4Fena Yɔɔna ne nyɛ, te asu aneshir ne ŋa kɛ ahwaŋ te na du lɛ kɛ Arik netu ayi suu aner abɛ duŋ na kiki mimin tǝ ta zuk zhɔk ne lalɛ. 5Bɔbɔk ne ŋa kɛ Yahuda bǝn aneshir abǝ Urshelima bɔbɔk ne na gar bǝn abɔu. Abla ilalɛ men, te Yɔɔna ne su ba ne nek ine Urdu 6Yɔɔna ne su kluŋklu iyi na ne fumfuk kpa yi lakurmi, bǝn ririk kɛ na ne lɛda kɛ kpa ne tiŋ, tena ta Adamgbyaŋ ben ntun anisho. 7Fena waŋa ai nkanlɛ iyi du maa: <<Inuŋ atei nyɛ ne goŋ muŋ tena ayi ne mgbyamgbyaŋ anaŋ me, ndi Juda ayi akpaza amaa bam ne mla ne zuge yir ba. 8Mǝ suu zhin ne amashir, ama ine nyɛmɛ atei suu zhin ne Izhu Tsetser.>>
Isu ben iten yi Yesɔ
9Nǝ mkpaŋ yuŋɔ Yesɔ ne rɛ Nazara kɛ Galili te duŋ Yɔɔna asuu ne nek ne Urdu. 10Ndi Yesɔ anaga aru are miŋ amashire, akɔ yik gbarshu ku bu alɛla fena Izhu Arik kuzi nyɛ sɔŋu ne mpa ndi angu. 11Ankyak ikɔr ku rɛ shu te di: <<Iwa uyi Zumuŋ, iwaŋ ndi Mta nyɛmɛ; iwa susun muŋ inyɛru ngɔŋ.>>
12Ne amkpama, Izhu ayou Arik akɔ Gli Yesɔ kɔmɔ ne ahwaŋ, 13te baŋ mkpaŋ ne ahwaŋa iber sɔknas, shetan azǝn tenu. Neyi amɔ ne ahwaŋa abiŋ ben inarum abɛ ŋlɔk aner, ne yiŋɛ abɛ shar Arik ne zen ŋubu.
Yesɔ nɛ zhɔ abǝ zeu na ndum abǝ kuti
14Ndi neka zhɔk Yɔɔna ne jaru, Yesɔ alɔ gar Galili, te du lɛ didik kɛ Arik. 15<<Mkpaŋ neka nyɛ,>> Yesɔ adi ba. <<Nyɛ Arik ne te gbahir. Duŋ lalɛ min te ta nyɛmɛ ne lɛ didik!>> 16Ndi Yesɔ atsǝnetsǝn ne ŋa kɛ Inǝk ne Galili, ayik Siman ben izumen Andru azǝn tyak burgi ne inege, ayi aneshir abɛ vu ambɛ. 17Yesɔ adi ba, <<Nyɛ zhin, zǝme azhin,>> <<te M tei duŋ zhin yi abɛ gli aneshir nyɛ ben abɛm.>> 18Ne amkpama akɔ duŋ tyak burgime te zǝ Yesɔ.
19Ndi ne ayene kɔmɔ ne ti, ate yik Yakubu izu Zabǝdi ben izumen Yɔɔna ne miŋ gwu, azǝn ŋla burgi amen. 20Ne amkpama Yesɔ akɔ zhɔ ba, ankyak aduŋ tetɛɛ amen Zabǝdi ne gumɔ ben aneshir abaŋ ndi ne baŋ ba na ndum kɛ yaa te zi Yesɔ.
Yesɔ ayar anerim arumɔ
21Ane Yesɔ ben abɛ zeu tsin ne kɔmɔ ne Kafanahum, ndi bɛr sɔŋ sik ne nyɛ, Yesɔ ne yir miŋ akabaŋkɔŋ te zen tsar amɔ. 22Aneshire ne vuŋ anu ne tsar maa, te atsar ne mgbyamgbyaŋ, ba ndi abɛ bla tsar nkanlɛ iyi cɛr Musa ba. 23Ne yaŋa iner nuŋ ne akabaŋkɔŋ ŋɔ ne men yi ne izhu yi mimin yi shetan ne miŋ kpa maa azhɔk zhin, 24Yesɔ awɔnǝ Nazara! <<Uwɔb anii bene bɛtai, Une nyɛ te ubǝ nyɛ zhɔk ta dɔmɔi? M ne zhi ka uyi ŋɔwa, Uyi Tsetser ne shar ayou Arik!>>
25Yesɔ atsaŋ izhu mɔ ne amkpama te di,<<Kwɔnu!>> <<Ru ne kpa kɛ ner waŋa!>> 26Anerime alǝk ner ndi ayi ne kpa maa abaŋa ŋur ne mimi te ŋɔr aru ne kpa kɛ neshire.
