Oknayene Ibo 31
31
Jekop Laban moglmara kide kodidre, teke ede ogwa
1Ana okuo Laban wama ere mogl, yegl digwa, Jekop we, ye neno taraglmo mudu yugwa. No neno taraglmo idre, erme ye taragl mere kan yomiwe di, yegl digwa. Yegl digo, yoba tau prisre, Jekop di teigwa. 2Te, Jekop kanugwa, Laban okna ka wakai dumere erme dikre, yakebude Jekop togwa. 3Ye yegl eruko, Jekop kanugo, Yawe ere mogl, Jekop yegl di togwa, Ene ede ikne nen agiglnma dumono kamino po! Ene en, na ene enatnara akie pidre, ene sugl moraluwe di, yegl dugwa.
4Yawe yegl dugwa pre Jekop ere mogl, Resel ya Lea agle dugo, ye ede u Jekop sipsip ya meme kuglmara ubrika. 5Ye ubriko, Jekop ye yegl di togwa, Na kaniga, ene neno okna ka wakai dumere dikre, yakebude narukwa. Yegl erukwa ba na nina Godmo na moglmara mogl narsre, na ake ple di narukwa. 6Na yobuglo ere, ene neno kogon wakai ere teiga i, enene pre kan eribrika. 7Yegl erika ba ye ege 10-pela taim topo naragle dumere narekre, na bakagl mere nare, topo kuri keme narukwa. Ene neno Laban yegl erukwa ba Laban na ere kide ere naragledi erukwa i, God kanige erekre, ake ple di narukwa. 8Laban ege tau dugwa, Meme kruo kama suna suna paigwa i, ene mudu ikre, kruo kebra kebra suna paigwa i keme inatniwe dugwa. Yegl dugo, meme gagro kruo kebra kebra suna paigwa i keme kiglkwa. Te, ye ege tau dugwa, Meme kruo kama suna suna paigwa i, ene mudu ikre, kruo olto suna paigwa i keme inatniwe dugwa. Yegl dugo, meme gagro kruo olto suna paigwa i keme kiglkwa. 9God yegl ere, ene neno kidagl aglmo buglamo idre, na narukwa.
10Ana na we, aglke ta sipsip ya meme du akigwa igne, na ugl pai, kubu ta kaniga, meme kumugl kruo kama suna suna paigwa i keme du akigwa. 11Na yegl kanigo, kubu kanimara i God angelomo ye Jekop yo dugo, na Mogliwe diga. 12Na yegl digo, ye yegl di narukwa, Meme kumugl kruo kama suna suna paigwa i keme du akigwa i kano! I siragl pre na Laban mabuno kide ene ere tenagledi erukwa i kandre, ene ake ple di teiga. 13Na God moglka. Na okna dumo Betel we dinara i, ene motnara wigo, ene kobuglo bodugl padiglsre, kugo nuglo toide bolamugl edidre, ka kaima di nare padiglnga. Na God i moglka. Ana erme we, ene dumo magigl i kide kodidre, ede pi enene dumon kaminen po! God angelomo yegl dumiwe di, Jekop yegl dugwa.
14Jekop ka yegl dugo, Resel ya Lea di ikne ede, Pra we dibrika. Neno goran, no taragl swara ta ikrabuglka. 15Ye no dumo pere mam miuredi kanugwa. Kandre, no di yu boglnga i, ye mudu ne kodugwa. 16God ere mogl, neno aglmo buglamo idre, ene togwa i, no suo gagroma bogl taraglno mere yegl meglkwa. Yegl pre God siragl mere ene di togwa i, ero! di, abu suo yegl dibrika.
