Isip Kide Kodigwa 32
32
Israel yoba god kibi bekigwa
1 Ana Moses ede atne ukre, muglo ibo tau kanana moglko, Israel yoba ye Moses ukruko kandre, Aron moglmara pi makai sidre, ka yegl di teigwa, Moses, no dumo Isip kide kodinaiglmedi no agre i ede meda ugwa i, ye erme goglmo mo ede bage ta omo mo i ta kiurumga. Yegl pre ene god ta beke notn, nono enamnara ede okna enabiwe di, yegl digwa.
2Ana Israel yoba yegl digo, Aron di ikne ede, yegl dugwa, Ene ebinoma ya gagroma gol mina kinano ring bekigo, padiglkwa i, gugl makai sibi, ene yu naraiglmiwe dugwa. 3Yegl dugo, yoba mudu gol mina kinano ring bekigo, padiglkwa i gugl makai sidre, yu, Aron teigwa. 4Yu Aron teigo, ye doga mina gaglko, de kurdi ede u nigl mere yegl ogwa. De kurdi ede u nigl mere yegl ogo, Aron ye maugl ta kau kumugl kwiamo mere yegl persre, gol toide maugl i mina atne edugwa. Toide ede, kuri ta moglkwa bi yogo, ye naip idre, kau kumugl moglmere yenabedi guglo bagl ere wakai erukwa. Ye ere wakai ere kodugo, Israel yoba ere mogl, yegl digwa, Taragl i, nono godno moglmiwa. Ye no Isip kide kodinaiglmedi agre i ede meda umiwe di, yegl digwa.
5Ana Israel yoba ka yegl digo, Aron prisre, kau gumamugl kobuglo bogl ta kuglsre, Israel yoba ka podo di te, yegl dugwa, Tagna we, nono makai sidre, Yawe kamage ere tedre, kagie kade tenamniwe dugwa. 6Yegl dugo, yoba tagna kana adiglsre, tawa tau gagl tedre, tau deno muduno swara yenamnedi kei neigwa. Ye ame di mogl, mie ne, wain ne, ersre, ye ere mogl, adigl, mabuno gua gua erikwa.
7Ana Israel yoba yegl eriko, Yawe ere mogl, Moses yegl di togwa, Ene oglade ede atne po! Ene yobanma Isip kide kodinaiglmedi agre i ede meda unga i, ye ede u kide pi kodigwa. 8Na kana duglo boraiglmedi di teiga i ye tabre kide kodidre, kau ta gol wagle bekigwa. Bekidre, ye kau i kagie kade tedre, tawa te, yegl digwa, Nono Israel yoba munga i we, taragl i nono godno moglmiwa. Ye nono dumo Isip kide kodinaiglmedi agre i ede umiwe di, yegl digwa. 9Israel yoba i, ye na kana prikramnedi nomaneno kobuglo mere gigle dugo, na pre kan ere kodiga. 10Ana erme we, ene na kanige ero! Na dena podo kubrika pre na ye mudu si goraluwa. Ye mudu si goglbo, enene gawanma keme mudu mere kide moglsre, yugobuno ta moraiglmedi ere edinaluwe di, Yawe yegl dugwa.
11Ana Yawe ka yegl di kodugo, Moses Yawe dumere yegl ere dinabedi kamage yei, yegl dugwa, Yawe yo, ene taragl podo ersre, enene yobugln mina Israel yoba dumo Isip kide kodinaiglmedi agre i ede meda unga. Ene erme den kubrisre, ye mudu si gogln, kuno erabo? 12Ene yegl ta etn, Isip yoba yegl dinaiglkwa, Israel yoba Godno we, ye agre i ede ogwa i, ye mabuno kide ere tedre, i ede pi dumo muglo paimara pidre, Israel yoba tau okuo moglkraiglmedi ye mudu si goragledi agre i ede omiwe di, yegl dinaiglmiwa. Yegl pre ene den podo kubutnga i kide kodidre, ye mudu si goragle dinga i, si goglkro! 13Ene okna Abraham ya Aisak ya Israel enene kagn mina ka giglede di te padiglnga i pre moglo! Ene ye yegl di tenga, Na we, na ene gawanoma mere kide moraiglmedi ere edibo, kugl kuri mere kide keglmere mere yegl moraiglmiwa. Te, na dumo makan magigl i pre diga i, ene gawanoma makano aimadi yenabedi mudu tenaluwe di, yegl dingra we di, Moses yegl dugwa. 14Moses yegl dugo, Yawe ye yobama mudu si goragle dugwa i kide kodidre, ta si goglkrukwa.
15Ana Moses muglo ibo kide kodidre, kobuglo suo ikra akidre, ede atne ogwa. Kobuglo suo i mina God lomo aket aket akie boglkwa. 16God yene kobuglo suo ere wakai ersre, lomo kobuglo wagle boglkwa. 17Ana Moses ede atne ogo, Josua ye Moses bogl ebriko, yoba ka podo digo, Josua prukwa. Josua prisre, ye Moses di te, yegl dugwa, Yoba kipaimara ime kuda ikne bogl kuda beglko, priwe dugwa. 18Yegl dugo, Moses ere mogl, I ta manumiwe dugwa. Ye kuda boglsre, yobuglo erikwa pre ya te, kuda ikne yobuglo erikwa i pre dikrikwa. Ye giglage digo, prie di, Moses yegl dugwa.
