Isip Kide Kodigwa 9
9
Isip yoba aglno buglano geglkwa
1Ana Yawe ere mogl, Moses yegl di togwa, Ene king moglmara pidre, ye yegl di tenatniwa, King yo, Yawe, no Hibru yoba Godno moglkwa i, ene yegl di togwa, Na yobanama ede pi na kagna kade naraiglmedi pra we do! 2Ene mane ta didre, ye dumo Isip yoko moraiglmedi ake gi din, 3Na yobuglo ersre, kide podo kaima ta ene aglno buglano sinabedi dedenaglka. Kide i, ene hos ya donki ya kamel ya kau ya sipsip ya meme kiglko, meda wan meglkwa i, mudu sinabuka. 4Na yegl eraglka ba na Israel yoba aglno buglano ene aglno buglano bogl i swara edidre, kide ye sinabedi dedekraglka. Ene Isip yoba aglno buglano keme kide si, goraiglkwa. Israel yoba taragl ere kiglkwa i, mudu yoko moraiglmiwe di, Yawe yegl dume dinatniwa. 5Yawe ka yegl di kodidre, ye ege ta padiglsre, Na dumo Isip eragle dimere i, tagna eraluwe dugwa.
6Ana kamun tagugo, Yawe ye dumere eruko, Isip yoba aglno buglano mudu geglkwa. Ye mudu geglkwa ba Israel yoba taragl ere kiglkwa i, swara ta goglkrikwa. 7Te, Isip king we, ye yoba ta pi doko kanabedi dedugo, ye ede pi Israel yoba aglno buglano swara ta goglkre, mudu yoko meglko, kanugwa. Kandre, ye ede ikne pi king di togwa ba king nomanemo gigle dugo, ye Israel yoba ede pikraiglmedi mane di pai moglkwa.
Isip yoba ogno gagno wagle umun ugwa
8Ana okuo Yawe ere mogl, Moses ya Aron yegl di togwa, Ene ede pi makan koglwa brik gaiglmara pidre, yugum tau pere i ede pi king moglmara ede enabriwa. Ene king moglmara ebr, Moses ene yugum i, pia si mitna edinatniwa. 9Pia si mitna edin, yugum i, u kugane kebra kide koglo pidre, dumo Isip suna mudu wai di yage atne yoba ya agl bugla ogono gagno wagle sinabuka. Yage atne yoba ya agl bugla ogono gagno wagle sinabara i, umun u, bla dinan, num denaiglmiwe di, yegl dugwa. 10Yegl dugo, ye ede pi makan koglwa brik gaiglmara pidre, yugum tau pere i pi king moglmara ebriko, Moses pia si mitna edugwa. Moses pia si mitna edugo, yoba ya agl bugla ogono gagno mina umun u bla dugo, num podo deigwa.
***********************
Aragl mogo yage sugwa
22 Ana okuo Yawe ere mogl, Moses yegl di togwa, Ene ogon buglo si mitna edin, aragl mogo yage atne si, dumo Isip mudu sinabiwa. Aragl mogo i yage atne si yoba ya agl bugla ya yoba taragl kane kane ere yaiglkwa i sinabiwe di, yegl dugwa. 23Yegl dugo, Moses ye muglbomo ake buglo si mitna edugo, Yawe ere edugo, kamun tai sugo, guru gagla dugo, aragl mogo yage atne dumo Isip sugwa. 24Aragl mogo yage sugwa i ya kamun tai podo kide si, si erukwa i, dumo Isip taragl yegl okna ta plau dikrukwa. 25Aragl mogo yage sidre, yoba ya agl bugla dumo Isip koglo koglo yugugl ta moglkrikwa i, mudu sugwa. Yoba ya agl bugla si goglsre, yoba taragl kane kane ere yaiglkwa i ere kide ersre, ede mudu si buko didre, erukwa. 26Yegl erukwa ba dumo Gosen, Israel yoba kipai meglmara i we, dumo i swara aragl mogo sikrukwa.
Valgt i Øjeblikket:
Isip Kide Kodigwa 9: KB
Markering
Del
Sammenlign
Kopiér
Vil du have dine markeringer gemt på tværs af alle dine enheder? Tilmeld dig eller log ind
Copyright 2015 New Tribes Mission