Isip Kide Kodigwa 2
2
Gak kebra Moses goglkre, kor moglkwa
1Ana igne i Livai yagl ta ere mogl, Livai abu ta yugobuno swara i moglkwa ta yugwa. 2Yugo, ye gak kiuriko, abu i okuo aglke kor dane paugo, yagl gak ta kuglkwa. Ye kuglko, yagl gak i wakai moglko, mam kandre, ba suota mere teke paduglkwa. 3Teke paduglko, ba suota ede ogo, ye i teke padrabuka kuno erekrukwa. Kuno erekrukwa pre ye ere mogl, degigl gagl podo ta idre, nigl ede atne pi dinabedi kolta ya ede nuglo degigl gagl wagle egrukwa. Yegl ersre, ye gak i degigl gagl mina atne edidre, degigl gagl i pi nigl Nail umara, egre nigle suna bogl moglmara edugwa. 4Edugo, gak kebra abauglo komono eglke iro mogl, gak kebra pai moglmara siragl taragl plau dinabuka i kanagledi sugl moglkwa.
5 Gak kebra abauglo komono kan moglko, Isip king abuglo nigl panagledi, nigl kogonmo abai tau bogl akie ede u nigl Nail udre, nigle bina wan meglkwa. Wan meglko, king abuglo i degigl gagl egre nigl suna bogl moglmara yogwa ikra kandre, nigl kogonmo abai ta yunabedi dedugo, ye pi yu, king abuglo togwa. 6Ye king abuglo togo, king abuglo pre yaursre, kan atne ede, yagl gak kebra ikra kai ere, pai moglko, ye kanugwa. Ye kandre, mirie goglsre, yegl dugwa, Gak i, Hibru yoba gagro ta moglkwa pamiwe dugwa. 7Yegl dugo, gak kebra i abauglo komono ikra ede u king abuglo yegl di prukwa, Na ede pi Hibru abu ta gak kebra am tedre, ye ene ere kugl tenabuka pre yunaglo? dugwa.
8Gak kebra abauglo komono yegl dugo, king abuglo di ikne ede yegl dugwa, Ene ede pi abu gak ta ere kugl narabuka agre yuo! dugwa. Yegl dugwa pre abai kebra i ede pi gak kebra mam ikra agre yugwa. 9Ye agre yugo, king abuglo ere mogl, gak kebra mam yegl di togwa, Ene gak kebra i pi am tedre, ere kugl natn, na ene topo tenaluwe dugwa. Yegl dugo, gak kebra mam i gak kebra i pi, am tedre, ere kuglkwa. 10Ye ere kuglko, gak kebra yakidre, kade dagl moglkwa. Kade dagl moglko, ye mam ye i pi king abuglo togo, king abuglo yene wam morabedi yugwa. Idre, ye ere mogl, yegl dugwa, Gak kebra i nigle pai moglko, na i meda ediga. Yegl pre ye kagie Moses#2.10 Ka Hibru mina, kagie Moses mabuno paugwa, i meda ediga. we dinagle di, yegl dugwa.
Moses teke ede dumo Midian ogwa
11-12 Ana okuo Moses kade moglkwa igne, ye ede pi ye nem agiglema, Hibru yoba i, meglmara pidre, kanugwa i, Isip yoba kogon podo kaima teigo, ye nem agiglema ere meglko, kanugwa. Kan moglko, Isip yagl ta ere mogl, Hibru yagl ta ere sugwa. Ere sugo, Moses ere mogl, Ye na agra ta sumedi prisre, ye si teke edenagledi kan koglo koglo ede, yoba kan dinaiglmedi prukwa. Kan koglo koglo edugo, yoba ta kan moglkriko, ye Isip yagl i si goglsre, makan wesan mere yomara yagl i, i pi atne ede, si bi dugwa.