17Jekop ebie suo yegl dibrika pre ye ere mogl, ebie suo ya gagiglma i kamel mokono bolamugl edidre, 18ye aglmo buglamo ya bonaganamo mudu idre, aglmo buglamo si okna ede, ye moknomugl mage okna okna ede, ede pi dumo Kenan, ye nem Aisak dumo kaminmo ikra enagledi ede ogwa. Ye aglmo buglamo i ya bonaganamo i, mudu dumo Mesopotemia moglkwa igne, kan nogwa. 19Ana Jekop ebiema gagiglma bogl ede enamnedi erikwa igne, Laban moglkrukwa. Ye sipsipmo yugono baragledi ede bage ta ogwa. Ye ede ogo, Resel ere mogl, nem god kibi tau bekugwa i kunogl yugwa. 20Te, Jekop ye, Na ede ikne yugunamugl eiwe di, Aram yagl Laban i di tekre, teke ede pi yegl mere ere, bakagl togwa. 21Ana Jekop aglmo buglamo ya bonaganamo mudu idre, yobama bogl teke ede pi Nigl Yufretis bai ede koglo eigwa. Nigl bai ede koglo pidre, ye dumo muglo mere paigo, Gileat we dimara ede enamnedi eigwa.
Laban Jekop sika si ede ogwa
22Ana Jekop ebiema gagiglma ya nigl kogonmo yoba bogl ege suota bage pai, pi meglko, yoba tau Laban di teigo, prukwa. 23Ye prisre, nem agiglema di makai sugo, ye Jekop sika si eigwa. Ege 7-pela de mere sika si pidre, ye dumo muglo mere paigo, Gileat we dimara ikra Jekop omara magigl eigwa. 24-25Magigl eigo, Jekop yobama bogl muglo ibo ta panamnedi sel yuguno keigwa. Laban ama dumo muglo paimara Gileat suna i nem agiglema bogl paigo, magigl magigl paigwa. Magigl magigl paigo, Laban ugl kubu ta kanugwa. Ye ugl kubu kanumara God ye moglmara udre, ka yegl di togwa, Ene kan kun ero! Jekop ka kide ta di tekro! di, yegl dugwa.
26Ana tagna kana we, Laban ye Jekop moglmara udre, ka yegl dugwa, Ene siragl pre bakagl natne? Ene siragl pre yoba kuda yobuglo erikwa igne ye yoba si kane si i ede wimere mere yegl ere, na abra suo i ede une? 27Siragl eruko, ene na di narekre, teke ede une? Siragl pre ene bakagl natne? Ene na di natna, no ene gun yenaiglmedi na yobanama agle dia, ye giglage didre, tamborin ya gita ki sigo. Te, na wakai wan pio! mere yegl ta dia, ene ede wima, i wakai paugo. 28Ba ene na di narekitnga pre na abra ya gawanama paunano si nekre, ede pio! dikre, erika. Ene mabuno kide etnga. 29Na ene sinaglka kuno erukwa ba eduer ene nen Godmo na moglmara udre, Ene kan kuno ero! Jekop ka kide ta di tekro! dugwa. 30Ene nen dumo kaminmo enagledi prisre, nomanen singa i prika ba ene siragl pre na godnana kunogl ine? di, yegl dugwa.
31Laban yegl dugo, Jekop di ikne ede, yegl dugwa, Ene yobuglo ere, abutn suo ikne edinatnedi pre kudugl gogl, teke ede wiga. 32Ba ene godnen we, enene dokidre, yoba ta gagl gre yunan kan, nono yoba i si goramga. Ene taraglnen doko kan, ta yenan, nono neno agroma kan meglbi, i nogugl edo! Taraglnen ta yenan, ikne edinatniwe di, yegl dugwa. Resel ye nem godmo kunogl yugwa i Jekop prikrukwa pre ka yegl dugwa.
33Ana Jekop yegl dugo, Laban ede pi Jekop sel yugumo yugugl pi, godmo kibi i dokugwa, yekrikwa. Yekriko, ye ede pi Lea sel yugumo yugugl pi dokidre, nigl kogon abu suo ikra sel yuguno yugugl pidre, ama dokugwa. Sel yugu i mudu dokugwa, yekriko, ye ede pi Resel sel yugumo yugugl ogwa. 34Ana Resel sel yugu mina yugugl mogl, ye kamel moko mina yei ame digwa taragl i, makandigle yugugl yedre, god kibi i, taragl i mina atne yedre, bolamugl ame di moglkwa. Laban ede yugugl pidre, ye godmo kibi i dokugwa, kankrukwa. 35Kankruko, Resel ere mogl, nem yegl di togwa, Nina yo, na adiglkrika i, kide prikro. Adraglba na ba kaniga pre ame di moluwe dugwa. Yegl pre Laban godmo kibi i doko wan moglkwa, kankrukwa.