27Fe aneshir bɔbɔk avuŋ anu tɛ bǝn arib akpa mɛn te di, <<Waŋa aye nii? Itsar yayas, ina yi ne mgbyamgbyaŋ! Ana lɛ ben anerime akɔ zǝ lɛ maa.>> 28Ilɛ kɛ bla ki na Yesɔ ne yir ntuntun iyi ŋa kɛ Galili ngɔŋ andanda.
Yesɔ nena aner tetɛk te ne rɛ
29Ndi anaga duŋ akabaŋkɔŋ ŋɔ, akɔ Gli Yakubu ben Yɔɔna te gar kɔb ane Siman ben Andru. 30Ne te yik acimen ayou Siman ikpa ne ŋuru zhɔk te akɔkur, ankyak akɔ bla Yesɔ ilɛ kǝ nǝ lɔmɔ. 31Fena Yesɔ akɔte yigu akɔkur, avuŋ ŋɔk maa te abɛ alu asɔŋ. Ankyak akɔ rɛ te naa ba kili.
32Ikab amgbalu ne bǝn aneshir ne vu abɛ lɔ bǝn abaŋ ndi anerim ne yir ba te nyɛ bǝn Yesɔ tǝ bɛ naa ba. 33Ankyak aner abɛ ntuno bɔbɔk atuŋ akpa abiŋ amkpa zhin ne ankɔŋ ane yir ntuno, 34fe Yesɔ nena aner abɛ lɔ kaŋkaŋ tetɛk te duŋ ba rɛ. Tena yar anerim aglɛ rumɔ; nena yar anerim bu anu te lɛ, tǝ nɛ zhiu.
Yesɔ ne ben Arik ne amkpa nuŋ kiki maa
35Ndi bɛr bane zen ŋan klɛ ba, Yesɔ atsɛru te duŋ kɔb kǝ sɔŋ maa te kɔmɔ ne goŋ ntun te gar ben Arik. 36Ankyak Siman ben nki abɛ zeu tsǝn alu zǝ goŋ maa, 37ndi ne te yigu, akɔ diu, aneshir tetɛk azǝne wɔb bu.
38Fe Yesɔ akɔ diba, <<tsara zhin kɔmɔ ne ntuntun yi ti, tem ite du lɛ kɛ Arik amɔ: te waŋa ayi ki ndi mne nyɛ naima.>> 39Neme Yesɔ ne du lɛ Arik ne akabaŋkɔŋ amene ne ntuntun iyi Galili, te yar anerim aglɛ rumɔ ne akpa aner abaŋ ndi ne yir ba.
Yesɔ ne na ner ne lɔ amkpuk
40Amɔ iner ne lɔ amkpuk nuŋ azǝ Yesɔ agar, te benu, tena tar agbarum, te di Yesɔ, <<utǝ ta Iben muŋ, ubɛ duŋ me rɛ.>>
41Fena Yesɔ akɔ wɔ lɔ susun maa, te sagu ŋɔk, te diu, <<Mne ta nyɛmɛ, ubǝ rɛ.>> 42Andanda ilɔ amkpuk go iduŋu, fe akɔ rɛ. 43Yesɔ akɔ gbaŋu atɔŋ tedi ne kɔr ŋgɔŋ te duŋu akɔmɔ; 44Adiu <<Duŋ bla ner nuŋ ikinuŋ ba. kɔmɔ kimi, kɔ te tsar tu mi ben ine na ndum kɛ Arik, tena nek ikinuŋ iyi tsar nyɛr mi ne akabaŋkɔŋ ndi icɛr yi Musa ne di duŋ bɛ yik uyi tsetser.>> 45Bane yi amɛ ba, ne ru te zen du ilɛ kɛ Arik ne zhɔk kpa. Iki ndi ne zi goŋɔ, Yesɔ bane yir miŋ ntuno ne zhɔk kpa ba te kǝr aneshir abɛ yigu ba ama ne sɔŋ ne mkpǝmkpa iyi goŋ ntun. Neme aneshir kɔte amɛ akyak te azǝn zeu gar.
Valgt i Øjeblikket:
MRK - NUMANA 1: NAA
Markering
Del
Kopiér
Vil du have dine markeringer gemt på tværs af alle dine enheder? Tilmeld dig eller log ind
The word for the World International and The word for the World Nigeria