13Tagugo i, Moses aglke ede ikne yene nem agiglema, Hibru yoba meglmara ogwa. Ye ogo, Hibru yagl suo ye yene kuda biurko, kanugwa. Ye kandre, yagl ta aglau erukwa i di pre, Ene siragl pre agitn sine? dugwa. 14Yegl dugo, yagl i di ikne ede, yegl dugwa, Ene we, ira ene no bitno moglsre, jasno moratnedi dedume? dugwa. Ene eduedi Isip yagl ta si goglnere ikra mere, na ama si goragledi pitno? dugwa. Yegl dugo, Moses kudugl goglsre, Na Isip yagl si goglka i, yoba pre kan erikwa pamedi prukwa.
15Te, Isip king we, ye Moses Isip yagl si goglkwa i pre kan ersre, Moses si goragledi erukwa ba Moses king moglmara kide kodidre, teke ede pi dumo pere Midian we dimara moragledi ede ogwa. Ye dumo Midian pi plau didre, maugl nigl ta moglmara bina ame di moglkwa. 16Ye ame di moglko, abai 7-pela nigl kogl, ye neno sipsipmo ya mememo tenamnedi wigwa. Udre, ye nigl kogl, sipsip ya meme nenaiglmedi toide baglkugl mina edigwa. Abai 7-pela i neno, Midian nem ta moglsre, tawa togwa yagle moglkwa. 17Abai i nigl kogl sipsip ya meme i te meglko, yoba sipsip ya meme bage ta sugl meglkwa u, ye si pi eglke edinamnedi erikwa. Yegl erikwa ba Moses adigl ede u yagl wagle i abai wagle si pi eglke ede dinaiglmedi ye ake ple di tedre, nigl kogl, sipsipno ya memeno ikra togwa. 18Nigl kogl togo, sipsip ya meme ne kodigo, abai 7-pela i neno sipsipmo ya mememo idre, ede neno moglmara eigwa. Ye neno, kagie Reuel we digwa. Ye ede pi neno moglmara plau digo, ye ere mogl, yegl di prukwa, Siragl eruko, ene erme tabre ede ikne wime? dugwa.
19Abai i neno ka yegl di pruko, ye di ikne ede, yegl digwa, Isip yagl ta yoba sipsip ya meme bage ta sugl meglkwa no si pi eglke ede dinaiglmedi ye no ere yugwa. Te, ye ama nigl kogl, sipsipno ya memeno tomiwe di, yegl digwa. 20Yegl digo, ye abugloma aglke kor di pre, Yagl i aglo moglme? dugwa. Ene siragl pre ye kide kodidre, ene ede wime? Ene ede pi ye yegl di teo, Kaya mokna akie nenamniwa wo! dio! di, yegl dugwa. Yegl dugo, ye ede pi Moses agre yuigwa.
21Abai neno i, ye Moses di te, Ene no kipamnara kipai moratnedi priwe dugwa. Yegl dugo, Moses Na kipai moraluwe dugo, abai wagle neno i abuglo ta kagie Sipora we digwa i, Moses ebie morabedi togo, yugwa. 22Moses abu Sipora yugwa miurko, ye dane paugo, okuo yagl gak ta kuglkwa. Yagl gak ta kuglko, Moses ere mogl, yegl dugwa, Na dumo bage ta nem moglka ba ede u magigl i kipaie dugwa. Yegl didre, ye yagl gak i kagie Gersom#2.22 Ka Hibru mina, kagie Gersom mabuno paugwa, Na dumo magigl i nem ta moglkrika. we dugwa.
23Ana bugla yugu tau ede ogo, Isip king ikra goglkwa. Ye goglkwa ba Israel yoba kane pai mogl, gign akin didre, God no ake ple di norabedi agle digwa. Ye kane paigwa pre God no ake ple di norabedi agle digwa i, God prukwa. 24God prisre, ye okna Abraham ya Aisak ya Jekop ka kaima di te paduglkwa ikra pre moglkwa. 25Ye ka di paduglkwa i pre moglsre, Israel yoba kandre, ye mitno goglkwa.
Valgt i Øjeblikket:
Isip Kide Kodigwa 2: KB
Markering
Del
Sammenlign
Kopiér
Vil du have dine markeringer gemt på tværs af alle dine enheder? Tilmeld dig eller log ind
Copyright 2015 New Tribes Mission