36Laban ye godmo kibi i dokugwa, kankruko, Jekop dem boglko, ye ka kodo di, yegl dugwa, Na aglau siragl mere erie? Na tadaglme siragl eriko, ene nigade na sika si une? 37Ene na bonaganana mina taraglnen dokinga i, ene taraglnen ta yogo, kano? Ta yenan, ene i nogugl edin, na yobanama ya ene nen agitnma kanaiglmiwa! Ye kandre, nono kotno pre yubu sinaiglmiwa. 38Ana na we, na bugla yugu 20-pela ene motnara mogl, ene kogon ere teiga. Na aglnen buglanen wakai sugl moglka pre sipsip abai ya meme abai gagro kor meglkwa keme kiglkwa. Te, na sipsip kumugl mo meme kumugl ta si nekrika. 39Ene sipsipnen ya memenen tau taragl are si geglkwa i, na ene kanatnedi i pi obuno dikre, na aglau ta erekrie di, yegl ta dikre, na sipsipnana mo memenana i pi suglo siga. Te, yoba ere mogl, ermine mo eduer sipsipnen mo memenen ta kunogl neigwa i, Ene taraglnen i pi suglo si naro! keme dinga. 40Ermine na niga podo dugo, eduer ir podo goglsre, ugl wakai paikrika. 41Na bugla yugu 20 ene kogonen ere teiga. Bugla yugu 14-pela, ene abutn suo topo tenagledi kogon erika. Te, bugla yugu 6-pela na sipsipnen ya memenen tau inagledi kogonen erika. Na bugla yugu 20 kogonen ere teimara suna i we, ene ege 10-pela taim topo naragle dinere i narekre, topo kebra keme natnga. 42Te, God na suglna ta moglkruma, ene taraglnen swara ta narekre, Yoko ede po! dina, ede wigo ba God ye na ake ple di naruko, na taraglnen tau mere idre, ede wiga. God ta na nina kuduglmo gogl togwa God i, ya na yagl awana Abraham Godmo i pre diga. Na kogon podo ere tedre, yubun podo iga i, God kandre, kotnana pre yubu sidre, eduedi eduer ene motnara pi ene ka tomiwe di, yegl dugwa.
Jekop ya Laban ka di padiurka
43Ana Jekop ka yegl di kodugo, Laban ere mogl, di ikne ede, yegl dugwa, Ebn suo i, na abra miurka. Te, gagiglnma i, na gawanama keme meglkwa. Te, sipsipnen ya memenen ya taragl mudu magigl kanga i we, na taraglna mudu meglkwa. Ba na siragl mere abra ya gawanama ake gi dinagle? 44Pra, nono suo ka ta di padrabuglka. Di padugl, nono ka i pre moglsre, dinabuglere keme aimadi erabugle di, yegl dugwa.
45Laban ka yegl dugo, Jekop ere mogl, kobuglo olto ta yu, yoba okuo kanaiglmedi bodugl paduglkwa. 46Te, ye ama yobama di te, Kobuglo yuwio! dugwa. Dugo, ye kobuglo yu, br beglkwa. Br beglko, ye mudu kobuglo br beglmara magigl i kaya mokna akie neigwa. 47Neigo, Laban ere mogl, kobuglo br i yene kamo wagle kagie Jegar Sahaduta we dugwa. Te, Jekop kobuglo br i yene kamo wagle Galet#31.47 Kagie suo Jegar Sahaduta ya Galet mabuno kuno keme paugwa. Suo akie torua si dinabedi kobuglo br beglkwa mere yegl paugwa. Jegar Sahaduta i, Laban kamo, ka Aram wagle paugo, Galet i, Jekop kamo, ka Hibru wagle paugwa. we dugwa.
