Isip Kide Kodigwa 4
4
God ye Moses kimagl erabedi yobuglo togwa
1Ana God ka yegl di kodugo, Moses aglke kor dugwa, Israel yoba ta ere mogl, na kana prikre, di ikne ede, Ene ka kibi dinga. Yawe ene motnara ta plau dikrume di, yegl ta dibi, siragl eragle? dugwa. 2Yegl dugo, Yawe ye di pre, Ene siragl ake motne? dugwa. Yawe yegl di pruko, Moses di ikne ede, Na muglbonana ake moliwe dugwa.
3Moses yegl dugo, Yawe ere mogl, Muglbonen pia si makan mina edo! dugwa. Yegl dugo, Moses pia si makan mina edugo, muglbo i u toki koglo ogwa. U toki koglo ogo, Moses teke ogwa. 4Moses teke ogwa ba Yawe aglke kor Moses di te, Ene toki dem yagle ako! dugwa. Yegl dugo, Moses dem yagle akugo, aglke kor u muglbo koglo ogwa. 5U muglbo koglo ogo, Yawe ye yegl di togwa, Ene yegl etn, Israel yoba ene kaima dinedi prisre, Yawe, no kowano awano Abraham ya Aisak ya Jekop Godno moglkwa i, ka kaima Moses moglmara plau dumedi praiglmiwe di, Yawe yegl dugwa.
6Ana Yawe ere mogl, ka ta ama Moses di te, yegl dugwa, Ene ogon i pi gagl suna ake ada bogl, pitn wagle atne padiglo! dugwa. Yegl dugo, Moses ye dumere ersre, ogo i meda edugo, ye ogo mudu kruo eruko, kede kaglade sugwa.#4.6 Kede kaglade sugwa i, ka English mina, leprousy we digo, Tok Pisin mina sik lepra we digwa. Kide i yoba sugwa igne, ye ogno nagno u kruo pidre, num podo dogwa. 7Kede kaglade sugo, Yawe ye di togwa, Ene aglke kor ogon i pi gagl suna ake ada bogl, pitn wagle atne padiglo! dugwa. Yegl dugo, Moses aglke kor ye dumere ersre, i meda edugo, ye ogo aglke kor ogo gagie yoko yomere yegl yogwa. 8Yegl yogo, Yawe ye yegl di togwa, Israel yoba ene kanen prikribi, ene muglbonen wagle kimagl etnga ikra eratnga. Te, ene yegl etn, ye ene kibi dinedi pre pai meglbi, ye ene kanen praiglmedi, ene ogon wagle kimagl erme etnga i eratniwa. 9Te, ene yegl etn, ye ama ene kibi dinedi pre pai meglbi, ene ede nigl Nail pidre, nigl tau kogl yu, makan kugla dumara toide edinatnga. Toide edin, nigl i u bormai koglo enabiwe di, yegl dugwa.
10Ana Yawe ka yegl di kodugo, Moses aglke kor dugwa, Yagl Kade yo, na ene nigl kogonen yoba moliba na ka kaugo siga yagle moglkrika. Na okna ya erme i pra, ka kaugo siga yagle moglkrika. Ene erme na ka di natnga ba na drana yubun de pai moglmiwe dugwa. 11Moses yegl dugo, Yawe yegl dugwa, Ira yoba drano beke yome? dugwa. Ira yoba tau kinano gi dinaiglmedi ersre, yoba tau kinano gi dikraiglmedi erume? Te, ira yoba tau gumuglno kin yenaiglmedi ersre, yoba tau gumuglno kin yekraiglmedi erume? Nana yegl erika. Na Yawe moglka. 12Ana erme we, ene ede po! Ene en, nana ene ka siragl mere dinatnga i ene beke tedre, dinatnga igne ene ake ple di tenaluwe dugwa.
13Yawe ka yegl dugwa ba Moses ere mogl, yegl dugwa, Aya, Yagl Kade yo, ene yoba ta kanen i pi di tenabuka pre dedenatnedi priwe dugwa. 14Moses yegl dugo, Yawe dem kubro Moses tedre, yegl dugwa, Ana ene agitn komono Aron, ye ama yugobuno Livai mina moglkwa i, we? Na prika, ye dra yubun dekrukwa. Te, ene pro! Ye erme ene kanagledi bage u moglkwa. Ye u ene kanan, gun yenabuka. 15Ene ere mogl, Aron ka dinabere mere beke ten, ye yoba di tenabuka. Te, na ene suo akie ka dinabrika i ake ple di tedre, ene siragl taragl erabrika i ene beke tenaluwa. 16Te, Aron we, ye ene kanen idre, yoba di tenabuka. Na ene ka di teimere ene ama ye ka di tenatnga. Ene ye di ten, ye ene dran mere yegl moglsre, yoba di tenabuka. 17Te, ene muglbo wagle kimagl eratnga pre muglbonen akidre, ede enatniwe di, Yawe yegl dugwa.
Moses aglke ede ikne dumo Isip ogwa
18Ana Yawe ya Moses ka di kodibriko, Moses aglke ede ikne pi ye imakie Jetro moglmara pidre, yegl dugwa, Na agrama Isip meglkwa i, geglmo mo yoko meglmo mo pi kanagledi prika. Ene pra we din, na ede enaluwe dugwa. Yegl dugo, Jetro di ikne ede, Ene wakai wan pi kanatna po! dugwa.
19Ana Moses dumo Midian mogl pai moglkwa igne, Yawe ye ka ta ama di te, yegl dugwa, Ene ede ikne dumo Isip po! Dumo Isip yoba tau ene si goramnedi prikwa i, mudu geglmiwe dugwa. 20Yawe yegl dugwa pre Moses ebie ya wam suo i pi donki moko bolamugl edidre, God muglbomo ikra idre, ede ikne dumo Isip ogwa.
*************************
27Ana Yawe ere mogl, Moses agigle Aron di te, Ene ede dumo wau yomara en, ene ya Moses tegigl yenabriwe dugwa. Yegl dugo, Aron ede pi God muglomo ikra yomara ogo, Moses ugo, tegigl yebrika. Tegigl yebriko, Aron Moses pauna si nogwa. 28Yegl eruko, Moses ere mogl, Yawe ye ka siragl mere dinatne dugwa i ya kimagl siragl mere eratne dugwa i, mudu Aron di togwa. 29Ye ka i Aron di togo, ye akie ede dumo Isip pidre, Israel yoba yagl kade di makai sibrika. 30Di makai sibriko, Aron ere mogl, Yawe ka di Moses togwa i mudu Israel yagl kade i di togwa. Di tedre, ye ama kimagl tau ikra ye gumuglno wagle erukwa. 31Yegl eruko, yagl kade ye ka dugwa i pre mediglkwa. Te, Yawe Isip yoba ye ere kide ere teigwa i kandre, Israel yoba mitno goglkwa i, yagl kade ka i prisre, goglkono bodugl, bitno magididre, Yawe kagie kade teigwa.
Valgt i Øjeblikket:
Isip Kide Kodigwa 4: KB
Markering
Del
Sammenlign
Kopiér
Vil du have dine markeringer gemt på tværs af alle dine enheder? Tilmeld dig eller log ind
Copyright 2015 New Tribes Mission