19Ana Moses ka yegl didre, ye ede pi Israel yoba meglmara magigl ogo, kau gol mina bekigwa ikra pai moglko, kandre, yoba ama ekin kaglno eriko, kanugwa. Kandre, ye dem podo kubrsre, muglo mabunomugl i, ye kobuglo paglkane suo ikra si suko dugwa. 20Si suko didre, ye kau i gagl tege ersre, gol i si deduagle ere, ere i kugane mere yegl edugwa. Yegl edidre, ye kugane i, i pi toide nigle edidre, ye Israel yoba nigl i Kogl neo! dugo, kogl neigwa.
21Ana Moses ere mogl, Aron di pre, Yoba siragl eriko, ene ede okna pidre, ye tadaglme podo yegl eraiglmedi etne? dugwa. 22Yegl dugo, Aron di ikne ede, yegl dugwa, Yagl kade yo, ene kubrokro. Yoba ege ege mabuno kide eramnedi prikwa i, enene pre kan ere kodinga. 23Ye na di nare, yegl digwa, Moses, no Isip kide kodinaiglmedi agre i ede meda ugwa yagle i, ye erme goglmo mo ede bage ta omo mo i ta kiurumga. Yegl pre ene god ta beke notn, ye no enamnara ede okna enabe digwa. 24Yegl digo, na di ikne ede, yegl diga, Yoba gol mina taragl bekigwa, ene ogono nagino mina padiglkwa i, gugl edio diga. Yegl digo, ye yu nariko, na pia si doga wagle ediga. Edigo, kau nagigle ikra yene plau di ede meda umiwe di, Aron yegl dugwa.
25Ana Moses kanugwa i, Aron ye yoba kanige eruko, ye mabuno gua gua nogugl ere wan meglkwa. Kuda ikne ye kandre, kenaglno sidre, gauglno eraiglkwa mere eriko, Moses kanugwa. 26Yegl kandre, ye yoba sel yuguno kipaimara konbauna ta ede suna omara i mina adigl moglsre, yegl dugwa, Ene yoba ta Yawe duglo boragledi pratnga i, na moglmara wo! dugwa. Yegl dugo, Livai yagl mudu ye moglmara eigwa. 27Eigo, Moses ye yegl di togwa, Yawe, nono Israel yoba Godno moglkwa i, ene yegl di togwa, Ene mudu bainetno idre, Israel yoba sel yugu kipaimara suna koglo koglo winabo di, yoba si golo! Ene agroma ya kabegleno ya yoba magigl akie kipaigwa i ama si goraiglkwa pre Yawe yegl dume dugwa. 28Yegl dugo, Livai yagl ye dumere ere, yoba 3,000 mere yegl si geglkwa. 29Yegl eriko, Moses ye di te, yegl dugwa, Ene erme God kamo duglo boramnedi wanoma ya agroma pra si geglkwa. Yegl pre Yawe ene ere wakai ere tedre, ene ye kogonmo eraiglmedi i pere edumiwe di, yegl dugwa.
30Ana tagugo we, Moses ye yoba mudu yegl di togwa, Ene tadaglme podo kide erikwa. Na erme ede ikne Yawe muglo ibo moglmara enaglka. Na pi, ye ene tadaglmeno si bi dinabedi eribo, kuno erabo mo pi kanaluwe dugwa. 31Yegl didre, ye ede ikne Yawe moglmara pi, ye yegl di togwa, Aya, yoba ikra tadaglme podo kide erikwa. Ye gol idre, god kibi ta kamage ere tenamnedi bekigwa. 32Yegl erikwa ba na ene di prika i, ene ye tadaglmeno gugl edinatnedi prika. Ene ta gugl edekitn, yoba kagno buk wagle boglnga i, na kagna ere edo! di, yegl dugwa. 33Yegl dugo, Yawe ye Moses di te, Yoba ta na mane dimara tadaglme erabuka i, ye kagie buk wagle boglka i, ere edenaglka. 34Yegl eraglka ba ene we, ene ede ikne pi Israel yoba dumo ta agre i ede enatne dimara i, agre i ede po. En, na angelona ene enatnara ede okna enabuka. Enabuka ba na Israel yoba tadaglmeno kumap tenaglka egemo unan, tadaglmeno kumap tenaluwe di, yegl dugwa. 35Yawe yegl didre, ye Aron kau nagigle ta bekugo, kamage ere teigwa ikra pre kide ta Israel yoba sinabedi dedugo, u, Israel yoba sugwa.
Valgt i Øjeblikket:
Isip Kide Kodigwa 32: KB
Markering
Del
Sammenlign
Kopiér
Vil du have dine markeringer gemt på tværs af alle dine enheder? Tilmeld dig eller log ind
Copyright 2015 New Tribes Mission