48Ana Laban ka ta ama yegl dugwa, Kobuglo br bunga i, nono ka ta di padrabuglka i kinano torua si dinabedi buniwe dugwa. Yegl pre kobuglo br i kagie Galet we digwa. 49Te, Laban ka ta ama dugwa pre kobuglo br i, yoba ama kagie Mispa#31.49 Kagie Mispa i, mabuno paugwa, yoba mitna ibo mogl, kan moraiglmedi yugu kei ede mitna eigwa paugwa. we digwa. Ye ka yegl dugwa, Nono ede pere pere pi morabuglka igne Yawe nono kan morabuka. 50Ene na abra suo mabuno kide ere tenatno mo ene abu pere tau yun, yoba ta kan, na ta di narekraiglkwa paugwa ba God nono kan morabuka pre moglo! 51Nono muglara kobuglo br suna beglkwa i ya kobuglo ta suna bodugl padiglka i kano! 52Kobuglo br i ya kobuglo bodugl padiglka i, nono okuo ta kanubugl, ka di padrabuglka i pre morabuglka. Kobuglo br yomara i, na ede koglo ibo pi, ene ere kide ere tenagledi pikraglka. Te, ene ede koglo ya u na ere kide ere naragledi ukratnga. 53Abraham ya Nahor ya ye neno Godno i, nono kan morabuka. Ene na ka diga i duglo boglkitn, God ene yubun tenabuka. Te, na ka diga i duglo boglkribo, God na yubun narabiwe di, yegl dugwa. Laban yegl dugo, Jekop ye God kagie mina ye nem Aisak kuduglmo goglkwa God i kagie mina ka kaima di te paduglkwa. 54Ka kaima di te padiglsre, ye ere mogl, muglo i mina God tawa togwa. Tawa tedre, ye nem agiglema kaya mokna akie nenamnedi agle dugo, ye u akie neigwa. Ne kodidre, ye eduer muglo i paigwa. 55Paigo, Laban tagna kana adiglsre, abuglo ya gawama paunano si nedre, di wakai yei togwa. Di wakai yei tedre, ye nem agiglema bogl ede ikne yugunomugl eigwa.
Jekop ere mogl, Iso na wakai kanabedi taragl tau togwa
Valgt i Øjeblikket:
Oknayene Ibo 31: KB
Markering
Del
Sammenlign
Kopiér
Vil du have dine markeringer gemt på tværs af alle dine enheder? Tilmeld dig eller log ind
Copyright 2015 New Tribes Mission
Oknayene Ibo 31
31
Jekop Laban moglmara kide kodidre, teke ede ogwa
1Ana okuo Laban wama ere mogl, yegl digwa, Jekop we, ye neno taraglmo mudu yugwa. No neno taraglmo idre, erme ye taragl mere kan yomiwe di, yegl digwa. Yegl digo, yoba tau prisre, Jekop di teigwa. 2Te, Jekop kanugwa, Laban okna ka wakai dumere erme dikre, yakebude Jekop togwa. 3Ye yegl eruko, Jekop kanugo, Yawe ere mogl, Jekop yegl di togwa, Ene ede ikne nen agiglnma dumono kamino po! Ene en, na ene enatnara akie pidre, ene sugl moraluwe di, yegl dugwa.
4Yawe yegl dugwa pre Jekop ere mogl, Resel ya Lea agle dugo, ye ede u Jekop sipsip ya meme kuglmara ubrika. 5Ye ubriko, Jekop ye yegl di togwa, Na kaniga, ene neno okna ka wakai dumere dikre, yakebude narukwa. Yegl erukwa ba na nina Godmo na moglmara mogl narsre, na ake ple di narukwa. 6Na yobuglo ere, ene neno kogon wakai ere teiga i, enene pre kan eribrika. 7Yegl erika ba ye ege 10-pela taim topo naragle dumere narekre, na bakagl mere nare, topo kuri keme narukwa. Ene neno Laban yegl erukwa ba Laban na ere kide ere naragledi erukwa i, God kanige erekre, ake ple di narukwa. 8Laban ege tau dugwa, Meme kruo kama suna suna paigwa i, ene mudu ikre, kruo kebra kebra suna paigwa i keme inatniwe dugwa. Yegl dugo, meme gagro kruo kebra kebra suna paigwa i keme kiglkwa. Te, ye ege tau dugwa, Meme kruo kama suna suna paigwa i, ene mudu ikre, kruo olto suna paigwa i keme inatniwe dugwa. Yegl dugo, meme gagro kruo olto suna paigwa i keme kiglkwa. 9God yegl ere, ene neno kidagl aglmo buglamo idre, na narukwa.
10Ana na we, aglke ta sipsip ya meme du akigwa igne, na ugl pai, kubu ta kaniga, meme kumugl kruo kama suna suna paigwa i keme du akigwa. 11Na yegl kanigo, kubu kanimara i God angelomo ye Jekop yo dugo, na Mogliwe diga. 12Na yegl digo, ye yegl di narukwa, Meme kumugl kruo kama suna suna paigwa i keme du akigwa i kano! I siragl pre na Laban mabuno kide ene ere tenagledi erukwa i kandre, ene ake ple di teiga. 13Na God moglka. Na okna dumo Betel we dinara i, ene motnara wigo, ene kobuglo bodugl padiglsre, kugo nuglo toide bolamugl edidre, ka kaima di nare padiglnga. Na God i moglka. Ana erme we, ene dumo magigl i kide kodidre, ede pi enene dumon kaminen po! God angelomo yegl dumiwe di, Jekop yegl dugwa.
14Jekop ka yegl dugo, Resel ya Lea di ikne ede, Pra we dibrika. Neno goran, no taragl swara ta ikrabuglka. 15Ye no dumo pere mam miuredi kanugwa. Kandre, no di yu boglnga i, ye mudu ne kodugwa. 16God ere mogl, neno aglmo buglamo idre, ene togwa i, no suo gagroma bogl taraglno mere yegl meglkwa. Yegl pre God siragl mere ene di togwa i, ero! di, abu suo yegl dibrika.
17Jekop ebie suo yegl dibrika pre ye ere mogl, ebie suo ya gagiglma i kamel mokono bolamugl edidre, 18ye aglmo buglamo ya bonaganamo mudu idre, aglmo buglamo si okna ede, ye moknomugl mage okna okna ede, ede pi dumo Kenan, ye nem Aisak dumo kaminmo ikra enagledi ede ogwa. Ye aglmo buglamo i ya bonaganamo i, mudu dumo Mesopotemia moglkwa igne, kan nogwa. 19Ana Jekop ebiema gagiglma bogl ede enamnedi erikwa igne, Laban moglkrukwa. Ye sipsipmo yugono baragledi ede bage ta ogwa. Ye ede ogo, Resel ere mogl, nem god kibi tau bekugwa i kunogl yugwa. 20Te, Jekop ye, Na ede ikne yugunamugl eiwe di, Aram yagl Laban i di tekre, teke ede pi yegl mere ere, bakagl togwa. 21Ana Jekop aglmo buglamo ya bonaganamo mudu idre, yobama bogl teke ede pi Nigl Yufretis bai ede koglo eigwa. Nigl bai ede koglo pidre, ye dumo muglo mere paigo, Gileat we dimara ede enamnedi eigwa.
Laban Jekop sika si ede ogwa
22Ana Jekop ebiema gagiglma ya nigl kogonmo yoba bogl ege suota bage pai, pi meglko, yoba tau Laban di teigo, prukwa. 23Ye prisre, nem agiglema di makai sugo, ye Jekop sika si eigwa. Ege 7-pela de mere sika si pidre, ye dumo muglo mere paigo, Gileat we dimara ikra Jekop omara magigl eigwa. 24-25Magigl eigo, Jekop yobama bogl muglo ibo ta panamnedi sel yuguno keigwa. Laban ama dumo muglo paimara Gileat suna i nem agiglema bogl paigo, magigl magigl paigwa. Magigl magigl paigo, Laban ugl kubu ta kanugwa. Ye ugl kubu kanumara God ye moglmara udre, ka yegl di togwa, Ene kan kun ero! Jekop ka kide ta di tekro! di, yegl dugwa.
26Ana tagna kana we, Laban ye Jekop moglmara udre, ka yegl dugwa, Ene siragl pre bakagl natne? Ene siragl pre yoba kuda yobuglo erikwa igne ye yoba si kane si i ede wimere mere yegl ere, na abra suo i ede une? 27Siragl eruko, ene na di narekre, teke ede une? Siragl pre ene bakagl natne? Ene na di natna, no ene gun yenaiglmedi na yobanama agle dia, ye giglage didre, tamborin ya gita ki sigo. Te, na wakai wan pio! mere yegl ta dia, ene ede wima, i wakai paugo. 28Ba ene na di narekitnga pre na abra ya gawanama paunano si nekre, ede pio! dikre, erika. Ene mabuno kide etnga. 29Na ene sinaglka kuno erukwa ba eduer ene nen Godmo na moglmara udre, Ene kan kuno ero! Jekop ka kide ta di tekro! dugwa. 30Ene nen dumo kaminmo enagledi prisre, nomanen singa i prika ba ene siragl pre na godnana kunogl ine? di, yegl dugwa.
31Laban yegl dugo, Jekop di ikne ede, yegl dugwa, Ene yobuglo ere, abutn suo ikne edinatnedi pre kudugl gogl, teke ede wiga. 32Ba ene godnen we, enene dokidre, yoba ta gagl gre yunan kan, nono yoba i si goramga. Ene taraglnen doko kan, ta yenan, nono neno agroma kan meglbi, i nogugl edo! Taraglnen ta yenan, ikne edinatniwe di, yegl dugwa. Resel ye nem godmo kunogl yugwa i Jekop prikrukwa pre ka yegl dugwa.
33Ana Jekop yegl dugo, Laban ede pi Jekop sel yugumo yugugl pi, godmo kibi i dokugwa, yekrikwa. Yekriko, ye ede pi Lea sel yugumo yugugl pi dokidre, nigl kogon abu suo ikra sel yuguno yugugl pidre, ama dokugwa. Sel yugu i mudu dokugwa, yekriko, ye ede pi Resel sel yugumo yugugl ogwa. 34Ana Resel sel yugu mina yugugl mogl, ye kamel moko mina yei ame digwa taragl i, makandigle yugugl yedre, god kibi i, taragl i mina atne yedre, bolamugl ame di moglkwa. Laban ede yugugl pidre, ye godmo kibi i dokugwa, kankrukwa. 35Kankruko, Resel ere mogl, nem yegl di togwa, Nina yo, na adiglkrika i, kide prikro. Adraglba na ba kaniga pre ame di moluwe dugwa. Yegl pre Laban godmo kibi i doko wan moglkwa, kankrukwa.
36Laban ye godmo kibi i dokugwa, kankruko, Jekop dem boglko, ye ka kodo di, yegl dugwa, Na aglau siragl mere erie? Na tadaglme siragl eriko, ene nigade na sika si une? 37Ene na bonaganana mina taraglnen dokinga i, ene taraglnen ta yogo, kano? Ta yenan, ene i nogugl edin, na yobanama ya ene nen agitnma kanaiglmiwa! Ye kandre, nono kotno pre yubu sinaiglmiwa. 38Ana na we, na bugla yugu 20-pela ene motnara mogl, ene kogon ere teiga. Na aglnen buglanen wakai sugl moglka pre sipsip abai ya meme abai gagro kor meglkwa keme kiglkwa. Te, na sipsip kumugl mo meme kumugl ta si nekrika. 39Ene sipsipnen ya memenen tau taragl are si geglkwa i, na ene kanatnedi i pi obuno dikre, na aglau ta erekrie di, yegl ta dikre, na sipsipnana mo memenana i pi suglo siga. Te, yoba ere mogl, ermine mo eduer sipsipnen mo memenen ta kunogl neigwa i, Ene taraglnen i pi suglo si naro! keme dinga. 40Ermine na niga podo dugo, eduer ir podo goglsre, ugl wakai paikrika. 41Na bugla yugu 20 ene kogonen ere teiga. Bugla yugu 14-pela, ene abutn suo topo tenagledi kogon erika. Te, bugla yugu 6-pela na sipsipnen ya memenen tau inagledi kogonen erika. Na bugla yugu 20 kogonen ere teimara suna i we, ene ege 10-pela taim topo naragle dinere i narekre, topo kebra keme natnga. 42Te, God na suglna ta moglkruma, ene taraglnen swara ta narekre, Yoko ede po! dina, ede wigo ba God ye na ake ple di naruko, na taraglnen tau mere idre, ede wiga. God ta na nina kuduglmo gogl togwa God i, ya na yagl awana Abraham Godmo i pre diga. Na kogon podo ere tedre, yubun podo iga i, God kandre, kotnana pre yubu sidre, eduedi eduer ene motnara pi ene ka tomiwe di, yegl dugwa.
Jekop ya Laban ka di padiurka
43Ana Jekop ka yegl di kodugo, Laban ere mogl, di ikne ede, yegl dugwa, Ebn suo i, na abra miurka. Te, gagiglnma i, na gawanama keme meglkwa. Te, sipsipnen ya memenen ya taragl mudu magigl kanga i we, na taraglna mudu meglkwa. Ba na siragl mere abra ya gawanama ake gi dinagle? 44Pra, nono suo ka ta di padrabuglka. Di padugl, nono ka i pre moglsre, dinabuglere keme aimadi erabugle di, yegl dugwa.
45Laban ka yegl dugo, Jekop ere mogl, kobuglo olto ta yu, yoba okuo kanaiglmedi bodugl paduglkwa. 46Te, ye ama yobama di te, Kobuglo yuwio! dugwa. Dugo, ye kobuglo yu, br beglkwa. Br beglko, ye mudu kobuglo br beglmara magigl i kaya mokna akie neigwa. 47Neigo, Laban ere mogl, kobuglo br i yene kamo wagle kagie Jegar Sahaduta we dugwa. Te, Jekop kobuglo br i yene kamo wagle Galet#31.47 Kagie suo Jegar Sahaduta ya Galet mabuno kuno keme paugwa. Suo akie torua si dinabedi kobuglo br beglkwa mere yegl paugwa. Jegar Sahaduta i, Laban kamo, ka Aram wagle paugo, Galet i, Jekop kamo, ka Hibru wagle paugwa. we dugwa.
48Ana Laban ka ta ama yegl dugwa, Kobuglo br bunga i, nono ka ta di padrabuglka i kinano torua si dinabedi buniwe dugwa. Yegl pre kobuglo br i kagie Galet we digwa. 49Te, Laban ka ta ama dugwa pre kobuglo br i, yoba ama kagie Mispa#31.49 Kagie Mispa i, mabuno paugwa, yoba mitna ibo mogl, kan moraiglmedi yugu kei ede mitna eigwa paugwa. we digwa. Ye ka yegl dugwa, Nono ede pere pere pi morabuglka igne Yawe nono kan morabuka. 50Ene na abra suo mabuno kide ere tenatno mo ene abu pere tau yun, yoba ta kan, na ta di narekraiglkwa paugwa ba God nono kan morabuka pre moglo! 51Nono muglara kobuglo br suna beglkwa i ya kobuglo ta suna bodugl padiglka i kano! 52Kobuglo br i ya kobuglo bodugl padiglka i, nono okuo ta kanubugl, ka di padrabuglka i pre morabuglka. Kobuglo br yomara i, na ede koglo ibo pi, ene ere kide ere tenagledi pikraglka. Te, ene ede koglo ya u na ere kide ere naragledi ukratnga. 53Abraham ya Nahor ya ye neno Godno i, nono kan morabuka. Ene na ka diga i duglo boglkitn, God ene yubun tenabuka. Te, na ka diga i duglo boglkribo, God na yubun narabiwe di, yegl dugwa. Laban yegl dugo, Jekop ye God kagie mina ye nem Aisak kuduglmo goglkwa God i kagie mina ka kaima di te paduglkwa. 54Ka kaima di te padiglsre, ye ere mogl, muglo i mina God tawa togwa. Tawa tedre, ye nem agiglema kaya mokna akie nenamnedi agle dugo, ye u akie neigwa. Ne kodidre, ye eduer muglo i paigwa. 55Paigo, Laban tagna kana adiglsre, abuglo ya gawama paunano si nedre, di wakai yei togwa. Di wakai yei tedre, ye nem agiglema bogl ede ikne yugunomugl eigwa.
Jekop ere mogl, Iso na wakai kanabedi taragl tau togwa
Valgt i Øjeblikket:
:
Markering
Del
Sammenlign
Kopiér
Vil du have dine markeringer gemt på tværs af alle dine enheder? Tilmeld dig eller log ind
Copyright 2015 New Tribes Mission